Headava Davana​—⁠Keristen Taudia Idia Karaia be Maoro A?

IDAU nega amo ema bona hari tano momo lalodiai headava neganai davana henia karana idia do karaia noho. Nega momo unai davana be moni, bona harihari gaudia namodia danu. Bese idauidau dekenai unai headava davadia edia bada be idauidau, badina taunimanima edia iduhu ena bada, edia mauri dalana, edia edukeisini, bona ma gau haida be idia idauidau dainai. Tano haida edia gavamani ese headava davana hida do idia henia ena taravatu idia gwauraia, to taunimanima momo ese unai taravatu idia badinaia lasi davana idia henia neganai.

Inai kara ita tahua neganai ia hedinarai dava henia karana idia karaia sibona lasi, to hari inai negai kastom gaudia ma haida danu idia karaia. Unai dainai namona be unai kara oi laloa namonamo, oiemu Keristen karana ia hadikaia garina.

Papua New Guinea lalonai, dava henia karana idia karaia neganai kohu be iduhu ta amo idia henia hanai ma iduhu ta dekenai, headava tauna bona ena varavara be dava idia henia kekeni ena varavara taudia dekenai. Unai davana ena bada be idauidau, iduhu ena bada hegeregerena, idia be K80 ia lao K38,000 bamona idia henia diba. Sri Lanka lalonai, idia karaia karana be idau. Kekeni ena tamana bona sinana ese davana idia henia kekeni ena maoheni merona dekenai. Nega haida golo ena herahera gaudia, tano, ruma, bona moni idia henia dava karaia totona. Iduhu ena tano ia boio garina idia ese edia varavara dekena amo mero ta idia tahua idia headava totona.

Africa tanodia momo lalodiai, headava neganai dava henia karana ena kastom idia karaia, unai ese headava ena dala maorona ia hamomokania taunimanima vairadiai. Nigeria tamana ta ena natuna kekenina idia hegaegaelaia ia headava totona, bona ia gwau: “Igbos taudia dekenai, headava ena dava henia karana be gau badana badina unai ese headava ena maoro taunimanima vairadiai ia hamomokania. Maoheni kekeni ena bese taudia ese unai davana idia abia neganai ia hedinarai idia ura mero bona kekeni do idia headava. Idia dekenai unai dala sibona be headava maorona. Unai dainai, ena be dubu ta lalonai eiava gavamani ena dala ai idia headava, to bema davana idia henia lasi, taunimanima vairadiai idia do headava maoro lasi.”

Tamana Ia Karaia Karana

Guna inai Africa taudia dekenai kara haida idia karaia badina unai amo tauhau ia hahedinaraia ia be hegeregere ruma bese ena maduna ia huaia totona. Unai tauhau ena ruma bese taudia ese ena maoheni kekeni ena tamana bona sinana idia vadivadi henidia, bona davana hamaragia totona idia herevahereva bona idia maka henia totona. To hari, gabu momo lalodiai unai bamona idia karaia lasi, kekeni ena tamana ese davana badana ia tahua noho. Nigeria ena gabu haida dekenai gavamani ese taravatu idia atoa dava henia ena bada be K10 idia henia totona. To gabu momo lalodiai K10 ia lao K1,200 bamona idia gwauraia diba. Nega haida idia ura tauhau ena tamana bona sinana ese moni eiava harihari gaudia idia siaia guna, bena gabeai idia lao kekeni ena tamana bona sinana idia vadivadi henidia totona. Zaire dekenai idia karaia hegeregerena, kohu ma haida do idia henia kekeni ena “tamana ena gwaumaoro abia totona,” unai dala amo lalona idia veria kekeni ena davana idia herevalaia hebou totona. Unai davana idia henia neganai, ma kohu haida bona harihari gaudia haida do idia gwauraidia diba danu.

