Kamonai Lasi Uru Be Dika Do Idia Davaria

Iesu ese Ioane Bapatiso ia matauraia bada, to taunimanima ese Ioane be edena bamona idia laloa? Iesu ia gwau, “inai uru” be “natudia maragidia bamona. Idia be edia gadara hebou turadia dekenai idia boiboi, idia gwau: ‘Umui totona fluti ai gadaralaia, to umui mavaru lasi. Ai taitai, to lalohisihisi dainai emui kemena umui botaia lasi.’”​—Mataio 11:16, 17.

Iesu ena hereva ena anina be dahaka? Anina ia hahedinarai, ia gwau: “Ioane ia mai bona ia aniani eiava inuinu lasi, to taunimanima idia gwau, ‘Ia be mai ena demoni.’ To taunimanima ena Natuna ia mai bona ia aniani bona inuinu, to taunimanima idia gwau, ‘Ia be aniani bona wain inua momo tauna, takisi gogoa taudia bona kara dika taudia edia turana.’” (Mataio 11:18, 19) Ena be Ioane be Nasiri tauna bona wain ia inua lasi, to inai uru taudia idia gwau ia be demoni ese ia biagua. (Numera 6:2, 3; Luka 1:15) To Iesu be taunimanima ma haida hegeregerena ia noho. Mai laloa maoromaoro ida ia aniani bona wain ia inua, to idia gwau ia be aniani bona inuinu momo tauna. Toana be ia auka unai taudia edia lalona idia hanamoa.

Iesu ia gwau unai uru taudia be maketi gabudiai idia noho natu maragidia bamona, natu ma haida ese fluti idia gadaralaia neganai, idia ura lasi mavaru, eiava haida idia taitai neganai, idia lalohisihisi lasi. Ia gwau: “To tau ta ese ia karaia kara namodia ese ia hamomokania ia be aonega tauna.” (Mataio 11:16, 19) Oibe, Ioane bona Iesu edia “kara namodia” ese idia maumau taudia edia hereva idia hakoikoia.

Iesu be unai uru ia gwauraia kamonai lasi uruna, unai murinai Korasina, Betesaida, bona Kaperanauma siti ia gwauraia dika, herevana unuseniai siahu karadia momo ia karaia. Ia gwau, bema Poinikia ena siti, Turo bona Sidono dekenai unai ia karaia, do idia helalo-kerehai. Ia ese Kaperanauma danu ia gwauraia dika. Ena be Iesu be nega sisina daudau unuseniai ia noho, to momo idia kamonai lasi. Iesu be unai siti dainai ia gwau: “Hahemaoro Dinana ai, emu dika davana ese Sodoma tanona ena dika davana do ia hereaia.”​—Mataio 11:24.

Bena Iesu ese ena Tamana ia hanamoa, badina ia ese dava bada hereva momokanidia be “aonega bona diba bada taudia” amo ia hunia, to ladana maragi taudia dekenai ia hahedinaraia, idia be natudia maragidia bamona. (Mataio 11:25) Bena unai bamona taudia ia boiria, ia gwau: “Umui hesiku bona metau bada umui huaia taudia ibounai e, lau dekenai umui mai bona umui dekenai goada matamata do lau henia. Egu huaia auna do umui huaia bona lau dekenai diba umui abia, badina lau be manau bona lalomanada tauna, bona goada matamata do umui davaria. Egu huaia auna be ia namo, bona egu huaia gauna be metau lasi.”​—Mataio 11:28-30.

Edena dala ai Iesu ese goada matamata ia henidia? Tomadiho gunalaia taudia ese taunimanima latanai sene taravatu metaudia momo, hegeregere Sabati taravatu aukadia idia atoa. To, Iesu ese Dirava ena hereva momokani amo idia dekenai goada matamata ia henia, bona sene taravatudia amo ia ruhadia. Danu, gavamani ese idia kara auka henidia bona edia kara dika dainai idia lalometau taudia edia lalona ia hanamoa. Oibe, Iesu be idia dekenai Dirava ese edia dika do ia gwauatao bona Dirava ida maino do idia karaia dalana ia hahedinaraia.

Iesu ena huaia auna idia abia dae taudia ese edia mauri be Dirava dekenai idia gwauhamatalaia diba, bona iseda hebogahisi guba Tamana idia hesiai henia. Unai ita karaia be auka lasi, badina Dirava ena taravatu be idia metau lasi.​—1 Ioane 5:3.