Karoa 14
Daika Ena Siahu Do Oi Matauraia be Namo?
1, 2. Biagua ena siahu iboudiai be dika, a? Gwauraia.
INAI hereva “siahu” be taunimanima momo ese idia badulaia. Badina be siahu taudia momo ese edia siahu idia gaukaralaia kerere—gaukara gabuna dekenai, famili lalonai, bona gavamani lalonai danu. Baibel ena hereva be momokani; ia gwau: “Haida ese ma haida idia biagua noho, bona idia hisihisi henidia noho.” (Hadibaia Tauna 8:9) Oibe, momo ese sibodia edia namo idia tahua dainai, ma haida idia biagudia mai edia dagedage ida.
2 To biagua ena siahu haida ese ita idia hadikaia lasi. Hegeregere, iseda tauanina ese ita idia biagua bamona. Ita idia “oda henia” do ita hahodi, do ita aniani, do ita inuinu, bona do ita mahuta. Unai ese ita ia hahisia, a? Lasi. Unai oda ita badinaia dainai, namo ita davaria. To siahu idaudia haida be mai eda ura ida do ita kamonai henidia be namo. Haheitalai haida mani oi laloa.
ATAI HEREA SIAHU TAUNA
3. Dahaka dainai Iehova be “Siahu Ibounai Lohiabadana” idia gwauraia be maoro?
3 Nega momo Baibel lalonai Iehova idia gwauraia “Siahu Ibounai Lohiabadana,” badina be iena siahu be herea. Dahaka dainai Iehova be unai siahu ia abia be maoro? Apokalupo 4:11 ena haere be inai: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.”
4. Iehova ese ena siahu be edena bamona ia gaukaralaia?
4 Iehova ese ita ia karaia, unai dainai iena siahu be sibona ena ura hegeregerena ia gaukaralaia be maoro. Reana ita laloa unai be mai garina, badina be Dirava ena “siahu be bada herea.” Ia idia gwauraia “Siahu Ibounai Dirava”—Heberu gado dekenai anina be ena goada be herea. (Isaia 40:26; Genese 17:1) To Iehova ese ena goada be dala namona amo ia gaukaralaia, badina be ena kara badana be lalokau.—1 Ioane 4:16.
5. Dahaka dainai Iehova ita kamonai henia be auka lasi?
5 Iehova ia gwau kara dika taudia bema idia helalo-kerehai lasi do ia panisidia, to Mose ia diba ia be “Dirava korikori, ia be abidadama kara Diravana. Ia ese iena gwauhamata do ia hamomokania, bona iena noho hanaihanai lalokauna do ia henia noho, . . . ia dekenai idia lalokau henia, bona iena Taravatu idia badinaia taudia dekenai.” (Deuteronomi 7:9) Mani oi laloa! Atai Herea Siahu Tauna ese ita ia doria lasi ena hesiai do ita lao henia totona. Lasi, to ena lalokau amo ita ia veria ia dekenai. (Roma 2:4; 5:8) Iehova ita kamonai henia be mai moalena, badina be nega ibounai ena taravatu ese iseda namo idia havaraia.—Salamo 19:7, 8.
6. Eden umana lalonai lohia siahuna be edena bamona idia dadaraia, bona unai dainai dahaka ia vara?
6 Iseda tubuna roboadia ese Dirava ena lohia siahuna idia dadaraia. Idia ura sibodia edia lalona do idia hadaia dahaka be namo bona dahaka be dika. (Genese 3:4-6) Unai dainai Paradaiso amo ia luludia. Unai murinai taunimanima ia kahua nege, sibodia edia siahu oreadia do idia haginidia diba, edia goevadae lasi besedia lalodiai do idia noho hebou namonamo diba totona. Unai orea haida be dahaka, bona Dirava ia ura edena bamona do ita kamonai henidia?
“GAVAMANI”
7. Gavamani be daidia edia, bona Dirava ena siahu ese edia siahu ia hereaia eiava?
7 Aposetolo Paulo ia gwau: “Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai.” Unai gavamani be daidia edia? Paulo ena hereva siri gabedia dekenai ese idia hahedinaraia idia be taunimanima edia gavamani. (Roma 13:1-7; Tito 3:1) Iehova ese taunimanima edia gavamani ia haginidia lasi, to ia koudia lasi dainai idia noho. Unai dainai Paulo ia gwau: “Gavamani ena siahu be Dirava ese ia henia.” Unai ese dahaka ia hahedinaraia? Ia hahedinaraia Dirava ena siahu ese unai gavamani edia siahu ia hereaia. (Ioane 19:10, 11) Unai dainai, taunimanima ena taravatu be idau bona Dirava ena taravatu be ma idau neganai, Keristani taudia edia lalona, Baibel amo idia hadibaia vadaeni gaudia, ese idia hakaudia be namo. ‘Dirava idia kamonai henia be namo, taunimanima idia kamonai henia be dika.’—Kara 5:29.
