‘Iehova be Lauegu Dirava, Ia Do Lau Abidadama Henia’
WILLI DIEHL ESE INAI SIVARAI IA GWAURAIA
“Willi, dahaka dainai oi ura Betele dekenai do oi lao, a?” Lagani 1931 ai, gara lou ena nega lalonai, egu tamana lau hadibaia lau ura Betele gaukara do lau hamatamaia neganai, ia ese unai henanadai lau ia henia. Egu tamana bona sinana be Saarland dekenai idia noho, lagani ten bamona hereva momokani lalonai idia noho, bona edia natudia mero be toi, bona ai memero toi dekenai edia kara be haheitalai namo herea. Edia mauri ibounai idia henia hereva momokani ena gaukara dekenai, bona lau ura unai bamona lau karaia danu.
TO EGU tamana bona sinana be edena bamona Iehova bona ena ura helagana edia sivarai idia diba? Tomadiho badadia edia kara dainai idia moale lasi, bona nega daudau lalonai hereva momokani idia tahua. Idia be dubu badadia bona maragidia idauidau dekenai idia lao, to idia davaria idia ta ta iboudiai be dubu maorodia lasi.
Dina ta ai, taunimanima haida be pepapepa ta aiemai iduara dekenai idia rakatania. Unai pepapepa ia gwau hereva ta mai ena laulau do idia henia bona muvini piksa amo Dirava ena ura do idia hahedinaraia; unai piksa ena ladana be “Photo-Drama of Creation.” Unai “Photo-Drama” ena piksa do idia halasia ena nega be egu tamana ena moni gaukara negana, unai dainai ia lao diba lasi; to egu Sinana ia hamaoroa do ia lao be namo. Tamana ia gwau: “Reana, oi itaia gauna ta ese oi do ia durua.” Unai hanuaboi dekenai piksa ia itaia murinai, sinagu be mai moale danu ia gwau: “Hari lau davaria vadaeni! Kerukeru hanuaboi umui mai bona umui itaia. Ia be guna nega ibounai ita tahua hereva momokanina.” Unai ia vara lagani 1921 dekenai.
Egu tamana bona sinana be horoa Keristen taudia bona edia abidadama ia goada ela bona idia mase. Nazi taudia ese nega momo dibura rumana dekenai idia atoa murinai, egu tamana be lagani 1944 dekenai ia mase, bona Sinagu be lagani 1970 dekenai ia mase. Nazi gavamani ena nega lalonai, ia danu be nega daudau dibura rumana dekenai ia noho.
Egu Tamana bona Sinana Idia Gaukara Goadagoada
Idia do mase lasi neganai, egu tamana bona sinana be haroro gaukara idia goadalaia. Lagani 1922 ia lao 1928 dekenai hebouhebou dekenai idia karaia gwaubou herevadia be pepapepa dekenai idia torea, bona Sinagu be mai goada danu unai pepapepa ia hariharilaidia. Ecclesiastics Indicted, [“Dubu Taudia Samania Herevana”], lagani 1924 dekenai idia karaia gwaubou herevana, ese dubu gunalaia taudia edia kara kerere ia hahedinaraia. Gari lasi taudia sibona ese unai pepapepa idia hariharilaidia. Pablisa taudia be daba kahana 4 o’clock dekenai idia toreisi bona idia lao taunimanima edia ruma edia iduara henunai unai pepapepa idia atodia totona. Ena be lauegu lagani be 12 sibona, to egu tamana bona sinana idia gwau unai gaukara lau karaia diba danu. Nega momo daba kahana 5 o’clock dekenai ai hamatamaia bona baisikele amo hora toi eiava hani ai heau ela bona gabu daudau ena teritori ai davaria. Ai ginidae neganai, baisikele be uda dekenai ai hunidia, bona haida ese unai hanua dekenai idia haroro neganai, lau ese unai baisikele lau naridia. Adorahi kahana dekenai baisikele amo emai ruma dekenai ai giroa lao, bona hanuaboi dekenai hora tamona ai raka lao hebou dekenai.
