Balama Ena Doniki Ia Hereva

Kahirakahira lagani 40 bamona Israela taudia be taunimanima lasi tanona dekenai idia loaloa. Siti goadadia momo idia halusia. Hari, idia be Moaba tano palakana ai idia kamepa, unai be Ioridane Sinavai ena ist kahanai, bona daudau lasi Gwauhamata Tanona dekenai do idia vareai. Moaba ena king Balaki be ena tano do ia haboioa dainai ia gari. Unai dainai Balama ia boiria Moaba dekenai ia mai bona Israela taudia ia gwauraia dika totona.

To Iehova ese Balama ia hamaoroa: ‘Namo lasi Israela taudia oi gwauraia dika.’ Unai dainai Balama be ia ura lasi lao. To king Balaki ese ia boiria lou bona ia gwauhamata ena ura gaudia do ia henia. Balama be unai ia dadaraia danu. Bena Dirava ia gwau: ‘Oi lao diba, to lau gwauraia hereva sibona oi gwauraia.’

Balama be doniki dekenai ia guia bona saut kahana amo Moaba dekenai ia lao. Ena be Iehova ese ia koua vadaeni, to Israela taudia ia gwauraia dika totona palani ia karaia. Bena Iehova ena aneru be dala dekenai nega toi ia hedinarai. Balama ese aneru ia itaia lasi, to ena doniki ese ia itaia diba. Matamanai doniki be dala amo ia raka siri bona uda lalonai ia vareai. Bena doniki be nadi magu badinai momokani ia lao bona Balama ena aena be magu dekenai ia bampa. Vadaeni doniki be dala huanai ia hekure. Unai nega ta ta lalonai, Balama ese au amo doniki ia kwadia.

Nega ihatoina murinai, Iehova ese doniki ena uduna ia kehoa. Bona doniki ese Balama ia nanadaia: ‘Dahaka dainai lau oi botaia noho?’ Balama ia gwau: ‘Badina oi ese lau be kavakava tauna bamona oi halaoa. Bema egu imana dekenai tuari kaia ta ia noho, oi do lau alaia mase.’ Doniki ia gwau: ‘Lagani momo lalonai oi be lau latanai oi guia. Lau be nega ta oi dekenai inai bamona lau karaia, a?’

Bena Iehova ese Balama ena matana ia kehoa bona aneru ia itaia. Aneru ia gwau: ‘Iehova ese oi ia hamaoroa Israela taudia oi gwauraia dika lasi totona.’ Balama ia gwau: ‘Lau kara dika vadaeni. Do lau giroa lou.’ To aneru ia gwau: ‘Moaba dekenai oi lao diba, to Iehova ese oi dekenai ia gwauraia hereva sibona do oi gwauraia.’

Balama be gau ta ia dibaia, a? Lasi. Unai murinai, nega toi Balama ia ura Israela taudia ia gwauraia dika neganai, Iehova ese ia gaukaralaia Israela taudia ia hanamoa. Gabeai, Israela taudia ese Moaba idia tuari henia, bona Balama idia hamasea. Balama ese Iehova ena hereva ia kamonai be namo, ani?