Vaira Neganai Do Oi Davaria Gaudia be Dirava Eiava Siahu ta ese Ia Gwauraia Hidi Vadaeni, A?

BEMA aksiden ta ia vara to oi mase lasi, do oi laloa siahu ta ese oiemu mauri ia biagua dainai bona oi ia hebogahisi henia dainai oi mase lasi, a? Eiava do oi moale badina aksiden ia vara neganai oi mase lasi?

Aonega tauna Solomon ia gwau: “Heau helulu ai idia heau haraga taudia be idia guna lasi, bona tuari ai idia goada taudia be idia kwalimu lasi, bona aonega taudia be aniani idia ania lasi, bona lalo-parara taudia be kohu momo idia abia lasi, bona taunimanima ese diba taudia idia lalo-namo henidia lasi; badina be iboudiai dekenai nega bona kara idia vara kava sibona.” (Kohelete 9:11) Nega momo oi laloa do ia vara diba lasi gauna be ia vara: Hegeregere, oi laloa tau ta do ia uini, to bero ia davaria dainai, ma tau ta ia uini. Eiava gau ta ia vara dainai kara maoromaoro tauna ena bisinesi ia dika, bena unai ese dala ia kehoa kara koikoi tauna ena bisinesi ia bada bona ia taga totona. To Solomon ia gwau unai kara idia vara badina Dirava eiava siahu ta ese taunimanima edia mauri dekenai idia vara gaudia ia biagua dainai, a? Lasi. To unai kara idia vara badina “iboudiai dekenai nega bona kara idia vara kava sibona.”

Iesu Keriso be unai bamona ia hereva danu. Ia idia kamonai henia taudia idia diba sivaraina ta ia kikilaia neganai, ia gwau: “Siloama kohoro ese taudia 18 latanai ia moru, vadaeni idia mase. Inai taudia 18, umui be umui gwau idia edia dika be Ierusalema taudia oredia edia dika ia hanaia?” (Luka 13:4) Iesu ia gwau lasi idia mase badina siahu ta ese edia mauri ia biagua dainai, eiava unai be Dirava ena ura dainai, bona ia gwau lasi idia edia dika be ma taunimanima haida edia dika idia hanaia. Unai aksiden ia vara badina be taunimanima iboudiai dekenai nega bona kara idia vara kava dainai.

Bible ibounai lalonai hereva ta ia noho lasi ia gwau Dirava ese nega ia abia hidi ita mase totona. Momokani, Kohelete 3:​1, 2 dekenai, ia gwau: “Gau iboudiai be mai edia nega korikori, bona gaukara iboudiai guba henunai idia karaia be mai edia nega korikori: vara mai ena nega, mase mai ena nega; hadohado mai ena nega, geigei mai ena nega.” Unai siri lalonai Solomon be vaia goevadae lasi taudia edia mauri lalonai idia vara gaudia ia kikilaia. Ita vara, bona nega ia lao murinai, ita buruka neganai​—unai be iseda mauri laganidia be 70 eiava 80 neganai​—ita mase. To, do ita mase horana Dirava ese ia gwauraia hidi lasi, biru tauna be do ia “hadohado” negana eiava do ia “geigei” negana ena hora ia gwauraia hidi guna lasi hegeregerena.

Oibe, Solomon be gabeai ia hahedinaraia tau ta ia mase haraga diba, ia gwau: “Oi kara dika rohoroho lasi, bona do oi kavakava lasi; emu nega ia do ore lasi lalonai oi mase ena anina be dahaka?” (Kohelete 7:17) Unai sisiba be anina lasi bema iseda mase dinana be Dirava ese ia gwauraia hidi vadaeni bona ita haidaua diba lasi, ani? Unai dainai Bible ia hahedinaraia Dirava eiava siahu ta ese iseda mauri dekenai do idia vara gaudia ia biagua herevana be maoro lasi. Dirava idia dadaraia Israel taudia be unai hahediba koikoi be dirava koikoi tomadiho henia taudia amo idia abia dae dainai, Dirava ese idia ia hahemaoro henidia. Isaia 65:11 ia gwau: “Umui tatau be Iehova rakatania taudia, egu ororo helagana idia laloaboio taudia, Laki diravana ena pata idia hegaegaelaia taudia bona Dina Vaira Gwauraia diravana ena vine ranu habuloa taudia.”