Gabeai, lauegu lagani henunai merona ta ese baisikele ia naridia bona lau be pablisa taudia ida lau lao haroro totona. To, dahaka do lau hereva, ta ese lau ia hadibaia lasi. Idia be lau idia hamaoroa edena gabu dekenai do lau haroro, unai sibona! Egu kudouna be ia hetaha bada herea lalonai, rege lasi dekenai lau ese ruma ginigunana lau raka henia, bona lau laloa namona be ta ia noho lasi. To madi, tau ta ese iduara ia kehoa. Lau gini sibona, lau hereva diba lasi. Lau hereva namonamo lasi bona egu baege dekenai ia noho buka ta lau duduia henia. Unai tau ia gwau: “Unai be Judge Rutherford ia karaia bukana, a?” Lau daradara bona lau gari dainai lau haere henia namonamo lasi, bena ia gwau: “Ia be buka matamatana ta, lau do abia lasi gauna ta, a?” Lau haere henia, lau gwau: “Oibe, ia be matamatana ta.” Ia gwau: “Vadaeni, lau abia be namo. Ena davana be hida?” Unai ese lau ia hagoadaia do lau gaukara noho totona.
Lagani 1924 lalonai, tadikaka bona taihu badadia be lagani 1925 idia herevalaia momo. Nega ta, ai be Bible Student taudia edia ruma dekenai ai lao, bona lau kamonai tadikaka ta ia henanadai, ia gwau: “Bema Lohiabada ese ita ia abia daekau guba dekenai, iseda natudia be edena bamona?” Sinagu ia daradara lasi to ia haere henia, ia gwau: “Lohiabada ia diba edena bamona do ia naridia.” Unai sivarai ese egu lalona ia veria. Lau ura diba ena anina be dahaka? Lagani 1925 ia matamaia bona ma ia hanai lao, bona gau ta ia vara lasi. To, egu tamana bona sinana ese edia haroro gaukara idia goadalaia noho.
Tamagu Ena Aonega Sisibana
Vadaeni, lagani 1931 dekenai, egu tamana lau hadibaia dahaka lau ura karaia. Lau ia nanadaia, ia gwau: “Dahaka dainai oi ura Betele dekenai do oi lao?” Lau haere, lau gwau: “Lau ura Iehova ena hesiai gaukara do lau karaia.” Egu tamana ma ia gwau: “Bema oi idia abia dae Betele dekenai oi gaukara totona, gau ta oi laloa be namo. Tadikaka be idia goevadae lasi bona nega haida idia danu be idia kerere; unai oi diba, a? Unai do oi itaia dainai, Betele do oi rakatania bona emu abidadama do oi haboioa garina lau gari. Namona be Betele gaukara oi lalohadailaia namonamo.”
Egu tamana ena hereva dainai lau hoa dikadika, to dina haida lalodiai unai hereva lau lalohadailaia namonamo murinai, egu tamana lau hadibaia lou lau ura Betele gaukara lau karaia totona aplikeisini pepana do lau atoa. Egu tamana ia gwau: “Lau oi hadibaia lou, dahaka dainai oi ura lao?” Ma lau gwau lou: “Lau ura Iehova ena hesiai gaukara do lau karaia.” Bena egu tamana ia gwau: “Natugu e, unai oi laloaboio lasi. Bema oi idia boiria Betele dekenai, oi lao ena badina oi laloatao. Bema unuseniai kerere ta oi itaia, oi lalo-hekwarahi bada lasi. Ena be edia kara oi dekenai be ia kerere, to oi heau boio lasi. Namona be Betele dekenai oi lao ena badina be nega ibounai oi laloatao: Badina be oi ura Iehova ena hesiai gaukara oi karaia! Namona be oi idia henia gaukarana oi karaia namonamo bona Iehova oi abidadama henia.”
Vadaeni, November 17, 1931 dekenai, adorahi kahanai, Bern, Switzerland lalonai, lau be Betele dekenai lau ginidae. Lau bona tadikaka toi be daiutu tamona lalonai ai mahuta, bona egu gaukara be printa gabuna dekenai. Printa masini maragina lau gaukaralaia, bona egu imana amo masini dekenai pepa lau atoa dalana be lau idia hadibaia. Lau printaia gaudia ginigunadia ta be Romania gado Gima Kohorona magasin.
Guba amo Ia Mai Sivaraina Ta!