Unai bamona kara ese moni mataganigani henia karana ia habadaia diba. To, Bible ia gwau: “Moni ura henia kara ese dika idauidau ibounai ia havaraia noho.” (1 Timoteo 6:10) Mataganigani karadia dainai taunimanima be idia henaohenao, bona unai bamona kara dainai Dirava ena badu do idia davaria. Bible lalonai ia gwau: “Kohu ura henia dikadika tauna be gabu lasi, Keriso bona Dirava edia Basileia lalonai. Kohu ura henia dikadika kara be hegeregere kaivakuku tomadiho henia kara bamona.”​—⁠Efeso 5:5; Hereva Lada-isidia 20:21; 1 Korinto 5:11; 6:⁠10 itadia danu.

To, tamana dekenai headava ena davana idia henia be dika lasi, badina ia ese ena natuna kekenina ia ubua bona edukeisini ia henia neganai moni bada ia negea. Namona be dava henia neganai maoheni merona be unai ia laloatao, bona ia moale ena maoheni kekenina ena tamana ese ena natuna ia hadibaia namonamo dainai. To, tamana bona sinana haida idia ura kekeni dekenai idia negea monina ibounai idia abia lou, badina idia laloa kekeni ia headava neganai do ia heduru lasi ena tadina bona taihuna idia sikuli totona. Unai bamona tamana bona sinana ese headava ena dava badana idia tahua, edia natudia be dava bada gaudia bamona idia hoihoilaidia. To natudia idia naridia bona idia hadibadia namonamo be idia edia maduna. Namona be unai maduna idia huaia mai moale danu, namo lasi idia karaia badina gabeai idia ura headava ena davana badana do idia abia bona do idia heagilaia totona. Tamana bona sinana ese natudia edia amo kohu momo do idia tahua garina, Bible ia gwau: “Memero maragi ese moni idia haboua lasi tamadia sinadia totona. To tamadia sinadia ese moni idia haboua edia natudia totona.”​—⁠2 Korinto 12:⁠14.

Sibodia idia gwauraia Keristen tamadia haida ese idia gwauraia davana be bada herea, bona kekeni idia ura henia Keristen uhaudia be unai davana idia henia diba lasi. Nega haida, unai bamona tamadia ese Keristen tadikaka idia henia diba davana idia dadaraia badina murimuri taudia idia henia davana ese ia hereaia! Keristen tamadia haida ese maduna idia henia edia varavara dekenai, bona idia be murimuri taudia dainai davana bada herea idia gwauraia. Bema headava davana ena bada idia hepapahuahulaia momo unai ese tauhau bona ena kekeni ia doridia diba idia sihari kava totona. Tanobada taudia momo ese unai bamona idia karaia. Tauhau bona kekeni idia lalohisihisi dainai do idia sihari kava kekeni do ia rogorogo totona, bena unai amo kekeni ena tamana bona sinana idia doridia tauhau ese ia henia diba davana idia abia totona.

To Keristen taudia be unai bamona idia karaia be maoro lasi. Dirava ena Hereva ese sihari kava karana ia gwauraia dika, bona idia karaia taudia be kongregesen murimurinai do idia atodia diba. (1 Korinto 6:9; Heberu 13:⁠4) Bema tamana ese davana bada ia gwauraia dainai ena natuna ia sihari kava, ia dekenai kerere ia noho danu. Unai bamona kerere ese ena gini kongregesen lalonai do ia hadikaia diba. Danu, herevana davana ia bada eiava ia maragi, bema tamana ese davana ia abia ena Keristen natuna kekenina ese murimuri tauna ta ia adavaia totona, unai be Dirava ena taravatu utua karana. Bona unai bamona tauna be maduna badadia do ia abia diba lasi kongregesen lalonai. Namona be Keristen tamana bona sinana idia ura edia natudia be Keristen kongregesen lalonai do idia goada, bona idia durudia edia kara idia namo noho totona. Namona be idia ura edia natudia kekenidia idia moale bona “ekalesia tauna sibona” do idia adavaia, unai bamona taudia ese Iehova idia lalokau henia bona ena taravatu bona ia gwauraia dala maorodia do idia matauraidia bada.​—⁠1 Korinto 7:⁠39.

Natuna ia headava gwauraia neganai davana idia habadaia be Keristen ena kara lasi, unai be moni henaoa karana. Namona be Keristen tamana ia naria namonamo ia mataganigani bona sibona ia laloa bada garina, badina unai bamona kara ese ena lauma goadana ia hamanokaia diba bona kongregesen lalonai maduna haida ia haboioa diba.​—⁠1 Korinto 6:​9, 10.

