Idia Hagoadaia Hesiai Gaukara Idia Karaia Totona
DAHAKA ese headava taudia 24 ia hagoadaia diba edia mauri ena goada negana lalonai edia ruma bese, turadia, bona idia manadalaia gabuna do idia rakatania bona idau tanodia ai misinari gaukara do idia karaia? Dahaka dainai idia moale Papua New Guinea bona Taiwan, Africa bona Latin-American tanodia dekenai danu idia lao totona? Idia ura gabu matamata idia itaia totona, a? Lasi. To, Dirava bona edia dekena tauna lalokau henia karana ese idia ia doria.—Mataio 22:37-39.
Unai taudia be daidia? Idia be Watchtower Bible School of Gilead ena klas namba 109 idia haorea taudia. Saturday, September 9, 2000 ai, Watchtower Educational Center—Patterson, New York dekenai—bona ma gabu haida ai idia hebou taudia 5,198 be lalokau sisibana idia kamonai, unai be sikuli idia haorea taudia ia durua misinari taudia namodia ai do idia lao totona.
Program ena seamani be Stephen Lett, Iehova ena Witnes taudia edia Hakaua Oreana ena Hadibaia Komiti tauna ta. Iena hamatamaia herevana be Mataio 5:13 amo, “Umui be tanobada taunimanima edia damena.” Tadikaka Lett ia gwau Iesu ena hereva be kosi idia haorea taudia dekenai ia momokani. Hegeregere, damena be aniani ena mamina ia hanamoa. Misinari taudia danu be edia haroro gaukarana lalonai anina namona idia havaraia neganai, laulau dalanai idia be unai damena bamona.
Hagoadaia Herevadia
Bena Tadikaka Lett ese lagani daudau lalodiai Iehova idia hesiai henia taudia haida ia boiria, idia ese Buka Helaga amo mai anina hereva kwadogidia idia henia. Hereva ia henia tauna ginigunana be John Wischuk, Toretore Dipatmen dekenai ia gaukara. Iena sinado be Salamo 117 amo, “Salamo Kwadogina ese Misinari Gaukara Urana Ia Hagoadaia.” Hari inai negai, tanobada hegegemadai “bese” bona “taunimanima” dekenai Iehova bona ena Basileia idia harorolaia be gau badana. Stiuden taudia ia hagoadaia Salamo 117 ia gwauraia herevana idia hagugurua totona, ma haida idia hamaoroa “Lohiabada do umui hanamoa.”
Bena, seamani ese Hakaua Oreana tauna Guy Pierce ia boiria. Iena sinado be “Kara Haida Oi Haidaua, to Oi Gini-Goada.” Dirava ena Hereva be ia gini auka gauna. Deuteronomi 32:4 ai, Iehova Dirava be ia gwauraia Nadi Badana, to iena Hereva ia torea gado bona kastom idauidau ibounai totona—oibe, taunimanima ibounai totona. Stiuden taudia ia hagoadaia Dirava ena Hereva idia harorolaia, bena iena sivarai ese taunimanima edia kudouna bona edia lalona do ia veria. (2 Korinto 4:2) Tadikaka Pierce ia gwau: “Kara maoromaoro taravatudia umui badinaia, to emui kara haida umui haidaua be namo. Emui gaukara do umui karaia gabuna ai idia noho taudia umui laloa maragi lasi badina edia kastom be idau.”
Karl Adams, Gilead ena hadibaia tauna ta bona hedikwota dekenai kahirakahira lagani 53 ia gaukara tauna, ese inai lalona veria herevana ena sinado “Inai Gabu Umui Rakatania Murinai be Edeseni Do Umui Lao?” ia henia. Momokani, unai headava taudia 24 be tanobada ena tano idauidau 20 dekenai misinari gaukara do idia karaia, to ia henanadai, Unuseniai umui ginidae neganai bona umui itaia murinai, dahaka do umui karaia? Ita noho tanobadana be ia laga-ani lasi. Taunimanima idia ura gabu matamatadia dekenai idia loaloa bona gau matamatadia idia karaia, unai amo moale idia davaria totona. To, stiuden taudia be Iehova ena amo gaukara idia abia, bona ia ura gabuna dekenai ia siaidia lao, idia sibona edia ura do idia laloa guna lasi, to iena “mamoe” do idia naria. Namona be idaunegai Israela taudia bamona idia karaia lasi, idia be sibona edia ura idia tahua guna dainai Iehova ese taunimanima ibounai ia hanamodia karana totona idia ia gaukaralaia lasi. To, namona be Iesu Keriso idia tohotohoa, nega ibounai ia be sibona ena ura ia tahua guna lasi, to iena Tamana ena ura ia karaia guna bona hekwakwanai idauidau ia davaria neganai ia abidadama noho.—Ioane 8:29; 10:16.
“Dirava Ena Dobu Gaudia Oi Laloa Bada” be Wallace Liverance ena hereva ena sinado, ia be Gilead Sikuli ena registra tauna. Buka Helaga be ia gwau loulou Dirava ena Hereva be kohu, dava bada nadidia, golo o siliva, eiava taunimanima idia tahua goadagoada o idia laloa bada davana bada gaudia hegeregerena. Aonega Herevadia 2:1-5 ia hahedinaraia ‘Dirava ita diba’ totona, namona be ita tahua “idia hunia gaudia” ita tahua bamona. Hereva ia henia tauna ese stiuden taudia ia hagoadaia edia gaukara matamatana idia karaia lalonai namona be Dirava ena dobu gaudia idia tahua noho. Tadikaka Liverance ia gwau: “Unai ese Iehova abidadama henia karana ia habadaia bona emu lalona oi hadaia emu gaukara do oi badinaia noho karana do ia hagoadaia. Unai ese oi do ia durua do oi hereva mai lalo-goada ida bona Iehova ena ura be ma haida dekenai do oi herevalaia neganai, hadibaia tauna namona ai do oi lao.”