Vadaeni, aksiden eiava kerere idia vara neganai, bema ita gwau idia vara badina siahu ta ese taunimanima edia mauri ia biagua dainai, eiava ita gwau, unai be Dirava ena ura dainai, unai be kavakava herevana! Bible ia gwau: “Dirava be lalokau,” bona taunimanima ese unai hereva momokani idia hakoikoia bona Dirava idia samania, idia gwau ia ese taunimanima edia hisihisi ia havaraia, be maoro lasi.​—1 Ioane 4:8.

Dirava Ena Ura Vaira Negana Dekenai

Vadaeni, hahemauri do ita abia diba eiava? Ita diba siahu ta ese iseda mauri dekenai do idia vara gaudia ia biagua lasi, to unai anina be iseda mauri ia heau kava bamona, a? Lasi, badina Dirava be mai ena ura taunimanima dekenai. Bible ia gwau “tanobada matamata” do ia vara bona ia lalonai “kara maoromaoro” do ia noho.​—2 Petero 3:13.

Unai bamona do ia vara totona, Dirava ese taunimanima edia kara ia koua. Ena be oi diba lasi, to reana unai ia vara totona inai guriguri oi gurigurilaia, ia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Unai Basileia be gavamani momokanina ta bona guba dekenai idia haginia vadaeni. Bema oi guriguri do ia mai totona, unai ena anina be oi ura unai Basileia ese hari tanobada ena gavamani do ia haoredia bona edia gabu dekenai do ia lohia.​—Daniel 2:44.

Vaira Negana Dekenai Oi Noho Namo Dalana

Do idia vara hoa karadia be mai anina oiemu dina vaira dekenai, bona namo eiava dika do oi davaria ena badina be siahu ta ese oiemu mauri ia biagua dainai lasi, eiava nega bona kara idia vara dainai lasi, to dala maorona oi abia hidi dainai. Siloama kohoro dekenai ia vara aksiden dikana oi laloatao. Iesu ese unai sivarai ia kikilaia badina ia ura mai anina bada herevana ta idia ia hadibaia. Unai kohoro ia moru neganai unai taudia be idia roho mauri diba lasi. To, Iesu idia kamonai henia taudia be idia roho mauri diba Dirava ese ena badu bona hahemaoro ia mailaia neganai. Iesu be inai sisiba idia ia henia: “Umui emui lalona bema umui giroa lasi, umui ibounai unai bamona do umui mase.” (Luka 13:​4, 5) Ia hedinarai goevagoeva, dina vairai totona sibodia edia dala idia abia hidi diba.

Hari inai nega lalonai danu unai bamona ita karaia diba​—kara ta ita karaia diba hahemauri do ita abia totona. (Filipi 2:12) Dirava ia ura “taunimanima ibounai ese . . . hereva momokani do idia diba.” (1 Timoteo 2:4) Bona ena be iseda tamana bona sinana dekena amo ita abia karadia be idauidau bona iseda noho be idauidau, to Dirava ese dala ia kehoa dainai ita ta ta ibounai be mai eda dala ita ura henia mauri dalana ita abia hidi totona. (Mataio 7:​13, 14) Ita be mai eda dala kara maoromaoro eiava kara kerere ita karaia totona. Ita be mai eda dala kara ta ita karaia Iehova Dirava ese ita ia lalo-namo henia totona bena mauri do ita abia, eiava Dirava ita dadaraia diba bona ita mase.

