Hereva Badana Ta
Hakaua Oreana Ena Komiti Edia Heduru
Iehova ena Witness taudia edia Hakaua Oreana ena memba taudia be 12, bona mai edia abidadama edia dagi gaukarana idia do karaia noho. Nega ibounai idia moale badina taunimanima “hutuma bada herea” be mai edia goada danu idia gaukara hebou dainai. (Apokalupo 7:9, 15) Tanobada ibounai dekenai orea ia tubu bada herea dainai, ai laloa nega ia ginidae ma haida ese Hakaua Oreana taudia idia durudia totona. Unai dainai dala ai hegaegaelaia, hutuma bada herea taudia dekena amo heduru taudia haida ai abidia hidi totona, bena idia ese Hakaua Oreana ena Komiti idauidau lalonai do idia helai vareai, unai be Personnel, Publishing, Service, Teaching, bona Writing Komiti. Unai anina be unai komiti ta ta lalodiai idia vareai taudia edia namba do idia habadaia 7 eiava 8 dekenai. Hakaua Oreana ena komiti taudia edia hakaua siahuna henunai unai heduru taudia ese idia danu hereva do idia kikilaia hebou bona komiti taudia ese do idia henia gaukaradia do idia karaia. Inai dala matamatana do idia karaia hamatamaia May 1, 1992 dekenai.
Idia hanai lagani momo lalodiai, idia horoa Witness orena taudia edia namba be idia diho idia lao, to hutuma bada herea taudia edia namba be idia bada idia lao, bona unai ai hoalaia bamona. (Isaia 60:22) Orea ia tubu bada dainai Iehova ita tanikiu henia bada! Lagani 1931 ai, mai moale danu Iehova ena Witness ladana matamatana ita abia, bona unai nega lalonai Basileia pablisa taudia edia namba be 39,372, bona kahirakahira idia iboudiai idia gwau idia be Keriso ena horoa tadikakadia. (Isaia 43:10-12; Heberu 2:11) Lagani 60 murinai, lagani 1991 ai, tanobada ibounai dekenai pablisa taudia edia namba be 4,278,820, bona unai amo 8,850 sibona idia gwau idia be horoa orena taudia. Bible ia hereva hegeregerena, harihari “hutuma bada herea” taudia edia namba be “orea maragi” taudia edia namba ia hereaia, taunimanima 480 480 amo orena taudia be 1 1 sibona. (Luka 12:32; Apokalupo 7:4-9) Ia bada ia lao Basileia gaukarana idia naria neganai, orena taudia idia moale hutuma bada herea taudia danu idia gaukara hebou bona edia heduru idia abia dainai.
Inai Gima Kohorona ena sivarai ese ia hahedinaraia hegeregerena, hari inai nega lalonai orea ta ese lauma Israel taudia idia durudia, idia be gunaguna Iuda orena taudia danu Babulono amo idia giroa lou Nethinim taudia bona Solomon ena hesiai taudia edia tubudia bamona; unai Israel lasi taudia edia namba be idia giroa lou Levi taudia edia namba idia hereaia. (Esera 2:40-58; 8:15-20) Hari inai negai, hutuma bada herea taudia dekena amo “henia taudia” be Keristen ena lo taudia, unai be branch naria taudia, sekit bona distrik taudia, bona tanobada ibounai dekenai idia noho kongregesen 66,000 idia naria taudia.
Vanegai, tanobada ibounai dekenai Kingdom Ministry School idia karaia kongregesen naria taudia bona hesiai taudia idia hadibadia totona. United States lalonai, naria taudia 59,420 ese unai hebou dekenai idia lao. Unai sikuli ese “gunalaia taudia” ia durudia edia gaukara do idia karaia namonamo totona.—1 Petero 5:1-3; Efeso 4:8, 11 itaia danu.
Iehova ena Witness taudia edia Brooklyn hedikwota dekenai, unai “henia taudia” haida be lagani momo herea hesiai gaukara idia karaia. Idia haida be gaukara naria lo taudia, idia be hutuma bada herea taudia, bona edia aonega be bada. Unai dainai, Hakaua Oreana ese unai bamona naria taudia haida idia abia hidi Hakaua Oreana ena komiti edia hebou dekenai do idia helai vareai bona idia heduru totona. Unai taudia haida be orea dekenai hesiai gaukara idia karaia daudau taudia sibona lasi. To, idia be lo taudia, Keristen dalana idia diba taudia bona idia hegeregere gaukara haida idia karaia namonamo totona. Ita gwau lasi komiti taudia danu idia gaukara hebou dainai idia ese lada bada dagina idia abia. Badina Iesu ese ena hahediba taudia dekenai ia gwau, “umui ibounai be tadikaka.” (Mataio 23:8) To, unai taudia dekenai gaukara bada do idia henia, unai dainai idia dekena amo “gau momo do idia tahua.”—Luka 12:48.
Hari inai nega lalonai, Iehova ena orea ia bada ia lao dainai ita moale bada. Idia ore lagani ten lalodiai, haroro gaukara idia karaia taudia edia namba be kahirakahira 100 pesen amo ia bada daekau, unai be peroveta herevana David Badana, Iesu Keriso, dekenai ia hagugurua, ia gwau: “Iena Lohia siahuna habadaia karana bona maino do idia doko lasi.” (Isaia 9:7) Unai Nethinim taudia ese hahelaga taudia danu idia gaukara hebou Ierusalem ena haba idia hanamodia totona, bona unai hegeregerena, hari inai nega lalonai, Iehova ena orea dekenai peroveta herevana be ia guguru, ia gwau: “Idau bese taudia ese emui magu do idia haginia.” (Isaia 60:10; Nehemia 3:22, 26) Hari inai nega lalonai, Nethinim bamona taudia be mai edia goada danu tomadiho momokanina ena gaukara idia habadaia bona Iehova ena tanobada ibounai oreana dekenai idia henia gaukaradia idia karaia “Iehova ena hahelaga taudia” idia durudia totona, unai dainai idia ai hanamoa bada.—Isaia 61:5, 6.