Tanobada Ibounai Noho Namo Totona Palani Do Idia Kwalimu, A?
MAGASIN ta, One World, ia gwau: “Lagani 40 lalodiai East bona West huanai ia noho hepapahuahu be Dirava ena heduru dainai ia ore”; unai magasin be WCC (World Council of Churches) edia magasin. Anglican toretore tauna, John Pobee, World Council of Churches ena Programme on Theological Education tauna ta, ia gwau: “Central bona Eastern Europe dekenai idia vara gau badadia . . . dainai reana Europe bona tanobada ibounai dekenai maino bona noho namona do ia vara diba.”
World Council of Churches taudia sibona lasi to ma haida danu idia laloa Dirava ese taunimanima edia palani ia durudia tanobada ibounai ia noho namo totona. April 1991 lalonai, Persian Gulf tuarina nega sisina murinai, Pope John Paul be unai neganai United Nations ena seketere-jeneral, Javier Peréz de Cuéllar, dekenai hereva ta ia siaia, ia gwau: “Middle East bona West dekenai Katolik Dubu ena bisop taudia idia moale United Nations ena gaukara dekenai . . . Idia ura United Nations bona ena orea idauidau amo hari ia vara tuarina dainai idia dabu taudia be tanobada taudia iboudiai amo hebogahisi bona heduru do idia davaria.”
Ma danu, Vatican ena gavamani be ma gavamani 34 ida 1975 Helsinki Gwauhamata bona 1986 Stockholm Document pepana idia saini. United Nations be 1986 ia gwauraia “Tanobada Ibounai Maino Laganina” neganai, pope ese tanobada ena tomadiho badadia iboudiai edia hesiai taudia haida ia boiridia idia be “Tanobada Ibounai Maino Gurigurilaia Dinana” idia karaia hebou totona. October 1986 lalonai, Buddhist, Hindu, Islam, Shinto, Anglican, Lutheran, Greek Orthodox, Iuda, bona ma tomadiho haida edia hesiai taudia haida idia helai hebou Assisi, Italy, dekenai, bona idia iboudiai be edia nega edia nega ai tanobada mainona idia gurigurilaia.
Lagani haida murinai, Roma dekenai ia haroro neganai, Anglican ena Archbishop of Canterbury be unai negana ia laloa. Ia gwau: “Assisi dekenai, ai itaia Rome ena Bishop [pope tauna] be Keristen Dubudia ia haboudia diba. Ai guriguri hebou diba, ai hereva hebou diba bona maino bona taunimanima edia namo totona ai gaukara hebou diba . . . Unai neganai tanobada ibounai mainona totona ai guriguri bona lauegu mamina be Dirava vairanai lau gini, ia gwau ‘Itaia! Lau be gau matamatana ta lau karaia.’ ”
Ena be ma tomadiho haida be taunimanima idia siaia lasi Assisi hebouna dekenai, to idia danu idia laloa taunimanima edia palani tanobada ibounai ia noho namo totona be do idia kwalimu diba. South Africa ena Dutch Reformed Church ena dubu magasin, Die Kerkbode, ia gwau: “Hari ita be tanobada matamatana negana dekenai ita hanai. Lagani haida gunanai ita laloa unai gauna ia vara diba lasi to hari iseda matana vairanai ia vara. Tanobada ena kahana ibounai dekenai Soviet Union bona West idia turana lou karana ena anina be bada gabu momo dekenai. Aiemai gabu dekenai, guna idia inai heheni taudia bona idia hepapahuahu heheni taudia be hari idia herevahereva hebou, bona gabu ibounai dekenai taunimanima momo idia ura bada ‘maino’ idia karaia . . . Namona be Keristen taudia iboudiai idia laloa dahaka dala idia noho taunimanima be maino idia abia totona. Iseda nega lalonai maino ia vara totona ita guriguri diba.”
Dirava ese taunimanima edia palani tanobada ibounai noho namona abia totona ia durua, a?
Bible be Dahaka Ia Gwau?
Taunimanima edia gaukara dekenai tabekau henia karana dekenai, Bible be inai sisiba maorona ia henia: “Pavapava umui abidadama henia lasi; taunimanima natuna danu umui abidadama henia lasi, ia be goada lasi. Ena laga ia doko neganai ia giroa lou tano dekenai, unai dina ai iena lalohadai ia ore.” (Salamo 146:3, 4) Hari inai negai maino idia havaraia toho be lalo-goada ia havaraia diba reana. To ita laloa namonamo. Taunimanima edia siahu be mai ena hetoana. Nega momo, idia vara gaudia idia koua diba lasi. Nega momo taunimanima idia lalo-parara diba lasi dahaka ese taunimanima edia kara ia haidaua diba hehuni dekenai ia noho siahuna idia diba lasi, unai siahu ese edia palani namodia ia hadikaia.
Lagani 700 Iesu ena nega ia do mai lasi neganai, peroveta tauna Isaia ena nega lalonai, Iuda bese gunalaia taudia be idia kahirakahira idia noho besedia ida gwauhamata idia karaia hebou, noho namo totona edia palani idia karaia; idia karaia dalana be hegeregere hari inai negai ia vara karana hegeregerena. Unai nega ai danu, tomadiho biagudia ese politikol taudia edia kara idia durua. To Isaia ena sisiba be inai, ia gwau: “Palani ta umui karaia, to gau ta do ia vara lasi! Hereva ta umui karaia, to emui hereva do ia gini lasi.” (Isaia 8:10) Edia palani be murinai ia dika momokani. Hari inai nega lalonai unai bamona gauna ia vara diba danu, a?