Taunimanima momo be Dirava amo idia gini siri. Edia mauri ibounai lalonai idia hekwarahi kohu, moale, eiava ladana bada idia abia totona. To Iesu ena sisiba be inai: “Umui naria namonamo, kohu dekenai do umui ura henia dikadika garina. Badina taunimanima edia mauri badina be kohu momo dekenai lasi, lasi momokani.” (Luka 12:15) Vadaeni, mauri ita abia ena badina be dahaka? Ioane Ginigunana 2:​15-17 dekenai, Bible ia gwau: “Tanobada do umui ura henia lasi, bona tanobada ena gaudia danu do umui ura henia lasi. . . . Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”

Mauri Abia Hidi Dalana

Edena bamona oi diba maoro oi ese Dirava ena ura oi karaia? Iesu ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.” (Ioane 17:3) Bible dekena amo diba momokanina abia karana ese abidadama ia havaraia. “Tau ta bema Dirava ia abidadama henia lasi neganai ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava ia mauri noho do ia abidadama henia guna. Bona unai tau ena abidadama be inai bamona, Dirava idia tahua taudia ibounai be davana namona Dirava ese do ia henidia.” (Heberu 11:6) Unai diba oi abia dalana oi davaria be ia auka lasi. Iehova ena Witness taudia ese Bible stadi karana amo taunimanima milion momo idia durudia vadaeni unai diba idia abia totona.a

Dirava do oi hamoalea totona, emu kara haida do oi haidaua be gau badana. Reana emu kara haida be idia kerere, namona be unai kara oi hamaoromaoroa, eiava bema kara dika haida oi karaia, namona be unai kara oi rakatania. To namona be oi hekwarahi noho badina unai amo emu kara oi haidaua diba. Bema oi laloa emu kara oi haidaua diba lasi, unai be taunimanima edia lalohadai, idia laloa Dirava eiava siahu ta ese mauri dekenai idia vara gaudia ia biagua bona oi haidaua diba lasi. Iehova ena heduru amo, taunimanima iboudiai be ‘edia lalona idia haidaua diba’ bona “mauri matamata” ena kara idia karaia diba. (Roma 12:2; Efeso 4:​22-24) Bema oi hekwarahi noho Dirava oi hamoalea totona, ia ese oiemu kara do ia laloaboio lasi. Ia hegaegae noho iena ura idia karaia taudia do ia hanamoa totona.

Momokani, Bible ena sivarai oi diba neganai, unai ese emu hekwakwanai ibounai do ia haoredia lasi. Dirava ena hesiai taudia korikoridia be taunimanima ibounai hegeregeredia aksiden bona dika idia davaria. To, Dirava ese ita dekenai aonega ia henia diba ita davaria dikana ita haheaukalaia totona. (Iakobo 1:5) Bona ita moale badina ita diba Dirava ida ita turana karaia momokani dainai. Hereva Lada-isidia 16:20 ia gwau: “Iehova dekenai ia abidadama tauna ia moale.”

Dirava ena Basileia henunai do ia vara lou Paradaisona lalonai, nega bona kara dainai dika do ita abia garina do ita gari lasi. Momokani, hari inai negai moale idia haorea gaudia be unai nega matamatana lalonai Dirava ese do ia kokidia. Bible ena gwauhamata ta be inai: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” (Apokalupo 21:4) Aksiden dekenai idia mase taudia momo herea be do idia toreisi lou.​—Ioane 5:​28, 29.

Dina vaira dekenai unai gabu namona dekenai do oi noho, a? Israel taudia be Gwauhamata Tanona dekenai idia vareai gwauraia neganai, Mose be idia dekenai ia gwau: “Lau ese mauri bona mase emui vairanai lau atoa, hahenamo bona hahemaoro; mauri umui abia hidi, umui bona emui natudia, umui mauri noho totona, bona emui Dirava Iehova umui lalokau henia, bona iena hereva umui kamonai henia bona ia umui badinaia; badina ia be emui mauri dala, bona ia dainai emui mauri dinadia do idia momo.”​—Deuteronomi 30:​19, 20.

Siahu ta ese iseda mauri dekenai do idia vara gaudia ia biagua lasi. Dina vaira dekenai do oi moale totona, oibe do oi mauri hanaihanai totona, oi sibona ese emu dala oi abia hidi diba. Oi ai hagoadaia mauri dalana oi abia hidi totona.

[Footnotes]

[Blurb on page 5]

Dirava idia dadaraia Israel taudia ese dirava diba lasi taudia edia hahediba idia abia dae, idia laloa siahu ta ese edia mauri lalonai do idia vara gaudia ia biagua; unai dainai hahemaoro dikana idia abia