Gilead Sikuli ena hadibaia tauna ma ta ese klasrum lalonai hahediba dalanai bamona, ia ese hua ima lalonai Iehova ese stiuden taudia edia haroro gaukara ia hanamoa dalana ia riviulaia. Aposetolo Paulo ese Kara 20:20 ai Efeso dekenai ia karaia haroro gaukara ia gwauraia, bona Lawrence Bowen ese ia hahedinaraia Paulo be haroro henia dalana ia davaria negadia ai ia gaukaralaia. Aposetolo Paulo bamona, stiuden taudia edia ekspiriens idia hahedinaraia, iseda nega lalonai Dirava bona edia dekena tauna idia lalokau henia taudia be hereva momokani herevalaia karana idia hadokoa lasi bona unai ese dala ia kehoa Dirava ena Hereva ena siahu ese ma haida ia hagoadadia totona. Unai dainai, Iehova ese ia hanamodia.
Lo Taudia Edia Hereva
Edia sikuli negana lalonai, unai Gilead klas taudia ese hahenamo ta idia abia, badina Patterson Educational Center dekenai Brens Komiti memba taudia, tano 23 amo, idia hadibadia dainai idia noho danu bona idia bamoa diba. Leon Weaver bona Merton Campbell, Haroro Naria Dipatmen amo, ese Brens Komiti taudia idauidau idia henanadai henia, idia haida be Gilead ena klas idia haorea taudia. Unai be hagoadaia gauna, badina stiuden taudia bona edia ruma bese bona turadia ese idia manada vadaeni misinari taudia edia sivarai idia kamonai diba.
Idia henia sisibana ese kosi idia haorea taudia do ia durua idau tanodia do idia manadalaia totona, bona sisiba herevadia haida be inai: “Oi lalo-goada. Bema gau idauna ta oi davaria eiava oi lalo-parara lasi, namona be oi hesiku lasi. Iehova dekenai oi tabekau”; “idia noho gaudia oi gaukaralaia mai moale ida, bona mauri durua gaudia abia totona Iehova oi abidadama henia.” Hereva ma haida ese stiuden taudia idia durua edia gaukara lalonai moale idia davaria noho totona. Idia herevalaia gaudia haida be inai: “Do oi gaukara gabuna be emu noho gabuna gunana ida oi hahegeregerea lasi”; “unai gabu ena gado oi dibaia bona oi herevalaia namonamo, unai amo taunimanima ida do oi herevahereva diba”; “taunimanima edia kastom bona noho dalana oi dibaia, badina unai ese oi do ia durua emu gaukara do oi dogoatao totona.” Unai hereva idauidau ese misinari taudia matamatadia idia hagoadaia momokani.
Henanadai henia kahana murinai, David Splane, guna Gilead ena klas namba 42 ia haorea bona misinari gaukara ia karaia bona hari ia be Iehova ena Witnes taudia edia Hakaua Oreana tauna ta, ese hereva badana ia henia. Unai lalona veria herevana ena sinado be “Stiuden Taudia Eiava Kosi Haorea Taudia—Edena?” Ia ese kosi idia haorea taudia ia nanadaia, ia gwau: “Emu misinari gaukara oi karaia neganai oi sibona be edena bamona do oi laloa? Do oi laloa oi be misinari gaukara dekenai gau momo ia diba kosi haorea tauna eiava gau momo ma ia ura ia diba stiuden tauna?” Tadikaka Splane ese ia hahedinaraia kosi ia haorea aonega tauna ia laloa ia be stiuden tauna. Namona be misinari taudia idia laloa edia misinari gaukarana lalonai idia davaria taudia ibounai amo gau namona ta idia dibaia diba. (Filipi 2:3) Stiuden taudia ia hagoadaia edia misinari tadikaka, brens opesi, bona kongregesen ida idia gaukara hebou be namo. Tadikaka Splane ia gwau: “Emu eksam badana oi karaia mai kwalimu ida vadaeni, to emu stiuden dagina be ia doko lasi. Namona be taunimanima ibounai dekenai oi hahedinaraia goevagoeva, unuseniai oi noho diba oi tahua totona.”
Unai hereva murinai, stiuden taudia ese edia sikuli idia haorea kwalimu pepadia idia abia bona edia gaukara tanodia idia gwauraia hedinarai helai taudia dekenai. Klas taudia dekenai unai be moale bona hebogahisi negana, badina klas tauna ta ese edia gwaubou herevana ia duahia, ia gwau kosi idia haorea taudia ese edia lalona idia hadaia Dirava ena Hereva amo idia dibaia gaudia dainai, hesiai gaukara helagana badana do idia karaia.
Idia helai taudia ibounai idia abia dae, unai sisiba ese kosi haorea taudia edia lalona ia hagoadaia Dirava bona edia dekena tauna lalokau henia karana do idia hahedinaraia. Danu, unai ese idia ia hagoadaia edia misinari gaukara lalonai taunimanima be lauma dalanai do idia durua bada.
[Box on page 25]
KLAS TAUDIA
Edia tano idauidau: 10
Idia lao henia tanodia idauidau: 20
Klas taudia iboudiai: 48
Edia mauri lagani edia averes: 33.7
Lagani hida hereva momokani lalonai, edia averes: 16.2
Lagani hida ful-taim hesiai gaukara idia karaia, edia averes: 12.5
[Picture on page 26]
Watchtower Bible School of Gilead Ena Klas Namba 109
Inai lista ai, laini edia namba be vairana kahana amo ia daekau murina kahana, bona edia ladadia be lauri kahana amo ela bona idiba kahana.
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.