Lagani 1933 dekenai, Society ese buklet ta ladana The Crisis idia halasia, bona ia lalonai guna United States dekenai Tadikaka Rutherford be reidio amo ia henia herevadia toi idia torea. Branch naria tauna, Tadikaka Harbeck, be daba aniani neganai Betele taudia ia hadibaia unai buklet be dala idauna dekenai do idia hariharilaidia. Peleini maragina do idia rentalaia bona Bern hanua ataiai ia roho lao neganai, tau ta be ia dekena amo unai buklet ena sivarai pepapepadia do ia negea diho, bona pablisa taudia be dala dekenai do idia gini, unai buklet be idia raka hanai taudia dekenai idia hariharilaidia totona. Branch naria tauna ia gwau: “Umui tadikaka memero amo daika ia ura peleini dekenai ia lao? Bema oi ura lao, namona be hari ai oi hadibaia.” Lau ura lau lao, bona gabeai Tadikaka Harbeck ese Betele taudia ia hadibaia lau idia abia hidi.
Unai mai anina bada dinana dekenai, karton haida ai atoa motuka dekenai bona ai heau lao peleini gabuna dekenai. Unai karton lalonai pepapepa momo idia noho. Peleini dekenai lau guia bona taria tauna murinai lau helai, bena pepapepa be lau kahirakahira helai gabuna dekenai lau haboudia hegaegae. Lau idia hadibaia herevana be inai: Unai pepapepa 100 100 be do lau kumidia hebou, bona peleini ena uindo amo do lau tahodia goadagoada. Bema lau tahodia goadagoada lasi idia be peleini ena murina kahana dekenai do idia kamokau, bona unai ese hekwakwanai do ia havaraia diba. To lau karaia neganai hekwakwanai ta ia vara lasi. Gabeai, tadikaka idia gwau ‘guba amo ia mai sivaraina’ idia itaia neganai, idia moale bada herea. Unai gaukara be ia namo, bona ena be taunimanima haida be telefon amo ai idia rini henia bona idia maumau badina unai pepapepa be edia uma palaoapalaoa idia koua dainai, to tadikaka ese unai buklet momo idia hariharilaidia.
Hesiai Gaukara Iboudiai Dainai Lau Moale
Betele ena hesiai gaukara ese lau ia hamoalea dainai, dina ta ta iboudiai lau ese Iehova lau tanikiu henia. Kongregesen lalonai gaukara be lau idia henia, hebou iboudiai vairanai Kingdom Hall ena iduara lau kehoa totona helai gaudia lau atodia maoromaoro totona, bona hereva do ia henia tauna ena pata dekenai galasi mai ranuna lau atoa totona. Lau idia henia gaukarana lau laloa bada.
Betele rumana lalonai, gabeai flatbed printa masini badana ta lau gaukaralaia; unai masini dekenai The Golden Age (hari unai be Noga!) magasin Polish gado dekenai ai printaia. Lagani 1934 ai, phonograph masini (unai be rekod ia gadaralaia masini) ai gaukaralaidia matamaia, bona lau heduru unai masini karaia totona. Bible ena hereva be rekod dekenai idia atoa, bona masini dekenai ai gadaralaia taunimanima idia kamonai henia totona. Lau moale ruma ta ruma ta dekenai unai gaukara lau karaia dainai. Ruma taudia momo ese unai masini idia itaia neganai idia ura ena heau dalana idia itaia, bona nega momo ruma bese taudia iboudiai idia mai idia kamonai henia totona, to nega sisina murinai ta ta idia raka oho. Iboudiai idia raka oho neganai, lau be ma ruma ta dekenai lau lao.
Tuari Negana Lalonai Hesiai Gaukara Lau Karaia Noho
Tanobada Ibounai Tuarina Ginigunana murinai, lauegu hanua Saarland be German gavamani ena siahu amo idia kokia, bona League of Nations ese ia naridia. Unai dainai, Saarland be sibodia edia loaloa gwaumaoro pepadia idia karaia. Lagani 1935 ai, unai hanua taudia iboudiai idia vouti, gavamani ia ura diba hanua taudia be German gavamani ena siahu henunai idia ura giroa lao eiava lasi. Unai neganai, lau ese egu ruma bese taudia lau vadivadi henidia, badina lau diba bema Saarland taudia be Nazi gavamani henunai do idia lao, lau be dala lasi unai bamona do lau karaia totona. Bona lauegu lalohadai be ia maoro, badina murina lagani momo lalodiai, lau ese egu tamana bona sinana eiava egu tadina haida amo hereva ta lau davaria lasi.
