“Iena Hebogahisi be Ai Dekenai Ia Bada”

JOSÉ VERGARA OROZCO ESE IA SIVARAILAIA

Oi laloa oiemu lagani be 70 neganai gaukara matamata ta do oi karaia diba, a? Lau dekenai unai bamona ia vara. Bona lagani 35 gunana ai unai ia vara.

Iehova ena hebogahisi dainai, lagani 1962 ena amo, lau be regular pioneer tauna, bona lagani 1972 ena amo, lau be elda tauna ta Iehova ena Witness taudia edia El Carrizal Kongregesen, Jalisco, Mexico dekenai. Lauegu sivarai sisina umui lau hadibaia.

LAU BE August 18, 1886 neganai, Michoacán, Mexico, dekenai lau vara. Lauegu tamana be Mason tauna, unai dainai aiemai ruma bese be Katolik Dubu dekenai ai lao lasi, bona ai be Katolik tomadiho karadia ai karaia lasi bona aiemai ruma lalonai tomadiho laulaudia be lasi.

Lauegu lagani be 16 neganai, lauegu tamana be United States dekenai ia lao gaukara totona, to dala ia karaia tau ta be moni gaukarana ta lau ia hadibaia. To, lagani rua murinai, unai tau be lau ia abia lao Mexico City dekenai tuari sikuli dekenai lau tereini karaia totona. Unai murinai lau be Mexico tuari orea dekenai lau gaukara.

Tuari Orea Dekenai bona Unai Murinai

Lagani 1910 lalonai ia hamatamaia Mexico Ena Gwau-Edeede Tuari Badana dekenai lau tuari. Tuari sikuli dekenai ai matamata tataudia iboudiai be Francisco I. Madero ai durua, ia be Porfirio Di̇́az ena dagedage gavamani dalana ia inai henia tuari tauna ta. Ela bona lagani 1913 ai ia mase neganai ai be Madero ai durua, bona unai murinai ai be Venustiano Carranza ai durua, ia be Mexico Republic ena presiden, lagani 1915 ia lao 1920 lalonai. Ai idia gwauraia Carranzistas taudia.

Nega hani lau be tuari orea lau rakatania toho, to lau karaia diba lasi. Gabeai lau heau siri bona hehuni dekenai lau noho. Unai dainai, lauegu tamana, Mexico dekenai ia giroa vadaeni, idia hadiburaia. Dina ta, lau koikoi lau gwau lau be iena tadikaka ena natuna bamona, bona dibura rumana dekenai ia lau vadivadi henia. Ai be pepapepa maragidia dekenai aiemai herevahereva ai torea gadi taudia be aiemai hereva idia kamonai lasi totona. Lau be unai pepa lau ania badina lau ura lasi ta ia diba lau be daika.

Dibura amo lauegu tamana ia raka siri murinai, lau ia vadivadi henia bona lau ia hamaoroa siahu taudia dekenai lau lao. Lau karaia, bona lau hoa badina jeneral ese lau ia dogoatao lasi. To, ia gwau namona be United States dekenai lau lao. Iena hereva lau badinaia bona lagani 1916 ia lao 1926 lalonai unuseniai lau noho.

Lagani 1923 lalonai, lau be United States dekenai ia noho Mexico hahine ta lau adavaia. Lau be ruma haginia gaukarana dekenai diba lau abia, bona ai be kekeni maragina ta ai abia, ia be aiemai heubu natuna. Ia be hua 17 ia abia neganai, Mexico dekenai ai giroa lou bona Jalpa, Tabasco, dekenai ai noho. Bena ‘Cristero gwau-edeede karana’ ia matamaia, bona idia karaia noho lagani 1926 ia lao 1929 dekenai.

Cristero taudia idia ura lau be idia danu lau lao. To lauegu ruma bese bona lau ai ura Aguascalientes State dekenai ai heau siri. Mexico republic ena gabu idauidau dekenai ai noho murinai, ai be 1956 lalonai Matamoros, Tamaulipas, dekenai ai noho bona unuseniai ruma haginia gaukara haida lau biagua.

