Kingdom News No. 36

Milenium Matamatana—Vaira Negana Ena Anina Oi Dekenai be Dahaka?

Milenium Matamatana—Nega Matamatana ta Ia Matamaia, A?

HANUABOI 12:​00, December 31, 1999, be ma lagani handred ta ena dokona.a Unai lagani handred lalodiai hekwakwanai momo herea idia vara. To unai nega lalonai masini matamatadia idia havaraia, medikol diba idia habadaia, diba idauidau idia halasia haraga, bona tanobada ibounai moni gaukaralaia dalana idia habadaia. Unai dainai taunimanima momo idia laloa mileniumb matamatana be helaro bona mauri dalana hamatamataia negana. Lagani 2000 ai reana tuari, ogogami, tanobada hadikaia karadia, bona gorere do idia ore, a?

Taunimanima momo idia ura unai bamona do ia vara. To milenium matamatana lalonai oiemu namo idia havaraia gaudia​​—oi bona emu ruma bese idia gimaia bona emui noho namona idia havaraia gaudia​—do idia vara, a? Mani idia vara noho hekwakwanai haida sibona edia bada ita laloa.

Tanobada Hadikaia Karana

Faktori momo tanodia be “tanobada ibounai lalonai gabu idia hadikaia bona tanobada hamiroa karadia idia habadaia bona mauri gaudia edia noho daladia idia hadikaia.” Bema unai bamona ia vara noho, “tanobada be do ia dika ia lao momokani.”​​—“Global Environment Outlook​​—2000,” United Nations Environment Programme.

Gorere

“Lagani 2020 ia abia neganai, ogogami tanodia ai mase 10 10 amo 7 7 be daihanai lasi goreredia ese do idia havaraia, to hari be unai namba ena kahana sibona.”​​—“The Global Burden of Disease,” Harvard University Press, 1996.

Diba taudia haida idia gwau “lagani 2010 ia abia neganai, [AIDS] gorere dika hereana ese idia abia tanodia 23 lalonai [do idia mauri noho] taunimanima edia namba be 66 milioni amo do ia diho.”​​—“Confronting AIDS: Evidence From the Developing World,” European Commission bona World Bank edia ripoti ta.

Ogogami

“Taunimanima kahirakahira bilioni 1.3 be dina ta ta dola ta ia hanaia lasi monina amo mauri durua gaudia idia abia, bona kahirakahira bilioni ta be hegeregere lasi edia aniani gaudia badadia ibounai idia abia totona.”​​—“Human Development Report 1999,” United Nations Development Programme.

Tuari

“Dagedage [tano idauidau] lalonai be ia dika herea diba. Orea, iduhu, bona tomadiho [edia hepapahuahu] amo, . . . unai bamona dagedage be . . . lagani gabedia 25 lalonai do ia vara momo gauna . . . , lagani ta ta ai taunimanima tausen momo do ia hamasea.”​​—“New World Coming: American Security in the 21st Century,” U.S. Commission on National Security/21st Century.

Unai dainai milenium matamatana dainai idia karaia regerege bona moale ese ia hunia gauna korikorina be hari tanobada hadikaia karana, gorere, ogogami, bona tuari idia bada herea. Unai hekwakwanai iboudiai edia badina be mataganigani, abidadama heheni lasi, bona sibona ena namo atoa guna karana​​—saiens, masini matamata havaraia, eiava politikol karadia amo idia kokia diba lasi karadia unai.

Taunimanima Do Ia Hanamoa Laganidia 1000

IDAUNEGAI toretore tauna ta ia gwau: “Taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Taunimanima ena diba be hegeregere lasi bona ia be maoro lasi tanobada ia biagua totona. Ita ia Havaraia Tauna, Iehova Dirava, sibona be mai ena maoro bona taunimanima edia hekwakwanai haoredia dalana ia diba.​​—Roma 11:​33-​36; Apokalupo 4:11.

