Baibel Ena Hereva Maino bona Noho Namo Dekenai

Tanobada ena toana be tanobada ibounai ia tamona ia lao bona unai be maino bona noho namo reana do ia havaraia; taunimanima momo idia laloa unai bamona do ia vara. Idia ura unai bamona karana ese tanobada namona do ia havaraia. To Bible ia hahedinaraia iseda matana amo ita itaia gaudia edia anina be ia idau.

LAUMA helaga ena siahu dainai aposetolo Paulo be hereva ta ia torea Keristen kongregesen gunana dekenai, bona unai hereva dainai Keristen taudia idia ura bada maino bona noho namo ena sivarai idia diba. Iena hereva be Bible lalonai, 1 Tesalonika 5:3 dekenai ia torea, ia gwau: “Inai bamona hereva, ‘Maino bona [noho namo] ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi do ia ginidae. Bona unai taunimanima do idia roho mauri diba lasi.” Unai siri ese henanadai badadia haida ia havaraia.

Maino bona Noho Namo Idia Vara Murinai Dahaka Do Ia Vara?

Bema atai dekenai ai torea Paulo ena hereva ma haida unai karoa dekenai oi duahia, do oi itaia “maino bona [noho namo]” idia boiboilaia taudia be Keristen taudia lasi. Idia be tanobada dekenai idia vara gaudia ena anina dekenai idia lalo-parara lasi taudia. Idia dekenai dika do ia vara to unai idia diba lasi badina idia laloa taunimanima edia noho ia namo ia lao. To Keristen taudia dekenai Paulo ia gwau: “Inai kara do idia vara ena nega korikori be umui dekenai lau torea henia lasi.” (1 Tesalonika 5:1) Oibe, Dirava ena sediual ita laloa be namo. Badina be dahaka? Badina Paulo ia gwau tanobada do ia ore haraga negana, idia gwau ia be ‘Iehova ena dina,’ do ia vara, bona do ia mai “henaoa tauna hanuaboi neganai ia mai bamona.”​—1 Tesalonika 5:2.

Idia perovetalaia maino bona noho namo ena anina be dahaka? Ia hedinarai, ia be herevahereva sibona lasi. Taunimanima be tuari idia karaia hamatamaia negana amo maino idia herevaherevalaia danu. Paulo ena hereva ese nega ta bona dala idauna dekenai tanobada besedia be maino bona noho namo do idia abia ia gwauraia. To unai be koikoi toana sibona. Bema toana be maino bona noho namo idia abia to murinai hadikaia ore negana ia vara haraga unai be maino bona noho namo korikoridia lasi.

Iesu danu be unai hadikaia ore negana ia herevalaia. Ia gwau “hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” Lagani handred haida gunanai, Iesu ia do mai lasi neganai, peroveta tauna Daniel ese unai nega ia herevalaia inai bamona: “Hekwakwanai nega dikana ta do ia vara; unai bamona hekwakwanai dikana ta be nega gunadia ai ia vara lasi bese ta ia do matamaia lasi negana amo ema bona hari, ela bona unai nega do ia ginidae.”​—Mataio 24:21; Daniel 12:1.

Herevana ita gwauraia hisihisi negana eiava idia gwauraia hekwakwanai negana, to peroveta herevadia idia hahedinaraia unai nega lalonai Satana ena tanobada oromana do ia hadikaia ore momokani. Ia hahedinaraia Dirava ese tanobada besedia do ia durudia lasi, to maino bona noho namo ena peroveta hereva ia hahedinaraia ia be maino bona noho namo do ia kokia!​—Sefania 3:8 itaia danu.

Do Ia Vara Negana Ita Diba Dalana

Taunimanima be tanobada ena lalo-tamona totona idia gaukara maino bona noho namo idia havaraia totona be Paulo ese ia perovetalaia hereva ia hagugurua, a? Inai magasin be nega momo ia hahedinaraia hegeregerena, 1914 negana amo ita be Bible ena peroveta hereva momo idia guguru kara ita itaia vadaeni; idia be Iesu ena Basileia siahuna guba dekenai ia abia idia sivarailaia. (Mataio, karoa 24, 25; 2 Timoteo 3:​1-5; Apokalupo 6:​1-8) Iesu ia hahedinaraia Iehova ena dina, kara dika taudia do idia ore haraga negana unai, be do ia matamaia inai uru taudia idia do mauri noho negana lalonai.​—Luka 21:​29-33.

