Lagani Tausen Ihatoina be Edena Negai Do Ia Matamaia?

LAGANI tausen ihatoina be lagani 2000 lasi to lagani 2001 ai do ia matamaia herevana oi kamonai vadaeni, a? Unai be hereva maorona​—dala ta dekenai. Bema ita abia dae Iesu Keriso be hari idia gwauraia lagani 1 B.C.E. ai ia vara, guna haida idia abia dae bamona, vadaeni December 31, 2000 (1999 lasi), be lagani tausen iharuana ena dokona, bona January 1, 2001, be lagani tausen ihatoina ena matamana.a To hari inai negai, kahirakahira diba bada taudia ibounai ese idia abia dae Iesu be lagani 1 B.C.E ai ia vara lasi. Vadaeni, ia be edena negai ia vara?

Iesu be Edena Negai Ia Vara?

Baibel ese Iesu ena vara dinana ia gwauraia lasi. To, ia gwau Iesu be ‘king Heroda ia lohia neganai’ ia vara. (Mataio 2:⁠1) Baibel idia tahua diba bada taudia momo idia laloa Heroda be lagani 4 B.C.E. ai ia mase bona Iesu be ia vara vadaeni​—reana ia be lagani 5 eiava 6 B.C.E. ai ia vara vadaeni. Idia ese edia lalohadai Heroda dekenai ena mase dekenai be aposetolo taudia edia negai ia noho Iuda taudia edia sivarai ia torea tauna Flavius Josephus ena hereva dainai idia abia dae.b

Josephus ia gwau, King Heroda ia do mase lasi neganai, hua ena eclipse ia vara, nega sisina hua ena diari ia hedinarai lasi. Baibel idia tahua diba bada taudia idia gwau March 11, 4 B.C.E. ai, hua ena eclipse maragina ia vara, bona unai ese ia hamomokania Heroda be unai lagani lalonai ia mase. To, lagani 1 B.C.E. ai, January 8 dekenai hua ena eclipse badana ia vara bona December 27 ai hua ena eclipse maragina ia vara. Josephus ese lagani 1 B.C.E. ai ia vara eiava lagani 4 B.C.E. ai hua ena eclipse ia herevalaia be ta ia diba lasi. Unai dainai, Josephus ena hereva ita gaukaralaia diba lasi Heroda ena mase laganina ita diba totona. Herevana do ita gaukaralaia, to bema diba ma haida ita abia lasi Iesu ena vara negana do ita gwauraia diba lasi.

Iesu ena vara negana ia hamomokania hereva namona be Baibel dekenai ia noho. Dirava ena lauma amo ia vara herevana ia gwau, Roma Lohiana Tiberio Kaisara ena lohia laganidia be 15 neganai, Iesu ena kasin Ioane Bapatiso be ena peroveta gaukarana ia hamatamaia. (Luka 3:​1, 2) Histori ese ia hamomokania, Tiberio be September 15, 14 C.E. ai king dagina ia abia, unai dainai ena lagani namba 15 be lagani 28 C.E. ena dokona kahana amo ela bona lagani 29 C.E. ena dokona. Unai nega lalonai, Ioane be ena hesiai gaukarana ia karaia matamaia, bona toana be Iesu be hua 6 murinai ena hesiai gaukara ia hamatamaia. (Luka 1:​24-​31) Unai hereva, bona hamomokania herevadia ma haida ita hakapua neganai, ita abia dae diba Iesu be lagani 29 C.E. ena September eiava October ai ena hesiai gaukara ia hamatamaia.c Baibel ia gwau, Iesu ena mauri “lagani be 30 bamona” neganai, ia ese ena haroro gaukara ia karaia matamaia. (Luka 3:​23) Bema lagani 29 C.E. ena September eiava October ai, iena mauri lagani be 30, ia be lagani 2 B.C.E. ena September eiava October ai ia vara. Vadaeni, bema lagani 2 B.C.E. dekena amo lagani 2,000 ita duahia (bona namona be ita laloatao lagani 0 be lasi dainai, lagani 2 B.C.E amo ia lao lagani 1 C.E. be lagani rua), do ita davaria lagani tausen iharuana ena dokona bona lagani tausen ihatoina ena matamana be lagani 1999 ena September eiava October ai ia vara!