8. Gavamani ese oi edena bamona ia durua, bona edena bamona oi hahedinaraia diba oi kamonai henia?
8 To, nega momo gavamani be ‘Dirava ena hesiai gaukara ia karaia, ita ia hanamoa bona ia durua.’ (Roma 13:4) Edena dala amo? Gavamani ena heduru momo mani oi laloa; haida be inai: pos opesi, pulisi, hospital, bona sikuli. Paulo ia gwau: “Takisi moni danu umui henia ena badina be unai. Badina be gavamani taudia ese gaukara davana idia abia be namo, Dirava ena gaukara do idia karaia diba totona.” (Roma 13:6) Takisi henia karana lalonai bona gavamani ena hahegani idaudia badinaia karadia lalodiai, namona be ‘kara maoromaoro do ita karaia.’—Heberu 13:18.
9, 10. (a) Dirava ese taunimanima edia gavamani be edena bamona ia lalodia? (b) Badina be dahaka gavamani ita gwau-edeede henia be kerere?
9 To, nega haida gavamani taudia ese edia siahu idia gaukaralaia kerere. Unai neganai edia siahu ita dadaraia be kerere lasi, a? Lasi. Iehova ese edia kerere ia itaia. (Aonega Herevadia 15:3) Ena be taunimanima edia gavamani ia haheauka henidia, to edia kerere ia laloa, bona ia ura lasi unai do ita laloa nege. Momokani, nega daudau lasi Dirava ese unai “basileia ibounai do ia hamakohia, bona haorea momokani,” bena sibona ena kara maoromaoro gavamanina be edia gabunai do ia haginia. (Daniela 2:44) To ela bona unai do ia karaia, gavamani ese taunimanima idia durua.
10 Paulo ia gwau: “Gavamani ena hereva idia kamonai henia lasi taudia be Dirava danu idia kamonai henia lasi.” (Roma 13:2) Unai bamona ia hereva, badina be gavamani ese heiriheiri bona kara kava idia koua. Gavamani gwau-edeede henia karana be Baibel ena hereva hegeregerena lasi bona kavakava. Haheitalai ta be inai: Doketa taudia ese emu tauanina idia ivaia murinai, emu bero idia turia hebou. Ena be unai varo be emu tauanina ena gau korikorina lasi, to nega sisina lalonai ia durua. Bema oi kokia haraga, reana dika do oi davaria. Unai hegeregerena, taunimanima edia gavamani be Dirava ena palani ginigunana ena kahana ta lasi. To, ela bona iena Basileia ese tanobada do ia lohiaia guguru, taunimanima edia gavamani ese edia bese taudia idia hakapudia hebou, bona unai be Dirava ena ura hegeregerena, hari inai nega lalonai. Unai dainai, namona be gavamani do ita kamonai henia noho, bona Dirava ena taravatu bona ena lohia siahuna do ita laloa bada be namo.
SIAHU, FAMILI LALONAI
11. Kwara dagina ena taravatu anina be dahaka?
11 Bese iboudiai lalodiai, famili ta ta lalodiai tau be ena adavana ida idia hebamo heheni diba mai edia moale ida, bona edia natudia idia naria bona hadibaia diba, do idia bada neganai do idia noho namonamo totona. (Aonega Herevadia 5:15-21; Efeso 6:1-4) Namona be dala namona amo edia ruma bese taudia idia naridia, maino bona lalo-tamona dekenai do idia noho totona. Iehova ese kwara dagina ena taravatu amo unai dala ia karaia; Korinto Ginigunana 11:3 ese inai bamona ia gwauraia: “Tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.”
12, 13. Daika be famili ena kwarana, bona Iesu ese ena kwara dagina ia gaukaralaia dalana ese ita be dahaka ia hadibaia?
