Ioane Bapatiso Ese Dala Ia Hegaegaelaia

Lagani 17 gunanai, dubu helaga lalonai, Iesu be Iuda hadibaia taudia dekenai henanadai momo ia henia. Hari be lagani 29 C.E. ena siahu negana. Momo be Iesu ena varavara Ioane idia herevalaia, ia be Ioridane Sinavai ena west kahana ibounai dekenai ia haroro noho.

Ioane ena herevahereva dalana bona ena dabua toana be idau. Iena dabua be kamelo ena huina amo idia karaia bona ena gabana ai leda beleta ia kwatua. Ia ese kwadi bona uda ena hani ia ania. Ia ese dahaka ia harorolaia? Ia gwau: “Umui helalo-kerehai, badina guba Basileia be ia kahirakahira vadaeni.”​—Mataio 3:2.

Ioane ena hereva ese kamonai taudia edia lalona ia hamarerea. Momo idia laloparara idia helalo-kerehai be namo, anina be edia lalohadai bona kara idia haidaua, bona edia mauri gunana idia rakatania. Ia dekenai idia mai taudia be “Ierusalema, Iudea bona Ioridane ena gabu ibounai” amo. (Mataio 3:5) Ioane dekenai idia mai taudia momo be idia helalo-kerehai. Bona ia ese Ioridane ranuna dekenai ia bapatisodia. Dahaka dainai?

Ioane ese taunimanima ia bapatisoa, unai amo ia hahedinaraia idia helalo-kerehai vadaeni, badina Dirava ena Taravatu idia utua. (Kara 19:4) To, haida be hegeregere lasi bapatiso idia abia totona. Dubu gunalaia taudia haida, Farisea taudia bona Sadukea taudia unai, be Ioane dekenai idia mai neganai, idia ia gwauraia “gaigai ena natudia.” Ia gwau: “Emui helalo-kerehai toana be emui kara amo umui hahedinaraia. Namo lasi umui sibona dekenai umui gwau, ‘Aberahamo be emai tamana.’ Badina umui lau hamaoroa, Dirava be inai nadi amo Aberahamo totona natudia ia havaraia diba. Ira be au edia badina dekenai ia noho vadaeni. Unai dainai huahua namona idia havaraia lasi au ibounai be do idia utua bona lahi lalonai do idia negea.”​—Mataio 3:7-10.

Momo idia ura Ioane ena hereva idia kamonai, ia harorolaia herevana be mai ena siahu, bona momo ia bapatisoa dainai, hahelaga taudia bona Levi taudia idia lao bena ia idia nanadaia: “Oi be daika?”

Ioane ia haere: “Lau be Keriso lasi.”

Idia nanadaia: “Vadaeni oi be daika? Oi be Elia, a?”

Ia haere: “Lasi, lau be Elia lasi.”

Ma idia nanadaia: “Oi be idia gwauraia peroveta tauna, a?” Unai bamona idia henanadai, badina idia ura diba bema ia be Mose ese ia gwauraia Peroveta Tauna badana.​—Deuteronomi 18:15, 18.

Ioane ia haere: “Lasi!”

Ma idia nanadaia: “Oi be daika? Ai oi hamaoroa, bena ai idia siaia taudia dekenai haere ta ai henia diba. Mani oi hereva, oi be daika?” Ia gwau: “Peroveta tauna Isaia ia hereva bamona, lau be taunimanima momo lasi gabuna ai lau boiboi tauna, ‘Iehova ena dala umui hamaoromaoroa.”​—Ioane 1:19-23.

“Bema oi be Keriso eiava Elia eiava idia gwauraia Peroveta tauna lasi, dahaka dainai bapatiso oi karaia noho? Ioane ia haere: ‘Lau be ranu lalonai bapatiso lau karaia. Umui huanai ta ia gini noho, bona ia umui diba lasi. Ia be egu murinai ia mai noho.’”​—Ioane 1:25-27.

Oibe, Ioane ia gwau ia ese taunimanima ia durua lalohadai maorona do idia abia, unai amo King ai do ia lao Mesia do idia abia dae. Ioane ia gwau: “Lau murinai ia mai noho tauna ese egu siahu ia hereaia, bona lau hegeregere lasi ena sandolo lau kokia totona.” (Mataio 3:11) Bona ia gwau: “Lau murinai ia mai tauna be lau vairanai ia lao vadaeni, badina lau do vara lasi neganai, ia be ia noho vadaeni.”​—Ioane 1:15.

Unai dainai Ioane ese ia harorolaia herevana be maoro, ia gwau: “Umui helalo-kerehai, badina guba Basileia be ia kahirakahira vadaeni.” (Mataio 3:2) Ia ese taunimanima ia hadibaia Iehova ena King, Iesu Keriso, ena haroro gaukara be kahirakahira do ia matamaia.