Iseda Vaira Negana be Guna Idia Torea Vadaeni, A?

HEREVANA idia be Keristani, Muslim, Iuda, Hindu, eiava dubu ma ta taudia​—tomadiho orea iboudiai taudia be dika idia davaria bona unai dika idia lalohisihisilaia.

Hegeregere, December 6, 1997 ai, Siberia ena siti Irkutsk dekenai, dika bada herea ia vara. AN-124 peleini badana ta ia daekau neganai ena ensini rua idia dika. Unai peleini mai ena petrol bada herea be taunimanima momo idia noho gabuna dekenai ia moru diho. Lahi ese ruma badadia momo ia hadikaia bona idia noholaidia taudia momo herea ia hamasea, idia momo be kerere lasi natudia.

Siberia ai, unai aksiden ia vara gabuna dekenai, tomadiho idauidau taudia idia noho. Ena be idia haida be sibona idia gwauraia Keristani taudia, to reana idia laloa unai dika be siahu ta ena ura dainai ia vara. Reana idia bona ma haida idia laloa, ‘Ia be Dirava ena ura, bona bema unai aksiden dekenai idia mase lasi, dala ma ta ai idia mase​—ia be siahu ta ena ura dainai.’

Unai lalohadai, hereva amo idia gwauraia eiava lasi, be tanobada hegegemadai tomadiho oreadia momo lalonai ita davaria lalohadaina ia hahedinaraia​—gau iboudiai be siahu ta ena ura hegeregerena idia vara. Taunimanima momo idia laloa iseda vaira negana, ita vara negana amo ela bona ita mase negana, lalonai idia vara gaudia be dala ta ai guna idia torea vadaeni.

Unai lalohadai be dala idauidau ai ia hedinarai, unai dainai hereva haida amo ena anina ita gwauraia be auka. To reana ita gwau diba unai lalohadai be inai, idia vara gaudia ibounai bona taunimanima idia karaia karadia ibounai​—herevana idia namo o idia dika​—ita koua diba lasi; do idia vara badina siahu badana ta, ita biagua diba lasi siahuna, ese guna unai ia gwauraia hidi vadaeni. Unai lalohadai be hisiu edia toadia tahua karana ai, Hindu bona Buddha tomadiho edia karma ai, bona Kerisendom ena hahediba herevana, Dirava ese hahemauri eiava panisi do idia abia taudia ta ta ia gwauraia hidi herevana, lalonai ita davaria diba. Idaunegai Babulonia ai, taunimanima idia abia dae dirava idauidau ese do idia vara gaudia be toretore ta amo idia biagudia. Idia laloa, “do idia vara gaudia edia nadi palaka” ia dogoatao diravana ese taunimanima, basileia, bona unai dirava idauidau dekenai do idia vara gaudia ia biagua diba.

Unai lalohadai idia abia dae taudia momo idia gwau taunimanima idia do vara lasi neganai, Dirava ese idia dekenai do idia vara gaudia ibounai ia gwauraia hidi vadaeni, edia mauri ena lata, idia be tau eiava hahine, idia be taga eiava ogogami, do idia hisihisi eiava idia moale. Idia gwau unai gaudia ibounai idia do vara lasi neganai, idia be Dirava ena lalona ai idia noho eiava buka ta lalonai idia torea vadaeni. Unai dainai dika ia vara neganai, nega momo unai lalohadai ia abia dae tauna ta ia gwau, “mektoub,”​—ia torea vadaeni! Idia laloa Dirava ese dohore idia vara gaudia ibounai ia diba dainai, ia do idia kamonai henia taudia ta ta bona do idia kamonai henia lasi taudia ta ta do ia gwauraia hidi danu. Unai dainai, unai lalohadai idia abia dae taudia momo idia gwau tau ta ia do vara lasi neganai, Dirava ia gwauraia hidi vadaeni unai tau be moale hanaihanai Paradaiso ai eiava panisi hanaihanai do ia abia.

Reana oi laloa unai be Kerisendom ena dubu haida dekenai idia hadibaia herevana, Dirava ese hahemauri eiava panisi do idia abia taudia ta ta ia gwauraia hidi vadaeni herevana bamona. Unai lalohadai ia abia dae Protestan tauna badana ta be lagani 1500 murinai ia noho, dubu ena heau dalana ia ura hanamoa France tauna, John Calvin. Ia gwau unai lalohadai be “Dirava ena idaunegai taravatuna, unai amo ia ese taunimanima ta ta do ia gaukaralaia dalana ia abia hidi. Ia havaraia taudia ibounai edia noho be tamona lasi, to haida totona mauri hanaihanai ia gwauraia hidi bona ma haida totona panisi hanaihanai ia gwauraia hidi.” Calvin be ma ia gwau: “Dirava ese tau ginigunana ena moru, bona ia dainai ena natudia ibounai ese dika idia abia be guna ia diba sibona lasi; to ena ura dainai unai ia lalohadailaia.”

To, Dirava ese hahemauri eiava panisi do idia abia taudia ia gwauraia hidi lalohadaina eiava siahu idauidau ese mauri lalonai idia vara gaudia idia biagua bona ita haidaua diba lasi lalohadaina idia hadibaia dubu edia memba taudia ibounai be unai lalohadai idia abidadama henidia lasi. Idia haida be mai maoro ida idia hahedinaraia tomadiho toretoredia ese taunimanima edia ura kwalimu idia herevalaia. Oibe, momo ese taunimanima edia kara idia hepapahuahulaia bada, unai kara be tau ta ese ia abia hidi dainai eiava Dirava ese ia gwauraia hidi dainai idia karaia. Hegeregere, haida idia gwau taunimanima be edia ura hegeregerena dala ta idia abia hidi bona idia kara be maoro, badina Dirava, kara maoromaoro Diravana, ia gwau taunimanima edia kara be sibodia edia maduna bona edia kara ena davana do idia abia. Ma haida idia gwau Dirava ese taunimanima edia kara ia havaraia to dala ta ai taunimanima ese idia “abia” bona unai dainai maduna be idia edia. To, ita gwau diba, taunimanima momo idia laloa idia vara gaudia ibounai, badadia bona maragidia, be Dirava ese ia gwauraia hidi dainai idia vara.

Dahaka oi laloa? Dirava ese oiemu vaira negana ia gwauraia hidi vadaeni, a? Momokani taunimanima be mai edia ura kwalimu ida edia vaira negana idia abia hidi diba, a? Iseda kara be mai anina iseda vaira negana ai do idia vara gaudia dekenai, a? Murina herevana ese unai henanadai edia haere do ia tahua.

[Picture Credit Line on page 3]

SEL/Sipa Press