Aposetolo Paulo ese nega ta ia hahedinaraia. Ia gwau: “Idia hereva noho neganai, maino bona noho namona idia abia, kara haraga dika do idia davaria.” Paulo ena hereva be unai bamona idia hahanaia The New English Bible lalonai, bona idia hahedinaraia “idia hereva noho neganai” hisihisi badana do ia vara. Hanuaboi lalonai, henao tauna ia mai bamona​—ta ese ia mai negana ia gwauraia diba lasi​—unai taudia idia do hegaegae lasi neganai edia hadikaia ore negana do ia mai, unai be taunimanima momo be sibodia edia dala dekenai maino bona noho namo idia havaraia karana idia laloa bada neganai. Unai dainai, ena be hari ita gwau diba lasi hari maino bona noho namo be Paulo ese ia perovetalaia gauna hegeregerena​—eiava unai maino bona noho namo be edena bamona ia bada ia lao unai peroveta hereva ia hagugurua totona​—to unai bamona hereva idia gwauraia momo dainai, namona be Keristen taudia be nega ibounai idia gima noho.

Tanobada Siahu Bada Besedia Idia ‘Heai’

Ia be hisihisi negana ia herevalaia neganai, peroveta tauna Daniel ese do ia vara negana ita diba dalana ta ia gwauraia. Ia hahedinaraia siahu bada besedia rua, ta idia gwauraia “north ena king” bona ta idia gwauraia “south ena king,” edia nega daudau heaina ia ore neganai, hisihisi badana do ia mai. (Daniel 11:​5-43) Tanobada Ibounai Tuarina Iharuana ia ore negana amo unai siahu bada besedia rua idia gunalaia taudia be bisinesi dalana ia goadalaia “south ena king” bona taunimanima edia siahu dalana ia goadalaia “north ena king.”

Daniel ia gwau unai siahu bada besedia rua do idia hepapahuahu bada, bona idia hanaia lagani 45 lalodiai unai ita itaia, unai be hepapahuahu taudia rua idia “heai” hegeregerena. Vanegai, unai heai karana ia maragi ia lao bamona. Unai dainai, May, 1990 lalonai, Soviet ena foreign minister ia gwau East bona West huanai ia noho politikol tuarina ia ore vadaeni. June, 1990 lalonai, Time magasin be United States bona Soviet Union idia karaia hebouna ia herevalaia, ia gwau: “Lagani haida gunanai, reana hari idia abia dae herevadia, edia gwauhamata tuari kohu bona niuklia bomu hapoua karana idia hamaragia karana, ita laloa ia vara diba lasi. To, harihari unai gwauhamata idia karaia momo neganai ita hoa lasi bamona.”

Ita diba lasi unai turana bamona karana siahu bada besedia ruaosi huanai be nega sisina sibona ia noho eiava nega daudau do ia noho, to nega ia lao murinai do ita diba. Gau tamona ia hedinarai namonamo. Iesu ese ia gwauraia negana kahirakahira ia ore. Bona tanobada dekenai idia vara gaudia idia hahedinaraia aposetolo Paulo bona peroveta tauna Daniel idia perovetalaia gaudia be nega kahirakahira do idia vara. Ena be vanegai idia vara politikol karadia be Kerisendom ena dubu ese idia durua, to idia ese maino hanaihanai do idia havaraia lasi. Ia hedinarai tanobada besedia dekenai maino bona noho namo do idia kokia.

[Pictures on page 6]

Gabeai do ia hedinarai siahu bada besedia huanai ia noho turana bamona karana be do ia noho daudau eiava lasi

[Credit Line]

USSR Mission to the UN