Ena be Switzerland be Tanobada Ibounai Tuarina Iharuana lalonai ia vareai lasi, to tuari dekenai German gavamani be ia kahirakahira tanodia ta ta ia abidia neganai, Switzerland idia koua hegege. Ai be Europe tanodia iboudiai totona buka bona magasin ai printaia, Germany ena mo sibona ai printaia lasi, to idia oda gaudia ai siaia diba lasi. Unai nega lalonai, branch naria tauna be Tadikaka Zürcher, bona ai ia hadibaia moni be kahirakahira ia ore bona namona be Betele murimuri ai moni gaukara do ai karaia ela bona gau ibounai idia hegeregere lou. To lau sibona lau noho, badina idia ura unai hanua ena pablisa taudia totona gau haida do lau printaia. Pablisa edia namba be tausen tamona bamona.
Aiemai Betele taudia be July 5, 1940 dinana do idia laloaboio diba lasi. Dina tubua aniani ai haorea murinai, ami taraka ta be ia mai. Ami taudia idia diho bona Betele rumana dekenai idia heau vareai. Ai idia oda henia ai gini bona ai mareremarere lasi, bona ai ta ta ibounai badinai mai ena ipidi ami tauna ta idia gini, ai idia gadi henia totona. Ai ibounai idia doria lao aniani daiutuna lalonai, bena ruma ena daiutu ibounai dekenai idia lao gau ta idia tahua totona. Gavamani taudia idia laloa ai ese taunimanima ai hadibaia ami gaukara do idia dadaraia totona, to unai hereva hamomokania pepadia idia davaria lasi.
Tuari laganidia lalodiai, lau be Thun bona Frutigen kongregesen edia naria tauna. Unai anina be Saturday bona Sunday dekenai lau bisi bada herea. Saturday ta ta iboudiai, dina tubua aniani murinai, egu baisikele latanai kilomita 50 lau heau ela bona Frutigen hanua dekenai, bona unuseniai, hanuaboi kahanai, lau ese Gima Kohorona Stadi lau naria. Sunday dabai lau be pablisa taudia lau bamodia haroro gaukara dekenai. Bena, adorahi kahanai, lau lao Interlaken hanua dekenai Kongregesen Buka Stadi lau naria totona, bena murinai lau lao Spiez hanua dekenai ruma bese ta danu Bible stadi lau karaia totona. Murinai, dina ena gaukara lau haorea totona, lau lao Thun hanua dekenai Gima Kohorona Stadi lau naria totona.
Hanuaboi momokani dekenai, egu gaukara ibounai lau haoredia murinai, Bern hanua lau giroa henia lalonai, mai moale ida ane lau abia bona lau uisili. Motuka momo lau davaridia lasi. Tuari dainai ruma ena diari idia koua, unai dainai unai gabu ena ororo maragidia be dibura dekenai idia noho; unai be maino bona regerege ta lasi gabuna, hua sibona ese nega ta ta dekenai unai ororo ia hadiaridia. Saturday bona Sunday dekenai unai gaukara lau karaia dainai, lauegu mauri ia hanamoa bona lau ia hagoadaia danu!
Ta Ia Vadivadi Bena Hoa Gauna Ta Ia Vara
Lagani 1945 dekenai, autumn ena nega lalonai, Tadikaka Knorr ese ai ia vadivadi henia. Dina ta ai ia be faktori dekenai ia vareai neganai, lau be printa masini latanai lau gini. Ia boiboi, ia gwau: “Oi diho mai! Oi ura Gilead School dekenai oi lao, a?” Lau hoa dikadika. Lau haere henia, lau gwau: “Bema oi laloa lau hegeregere, lau ura lau lao.” Vadaeni, lagani 1946 dekenai, gara lou ena nega lalonai, revareva ta ese ai ia hadibaia Tadikaka Fred Borys, Taihu Alice Berner, bona lau idia boiria mai. To, lau be Saarland dekenai lau vara dainai, lau be loaloa gwaumaoro pepana lau abia lasi bona unai dainai Washington, D.C., U.S.A. dekenai revareva lau siaia visa idauna ta lau abia totona.