To edena negai? Bona edena bamona do ia haorea? Gau momo herea ese idia hamomokania ita be “nega ena dokona” ai ita noho. Mani emu kara, emu Baibel oi kehoa, bena 2 Timoteo 3:​1-5 oi duahia. Inai “metau dikadia momo” idia vara negana ai taunimanima ese do idia hahedinaraia karadia ia gwauraia goevagoeva. Mataio 24:​3-14 bona Luka 21:​10, 11 ese “nega ena dokona” idia herevalaia danu. Unuseniai lagani 1914 amo ema bona hari idia vara gaudia idauidau, hegeregere tanobada ibounai lalonai tuari idia vara, gorere idauidau, bona aniani do ia hegeregere lasi ia herevalaia.

Kahirakahira “nega ena dokona” momokani do ia ginidae. Daniela 2:44 ia gwau: “Guba ena Dirava ese basileia ta do ia haginia . . . Unai basileia ese [tanobada ena] basileia ibounai do ia hamakohia, bona haorea momokani, bona ia sibona do ia noho ela bona hanaihanai.” Unai amo Dirava ese Basileia ta, eiava gavamani ta, tanobada do ia lohia totona do ia haginia herevana ia gwauraia guna. Apokalupo 20:4 ia gwau unai gavamani be lagani 1000 do ia lohia​—milenium ta! Unai Lagani 1000 Lohia Negana lalonai taunimanima edia mauri do ia namo daladia haida sibona mani ita laloa:

Kohu Gaukaralaia Dalana. “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi.”​​—Isaia 65:​21, 22.

Tauanina Ena Goada. “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.” “Idia noho taudia ta ese do ia gwau lasi, ‘Lau be gorere.’ ”​​—Isaia 33:24; 35:​5, 6.

Tanobada. Dirava ese “tanobada idia hadikaia [noho] taudia do [ia] alaia ore.”​​—Apokalupo 11:18.

Taunimanima Edia Noho Hebou Dalana. “Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani.”​​—Isaia 11:9.

Taunimanima milioni momo be inai Baibel gwauhamatadia idia abidadama henia bona unai amo idia lalo-goada bona vaira negana namona idia laloa. Unai dainai, mauri ena hekwarahi bona hekwakwanai idauidau idia haheaukalaia namonamo diba. Edena dala ai Baibel be emu mauri lalonai oi ia hakaua gauna mai siahuna ai ia lao diba?

Diba Ese Mauri Dekenai Oi Ia Hakaua Lao!

NEGA haida saiens bona masini matamatadia havaraia karana ita hoalaia! To, taunimanima edia diba ese momo edia mauri ia gimaia lasi bona edia moale ia havaraia lasi. Unai ia havaraia dibana tamona be Baibel lalonai, Ioane 17:3 ai, ia gwauraia, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”

Unai diba be Baibel ena rau lalodiai do ita davaria. Ena be unai buka helagana dekenai taunimanima momo ese edia lalohadai aukadia idia hahedinaraia, to haida sibona ese unai buka idia tahua namonamo. Oi be edena bamona? Momokani, Baibel duahia karana be mai ena hekwarahi. To ena namo be bada herea. Baibel sibona be “Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.”​—2 Timoteo 3:16.

Vadaeni, edena dala ai Baibel oi dibaia matamaia diba? Iehova ena Witnes taudia edia heduru mani oi abia dae. Idia ese taunimanima milioni momo be edia ruma dekenai idia hadibadia, davana lasi. Oi idia durua totona Baibel herevalaia bukadia, hegeregere Dirava Ia Ura Dahaka Ita Karaia? buklet, idia gaukaralaia. Reana oi laloa vadaeni Baibel henanadaidia momo edia haere kwadogidia do ia henia, hegeregere: Dirava be daika? Dirava ena ura tanobada totona be dahaka? Dirava ena Basileia be dahaka? Baibel ese oiemu ruma bese maurina be edena bamona ia hanamoa diba?

Bema oi ura Iehova ena Witnes taudia ta be oiemu ruma dekenai ia mai, mani henunai ia noho fom oi hahonua. Mai edia moale ida Dirava ena Basileia ena Lagani 1000 Lohia Negana namona ena sivarai ma haida oi dekenai do idia gwauraia!

□ Lau ura Dirava Ia Ura Dahaka Ita Karaia? buklet lau abia. Gado oi torea hedinarai

□ Ruma ai davana lasi Baibel stadi totona mani lau dekenai umui mai

[Footnotes]