1
Mauri be mai Anina, Eiava?
Taunimanima momo ese mauri ena anina idia henanadailaia. Anina be mauri namona do ita tahua, iseda famili do ita naridia, bena lagani 70 o 80 murinai do ita mase, bena do ita ore ela bona hanaihanai, a? Tauhau ta be unai bamona ia laloa, ia gwau mauri ena anina tamona be “do ita mauri, eda natudia do ita havaradia, do ita moale bena do ita mase.” To unai be momokani a? Bona mase ese momokani unai ibounai ia haorea, a?
2 Tanobada ena kahana momo ai taunimanima momo idia laloa mauri ena anina badana be moni bona kohu do idia gogoa bona unai amo moale do idia davaria. To moni bona kohu idia abia vadaeni taudia be edena bamona? Canada ena toretore tauna Harry Bruce ia gwau: “Taga taudia momo idia gwau idia moale lasi.” Ma ia gwau: “Idia davaria vadaeni North America taudia momo idia moale lasi . . . Tanobada ai ta ia moale a? Moale davaria dalana be dahaka?”
3 U.S. presiden gunana Jimmy Carter ia gwau: “Ita davaria vadaeni, ena be gau idauidau ita abidia siboda eda bona ita iusilaidia, to mamina ita abia eda mauri be anina lasi.” Bona politik gunalaia tauna ma ta ia gwau: “Lagani haida lalodiai lau ese egu mauri ena anina lau tahua goadagoada vadaeni. Lau diba taudia momo danu be unai bamona idia karaia. Idia momo idia henanadai, idia gwau, ‘Dahaka totona ita mauri noho?’ ”
Hekwarahi Momo Negana
4 Momo idia laloa mauri be anina lasi, badina be idia itaia hekwarahi idia momo daekau. Tanobada lalonai taunimanima bilion ta mai kahana idia gorere bada o edia aniani be hegeregere lasi; unai dainai memero kekeni momo idia mase; Africa ai ten milion idia mase. Tanobada noholaia taudia iboudiai be kahirakahira 6 bilion; lagani ta ta ai 90 milion amo idia momo daekau, bona ogogami tanodia ai unai kara be bada. Idia momo daekau hanaihanai dainai, aniani, ruma, bona moni gaukara idia tahudia; unai dainai tano, ranu, bona hodahoda be idia hamirodia bona idia hadikadia.
5 Buka ta ladana World Military and Social Expenditures 1991 ia gwau: “Lagani ta ta ai uda edia kahadia idia hadikadia ore, edia bada be [Great Britain] ena bada hegeregerena. Bema unai bamona do idia hadikadia ore noho, lagani 2000 be do lasi neganai siahu tanodia edia uda edia 65 pesen do idia kokidia.” UN oreana ta ia gwau, unai gabu ai au 10 10 idia utudia murinai au tamona tamona idia hadodia. Unai dainai tano gagaedia idia bada idia lao, bona lagani ta ta ai tano ena kahana badana idia hadikaia dainai idia birulaia lou diba lasi.
6 Inai danu, hanaia laganidia 90 bamona lalodiai taunimanima momo herea be tuari dainai idia mase. Gabu iboudiai, raskol karadia bona ala-ala karadia idia bada idia lao. Famili momo idia dika, taunimanima ese drag idia ania kava, AIDS bona pokese goreredia idia vara; unai ibounai ese hekwarahi momo ia havaradia. Bona tanobada gunalaia taudia ese taunimanima edia hekwakwanai haoredia dalana idia davaria diba lasi. Unai dainai taunimanima idia henanadai, idia gwau, Mauri ena anina be dahaka?
7 Aonega taudia bona tomadiho gunalaia taudia be edena bamona idia haere? Nega daudau herea ia ore murinai, haere maorona idia gwauraia a?
Edia Hereva
8 China ena aonega tauna Tu Wei-Ming ia gwau: “Mauri ena anina korikorina be taunimanima be vaia idia karaia karadia lalodiai ita davaria.” Anina be, taunimanima do idia vara, mauri do idia hekwarahilaia, bona do idia mase, ela bona hanaihanai. Unai lalohadai lalonai helaro be lasi. Bona ia be momokani eiava?
9 Elie Wiesel, guna Nazi dibura rumadia ai ia noho tauna, be ia gwau: “Henanadai mai anina bada be, ‘Eda mauri ena anina be dahaka?’ . . . Ena be taunimanima idia hamasedia kava be lau itaia, to lau laloa mauri be mai anina.” To ena anina ia gwauraia diba lasi.
10 Niuspepa tauna Vermont Royster ia gwau: “Ita do diba lasi taunimanima be tanobada ai idia noho ena anina be dahaka. Ita do diba lasi edia mauri ena anina be dahaka bona dahaka be nega vairai do ia vara.”