Idia boiria taudia ma haida be nega korikori dekenai idia lao, to lau naria noho egu revareva idia haerelaia totona. September 4 dekenai, unai sikuli idia hamatamaia neganai, lau be Switzerland dekenai lau do noho, bona lau laloa do lau lao diba lasi. Bena U.S. Consulate ese lau ia rini henia, bona ia gwau lauegu visa ia mai vadaeni. Kara haraga laolao dalana lau tahua, bona ami taudia idia guia boutina dekenai lau guia, unai bouti be Marseilles ia rakatania bona ia heau lao New York dekenai. Lau hoa momokani! Unai bouti ena ladana be Athos II, bona taunimanima momo herea idia guia. Taunimanima momo idia mahuta diba daiutuna dekenai mahuta patana ta lau idia henia. Davara dekenai ai heau lao ena dina iharuana lalonai, bouti ena mota daiutuna dekenai gau ta ia pou dainai bouti ia hastopua. Idia guia taudia bona kuru taudia danu idia gari, idia laloa bouti do ia mutu. Unai ese dala ia kehoa lau be toreisi lou sivaraina idia dekenai lau harorolaia totona.
Dina rua murinai bouti ena mota idia hanamoa bona ma ai heau lao, to bouti ena sipidi idia hamaragia sisina. Dina 18 murinai ai be New York dekenai ai ginidae, to bouti amo ai diho diba lasi badina uopu taudia be idia straiki bona edia gaukara idia karaia lasi. Idia herevahereva namonamo murinai, ai be bouti amo ai diho diba. Lau ese Society lau hadibaia dahaka ia vara, bona loaloa gwaumaoro pepadia idia sekea gabuna amo lau raka lasi neganai, tau ta be lau dekenai ia mai bona ia gwau: “Oi be Mr. Diehl, a?” Ia be Tadikaka Knorr ena heduru tauna ta, bona train dekenai lau ia atoa, unai train be hanuaboi dekenai ia heau Ithaca hanua dekenai, unai be Gilead School kahirakahira dekenai. Murina dina dekenai, dabai 8 o’clock murinai lau ginidae. Unuseniai lau ginidae dainai bona tano idauidau taudia Gilead klas ginigunana dekenai lau vareai dainai, lau moale bada herea.
Hekwakwanai Idia Vara Neganai Lau Haheauka
Gilead klas namba 8 idia hadokoa February 9, 1947 dekenai, bona taunimanima iboudiai idia laloa momo. Ai be edeseniai do idia siaia? Lau “egu dala be gabu namodia amo ia lao” ena anina be lau idia siaia Wiesbaden, Germany dekenai, unuseniai Society be printa gabu matamatana ta idia kehoa. (Salamo 16:6) Lau giroa Bern hanua dekenai, Germany dekenai do lau vareai totona loaloa ena gwaumaoro pepadia lau tahua, to United States ena ami taudia Germany dekenai ese idau taudia edia vareai dalana idia koua; tuari do lasi neganai Germany dekenai idia noho taudia sibodia idia vareai diba. Lau be unuseniai lau noho lasi dainai, lau vareai diba lasi. Unai dainai Brooklyn hedikwota ese ma gabu ta dekenai lau idia siaia. Lau idia siaia Switzerland dekenai sekit gaukara lau karaia totona, bona Iehova lau abidadama henia momokani dainai, unai gaukara lau ura karaia. To, unai gaukara do lau hamatamaia lau naria noho lalonai, lau idia hamaoroa idia vadivadi taihu toi be Betele rumana dekenai do lau hakaudia lao, Betele idia itaia totona. Idia ta ena ladana be Marthe Mehl bona ia be pioneer taihuna ta.
May 1949 ai, lau ese Bern ena branch opesi lau hadibaia lau hegaegae Marthe do lau adavaia totona, bona ai ura nega ibounai hesiai gaukara do ai karaia noho. Dahaka idia gwau? Idia gwau regular pioneer gaukara sibona ai karaia diba, gaukara idauna ta ai karaia diba lasi. June 1949 lalonai ai headava murinai, unai gaukara be Biel dekenai ai hamatamaia. Lau be tok lau henia diba lasi, bona ena be aiemai sekit tauna ese gwaumaoro ia henia vadaeni, to idia gwau hebouhebou dekenai do idia mai taudia edia noho rumadia tahua gaukarana ai karaia diba lasi. Tadikaka momo ese ai dekenai hanamoa herevadia idia henia lasi, bona ena be ai be pioneer taudia, to ai idia kara henia hegeregere ai be orea murimurinai idia atoa taudia bamona.
To, ai diba ai headava neganai, Bible ena taravatu ai utua lasi, unai dainai ai guriguri heduru ai abia totona, bona Iehova dekenai ai abidadama henia noho. Ai idia kara henia dalana be Society ena ura lasi. To haida be Society ia henia heduru hereva idia badinaia kerere dainai unai kara idia karaia.