Oibe, ia vara diba, badina unai peroveta tauna amo, Dirava ia gwau Ia be Iena dala ai sibona tanobada dekenai noho namona do ia havaraia. Ia be, taunimanima edia orea amo lasi, to Israel pavapava David ena bese amo ia mai tauna dekena amo do ia havaraia. (Isaia 9:6, 7) King David ena bese amo ia mai Tauna be Iesu Keriso; Pontio Pilato ese ia henanadai henia neganai ia gwau ia be King ta, to ia gwau: “Lauegu Basileia be inai tanobada gauna lasi.” (Ioane 18:36; Luka 1:32) Iesu ena Basileia be guba gauna. Ia be United Nations oreana eiava tanobada ena politikol besena ta lasi, to unai guba gavamani sibona ese do ia noho hanaihanai, noho namo korikorina, hari tanobada dekenai do ia mailaia.—Daniel 2:44.
Iesu Keriso ia peroveta, ia gwau iena Basileia be guba dekenai do ia lohia hamatamaia neganai tanobada dekenai “tuari ena regena bona tuari ena sivarai” idia kamonai, unai be ‘bese ta ia toreisi bese ta ia tuari henia bona basileia ta be basileia ta ia tuari henia’ neganai. Unai peroveta herevana ia guguru dainai ita diba unai be 1914 ai ia vara bona unai nega amo ema bona hari be ‘tanobada dokona ena nega.’—Mataio 24:3, 6-8.
Unai ena anina be dahaka? Anina be hari tanobada ena nega be ia kwadogi, bona nega kahirakahira do ia ore. Unai be lalo-hekwarahi eiava lalohisihisi gauna, a? Lasi, badina hari tanobada ena hisihisi havaraia karadia, ena hahemaoro maoromaoro lasi karadia, ena dagedage karadia, ena tuari, bona ena hisihisi iboudiai ita itaia vadaeni. Iseda metau iboudiai do idia ore momokani neganai do ita moale, unai negana be Dirava ena Hereva, Bible, ese ia herevalaia lohia tauna henunai ita noho neganai bona ia gwau: “Iehova ena Lauma do ia diho mai, aonega bona lalo-parara laumana, sisiba bona goada laumana, diba bona Iehova gari henia laumana.”—Isaia 11:2.
Noho Namona Momokani Tanobada Dekenai
Hereva momokanina be tanobada dekenai noho namo momokanina do ia havaraia lasi ela bona Dirava ena Basileia henunai, Isaia ena peroveta hereva be tanobada ibounai dekenai do ia guguru, ia gwau: “Lau ese guba matamatana bona tanobada matamatana lau karaia, gau gunadia do idia laloa lasi bona edia kudouna dekenai do idia vara lou lasi.” (Isaia 65:17) Herevana tomadiho gunalaia taudia be hari tanobada totona guriguri hida idia karaia, to taunimanima edia palani tanobada ibounai dekenai, noho namona idia havaraia totona be do idia vara lasi, to Dirava ena dala ai sibona maino bona noho namo do ia vara.
Tanobada ibounai dekenai, Dirava ena Basileia ese do ia noho hanaihanai noho namona do ia havaraia be namo herea momokani. Bible lalonai unai nega be inai bamona ia herevalaia, ia gwau: “Idia ese edia tuari kaia be tano geia auridia ai do idia halaoa, bona edia io do idia hodoa au rigidia utua pakosidia do idia halaoa. Edia tuari kaia do idia abia isi lou lasi, bese ta bese ta tuari henia totona, bona tuari daladia do idia hadibaia lou lasi. Bona momokani, ta ta ena vine au bona ena fig au henunai do idia helai, bona tau ta ese idia do ia hagaria lasi; badina be tuari orea badana gunalaia Diravana Iehova ena uduna ese ia gwauraia.”—Mika 4:3, 4.
Dirava ese ia gwauraia noho namona sibona do ia noho hanaihanai bona unai sibona ita tabekau henia diba. Unai dainai, lohia taudia dekenai ita tabekau henia lasi, to Dirava ita tabekau henia be namo, ani? Unai neganai do ita davaria salamo torea tauna ena hereva ia momokani, ia gwau: “Iakobo ena Dirava ese ia durua tauna ia moale, iena helaro be ena Dirava Iehova dekenai. Iehova ese guba bona tanobada bona davara ia karaia bona lalodiai idia noho gaudia iboudiai ia karaia.”—Salamo 146:5, 6.
[Box on page 7]
Katolik Dubu bona Tanobada Ena Politikol Kara
“Ena be Keriso ia gwau iena basileia be ‘inai tanobada gauna lasi,’ to dagi bada dubu taudia bona pope edia orea be Constantine ena nega amo tanobada ibounai bona bese ta ta edia politikol hepapahuahu dekenai idia vareai momo.”—The Catholic Church in World Politics, Profesa Eric Hanson, Jesuit Santa Clara University tauna.