Unai be mai anina bada, a? Hegeregere, lagani tausen ihatoina ena matamana be Apokalupo bukana ese ia gwauraia Iesu Keriso ena Lagani 1,000 Lohia Negana ena matamana danu, a? Lasi. Baibel ia gwau lasi lagani tausen ihatoina bona Keriso ena Lagani 1,000 Lohia Negana be nega tamona idia vara.

Iesu ese ia murinai idia raka taudia ia sisiba henia, dina idia laloa bada garina. Ena hahediba taudia dekenai ia gwau: “Egu Tamana sibona ena siahu dekenai ia laloa dina bona nega, umui be diba lasi.” (Kara 1:⁠7) Guna, Iesu ese idia ia hamaoroa Dirava ese edena nega ai inai nega dikana do ia hahemaoro henia bona unai amo dala do ia kehoa Keriso ena Lagani 1,000 Lohia Negana totona be unai nega ai ia diba lasi. Ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.”​—Mataio 24:⁠36.

Momokani ita laloa diba, Keriso ia vara negana amo lagani 2,000 idia hanaia murinai do ia giroa mai, a? Lasi, momokani. Iesu be ena vara dinana ia diba. Bona unai dina amo lagani 2,000 ia duahia diba. To, iena giroa mai dina bona hora be ia diba lasi. Momokani, ena giroa mai negana ita gwauraia haraga diba lasi! Tamana sibona ena siahu dekenai amo “dina bona nega” ia gwauraia diba​—ia sibona be ena sediual ia diba.

Unai sibona lasi, to Iesu be ena murinai idia raka taudia ia hagania lasi gabu ta dekenai ia idia naria totona. Ia hamaorodia lasi gabu ta dekenai do idia hebou bona ia do idia naria, lasi, to ia siaidia “tanobada ena kahana ibounai,” tanobada ena bese ibounai taudia be hahediba taudia ai idia halaoa totona. Ela bona hari ia be unai hahegani ia haidaua lasi momokani.​—Kara 1:8; Mataio 28:​19, 20.

Edia Lagani Tausen Helarona Do Idia Haboioa, A?

To, tomadiho fundamentalist taudia haida be lagani 2000 idia laloa bada. Idia laloa hua haida lalonai, Apokalupo bukana ena kahana haida be do idia guguru. Momokani, idia laloa idia be do idia guguru gaudia lalonai idia noho. Hegeregere, idia ese Apokalupo 11:​3, 7, 8 dekenai ia noho peroveta herevana idia laloa bada, ia lalonai uitnesi taudia rua be “edia Lohia idia hasatauroa gabuna. Unai hanua badana ena ladana, parabole dekenai, be Sodoma, o Aigupito” dekenai idia peroveta noho. Unai uitnesi taudia rua ese edia peroveta hereva gwauraia hedinarai gaukarana idia haorea neganai, dagedage gauna dikana, guri dobu masemase dekena amo ia daekau gauna, ese ia aladia mase.

The New York Times Magazine, December 27, 1998 gauna ena hereva ta ia gwau, tomadiho orea ta ena gunalaia tauna ta “be iena murinai idia raka taudia ia hadibaia ia be unai uitnesi taudia ta, bona siahu ia abia, tanobada ena ore negana bona Lohiabada ena giroa mai negana do ia harorolaia totona​—bena murinai Satani ese Ierusalema ena dala dekenai do ia alaia mase.” Ita hoa lasi Israel ena gavamani taudia be idia lalo-hekwarahi bada. Idia gari badina reana unai bamona lalohadai idia gwauraia taudia haida be edia ura dainai unai peroveta herevana idia “hagugurua” toho​—herevana unai ena anina be ipidi do idia gaukaralaia! To, Dirava dekenai taunimanima edia “heduru” be anina lasi ena ura do ia hagugurua totona. Baibel ena peroveta herevana iboudiai be Dirava ena ura negana ai bona Dirava ena ura dalana ai do idia guguru.

