Tomadiho Ena Heduru be Hegeregere, A?

LAGANI 21 lalodiai Maria be Roman Katolik sisita ta. Ia kekeni neganai tomadiho ia laloa bada. Hanuaboi ai ena mahuta amo ia toreisi bona taunimanima haida dainai ia guriguri! To, gabeai ia daradara, badina be ena be ena tomadiho oreana be mai ena siahu lagani tausen momo lalodiai, to ogogami, hisihisi, bona dika karadia idia do noho. Ena lalona dekenai inai bamona ia henanadai: “Tomadiho ese ita ia durua momokani a?”

Tomadiho oreadia momo ese lalohadai maorodia bona kara maorodia idia gwauraidia. To, nega momo taunimanima idia laloa tomadiho oreadia ese hekwakwanai idia havaraia, iseda hekwarahi idia habadaia, bona ita idia durua momokani lasi. Tomadiho oreadia edia kara idia itaia taudia edia hereva haida mani oi laloa, idia gwau: “Dagedage karadia dika rohoroho idia vara tomadiho oreadia dainai.” (National Review) “Hari, mataganigani dainai tuari idia vara lasi, to tomadiho dainai idia vara.” (Toronto Star) “ ‘Idia bapatiso Keristen taudia ese’ Jew taudia hutuma idia hamasedia kava.”​—The Tampa Tribune.

Ena be tomadiho oreadia idia gwau taunimanima idia durudia, to taunimanima momo ese edia huahua idia itaia dainai edia hereva idia abia dae lasi, ani? Haheitalai haida be inai, niuspepa ta ladana The Christian Century ia gwau: “Shinto, Japan ena tomadiho oreana badana, ese tuari ia durua sibona lasi, to danu ia gwau idia tuari be maoro.” Tomadiho oreadia momo be unai bamona idia karaia vadaeni​—‘mai edia ura ibounai ida tuari idia durua’! Sri Lanka dekenai Buddhist bona Hindu tomadiho oreadia taudia ese taunimanima momo idia hamasedia kava, Ireland dekenai Katolik bona Protestant taudia idia ala-ala heheni bona kara dika rohoroho idia karaia​—gabu momo dekenai unai bamona kara idia vara! Niuspepa ta ladana U.S. News & World Report ia gwau: “India dekenai nega daudau herea lalonai, Hindu, Moslem, Sikh bona ma tomadiho orea haida taudia idia ala-ala heheni noho.”

Reana haida idia laloa tomadiho oreadia ese dika idia havaraia lasi, to idia diba idia ta be siahu lasi namo do ia havaraia. Magasin ta ladana National Catholic Reporter ia gwau, “dubu orea badadia ese taunimanima edia ura gaudia bona dabu gaudia idia henidia lasi.” Bona magasin ta ladana Liberty ia gwau, taunimanima momo idia laloa dubu ena haroro tauna ena gaukara badana be dina badadia dekenai gau ta eiava taunimanima ta do ia hanamoa o hahelagaia sibona. Reana oi danu be idia bamona oi laloa​—reana oi laloa tomadiho oreadia ese ita idia hadikaia lasi, to ita idia durua bada lasi danu, a?

Hari inai negai tomadiho be Iesu Keriso be tanobada ai ia noho neganai ia noho tomadihona hegeregerena. Ia gwau iena nega lalonai tomadiho oreana gunalaia taudia ese Dirava idia tomadiho henia edia udu bibinadia amo sibona. Edia kara dainai taunimanima edia hekwarahi idia habadaia, bona edia dabu gaudia idia henidia lasi. Ia gwau: “Idia ese huaia gaudia mai metau danu idia kwatua, taunimanima latanai idia atoa.” (Mataio 23:4) Hari inai negai, tomadiho oreadia ese gwauhamata momo idia gwauraia, to idia hamomokania lasi. Vadaeni, bema ta ia laloa tomadiho ese ita ia durua diba, ena lalohadai be mai ena badina korikorina a?