To moale gauna be inai, Keristen tamadia momo ese tauhau idia hametaua bada lasi, idia ese headava ena dava badana idia gwauraia lasi, unai ese ia hahedinaraia idia be laloa maoromaoro taudia. Idia haida be idia kerere garina eiava lauma dalanai idia manoka garina dava henia karana idia dadaraia.

Tau bona ena Maoheni edia Kara

Nega haida kekeni be idia mataganigani dainai edia tamana bona sinana ese davana badana idia gwauraia. Kekeni haida idia headava gwauraia neganai edia tamana bona sinana idia doridia momo idia heagilaia diba gaudia idia abia totona. Ma haida ese edia tamana bona sinana idia gwau henidia idia ura henia davana bada gaudia idia hoidia hegaegae totona. Unai bamona gaudia idia hoidia totona, reana tamana ese kekeni ena davana do ia habadaia.

Vadaeni, headava matamata tauna ese metau bada ia huaia headava dinana ena gaukara bona ruma ena kohu edia davana ia karaia totona. Dirava ena Hereva lalonai, ia gwau: “Dirava dekena amo aonega ia abia tauna ena kara [ta] be . . . laloa manada.” Namona be idia headava gwauraia taudia edia “manau bona manada kara taunimanima ibounai edia vairanai do [idia] hedinaraia.” Unai anina be idia headava neganai ta ese do ia hametaua lasi headava gaukara ena davana ia habadaia totona.​—⁠Iakobo 3:17; Filipi 4:⁠5.

Idia headava murinai, bema ena tau ese davana badana ia henia hahine ia abia totona, reana hahine ia laloa ena tau ia lalokau henia bada. Bema dava maragina sibona ia henia reana ia hemarai. Reana ia laloa bema ena tau ese ia hesikulaia do ia lulua haraga diba, badina moni sisina sibona ia negea ia abia totona. Momokani, tatau haida ese edia adavadia idia luludia lao edia tamana bona sinana edia ruma dekenai ena badina be idauidau, hegeregere idia gabani dainai eiava idia gwau-edeede dainai. Headava matamata tauna ese dava ia henia neganai, haida idia gwau: “Adavana ta oi hoia inai.” Bema ia ese headava ena davana badana ia henia reana iena adavana be hesiai hahine ta bamona do ia halaoa, bona ia be ena turana namona ai do ia halaoa lasi. Danu, hekwakwanai ta dainai, nega haida tamana ese headava davana ia abia murinai ia henia lou, bona ena natuna kekenina ia doria ena adavana ia rakatania totona.

Haida idia gwau bema headava ena davana do ia bada tamana ese ena natuna ia abia lou karana do ia koua, badina unai moni badana ia haboua bona ia henia lou be ia auka. Danu idia laloa davana badana idia gwauraia neganai memero bona kekeni idia headava haraga diba lasi, badina mero ese moni ia haboua noho negana ia hadaudaua. Idia gwau unai be namo badina idia headava neganai tatau be maduna idia huaia diba bona edia headava do idia namo.

Reana unai hereva be momokani haida dekenai, to Keristen headava be kohu ura henia bada karana latanai idia haginia be edia headava do ia hanamoa lasi. Reana Keristen tauna ese ena headava ia matauraia badina be ia ura lasi ena headava ia dika bona moni do ia haboioa kava. To, namona be ena headava ia matauraia Bible ia gwauraia dala maorona dainai, ia gwau: “Dirava ese ia hakapua taudia, be taunimanima ese do idia hapararaia lasi.” (Mataio 19:⁠6) Hahine be tau idia hoia kohudia lasi, Bible ese tatau ia haganidia edia adavana idia ‘mataurai henidia totona.’ (1 Petero 3:⁠7) Iesu ia gwau tau bona hahine idia headava neganai idia be tauanina “tamona.” (Mataio 19:5; Genese 2:24) Bible ese tatau ia sisiba henidia edia hahine idia lalokau henidia, idia matauraidia bona idia naridia namonamo, sibodia edia tauanina idia lalokau henia hegeregerena. (Efeso 5:​28, 29) Ma danu, headava murinai idia hanai laganidia lalodiai, tau ena kara ena hahine dekenai ese ia hahedinaraia ia lalokau henia momokani eiava lasi. Herevana tau ese headava ena dava ia henia eiava lasi, bema ia ese ena hahine ia naria namonamo, bona ia matauraia momokani, taunimanima idia gwau ena adavana ia lalokau henia momokani, ani?

