Iesu ena Mauri bona Gaukara

Samaria Taudia Momo Idia Kamonai

HAHEDIBA taudia be Sukara dekenai aniani idia abia bena idia giroa lou Iesu dekenai, Iakobo ena ranu guri dekenai Samaria hahinena ta ia hereva henia noho. Idia ginidae neganai, hahine be ena hodu ia rakatania, hanua dekenai ia lao.

Iesu ena hereva ia lalodia bada dainai, hanua taudia ia hamaorodia, ia gwau: “Umui mai, tau ta umui itaia, egu kara ibounai ia ese ia gwauraia hedinarai.” Bena edia lalona veria totona ia gwau: “Dahaka umui gwau, ia be Keriso o?” Unai henanadai dainai, hanua taudia idia lao itaia totona.

Vadaeni hahediba taudia ese Iesu idia doria hanua amo idia mailaia anianina ia ania totona. To ia hamaorodia, ia gwau: “Lau be mai egu aniani, umui diba lasi gauna.”

Hahediba taudia idia henanadai heheni, idia gwau: “Tau ta ese ena aniani ia mailaia vadaeni o?” To Iesu ia gwau: “Egu aniani be inai, lau ia siaia Dirava ena ura do lau karaia, iena gaukara do lau karaia haorea momokani. Umui be mai emui hereva ta, ani, umui gwau: ‘Hua 4 do idia ore murinai, uiti utua negana do ia ginidae.’” To Iesu ese uiti be lauma dalanai utua negana ia gwauraia idia dekenai, ia gwau: “Utua tauna ese ena davana ia abia, vadaeni anina ia haboua, mauri hanaihanai gauna.”

Reana Iesu ia diba vadaeni momo ese ia idia abidadama henia, unai Samaria hahinena ena hereva dainai. Sukara hanua tataudia be ranu guri dekenai idia mai bona Iesu idia noia do ia noho ia hereva henidia totona. Vadaeni Iesu be dina rua unuseniai ia noho.

Samaria taudia ese Iesu ena hereva idia kamonai henia bona momo idia abidadama henia. Vadaeni unai murinai unai hahine dekenai idia gwau: “Ai be oiemu hereva dainai ai abidadama lasi ia dekenai, to badina ai sibona ena hereva ai kamonai, bona hari ai diba ia be momokani tanobada ena Hamauria Tauna.” Unai Samaria hahinena ia karaia hegeregerena, namona be taunimanima edia lalona ita ania, Keriso ena sivarai idia tahua totona!

Unai gau be November eiava December lalonai idia vara bena hua 4 idia ore murinai bali utua negana ia ginidae, Palestine ena gara lou negana lalonai. Unai dainai ita diba lagani 30 C.E. ena Paseka ariana murinai, Iesu bona ena hahediba taudia be Iudea dekenai idia noho hua 8 bamona, hahediba bona bapatiso gaukarana idia karaia totona. Vadaeni unai murinai edia provinsi korikori, Galilea dekenai idia giroa lao. Dahaka do ia vara unuseniai? Ioane 4:27-42.

◆ Unai Samaria hahinena ese dahaka sivarai ia harorolaia, bona unai dainai dahaka ia vara?

◆ Iesu ena aniani be uiti utua gaukarana ida edena bamona idia hegeregere?

◆ Edena bamona ita diba lagani 30 C.E. ena Paseka ariana murinai Iesu be hua 8 bamona Iudea dekenai ia haroro?