Gilead Sikuli Lagani 50 Ida Karaia bona Ia Namo Noho!

“GABU momo dekenai Basileia ena sivarai idia do harorolaia momo lasi,” N. H. Knorr be Gilead ena klas ginigunana taudia dekenai unai ia hereva February 1, 1943 ai, sikuli ia kehoa dinanai. Ma ia gwau: “Uma dekenai bema gaukara taudia idia momo neganai, taunimanima tausen momo be haroro herevana idia kamonai diba. Lohiabada ena hebogahisi dainai, momo herea do idia kamonai.”

Bona gaukara taudia ma haida idia hedinarai​—milion momo unai! Lagani 1943 ai, Basileia pablisa edia namba be 129,070 bona tano idauidau 54 ai idia gaukara, to lagani 1992 ai, edia namba ia daekau bona idia 4,472,787 be tano idauidau 229 ai idia gaukara! Gilead Sikuli ena heduru dainai haroro gaukara ia habadaia. Unai sikuli be lagani 50 lalodiai ia heau vadaeni, to ia ese misinari taudia ia do hadibadia noho bona tanobada ibounai dekenai idia ese haroro hesiai gaukara idia karaia.

March 7, 1993 ai, hebou totona idia boiridia taudia bona United States ena Betele taudia, iboudiai be 4,798, be Jersey City Assembly Hall, New Jersey ai, idia mai sikuli klas namba 94 ena kosi idia haorea herevana idia kamonai totona. Unai be nega namona bona Gilead Sikuli ena lagani 50 karana idia laloa nega namona danu. Oi ura program ena hereva haida oi diba, a?

Ane amo hebou idia kehoa, bona Hakaua Oreana tauna ta George D. Gangas be mai goada danu ia guriguri. Bena hebou ena seamani, Carey W. Barber, ena hamatamaia herevana murinai sikuli taudia​—hebou taudia iboudiai danu​—be hereva kwadogidia haida idia kamonai henia namonamo.

Hereva ginigunana tauna be Robert W. Wallen, ena hereva ladana be “Umui Sibona Umui Noho Lasi.” Mai ena hebogahisi danu ia gwau: ‘Dina vairadiai, reana nega haida do umui lalohisihisi bada badina umui laloa umui sibona umui noho bona emui ruma bese bona turadia amo umui noho daudau dainai.’ Vadaeni, edena bamona ita gwau diba, “Umui sibona umui noho lasi?” Ia gwau: ‘Badina haraga herea umui ibounai be Iehova Dirava ida umui herevahereva diba.’ Ia ese unai kosi idia haorea taudia ia hagoadadia guriguri idia laloa bada bona dina ta ta iboudiai idia guriguri totona. Bena, Iesu bamona, idia gwau diba, “Lau sibona do lau noho lasi.” (Ioane 16:32) Unai hereva ese sikuli kosi idia haorea taudia ia hagoadadia bada!

Hereva ta ladana “Emui Helaro Umui Dogoatao Auka” (March 7 ena dina siri amo), Hakaua Oreana tauna ta, Lyman A. Swingle ese ena hereva lalonai haheauka bona helaro ia kikilaia. Ia gwau: ‘Ladana hadikaia, dagedage, badu, dibura, bona mase idia davaria diba dainai, Keristen taudia idia haheauka be gau badana. Iehova ena abidadama Witness taudia be hetoho badadia idia davaria neganai goada bada idia abia diba idia haheauka totona. Inai kosi umui haorea taudia dekenai unai be moale herevana.’ Helaro be edena bamona? Ia gwau: ‘Helaro umui abia be gau badana. Kwarana gauna ese ia karaia tauna ena kwarana ia naria hegeregerena, hahemauri ena helaro ese ia abia Keristen tauna ena lalohadai ia naria dainai ena abidadama ia goada noho diba.’​—1 Tesalonika 5:8.

Hereva tauna ma ta, Ralph E. Walls, ena hereva kwarana namona be “Noho Namo Ena ‘Taora Bada Gabunai’ be Edena Bamona Ita Heau Mauri Diba?” Unai “taora bada gabunai” be dahaka? (Salamo 18:19) Hereva tauna ia gwau: “Unai be ruhaia karana, unai amo lalo-maino bona kudou mamina namo ita abia.” Dahaka gau amo ita idia ruhaia be namo? ‘Ita siboda eda kerere amo.’ Ma ia gwau: ‘Danu, Satana ese ia havaraia kereredia amo.’ (Salamo 118:5) Noho namo ena taora bada gabunai be edena bamona ita heau mauri diba? ‘Iseda kara ibounai lalonai bona Iehova ena hahegani tahua karana amo, bona iseda hekwarahi be guriguri amo mai abidadama danu Iehova ita hereva henia.’

