Gilead School Taudia be Harihari Gauna, Misinari Gaukara Unai, Idia Abia Dae
WATCHTOWER Bible School of Gilead ena klas namba 92 edia sikuli taudia 22 be, March 1, 1992 ai, harihari gauna ta idia abia dae—misinari gaukarana idia abia dae. Unai klas taudia ia hereva henidia neganai, Hakaua Oreana tauna ta, Lloyd Barry, ia gwau: “Ai ura unai harihari gauna namo hereana be mai moale bada danu umui abia dae, bona ai ura umui gaukaralaia ma haida dekenai moale oi mailaia totona.”
Betele taudia bona idia boiridia mai taudia 4,662 be Jersey City Assembly Hall, New Jersey dekenai, idia hebou unai sikuli taudia be edia setifiket idia abia totona. Watch Tower Society ena New York gaukara gabudia Brooklyn, Wallkill, bona Patterson dekenai tadikaka 970 be telefon amo hereva idia kamonai henia. Sikuli taudia be sisiba idia abia edia harihari gauna, misinari gaukarana, do idia laloa bada totona bona aonega dalanai idia gaukaralaia totona; iboudiai idia kamonai namonamo.
Unai program ia kehoa neganai, ane namba 155, “ ‘Umui ta ta Umui Abia Dae’!” idia abia goadagoada. Unai murinai, iboudiai edia kudou ia marere badina Gilead Sikuli ena presiden, lagani 98 tauna, Frederick W. Franz, ese mai kudouna ibounai ida guriguri ia henia. Bena seamani tauna, Hakaua Oreana tauna, Carey Barber, be iboudiai dekenai heabidae herevana ia henia bona ia gwau: “Harihari Gilead misinari taudia momo ita abia be namo.” Iena hereva murinai, ia gwau heduru hereva kwadogidia haida do idia kamonai.
Betele Ruma Komiti tauna ta, Curtis Johnson, ia hereva guna, bona iena sinado be, “Emu Uma Oi Naria Namonamo.” Tadikaka Johnson ia gwau unai misinari matamatadia be idia siaia gabuna dekenai idia ginidae neganai, idia ta ta iboudiai be lauma dalana dekenai mai edia uma do idia naria totona. (1 Korinto 3:9) Tanobada hegegemadai Iehova ena taunimanima be lauma dalana dekenai idia be uma ta bamona, bona tanobada besedia iboudiai vairadiai kara maoromaoro bona hanamoa karadia idia hatubudia. (Isaia 61:11) Hereva tauna ia gwau, ‘Gabeai oiemu uma lauma dalana dekenai bema oi naria namonamo oiemu misinari gaukara unai gabuna dekenai do oi kwalimulaia diba.’ Dahaka ese do ia durudia lauma dalanai edia umana idia naria namonamo totona? Hereva tauna ia gwau: ‘Iehova be magu bamona oiemu uma lauma dalana dekenai do ia koua hegege. Bema oi ura momokani kara namodia oi hatubua, guriguri dalana amo ia kahirakahira oi noho, bena oiemu guriguri hegeregerena ai oi gaukara.’
Unai murinai, Lloyd Barry ena hereva be, “Hanaihanai Lohiabada Oi Moalelaia.” (Filipi 4:4) Ia be lagani 25 lalonai Japan dekenai misinari gaukara ia karaia, unai dainai heduru hereva sikuli taudia dekenai ia henidia idia ese edia harihari gauna, misinari gaukarana, idia moalelaia totona. Ia gwau: ‘Do umui davaria Dirava ena hesiai gaukarana umui moalelaia neganai unai ese umui do ia durua do umui davaria lalo-hekwarahi bona reana emui tauanina hekwakwanai gaudia umui hanaia totona.’ (Hereva Lada-isidia 17:22) Ia be sikuli taudia ia hadibaia lou, reana do idia itaia bona do idia vara karadia be guna idia manadalaia gaudia hegeregeredia lasi. Reana gado matamatana ta do idia diba. ‘Do umui hekwarahi unai gado do umui diba namonamo totona. To taunimanima ida edia gado dekenai umui herevahereva hebou namonamo neganai, unai ese emui moale do ia habadaia.’
