Aksiden—Dirava Eiava Siahu ta ese Ia Havaraia Gaudia Eiava Idia Vara Kava Gaudia?
HAIRAI kekeni ladana Cristina ena gaukara be dabua ia atoa ia hahedinaraidia totona. Motuka momo idia heau dalana ladana Nove de Julho Avenue, São Paulo, Brazil dekenai ia hanaia neganai, basi ta ia mai to ia itaia lasi. Basi ia taria tauna be bereiki ia moia haraga to basi ia hastopua haraga diba lasi. Cristina ia bampa bona ia mase.
Unai aksiden ena sivarai be Brazil ena niuspepa O Estado de S. Paulo (July 29, 1990) ena rau ginigunana dekenai idia torea. To unai be mase tamona ena sivarai; Brazil dekenai lagani ta ta iboudiai aksiden dekenai idia mase taudia be 50,000. Bona ma taunimanima tausen momo be aksiden dekenai bero dikadia idia davaria to ma haida be bero ta idia davaria lasi. Dahaka dainai unai kekeni ia mase? Dirava eiava siahu ta ese ia gwauraia hidi iena mase dinana ia ginidae dainai ia mase, a?
Taunimanima momo be unai bamona idia laloa. Idia laloa vaira neganai do oi davaria gaudia be Dirava eiava siahu ta ese ia gwauraia hidi vadaeni, bona oiemu mauri lalonai do idia vara gau badadia, hegeregere do oi mase dinana, ia gwauraia hidi vadaeni. Taunimanima ese unai lalohadai idia abia dae dainai inai bamona idia hereva: “Tau ta lasi ese ena vaira neganai do ia davaria gaudia ia koua diba,” “Ena nega ia ginidae vadaeni unai dainai ia mase.” Taunimanima momo be unai bamona idia hereva, to unai hereva be idia momokani, a? Siahu ta ese iseda mauri lalonai dahaka do ia vara ia biagua bona ita be dala lasi ita koua totona, a?
Idau negai Greek bona Roma taudia danu idia laloa siahu ta ese vaira neganai do oi davaria gaudia be ia gwauraia hidi vadaeni. Hari inai negai danu, tomadiho orea momo dekenai unai lalohadai idia abia dae. Hegeregere, Islam tomadiho be Koran ena hereva ia abia dae, ia gwau: “Mai ena mauri gauna ta do ia mase kava lasi to Allah ia ura bona ia gwauraia hidi neganai sibona do ia mase.” Kerisendom oreadia dekenai danu taunimanima momo be unai lalohadai idia abia dae. John Calvin ena hahediba herevana ese unai lalohadai ia habadaia, ia gwau vaira neganai taunimanima do idia davaria gaudia be Dirava ese ia gwauraia hidi vadaeni. Unai dainai, diakono taudia be mase tauna idia taitailaia varavara taudia dekenai idia gwau unai aksiden ia vara badina unai be “Dirava ena ura” dainai.
To ita laloa maoromaoro neganai, ita diba siahu ta ese iseda mauri dekenai dahaka do idia vara gaudia ia biagua herevana be maoro lasi. Idia vara gaudia bona unai idia vara gaudia ita lalodia namonamo karana ese unai lalohadai ia hakoikoia. Gau ta be inai, motuka dekenai aksiden idia vara neganai unai be Dirava ena kara dainai idia vara lasi, badina unai aksiden ia vara ena badina idia tahua namonamo neganai, idia davaria ma gau ta ese ia havaraia. Ma danu, unai kara idia tahua taudia idia gwau bema taunimanima idia naria namonamo neganai—hegeregere motuka ena helai gauna dekenai ia noho beleta idia kwatua—aksiden dekenai reana do idia mase lasi. Bema Dirava ese vaira neganai do oi davaria gaudia be ia gwauraia hidi vadaeni, oi laloa unai bamona naria namonamo karana ese iena ura do ia koua diba, a?
Bema taunimanima idia laloa siahu ta ese edia mauri dekenai do ia vara gaudia ia biagua, idia ese dika do idia davaria diba. Nega haida kavakava karadia idia karaia, hegeregere motuka idia haheaua neganai, motuka ena sipidi bona taravatu ia gwauraia sainidia idia badinaia lasi, eiava idia inuinu kekero eiava drag idia ania neganai motuka idia taria, ani? Bona unai dika ia hanaia gauna be inai: Idia laloa Dirava ese edia mauri dekenai idia vara gaudia ia havaraia dainai, taunimanima haida ese aksiden idia abia neganai idia gwau unai be Dirava ena kerere. Idia badu bona idia diba lasi dahaka do idia karaia, bona idia laloa Dirava ese idia ia laloa lasi, unai dainai reana edia abidadama ia dekenai ia boio. Toretore tauna Ralph Waldo Emerson, ia gwau: “Mauri lalonai ia vara gau dikana be taunimanima idia laloa siahu ta ese edia mauri ia biagua eiava vaira neganai do idia davaria gaudia be ta ese ia gwauraia hidi vadaeni.”
To kerere bona aksiden idia vara ena badina ia gwauraia neganai Bible ena hereva be dahaka? Ita ia hadibaia aksiden idia vara badina siahu ta ese taunimanima edia mauri lalonai do idia vara gaudia ia biagua dainai, a? Ma danu, iseda hahemauri davaria dalana ia gwauraia, a? Ita sibona ese iseda mauri dalana ita abia hidi diba, a?
[Blurb on page 4]
“Mauri lalonai ia vara gau dikana be taunimanima idia laloa siahu ta ese edia mauri ia biagua.”—Ralph Waldo Emerson