Tadikaka Knorr Ia Giroa Mai
Lagani 1951 dekenai, Tadikaka Knorr be Switzerland dekenai ma ia vadivadi henia lou. Ia ese hereva ta ia henia murinai, lau idia hadibaia ia ura lau ia hereva henia. Mai egu gari sisina ida ia dekenai lau lao, to lau ia moale henia dainai egu gari ia ore. Ia gwau Geneva dekenai misinari rumana ta do idia haginia, bona ia ura diba unuseniai do ai lao eiava lasi. Mai moale danu ai ura, to ai lalohisihisi sisina Biel do ai rakatania dainai. Murina dinana dekenai, Tadikaka Knorr ese hereva ma ta ia siaia. Ai ia nanadaia, ai ura sekit gaukara do ai hamatamaia lou, badina Switzerland dekenai unai gaukara be ia heau namonamo lasi dainai? Ai ura ai karaia. Hanaihanai lau idia henia gaukarana lau ura karaia.
Switzerland ena east kahana dekenai ai karaia sekit gaukarana amo hahenamo momo ai davaria. Kongregesen ta ta ai lao henidia totona train ai guia, aiemai kohu ibounai be maua rua lalodiai ai huaia. Nega momo, mai edia baisikele ida, tadikaka be train station dekenai ai idia naria. Unai nega lalonai, idia momo lasi be mai edia motuka. Lagani momo murinai, tadikaka ta ese motuka ai idia henia ai gaukaralaia totona, bona unai ese aiemai gaukara ia durua bada.
Hoa Gaudia Matamatadia Haida
Lagani 1964 dekenai, ai moale badina lau bona egu adavana idia boiria mai Gilead ena klas namba 40 dekenai; unai be ena hua ten klas ginigabena bona, gabeai unai kosi idia hakwadogia hua 8 dekenai. Marthe be ia hekwarahi English gado do ia diba haraga totona. To, unai gado ia dibaia namonamo. Klas taudia ese edeseniai ai do idia siaia be idia herevalaia momo. To, lauegu lalohadai be inai: ‘Lau idia siaia gabuna be herevana, to lau ura lasi opesi gaukara lau karaia!’
Lau ura lasi gauna ia vara unai! September 13, 1965 ai, sikuli ena kosi ai haorea neganai, lau idia hadibaia lau be Switzerland ena branch naria tauna dagina lau idia henia. Marthe be Betele gaukara dekenai ia manada lasi. Lau dekenai, anina be “Dirava ena Ruma” dekenai do lau giroa lou; to lagani 1931 ia lao 1946 lau karaia printa gaukarana lau karaia lou lasi, to opesi gaukara lau karaia. Ena be lau be lau diba lasi matamata gaudia momo lau diba gwauraia, to Iehova ena heduru dainai unai gaukara lau karaia diba.
Egu Gaukara Lau Laloa Lou
Lagani 60 lalodiai lau be nega ibounai hesiai gaukara lau karaia, bona unai nega ibounai lalonai Iehova dekenai lau abidadama henia, egu tamana ese lau ia sisiba henia bamona. Bona Iehova ese lau dekenai hahenamo momo ia henia. Lau lalohisihisi neganai eiava egu gaukara ia metau herea neganai, Marthe ese lau ia hagoadaia, lau ia durua bada, bona Iehova dekenai ia abidadama danu.
Gaukara ena maduna idauidau lau karaia diba dainai Iehova lau hanamoa bada! Thun dekenai lau be Branch Komiti coordinator gaukara lau do karaia noho, bona nega haida lau loaloa zone gaukara lau karaia totona. Herevana lau idia hadibaia dahaka do lau karaia totona, lau be Iehova dekenai lau guriguri lau ia hakaua totona. Ena be nega momo lau kerere bona gau haida lau karaia namonamo lasi, to lau diba Keriso dekena amo Iehova ese lauegu kerere ia gwauatao vadaeni. Lau ura dikadika ia ese lau do ia lalo-namo henia noho. Bona lau ura ia ese lau ia hakaua, badina hanaihanai lau gwau: “Oi be lauegu Dirava, oi lau abidadama henia.”—Salamo 91:2.
[Picture of Willi and Marthe Diehl on page 25]
[Picture on page 27]
Tadikaka Diehl Betele gaukara ia karaia hamatamaia neganai