Faktori Komiti tauna ta, Eldor Timm, be unai murinai inai hereva ia henia, “Oi Tahua Gauna Oi Itaia Noho.” Unai tahua gauna be dahaka? Mauri hanaihanai! Ita abia totona namona be iseda matana amo ita raraia namonamo. Hereva henia tauna be Keristen taudia edia heau helulu mauri idia abia totona bona Keristen taudia ginigunadia edia negai edia heau helulu gadara karana ia hahegeregeredia bona edia idau karadia ia herevalaidia. Unai heau helulu taudia bamona, Keristen taudia be tauanina idia hagoadaia momo, taravatu idia badinaia, bona metau gaudia iboudiai idia negea. To heau helulu gadara idia karaia taudia amo idia idau, Keristen taudia be edia mauri ibounai lalonai idia heau helulu bona idia tahua ahuna be hanaihanai do ia noho gauna. Ia kwalimu tauna be tamona sibona lasi, to mauri ena heau helulu idia karaia ore taudia iboudiai be davana do idia abia. Tadikaka Timm ena hereva dokona be inai: ‘Mauri davana ita abia totona namona be Iehova, unai davana ia Henia Tauna, ida maino dekenai ita noho. Bona Iehova ida ita maino hebou totona, namona be iseda tadikaka ida maino dekenai ita noho hebou.’
Hakaua Oreana tauna ta, Milton Henschel, be unai murinai inai hereva ia henia, “Bible amo Heduru Hereva Ita Abia Dainai, Helaro Ita Abia.” (Roma 15:4) Hereva tauna ia gwau, ‘Idia hanai hua ima lalodiai umui be Bible ena hereva umui stadilaia momo. Hari umui hetura namonamo. Emui helaro ia goada. Emui haroro gabudia ai umui lao neganai, mani emu kara emui helaro ia goada ena badina umui laloatao. Ia goada badina be Bible dekenai umui tabekau momokani.’ Iseda helaro ia havaraia Bible sivaraina ta ia gwauraia tauna be Hahemaoro Taudia karoa 6 ia lao 8 ia herevalaia, unai sivarai ia hahedinaraia edena dala ai Gideon be gaukara ia abia Israel taudia be Midian edia dagedage amo ia ruhadia totona. Unai sivarai bona ena anina hari inai nega lalonai ia herevalaia murinai, ia gwau: ‘Umui be Bible ena hereva umui tahua momo neganai bona unai gaudia umui laloa neganai, unai ese emui lalona ia hanamoa. Umui gari lasi mamina ia havaraia.’
Iboudiai idia ura momokani sikuli ena hadibaia taudia badadia rua be dahaka sisiba do idia henia sikuli taudia dekenai. Jack Redford ia hereva guna, iena sinado be “Kara Maorona Oi Karaia.” Ia be sikuli taudia ia hadibaia lou: ‘Gilead dekenai Bible dekena amo umui idia hadibaia namonamo dahaka be maoro. Do umui lao gabu idauidau dekenai mai ena hekwarahi misinari gaukara karaia totona. Bona ai diba reana umui be hekwakwanai haida do umui davaria. To ena be unai do ia vara, bona herevana emui mamina be edena bamona, to ai diba umui be kara maorona do umui karaia diba.’ Dahaka ese idia do ia durua? Gau tamona be, ma haida dekenai lalohadai maoromaorona umui abia. Hereva tauna ia gwau: ‘Namo lasi umui ura goevadae lasi taudia be goevadae karadia idia karaia.’ Hekwakwanai idia vara neganai umui lalohadai namonamo bona umui ese idia do umui durudia diba danu. Ia gwau, ‘Ita ibounai be iseda mauri lalonai mai iseda nega namodia bona nega dikadia. Ita iboudiai be nega namodia ai ita hegeregere. To nega dikadia lalonai bema umui hegeregere, unai ese do ia hahedinaraia misinari gaukara do umui haheaukalaia diba.’—Iakobo 1:2-4.
Sikuli ena rekod ia naria tauna, Ulysses Glass, be inai sinado ia herevalaia, “Gabeai Totona Dahaka Helaro Ia Noho?” Tamana bamona ia hereva, ia be sikuli taudia ia hagoadaia edia helaro ia hururu namonamo noho totona. (Hereva Lada-isidia 13:12) Ia gwau, ‘Reana helaro ia boio hamatamaia karana ita reaia diba. Reana idia vara gaudia dainai ita sibona do ita laloa momo diba bona iseda turana karana Dirava ida ita laloaboio diba. Reana do ita gorere eiava ita laloa ma haida ese ita idia kara dika henia. Reana haida edia kohu ia bada to iseda kohu be momo lasi, eiava haida be haroro gaukara dekenai huahua momo idia havaraia dainai do ita mama diba. Bema metairametaira unai gaudia dainai ita lalohisihisi, nega sisina murinai Basileia do ia vara momokani helarona be iseda kudou bona lalona dekenai do idia boio diba, bona reana mauri ena heau helulu dekenai do ita haheauka lasi.’ Dahaka do ita karaia diba? Hereva tauna ia gwau: ‘Gau ta do ita karaia iseda helaro ita hamatamataia lou be gau badana. Namona be iseda lalona bona kudouna be Dirava ena gwauhamata momokanidia amo ita hahonua bona Dirava ena Basileia do ia vara momokani ita laloa nega ibounai. Bona namona be Iehova ida herevahereva hebou dalana ita hamatamaia lou, badina unai be momokani moale do ia havaraia.’