12 Tau be ena ruma bese ena kwarana. To, iena kwarana—Iesu Keriso—be ia ena atai ai. Paulo ia gwau: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:25) Bema tau ta ese ena adavana ia kara henia, Keriso ese nega ibounai ekalesia ia kara henia hegeregerena, unai amo ia hahedinaraia Keriso ia kamonai henia. (1 Ioane 2:6) Dirava ese Iesu be siahu bada ia henia, to unai siahu ia gaukaralaia mai ena hebogahisi, mai ena lalokau, bona mai ena lalo-manau bada ida. (Mataio 20:25-28) Tanobada dekenai ia noho neganai, Iesu ese ena dagi siahuna ia gaukaralaia kerere lasi. Ia be “dagedage lasi bona manau tauna,” bona ena orea taudia be ena “turana” ia gwauraidia, “hesiai taudia” ia gwauraidia lasi. Ia gwauhamata “laga-ani do ia henia” idia dekenai, bena unai bamona ia karaia.—Mataio 11:28, 29; Ioane 15:15.
13 Iesu ena haheitalai ese Keristani tataudia ia hadibaia, edia kwara dagina dekenai edia adavadia do idia biagua auka lasi, to do idia matauraidia bona do idia lalokau henidia dainai, sibodia edia namo do idia tahua lasi. Anina be, ta ese ena adavana do ia botaia lasi bona do ia gwau dika henia lasi. (Efeso 4:29, 31, 32; 5:28, 29; Kolose 3:19) Bema Keristani tauna ta ese ena adavana unai bamona ia hadikaia, ena kara namodia be anina lasi, bona unai ese ena guriguri dalana ia koua.—1 Korinto 13:1-3; 1 Petero 3:7.
14, 15. Hahine ese Dirava ia diba neganai, unai ese edena bamona ia durua, ena adavana do ia kamonai henia totona?
14 Tau ta ese Keriso ia tohotohoa neganai, ena adavana ese Efeso 5:22, 23 ena hereva ia badinaia be haraga: “Hahine e, emui adavana do umui kamonai henia, Lohiabada umui kamonai henia hegeregerena. Badina tau be iena adavana ena kwarana, Keriso be ekalesia ena kwarana bamona.” Tau ese Keriso do ia kamonai henia be namo hegeregerena, namona be hahine ese ena adavana do ia kamonai henia. Baibel ese danu ia hahedinaraia, hahine namodia idia aonega bona idia gaukara goadagoada dainai, edia adavadia ese do idia matauraidia bona do idia hanamodia be namo.—Aonega Herevadia 31:10-31.
15 Keristani hahinena ena adavana kamonai henia karana be mai ena hetoana. Bema gau ta dekenai ia kamonai henia amo Dirava ena taravatu do ia utua, namona be do ia kamonai henia lasi to Dirava do ia kamonai henia be namo. To, hahine be unai bamona ia gini auka neganai, namona be do ia “laloa manau” bona do ia “dagedage lasi.” Namona be do ia hahedinaraia Dirava ia diba dainai hahine namona ai ia lao. (1 Petero 3:1-4) Keristani tauna danu, ena be ena adavana be abidadama lasi hahinena, to namona be Baibel ena hereva ia badinaia dainai tau namona ai ia lao.
16. Iesu ia mero neganai ia karaia karadia be memero bona kekeni ese edena bamona idia tohotohoa diba?
16 Efeso 6:1 ese memero kekeni ia sisiba henidia, ia gwau: “Memero bona kekeni e, umui emui tamana bona sinana do umui kamonai henia. Kara maorona be unai.” Keristani memerodia bona kekenidia ese Iesu ena kara idia tohotohoa; ia bada ia lao lalonai, ena tamana sinana ia kamonai henidia noho. Ia be kamonai merona dainai, “ia tubu daekau noho, mai aonega danu, Dirava bona taunimanima danu ese idia ura henia.”—Luka 2:51, 52.
17. Tama sina ese edia siahu idia gaukaralaia dalana dainai, reana edia natudia be edena bamona do idia kara?
17 Tama sina ese edia siahu idia gaukaralaia dalana hegeregerena ai, edia natudia ese edia siahu do idia matauraia eiava do idia gwau-edeede henia. (Aonega Herevadia 22:6) Unai dainai, namona be tama sina be edia lalona ai idia henanadai, idia ta ta idia gwau, ‘Egu siahu lau gaukaralaia be mai egu lalokau ida, eiava mai egu dagedage ida? Lau biagudia namonamo lasi, a?’ Namona be do idia kara mai edia lalokau bona mai edia hebogahisi ida, to Dirava ena hahegani do idia badinadia danu be namo. Unai hegeregerena, Paulo ia gwau: “Tamana bona sinana e, emui natudia do umui habadua lasi, to Lohiabada ena hadibaia hereva idia dekenai do umui hadibaia.”—Efeso 6:4; Kolose 3:21.