Lauegu Mauri Ia Idau

Unai neganai lauegu mauri ia idau. Lauegu natuna kekeni, ia headava vadaeni bona Brownsville, Texas, U.S.A. dekenai ia noho, be nega momo ai ia vadivadi henia. Dina ta ia gwau: “Tamagu, hanua ena hebou rumana dekenai ruma bese momo idia hebou. Ita lao bona idia karaia gauna ita itaia.” Unai be Iehova ena Witness taudia edia hebouhebou ta. Lauegu natuna kekeni, lauegu ravana, lauegu tubuna mero, lauegu adavana, bona lau be unai hebouhebou ena dina hani dekenai ai lao.

Unai lagani amo, ai be Iehova ena Witness taudia edia Keristen heboudia ai lao. Mexico dekenai lauma dalana dekenai lau goada lau lao, bona United States dekenai lauegu natuna kekeni be unai bamona ia lao. Nega sisina murinai lau ida idia gaukara taudia dekenai lau diba Bible hereva momokanidia lau hadibaia. Lau be Gima Kohorona bona Noga! magasin ta ta iboudiai lau abia, bona lau ida idia gaukara hebou taudia dekenai lau hariharilaidia. Opesi dekenai idia gaukara taudia ima bona enjinia taudia toi bona gaukara taudia ma haida danu be Witness taudia ai idia lao.

December 19, 1959 sinavai lalonai lau bapatiso neganai, ia keru bada herea! Unai dina ai idia bapatiso taudia iboudiai be ranu ia keru bada herea dainai gorere idia abia. Lauegu natuna kekeni be bapatiso ia abia guna, bena lau be gabeai, bona lauegu hahine, ena be bapatiso ia abia lasi, to Bible ena hereva momokani dekenai diba ia abia, bona ai ida ia gaukara hebou namonamo.

Nega Ibounai Hesiai Gaukarana

Lau be iena hebogahisi dainai Dirava dekenai lau moale bada herea, unai dainai February 1962 lalonai, lauegu lagani be 75 neganai, lau be nega ibounai hesiai gaukarana lau karaia, pioneer gaukara lau hamatamaia neganai. Lagani haida murinai, 1968 neganai, lauegu hahine ia mase. Lau ura ma tano ta dekenai hesiai gaukara lau karaia, to lauegu lagani be momo dainai, tadikaka idia laloa unai bamona be aonega lasi. To, 1970 neganai, Colotlán, Jalisco gabuna ai lau idia siaia lau pioneer totona, unuseniai be kongregesen maragina ta ia noho.

September 1972 neganai, sekit naria tauna ia gwau namona be hanua maragina, El Carrizal, Colotlán kahirakahira ai lau lao. November, unai lagani lalonai, kongregesen be unuseniai idia hamatamaia, bona lau idia abia hidi elda dagina lau abia totona. Ena be unai be daudau momokani hanuana ta, to taunimanima 31 be kongregesen heboudia ai idia lao.

Ena be lau buruka, to haroro dekenai lau gaukara noho, bona lau hekwarahi bada taunimanima lau durudia edia abidadama idia tahua namonamo totona. Hegeregere, Rosary idia karaia neganai, idia ura namo idia karaia Katolik taudia momo be Hail Mary hereva idia karaia loulou: ‘Maria e, oi ai hanamoa, oi be namo herea; Lohiabada be oi dekenai ia noho.’ Unai guriguri ena hereva ma ta be: ‘Maria Helagana, Dirava ena Sinana.’ Lau be idia dekenai lau henanadai, lau gwau: ‘Edena bamona unai ia vara diba? Bema Dirava be Maria ia hamauria tauna, edena dala ai nega tamona Ia be iena natuna danu?’

Hari lau be lagani 105 bona El Carrizal, Jalisco, dekenai kahirakahira lagani 20 lalonai elda bona regular pioneer gaukara lau karaia. Lau laloa Iehova ena ura dainai lagani momo lalodiai lau mauri noho, badina guna nega bada lau haboioa bona lau ura unai nega lau haorea iena gaukara dekenai.

Lau davaria gauna ta be inai: Namona be nega ibounai ita diba iseda Atai Momokani Hahemaoro Henia Tauna be iena kara maoromaoro terona amo ita ia raraia noho bona ita dabulaia gaudia iboudiai ia henia. Salamo 117:2 ia hereva bamona, ia gwau: “Iena hebogahisi be ita dekenai ia bada.”