Hakaua Oreana tauna ta, Karl Klein, be sikuli haorea herevana ia henia. Iena sinado be “Dahaka Dainai Ita Manau Karaia?” Bona unai henanadai ena haere be dahaka? Iena hamatamaia herevana dekenai ia gwau, ‘Badina unai be kara namo bona kara maoromaorona, aonega bona lalokau karana.’ Kamonai taudia idia hakala namonamo ia ese ita do ita tohotohodia manau karadia hani ia gwauraia neganai: (1) Iehova Dirava be Abraham bona Mose ia kara henidia manau momokani dalana dekenai (Genese 18:22-33; Numera 14:11-21; Efeso 5:1); (2) Iesu Keriso be ‘sibona ia hamanaua bona Dirava ia kamonai henia ela bona hisihisi auna dekenai ia mase’ (Filipi 2:5-8; 1 Petero 2:21); (3) aposetolo Paulo, be ‘mai lalo-manau bada ida Lohiabada ia hesiai henia’ (Kara 20:18, 19; 1 Korinto 11:1); bona (4) ‘ita idia gunalaia taudia,’ hegeregere Society ena presiden ginigunana, Tadikaka Russell, be nega ta ia torea, ia gwau: “Lohiabada be mai moale ida gaukara ta ita ia henia, bona iseda diba sisina ia gaukaralaia gaukara matamatana ta ita karaia totona lasi, to ita be gaukara ita karaia lou, ita hanamoa, bona ita hatamonaia.” (Heberu 13:7) Tadikaka Klein be ita manau be namo ena badina badadia ma haida ia gwauraia. Momokani, unai sisiba, idia manau totona, ese sikuli taudia ia durudia edia harihari gauna, misinari gaukarana, be aonega dalana ai idia gaukaralaia totona!
Unai hereva iboudiai murinai, seamani be tanobada gabu idauidau amo hanamoa herevadia ia duahia. Nega ia ginidae sikuli taudia be edia setifiket pepadia idia abia totona. Idia be tano 7 amo idia mai—Canada, Finland, France, Mauritius, Netherlands, Sweden, bona United States. To edia misinari gaukara be tano 11 dekenai do idia karaia—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey, bona Venezuela.
Idia laga-ani sisina murinai, Hesiai Dipatmen Komiti tauna, Joel Adams, be Gima Kohorona stadi amo adorahi ena gaukara ia hamatamaia. Unai murinai, sikuli taudia be haheitalai amo edia sikuli negana lalonai idia davaria haroro ekspiriens haida idia hahedinaraia. Bena gau ginigabena be, Why Respect Theocratic Order? (Dahaka Dainai Tiokratik Gaukara Dalana Oi Matauraia be Namo?) ena drama idia karaia kamonai taudia iboudiai, bona sikuli taudia danu, edia diba habadaia totona.
Momokani, unai sikuli taudia be tano idaudia ai idia lao neganai sisiba bona hagoadaia hereva namodia idia abia lao, bona unai amo edia harihari gauna, misinari gaukarana, idia gaukaralaia idia sibodia bona ma haida dekenai moale idia mailaia totona.
[Chart on page 22]
Sikuli Ena Lista
Edia tano idauidau: 7
Idia lao henia tano idauidau: 11
Sikuli ena kosi idia karaia taudia: 22
Edia lagani ena averes: 33.4
Orea lalonai noho laganidia ena averes: 16.7
Nega ibounai hesiai gaukara idia karaia laganidia ena averes: 11.8
[Picture on page 23]
Gilead Ena Watchtower Bible Sikuli Ena Klas Namba 92 Taudia
Henuna dekenai laini ta ta dekenai idia gini tadikaka bona taihu edia ladana be vairana kahana amo bona laurina kahana amo idia torea lao.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.