Taunimanima ese Idia Havaraia ‘Maino bona Noho Namo’ Ia Hereaia Gauna Ita Laloa
Hereva momokanina be inai: taunimanima be noho hanaihanai maino korikorina idia havaraia diba lasi. Badina be dahaka? Badina ena be tanobada ena sivarai lalonai taunimanima be rara bada idia bubua, to idia mo sibodia be unai maino hadikaia taudia lasi. Maino ia hadikaia tauna korikorina ena siahu ese taunimanima edia siahu ia hanaia. Unai be Satana Diabolo, Bible lalonai idia gwau ia be “tanobada taudia ibounai ia koia noho.”—Apokalupo 12:9.
BIBLE ia gwau: “[Satana] ese tanobada taudia ibounai ia gunalaia noho.” (1 Ioane 5:19) Unai dainai, ia noho hanaihanai maino momokanina ita abia totona namona be Satana bona ia ese ia haginia bona ia biagua tanobadana ia ore. (Isaia 48:22; Roma 16:20 itaia danu.) Taunimanima be unai idia karaia diba lasi.
Unai dainai, maino bona noho namo be edena bamona ia vara diba? Satana ena goada ia hanaia tauna ena siahu amo. Siahu Ibounai Diravana ese Satana ena gaukara taunimanima bogaragidiai do ia ore negana ia gwauraia vadaeni. Unai nega ia doko neganai, Satana ena siahu dekenai ia noho tanobadana be “hisihisi dika momokani bona mase” do ia abia. (1 Tesalonika 5:3-7) Idia vara gaudia iboudiai dainai ita diba unai be nega kahirakahira do ia vara.
Hari Inai Negai Maino bona Noho Namo Ita Abia!
To hari inai nega be edena bamona? Hari inai negai maino bona noho namo sisina ita abia diba. Edena bamona? Tomadiho gunalaia taudia ese idia karaia dalana dekenai do idia vara lasi, idia be tanobada ena politikol karadia dekenai idia vareai, to Dirava ena taravatu bona sisiba badinaia karana amo maino bona noho namo do idia vara.
Unai dala amo momokani maino ia vara diba, a? Oibe, ia vara diba. Haheitalai ta be inai: Iehova ena Witness taudia momo be unai dala idia tohoa bona idia davaria maino korikorina bona noho namo sisina idia abia diba. Bible lalonai Dirava ena taravatu idia badinaia dainai, idia be tanobada ibounai oreana tamona lalonai idia lalo-tamona diba maino korikorina dekenai, herevana idia be edena bese, edena iduhu, eiava edena gado taudia.—Salamo 133:1.
Dirava ena taravatu idia badinaia dainai, laulau dalana dekenai idia be ‘edia kaia be tano geia gaudia ai idia halaodia bona tuari dekenai diba idia tahua lasi.’ (Isaia 2:2-4) Idia be Dirava ena lalokau dekenai idia noho namo bona idia diba edia tadikaka lauma dalana dekenai ese idia lalodia bada bona idia ura henidia. (Roma 8:28, 35-39; Filipi 4:7) Bema unai dekenai oi daradara, namona be edia Kingdom Hall ta dekenai oi lao bona oiemu matana amo edia kara oi itaia diba.
Maino bona Noho Namo Tanobada Ibounai Dekenai
To, Bible ese ia gwauhamatalaia maino momokanina bona noho namona ena guguru dalana be unai sibona lasi. Lasi momokani! Taunimanima iboudiai ese Dirava ena taravatu do idia badinaia karana ia laulaulaia. Nega sisina murinai, do ia vara momokani.
Aposetolo Paulo ia gwau: “Inai bamona hereva, ‘Maino bona [noho namo] ita noho inai,’ taunimanima idia gwauraia noho neganai, [badina idia laloa sibodia idia havaraia dalana amo maino bona noho namo ia vara] karaharaga hisihisi dika momokani bona mase do ia ginidae!” (1 Tesalonika 5:3) Satana ese taunimanima ia koidia negana be edena negai do ia ore Dirava ese do ia gwauraia. Unai neganai do idia kokia bona iena siahu dekenai ia noho tanobada dikana danu do idia kokia. Unai neganai, Daniel ena peroveta hereva do ia guguru: “Unai pavapava edia negai, guba Diravana ese basileia ta do ia haginia, nega ta ai do idia hadikaia ore diba lasi gauna. Bena ena lohia siahuna do ia hanai lasi bese idauna ta dekenai. Unai basileia iboudiai do ia hamakohidia maragimaragi bona idia do ia haoredia, bena ia sibona do ia gini ela bona hanaihanai.”—Daniel 2:44.
Dirava be unai bamona ia karaia neganai unai be hahemaoro maoromaoro ia laloaboio karana, a? Lasi momokani. Idia hadikaia ore taudia be kara dika taudia sibona, idia dekenai hisihisi negana do ia mai haraga, Dirava ena hahemaoro bona ena taravatu hegeregerena unai bamona do ia karaia. Ita ia Havaraia Tauna ena hereva unai kara dekenai oi abia dae, a? Unai gau ibounai be iena imana dekenai ita rakatania diba! Iena hahemaoro henia gaukarana ese dahaka do ia havaraia? Hereva Lada-isidia ia gwau: “Kara maoromaoro taudia be tanobada do idia noholaia, bona kerere lasi taudia be ia dekenai do idia noho. To kara dika taudia be tanobada amo do idia utudia oho, bona kerere taudia be tanobada amo do idia ragadia oho.” (Hereva Lada-isidia 2:21, 22) Kara dika taudia idia boio neganai ta do ia lalo-hisihisi, a?
Maino idia hadikaia taudia be tanobada amo idia kokia neganai, tanobada ibounai dekenai taunimanima be Dirava ena Basileia ena lohia namona dainai maino bona noho namo momokani do idia abia. “Idia be lauegu ororo helagana dekenai dika do idia havaraia lasi; badina tanobada ibounai be Iehova ena diba amo do ia honu davara be ranu amo ia honudae hegeregerena.” (Isaia 11:9) Bible ena gwauhamata oi abia dae, a? Oi laloa unai gaudia be nega kahirakahira do idia vara, a? Bema oi daradara, oi ai hagoadaia unai hereva oi tahua totona. Hereva momokani be inai, taunimanima be nega daudau lalonai maino bona noho namona korikorina idia tahua, to Dirava ena dala dekenai sibona do idia davaria.
[Pictures on page 8]
Iehova ena taunimanima be hari inai negai maino momokanina bona noho namo sisina bada idia davaria