Headava ena davana ese tau ena kara ena ravana taudia dekenai ia haidaua diba. Bema ia ese headava ena dava badana ia henia vadaeni, gabeai ena be ena ravana taudia idia dabu to ia ura lasi ia durudia, ia gwau ena maduna idia dekenai be ia ore. To Bible ia gwau: “Vabu ta, bema ia be mai ena natuna o mai ena tubuna, idia ese edia sinana bona tubuna idia durua be namo. Badina be Dirava do ita hamoalea karana ta be, iseda ruma taudia do ita laloa bona durua.” (1 Timoteo 5:⁠4) Keristen taudia ese unai sisiba idia badinaia, to hekwakwanai ia vara diba bema tau ia gwau hahine ena davana ia henia vadaeni bona ena maduna ena ravana taudia dekenai be ia ore.

Oi Laloa Namonamo Noho

Bema tauhau do ia adavaia gwauraia Keristen kekenina ena tamana bona sinana be Keristen taudia lasi, hekwakwanai do idia vara diba badina idia ura kara haida do ia karaia headava davana ia henia neganai. Reana idia ese taunimanima idia mase diba lasi ena hahediba idia abia dae, bona reana idia ura ia ese tubuna tamana tomadiho henia karadia ia karaia. (Kohelete 9:​5, 10; Esekiel 18:⁠4) To bema unai bamona ia karaia Dirava ena lalo-namo bona hahenamo do ia abia noho diba lasi, badina Iehova ese ‘hereva momokani idia badinaia bona edia laumadia idia hagoevaia vadaeni’ taudia sibodia ia hanamodia, ani? (1 Petero 1:22; Apokalupo 18:⁠4) Unai bamona hekwakwanai ia vara neganai, namona be ia gwauhamata Keristen tauna be ia goada karaia bona ia gwau “Dirava ai kamonai henia be namo, taunimanima ai kamonai henia be dika.”​—⁠Kara 5:⁠29.

Headava ena dava henia neganai inai kara haida idia vara diba, unai dainai namona be ita naria namonamo bena do ita henaohenao lasi, ita sihari kava lasi, bona abidadama tamona taudia sibona do ita adavaia totona. Keristen kekeni ena adavana idia abia hidi neganai, namo lasi unai kekeni bona ena tamana bona sinana ese tanobada taudia edia kara idia tohotohoa. Keristen lasi merona o kekenina adavaia karana be Dirava gwau-edeede karana ta. Mose dekena amo Dirava ese Israel taudia dekenai ia gwau: “Idia danu headava gwauhamata ta umui karaia lasi. Emui natuna kekeni be edia natuna mero dekenai umui henia lasi, bona edia natuna kekeni be emui natuna mero totona umui abia lasi.” (Deuteronomi 7:​3, 4; 1 Korinto 7:39) Vadaeni, namo lasi Keristen uhau bona ulato ese niuspepa dekenai edia ladadia idia atoa adavana ta idia tahua totona. Idia ura headava neganai, namona be edia Keristen tadikaka o taihu namona ta do idia abia hidi.

Headava be helaga gauna Iehova ena amo, bona ita iboudiai ese iena Hereva headava dekenai ita badinaia be gau badana. Bema Iehova, iseda natudia, bona iseda lauma tadikakadia ita lalokau henidia bada, ita ese kara maoromaoro bona kara namo idia hadikaia diba karadia do ita dadaraidia. (Salamo 119:105; Heberu 4:12) Headava neganai bema taunimanima ese Dirava ena Hereva idia badinaia dava henia karana eiava kohu henia karana idia karaia neganai, Iehova ena amo hahenamo do idia davaria edia mauri lalonai.​—⁠Hereva Lada-isidia 10:⁠22.