Duahia Taudia Edia Henanadai

Heberu 9:16 ia gwau gwauhamata karaia tauna ia mase guna be namo bena gwauhamata do ia momokani diba. To Dirava ese gwauhamata matamatana ia karaia, bona ia mase lasi. Unai dainai edena dala ai unai siri dekenai ita lalo-parara diba?

Heberu 9:​15-17 dekenai ita duahia, ia gwau: “Unai dainai Keriso ese taravatu matamatana ia haginia, bona taunimanima durua totona ia be Dirava vairanai ia gini noho. Keriso ia mase taunimanima do ia hamauria totona, bona edia kerere, taravatu gunana lalonai idia karaia gaudia do ia kokia totona. Unai dainai Dirava ena boiboi idia kamonai henia taudia ibounai ese Dirava ia gwauhamatalaia mauri hanaihanai do idia abia. Inai gwauhamata ese Dirava ena natuna ibounai do ia hanamoa. Tau ta ia do mase lasi neganai gwauhamata pepana ta do ia torea. Inai gwauhamata ena anina be, ia mase neganai iena natuna ese iena kohu do ia abia. Vadaeni, gabeai iena natuna ia ura unai pepa dekenai ia gwauhamatalaia kohuna do ia abia neganai, ia ese iena tamana ena mase taunimanima vairanai do ia hamomokania guna, ani? Unai gwauhamata pepana be ia siahu lasi ela bona gwauhamata karaia tauna ia mase vadaeni. Bema tau ta ia mauri noho neganai iena gwauhamata pepana be ia noho kava, anina lasi.”a

Iehova be taravatu matamatana Havaraia Tauna. Ieremia 31:​31-34 dekenai, Dirava ia peroveta ia sibona be iena taunimanima ida unai gwauhamata matamatana do ia karaia. Aposetolo Paulo be unai siri amo ia hereva Heberu 8:​8-13 dekenai, bona unai ese ia hahedinaraia Paulo ia diba, momokani, Dirava be unai gwauhamata helagana ia karaia.

To, Heberu karoa 9 dekenai, Paulo be unai gwauhamata matamatana dainai Iesu ia karaia gaukara idauidau ia herevalaia. Keriso be unai gwauhamata ena Hahelaga Tauna Badana dainai ia mai. Ma dala ta dekenai, Iesu be gwauhamata matamatana ena boubou; “Keriso ena rarana” sibona be “iseda lalona do ia hagoevaia anina lasi boubou karadia dekena amo.” Keriso be unai gwauhamata Naria bona Gaukaralaia Tauna, guna Mose ese Taravatu ia naria bona ia gaukaralaia hegeregerena.​—Heberu 9:​11-15.

Paulo ia gwau mase ta ese Dirava bona taunimanima huanai idia vara gwauhamata iboudiai ia hamomokanidia. Taravatu ena gwauhamata be unai ena haheitalai ta. Mose be unai gwauhamata ena naria bona gaukaralaia tauna, ia be Dirava bona tanobada Israel besena edia huanai unai gwauhamata ia haginia. Unai dainai Mose be gaukara badana ta ia karaia bona unai gwauhamata dekenai idia vareai neganai Israel taudia ia durudia bada. Unai dainai ita gwau diba Iehova ese ia havaraia Taravatu gwauhamatana be tanobada tauna Mose ese ia karaia. To Mose ese iena mauri rarana ia bubua Taravatu gwauhamatana ena anina ia vara totona, a? Lasi. Animal idia bouboulaidia, Mose ena rara lasi to animal edia rara idia gaukaralaia.​—Heberu 9:​18-22.

To Iehova bona lauma Israel besena huanai ia noho gwauhamata matamatana be edena bamona? Iesu Keriso ena dagi hereana be ia be huanai ia gini tauna, Iehova bona lauma Israel taudia edia huanai ia be Maino Karaia Tauna. Ena be Iehova ese unai gwauhamata ia havaraia, to Iesu Keriso be unai gwauhamata ena badina. Ia be Maino Karaia Tauna sibona lasi, to Iesu be tanobada ai ia noho neganai unai gwauhamata dekenai idia vareai guna taudia ida ia gaukara hebou. (Luka 22:​20, 28, 29) Ma danu, ia be hegeregere unai gwauhamata hamomokania boubouna ia henia totona. Unai boubou be animal boubou gaudia lasi to goevadae tanobada tauna ta ena mauri. Unai dainai Paulo ese Keriso ia gwauraia diba gwauhamata matamatana ia karaia tanobada tauna. Gabeai “Keriso ese . . . guba dekenai ia raka vareai. Unuseni Dirava ena vairanai, ita durua totona ia gaukara noho,” bona unai amo gwauhamata matamatana ia hamomokania.​—Heberu 9:​12-14, 24.

Mose bona Iesu be tanobada gwauhamata karaia taudia ia herevalaidia neganai, Paulo ia gwau lasi idia ruaosi ta ta be unai gwauhamata ruaosi idia havaraia, badina Dirava ese unai gwauhamata rua ia havaraia. To, unai tanobada taudia rua be maino karaia taudia dainai idia be unai gwauhamata ruaosi karaia totona idia gaukara bada. Bona unai gwauhamata rua dekenai, mase ia vara be maoro​—Mose ena gabu dekenai animal idia mase, bona Iesu be gwauhamata matamata taudia dainai sibona ena mauri rarana ia henia.

[Footnotes]