18. Tama sina ese edia natudia edia lalona be edena bamona idia hamaoromaoroa be namo?
18 Bema tama sina idia ura edia natudia ese do idia kamonai henidia bona do idia hamoaledia, idia hadibadia daladia do idia tahua namonamo be namo. (Aonega Herevadia 23:24, 25) Baibel lalonai, natu ena lalona hamaoromaoroa dalana badana be hadibaia herevadia amo. (Aonega Herevadia 4:1; 8:33) Unai be lalokau bona lalo-manau dalana; ia be badu bona dagedage dalana lasi. Unai dainai, Keristani tama sina ese edia natudia idia matahakani henia negadiai danu, namona be idia kara mai edia aonega bona mai edia haheauka ida.—Aonega Herevadia 1:7.
SIAHU, KONGREGESEN LALONAI
19. Keristani kongregesen taudia do idia gaukara hebou namonamo totona, Dirava ese dahaka ia henidia?
19 Iehova be kara namonamo Diravana, unai dainai ia ese siahu taudia ia atoa, iena orea taudia do idia naria namonamo. Ia ese Iesu be Keristani ekalesiana ena Kwarana ai ia halaoa. (1 Korinto 14:33, 40; Efeso 1:20-23) Dirava ia gwaumaoro, idia itaia diba lasi tauna, Keriso, ese ia gunalaidia lalonai, kongregesen ta ta lalodiai elda taudia ese mamoe do idia naridia mai edia ura bona mai edia lalokau ida. (1 Petero 5:2, 3) Hesiai taudia ese dala idauidau amo idia durudia, bona kongregesen lalonai edia heduru be mai anina bada.—Filipi 1:1.
20. Dahaka dainai Keristani elda taudia do ita kamonai henidia be namo, bona unai ese ita be edena bamona ia hanamoa?
20 Paulo ese Keristani elda taudia ia gwauraidia, ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho.” (Heberu 13:17) Mai ena aonega ida Dirava ese Keristani elda taudia be maduna ia henidia, lauma dalanai kongregesen taudia do idia naria totona. Elda taudia be pasto taudia oreana ta bamona lasi. Idia be Dirava ena hesiai taudia; edia tomadiho oreana taudia edia hesiai idia lao henia, iseda Biaguna, Iesu Keriso, ia karaia hegeregerena. (Ioane 10:14, 15) Ita diba Baibel ena hereva hegeregeredia idia hegeregere taudia ese ita be lauma dalanai ita goada ita lao dalana idia laloa; unai ese ita ia hagoadaia, idia ida do ita gaukara hebou mai eda ura ida bona do ita kamonai henidia.—1 Korinto 16:16.
21. Elda taudia ese Keristani taudia be lauma dalanai edena bamona idia durudia toho?
21 Reana nega haida mamoe idia raka boio eiava tanobada gaudia ese idia hadikadia. Mamoe Naridia Tauna Badana henunai, elda taudia be ia ese ia henidia mamoedia edia manoka ena mamina idia abia haraga, bona idia durudia mai edia goada ida. (1 Petero 5:4) Kongregesen taudia idia vadivadi henidia bona edia hereva amo idia hagoadadia. Elda taudia idia diba Satani ese Dirava ena orea taudia edia maino ia hadikaia toho, unai dainai idia ese atai amo ia mai aonegana idia gaukaralaia, hekwakwanai haoredia totona. (Iamesi 3:17, 18) Idia gaukara goadagoada, kongregesen taudia be edia abidadama dekenai do idia lalo-tamona noho totona; Iesu ese ia gurigurilaia gauna ta be unai.—Ioane 17:20-22; 1 Korinto 1:10.
22. Kara kereredia idia vara neganai, elda taudia be edena bamona idia heduru?
22 To bema Keristani tauna ta be dika ia hisihisilaia eiava kara dikana ta ia karaia dainai ena lalona ia manoka be edena bamona? Elda taudia ese Baibel ena sisiba amo ena lalona idia hanamoa lou, bona ia dainai idia guriguri; unai amo idia durua, lauma dalanai do ia goada lou totona. (Iamesi 5:13-15) Unai tatau, lauma helaga amo dagi idia henidia taudia, be mai edia siahu, kara dika amo kongregesen idia hakererea o idia hamiroa taudia do idia matahakani henidia bona do idia gwau henidia. (Kara 20:28; Tito 1:9; 2:15) Kongregesen do ia goeva noho totona, reana kara dika badana ta idia diba taudia ese do idia herevalaia hedinarai be namo. (Levitiko 5:1) Keristani tauna ta be kara dikana badana ta ia karaia murinai, bema Baibel ena matahakani bona ena sisiba ia abia dae bona helalo-kerehai momokani ena toana ia hahedinaraia, do idia durua. To, Dirava ena taravatu idia utua loulou bona idia helalo-kerehai lasi taudia be kongregesen amo idia atodia siri.—1 Korinto 5:9-13.
