Edena Bamona Noho Namona Oi Ura?

TAUNIMANIMA idauidau edia lalohadai be idauidau noho namona dekenai. Haida idia laloa ia be tuari oreadia idia maino karaia neganai. Haheitalai be, tanobada ena siahu bada besedia bona edia turadia Europe dekenai be nega momo idia herevahereva hebou, bona dala idia karaia, hepapahuahu maragidia be tanobada ibounai niuklia tuarina ai ia lao garina. Stockholm International Peace Research Institute Yearbook 1990 bukana ia gwau idia hoa badina “tanobada ena gabu ma haida dekenai” ma bese haida be unai daladia idia laloa bada lasi.

To, ogogami besedia dekenai, taunimanima milion momo dekenai, “noho namona” ena anina be aniani idia abia bona muramura idia abia gorere koua totona. Politikol saiens tauna Yash Tandon ia gwau: “Taunimanima be ‘maino bona noho namona’ idia laloa neganai, idia momo be West kahana besedia edia lalohadai hegeregerena idia laloa. . . . Idia laloa ‘noho namona’ abia dalana be tuari kohu bona unai kohu gaukaralaia karana idia rakatania; idia laloa momo lasi gauna be tanobada taudia edia kahana toi amo kahana rua idia noho namo lasi badina edia aniani be lasi bona edia noho gabuna be lasi.”

Bible ia gwauhamata Dirava ena Basileia henunai tuari do ia vara lasi. “Tuari ia hadokoa ela bona tanobada dokona. Peva ia hamakohia bona io ia hakwaidua; kariota be lahi dekenai ia araia.” (Salamo 46:9; Isaia 2:4) Unai neganai gorere be do ia ore vadaeni. “Unuseniai ia noho tauna ta do ia gwau lasi: ‘Lau gorere.’ Unai tano dekenai idia noho taudia edia dika Dirava ese ia gwauatao vadaeni.”​—Isaia 33:24.

Unai Basileia henunai, mauri durua gaudia dekenai do idia dabu lasi. “Ruma do idia haginidia bena do idia noholaidia bona idia ese vine umadia do idia hadodia, bona edia anina do idia ania. Ruma do idia haginidia bena idauna ta ese do ia noholaidia lasi; bona do idia hadohado, bena idauna ta ese do ia ania lasi.”​—Isaia 65:​21, 22.

To gau badana be Basileia be maino bona noho namona ia koua ena badina do ia kokia. Nega daudau lalonai idia kwalimu lasi bona idia dagedage momo gavamanidia ia biagudia? Ena be Dirava be mai ena ura namona dainai edia kara ia koua lasi, to ita samania tauna be Satana, badina Bible ia gwau ‘tanobada ibounai be iena siahu dekenai ia noho.’​—1 Ioane 5:19.

Iseda metau do idia ore, Dirava ena Basileia henunai, Paulo ena hereva Roma taudia dekenai do idia guguru neganai, ia gwau: “Maino ia havaraia Diravana ese nega sisina [Satana] do ia moia momokani umui emui aena henuna dekenai.” (Roma 16:20) Dirava ena guba Basileiana sibona, King Iesu Keriso henunai, be unai do ia karaia diba. Unai dainai, unai Basileia henunai sibona tanobada ibounai be paradaiso ai do ia lao diba.​—Genese 1:28; Luka 23:43.

Oibe, Bible ese ia gwauhamatalaia noho namona be taunimanima ese idia havaraia toho noho namona, ia hereaia momokani. Ita duahia “mase bona lalohisihisi, bona taitai, bona hisihisi be do idia ore momokani.” (Apokalupo 21:4) Unai gwauhamata ita abia dae diba, a? Oibe, siahu ibounai Havaraia Tauna, Iehova Dirava, ese ia gwauraia, bona ia gwau danu: “Lauegu uduna amo ia lao herevana . . . do ia giroa mai kava lasi, to lau moalelaia gauna do ia hagugurua, bona ia totona lau siaia gauna ena anina do ia havaraia momokani.” (Isaia 55:11) Iehova Dirava be hari ia karaia karadia idia kwalimu noho, idia be taunimanima dekenai, moale ia havaraia mainona, noho namona, bona kohu bada negana do ia havaraia, bona unai ese Iena noho hanaihanai lohia siahuna do ia hamomokania.