11 Saiens tauna Stephen Jay Gould ia gwau: “ ‘Atai’ amo ia mai haerena ita tahua—to ta be lasi.” Evolusen herevana idia abia dae taudia ia bamona be idia laloa mauri be hekwarahi helulu mo bona mase ese ia haorea. Unai lalohadai lalonai helaro be lasi. Ia be momokani eiava?
12 Tomadiho gunalaia taudia momo idia gwau mauri ena anina be inai: Kara maoromaoro taudia do idia mase neganai edia lauma be do idia lao guba bena unuseniai do idia noho ela bona hanaihanai, to kara dika taudia be hel ena lahi lalonai hisihisi do idia ania ela bona hanaihanai. To, unai ena anina be, tanobada ai taunimanima edia noho do ia namo lasi, ela bona hanaihanai. To bema Dirava ena palani be taunimanima be aneru hegeregeredia guba ai do idia noho, dahaka dainai nega matamanai unai bamona ia karadia lasi?
13 Haroro taudia haida danu ese unai lalohadai idia abia dae be auka. Dr. W. R. Inge, Anglikan haroro tauna badana ta, ia gwau: “Egu mauri negana ibounai lalonai mauri ena anina lau tahua. Lau henanadailaidia gaudia toiosi be inai: nega asi dokona; taunimanima edia lalodia; bona kara dika. Haere maorona ta lau davaria lasi.”
Ena Anina
14 Unai aonega taudia bona tomadiho gunalaia taudia edia lalohadai idauidau mauri ena anina enai be momo herea, unai dainai taunimanima momo idia hereva, tau burukana ta ia hereva bamona; ia gwau: “Nega daudau lau be mauri ena anina lau tahua. Bema mauri be mai anina, hari lau laloa lasi.”
15 Tanobada ena tomadiho oreadia edia lalohadai idauidau momo idia tahudia taudia haida idia gwau, ta be edena hereva ia abia dae be herevana. Idia laloa tomadiho be taunimanima edia lalo-hekwarahi hamaragia gauna mo. Ma haida idia laloa tomadiho be lalohadai kavakavadia mo. Idia laloa ena be tomadiho taudia be nega daudau lalonai mauri ena anina idia tahua, to idia davaria lasi bona edia orea taudia edia mauri idia hanamoa lasi. Momokani, tanobada sivaraidia ese idia hahedinaraia tomadiho momo ese taunimanima idia koudia dainai edia mauri idia hanamoa lasi, bona tomadiho dainai badu bona tuari idia vara.
16 To, mauri ena anina do ita davaria be gau badana eiava? Lalo-hekwarahi haorea daladia sisibalaidia tauna Viktor Frankl ena haere be inai: “Taunimanima ena ura badana be sibona ena mauri ena anina do ia davaria. . . . Bema ta ia diba ena mauri be mai anina, unai ese do ia durua, hisihisi dika hereadia do ia haheaukalaidia totona.”
17 Taunimanima ese edia aonega herevadia bona edia tomadiho herevadia amo mauri ena anina idia gwauraia hedinarai goevagoeva lasi. Vadaeni, aonega herea tauna, inai ita ia hadibalaia maoromaoro diba tauna, be ia noho, eiava?
[Study Questions]
1. Momo ese mauri ena anina edena bamona idia henanadailaia, bona ta ese edena bamona ia gwauraia?
2, 3. Dahaka dainai moni bona kohu gogodia karana ena anina be hegeregere lasi?
4. Dahaka dainai haida idia laloa mauri be anina lasi?
5. Uda be edena bamona idia kara henidia?
6, 7. Tanobada gunalaia taudia ese dahaka hekwakwanai idia haoredia diba lasi, unai dainai dahaka henanadai idia do noho?
8, 9. (a) China tauna ta ese mauri ena anina edena bamona ia gwauraia? (b) Guna Nazi dibura rumadia ai ia noho tauna be dahaka ia gwau?
10, 11. (a) Niuspepa tauna ta be edena bamona ia hahedinaraia taunimanima edia diba be hegeregere lasi? (b) Dahaka dainai saiens tauna ta ena lalohadai be hegeregere lasi?
12, 13. Tomadiho gunalaia taudia edia lalohadai be dahaka, bona unai lalohadai dainai iseda lalona be idia hegeregere a?
14, 15. Lalohadai be idauidau dainai, taunimanima momo be edena bamona idia laloa?
16. Mauri ena anina davaria be mai anina bada a?
17. Edena bamona do ita henanadai be namo?
[Picture on page 4]
“Lagani ta ta ai uda edia kahadia idia hadikadia ore, edia bada be [Great Britain] ena bada hegeregerena”
[Picture on page 5]
“Nega daudau lau be mauri ena anina lau tahua”