23. Keristani elda taudia ese kongregesen ena namo be edena bamona idia havaraia?
23 Baibel ia peroveta, ia gwau, King Iesu Keriso henunai, lauma dalanai idia lo taudia do idia abia hidi, Dirava ena orea taudia do idia hagoadaia bona naria totona. (Isaia 32:1, 2) Do idia gunalaidia noho lalonai, do idia haroro, do idia naridia bona do idia hadibadia, lauma dalanai do idia tubu daekau totona. (Efeso 4:11, 12, 16) Reana nega haida Keristani elda taudia ese edia orea taudia idia sisiba henidia o idia gwau henidia; edia hahediba herevadia maorodia Dirava ena Hereva amo bema idia badinaia, unai ese iboudiai do ia durudia, mauri ia lao henia dalana do idia rakalaia noho totona.—Aonega Herevadia 3:11, 12; 6:23; Tito 2:1.
IEHOVA ENA LALOHADAI OI ABIA DAE
24. Dina iboudiai Satani ese ita be edena bamona ia tohoa?
24 Satani ese tau bona hahine ginigunadia be biagua ena siahu matauraia karana dekenai ia tohodia. Dina iboudiai ia ese ita unai bamona ia tohoa. Gwau-edeede lalohadaina be taunimanima bogaragidiai ia habadaia. (Efeso 2:2) Ia koidia, do idia laloa sibodia edia ura do idia karaia be namo bona siahu taudia kamonai henidia be dika.
25. Bema tanobada ena gwau-edeede lalohadaina ita dadaraia bona Dirava bona ia koua lasi siahu taudia ita kamonai henia, dahaka namo do ita davaria?
25 To, namona be tanobada ena gwau-edeede lalohadaina do ita dadaraia. Unai bamona do ita karaia neganai, do ita davaria Dirava ena ura hegeregerena kamonai karana be mai ena davana namo hereadia. Hegeregere, gavamani idia gwau-edeede henia taudia edia lalo-hekwarahi do ita abia lasi. Do ita heai lasi, famili momo lalodiai idia heai hegeregerena. Iseda Keristani oreana taudia ida do ita hebamo heheni mai eda moale bona mai eda lalokau ida. Gau badana be inai: Iseda kamonai karana dainai, Iehova, Atai Herea Siahu Tauna, ese ita do ia lalo-namo henia.
EMU DIBA OI TOHOA
Iehova ese ena lohia siahuna be edena bamona ia gaukaralaia?
Gavamani be edena bamona ita kamonai henia noho?
Kwara dagidia taravatuna dainai, famili taudia ta ta edia maduna be dahaka?
Keristani kongregesen lalonai, biagua ena siahu matauraia karana be edena bamona ita hahedinaraia diba?
[Box on page 134]
IDIA KAMONAI, IDIA HADIKAIA LASI
Iehova ena Witness taudia be taunimanima idia haroro henidia goadagoada, idia gwau Dirava ena Basileia sibona mo ese maino momokanina bona noho namo do ia havaraia. To idia ese edia tano edia gavamani idia hadikaia lasi. Lasi, Witness taudia ese gavamani idia matauraidia bona edia taravatu idia badinaia; unai kara dekenai edia tano taudia oredia idia hereaia. Africa tanona ta dekenai gavamani tauna ta ia gwau: “Bema tomadiho oreadia iboudiai be Iehova ena Witness taudia hegeregeredia, ala-ala, henaohenao, kara kereredia, dibura taudia bona atomik bomu be lasi.”
Tano momo dekenai, gavamani taudia be unai idia diba dainai, Iehova ena Witness taudia edia haroro gaukarana idia koua lasi. Tano ma haida dekenai edia gaukara idia taravatua, to gabeai idia diba Iehova ena Witness taudia ese namo idia havaraia, unai dainai unai taravatu idia kokia. Unai be aposetolo Paulo ena hereva hegeregerena; ia gwau: “Kara namo do oi karaia, vadaeni gavamani ese oi do ia hanamoa.”—Roma 13:1, 3.