Duahia Taudia edia Henanadai

◼ Dirava ese taunimanima ia lalo-namo henia sivaraina ena anina be bema “kongregesen raka hebou diba tauna” ia kara kerere, Keristen taudia do idia dadaraia lasi guna idia karaia bamona, to idia hereva henia diba, a?

Oibe. May 1989 ena Gima Kohorona lalonai, Bible ena amo idia hahedinaraia dahaka dainai iseda lalohadai ita haidaua bona hari ia do bapatiso lasi tauna, Iehova ena Witness taudia danu idia haroro hebou tauna ita dadaraia lasi. Guna, ia do bapatiso lasi tauna idia gwauraia “kongregesen raka hebou diba tauna,” bona mai ena ura danu bema Dirava ena taravatu ia utudia noho, kongregesen taudia idia hadibadia bona idia ese unai tauna idia bamoa lasi bona idia hereva henia lasi.

Guna ai torea sivaraina lalonai ia hahedinaraia Bible ia gwau idia helalo-kerehai lasi bapatiso taudia be unai bamona do idia sisiba henidia. (1 Korinto 5:​11-13; 2 Ioane 9-11) To, bapatiso tauna bema ia kara dika noho ena kerere be bada badina ia be mai ena diba bada, ia do bapatiso lasi tauna ena kara dika ena kerere ia hanaia. (Luka 12:48) Ia do bapatiso lasi dainai Dirava ese ena lalo-namo henia tauna ia do gwauraia lasi, unai dainai kongregesen murimurinai do idia atoa be maoro lasi. To hari, tanobada tauna ta bamona ita kara henia.

Guna unai bapatiso lasi tauna be “kongregesen raka hebou diba tauna,” to hari ia kara dika noho dainai ia hegeregere lasi haroro gaukara ia karaia totona, unai dainai Witness taudia ese edena bamona do idia laloa be namo? Unai tauna be ena kerere amo ia helalo-kerehai lasi dainai ita be murimuri tanobada tauna ta bamona do ita kara henia.a To, May 1989 Gima Kohorona ena rau 20 bona 21 lalonai ia gwau Keristen taudia ese edia hebamo karana ia dekenai do idia naria namonamo. Idia lalo-parara unai bapatiso lasi tauna be reana Dirava ena taravatu ia diba to kara dika ia do karaia. Idia goada Keristen taudia ese unai bamona tauna idia bamoa momo lasi be gau badana. Bema Bible ena sisiba ita badinaia unai bamona tauna bamoa dalana do ita diba. Namona be 1 Korinto 15:33 bona Hereva Lada-isidia 13:20 edia sisiba herevadia ita laloa, bona sibona ita nanadaia: ‘Bema murimuri tanobada tauna ta be Keristen ena kara ia karaia lasi, do lau bamoa, a?’ Bema elda taudia idia itaia unai bamona tauna ese kongregesen taudia haida ia hakereredia diba, do idia hadibadia idia kerere garina.

Gabeai, bema unai kerere tauna ia hahedinaraia ia helalo-kerehai, reana do ia ura ta ese ia Bible stadi henia lou. (Kara 26:20) Bema unai bamona ia ura, namona be ia lao kongregesen ena elda taudia dekenai, bema elda taudia idia laloa unai be hegeregere, dala do idia karaia ta ese ia Bible stadi henia totona. Gabeai danu, bema ia do bapatiso lasi pablisa tauna idia koua ia hegeregere lasi haroro gaukara ia karaia totona, bena murinai ia helalo-kerehai, unai bamona do ia karaia diba danu. Bema mai dalana, guna iena kerere idia tahua elda taudia rua dekenai do ia lao, eiava bema guna elda rua edia hereva ia abia dae lasi, bona ia noinoi dainai elda edia orea ese ma elda rua idia gwauraia ena sivarai idia tahua lou totona, unai elda rua dekenai do ia lao.

Ma danu, Gima Kohorona magasin lalonai ia gwau ruma bese lalonai tamana bona sinana be mai edia maduna​—⁠unai maduna be edia natudia maragidia idia naridia. (Efeso 6:​1-4) Bible ena hereva ese tamana bona sinana ia haganidia edia natudia idia hadibadia namonamo totona. Unai dainai tamana bona sinana, (mai ena abidadama tamana o sinana unai), reana do ia ura unai kara kerere natuna sibona dekenai Bible stadi do ia karaia, eiava do ia boiria mai, ruma bese taudia danu Bible stadi lalonai ia vareai totona.

Guna idia torea Gima Kohorona sivaraina ese ita ia hamaoroa namona be inai hereva dekenai iseda lalohadai bona iseda kara ita haidaua, badina Buka Helaga ena hereva ibounai be namo “bona mauri dala maoromaorona ita dekenai do ia hadibaia.”​—⁠2 Timoteo 3:​16, 17.

[Footnotes]