Apokalupo bukana be Ioane ese “toa” herevadia amo ia torea. Apokalupo 1:1 ia gwau, Iesu be ia ura “iena hesiai taudia” (tanobada ibounai lasi) do ia hadibaia dahaka be gabeai do ia vara. Apokalupo bukana lalo-pararalaia totona Keriso ena hesiai taudia, eiava ena murinai idia raka taudia, ese Dirava ena lauma helaga idia abia be namo, bona Iehova be ia idia hamoalea taudia dekenai unai ia henia. Bema Apokalupo bukana be momokani do ia vara bamona gau idauidau ia herevalaia, abidadama lasi taudia danu ese idia duahia bona ena anina idia lalo-pararalaia diba. Vadaeni, Keristani taudia ese unai hereva lalo-pararalaia totona lauma ena heduru idia gurigurilaia be anina lasi.​—Mataio 13:​10-​15.

Baibel ia hamomokania herevadia amo ita itaia vadaeni, Iesu ena vara negana amo lagani tausen ihatoina ena matamana be lagani 1999 ena September eiava October ai bona unai nega eiava January 1, 2000, eiava January 1, 2001, be gau badana lasi. To, Keristani taudia be lagani 1000 negana ta be idia laloa bada. Bema ia be lagani tausen ihatoina lasi, vadaeni ia be edena? Hereva gabena ese unai henanadai do ia haerelaia.

[Footnotes]

[Box on page 5]

Lagani 2000 Eiava Lagani 2001?

Haida edia lalohadai, Iesu ena vara nega amo, lagani tausen ihatoina be January 1, 2001 ai ia matamaia, ena badina ita lalo-pararalaia totona, mani inai haheitalai oi laloa. Mani oi laloa rau 200 bukana ta oi duahia noho. Rau 200 dekenai oi ginidae neganai, rau 199 oi duahia ore vadaeni, bona rau tamona sibona ia do noho. Unai buka oi duahia ore lasi ela bona rau 200 ena dokona dekenai oi ginidae. Unai hegeregerena, hari ia heau lao lagani 1000 negana ena lagani namba 999 be December 31, 1999 ai ia ore vadaeni, anina be lagani tamona ia do noho ela bona inai lagani 1000 negana ena dokona. Unai duahia dalana hegeregerena, lagani tausen ihatoina be January 1, 2001 ai do ia matamaia. To, unai hereva ese ia hahedinaraia lasi, unai dina ai Iesu ena vara negana amo lagani 2,000 idia ore vadaeni.

[Box on page 6]

Edena Dala amo B.C. Ia Lao A.D. Dina Duahia Dalana Ia Matamaia

Lagani 500 C.E. murinai, Pope John Ginigunana ese monk tauna ta ladana Dionysius Exiguus ia hamaoroa, namona be dina duahia dalana ta ia hamatamaia, dubu ibounai ese Ista dinana idia abia hidi diba totona.

Dionysius ese gaukara ia hamatamaia. Unai nega ai idia ore vadaeni laganidia ia duahia, Iesu ena mase laganina ia hanaia ela bona ia laloa Iesu ena vara laganina ia davaria; bena unai lagani amo lagani ta ta dekenai namba ia atoa. Dionysius ese Iesu ena vara laganina ai ia matamaia negana ia gwauraia “A.D.” (Anno Domini​—⁠“iseda Lohiabada ena lagani ai.”) Lagani ta ta ai Ista duahia dala maorona sibona ia karaia gwauraia, to Dionysius ese Iesu ena vara negana murinai laganidia ia duahia dalana ia hamatamaia danu.

Ena be diba bada taudia momo ese idia abia dae Iesu be Dionysius ese ia gaukaralaia laganina ia vara lasi, to ena nega duahia dalana ese dala ia kehoa nega ia heau lalonai idia vara gaudia edia nega ita diba totona bona ia amo ita diba gaudia idia vara guna bona edena be gabeai idia vara.