Don A. Adams ena hereva ladana be “Dina Vairadiai Dahaka Do Ia Vara?” Misinari matamata taudia vairadiai dahaka do ia vara? Ia hadibadia nega vairai edia kara haida do idia haidaua be namo. Ia gwau: “Hahenamo momo do idia davaria danu.” Ia gwau misinari matamata taudia rua be idia siaidia gabuna dekenai idia manada neganai revareva amo idia gwau: “Emu haroro ia namo dinana ta oi laloa, vadaeni, iniseniai dina iboudiai be unai bamona. Ai abia buka bona magasin be momo to idia ore haraga, bona nega ibounai taunimanima ese ai idia noia Baibel stadi idia dekenai ai hamatamaia totona.” Hereva ia henia tauna be kosi idia haorea taudia edia ruma bese bona turadia ai hereva haida ia henidia, ia gwau: ‘Inai kosi idia haorea taudia dainai umui lalo-hekwarahi lasi. Idia umui hagoadadia diba revareva tore henidia karana amo.’​—Hereva Lada-isidia 25:25.

Murinai, unai sikuli ena tisa taudia ese hereva idia henia. Jack D. Redford ena hereva ladana be “Taunimanima amo Gau Haida Umui Tahua Lasi.” Ia gwau kosi idia haorea taudia edia hekwakwanai ta be taunimanima danu idia hetura namonamo. Dahaka ese ia durudia diba? Ia gwau: “Taunimanima edia kerere umui laloa lasi. Taunimanima umui doridia lasi idia tubu haraga totona. Emui davana hesiai gaukara amo abia guguru dalana umui tahua lasi. Namona be umui laloatao taunimanima be idia goevadae lasi, unai hebogahisi karana ese umui ia durua umui noho namo totona. Ma taunimanima haida dekenai emui turana karana ese emui lo karana ia habadaia.” (Hereva Lada-isidia 17:9) Momokani, kosi idia haorea taudia ese unai sisiba namona idia badinaia neganai, unai ese ia durudia idau tanodia ai edia kara haida do idia haidaua bona misinari gaukara do idia karaia namonamo totona!

Korinto Iharuana 4:​7 (NW) ia gwau: “Unai kohu namona be uro lalodiai ai abia.” Gilead Sikuli ena registrar, Ulysses V. Glass, ena hereva ladana be “Emui Kamonai Tadikakadia Umui Abidadama Henidia.” Unai “uro” gaudia be dahaka? Ia gwau: “Idia be ita goevadae lasi taudia.” Unai “kohu namona” be dahaka? Ia gwau: “Unai be iseda Keristen haroro gaukarana.” (2 Korinto 4:1) Bona unai kohu namona be edena bamona do ita gaukaralaia be namo? Ia gwau: “Iehova ese ita dekenai kohu namona ia henia, to namo lasi ita sibona ita dogoatao. Unai dainai, umui misinari taudia e, namona be umui lao henia gabuna dekenai unai kohu namona umui hariharilaia, bona taunimanima umui hadibadia do idia hariharilaia totona danu.”

Albert D. Schroeder ia hedinarai be hebogahisi negana, badina Gilead Sikuli idia haginia hamatamaia neganai ia be registrar tauna. Iena hereva ladana be “Lagani 50 Lalodiai Tiokratik Dala Idia Hadibaia.” Ia gwau: “Iehova ese hadibaia dala namona ia diba, bona ia karaia.” Edena bamona? Tadikaka Schroeder ese lagani 50 gunanai idia haginia sikuli rua dekenai idia hadibaia dalana ia kikilaia​—unai be Haroro Sikuli bona Gilead Sikuli. Ia ese ia hahedinaraia New World Translation Baibel be gau badana diba maorona hadibadia totona. Ia ese unai kosi idia haorea taudia dekenai ia gwau: “Idau tanodia ai umui do idia siaia neganai umui gari lasi, badina Society ese Iehova ena ura umui dekenai do ia hadibaia maoro.”

Watch Tower Bible and Tract Society of Pennsylvania ena presiden, Milton G. Henschel, ia henia herevana ena ladana be “Kwalimu Taudia Sibona Lasi.” Tadikaka Henschel ena hereva badana be lagani 1943 ena siri badana amo, ia gwau: “Ita ia lalokau henia, bona ia dainai do ita kwalimu momokani.” (Roma 8:37) Ia gwau unai lagani ena siri badana be namo badina Tanobada Ibounai Tuarina Iharuana lalonai, tano momo lalodiai iseda tadikaka idia dagedage henidia bada. Tadikaka Henschel be Gima Kohorona magasin amo unai lagani ena hereva badana ia kikilaia sivaraina ia duahia bena murinai ia gwau: “Gilead ena klas ginigunana taudia be February lalonai inai Gima Kohorona [January 15, 1943 gauna] idia stadilaia, bona ena hereva ese ia hegaegaelaidia dina vairadiai do idia davaria gauna totona.” Idia hanaia lagani 50 lalodiai inai kosi idia haorea taudia momo herea ese idia hahedinaraia idia kwalimu momokani. Klas namba 94 taudia be edena bamona? Ia gwau: “Iehova umui tabekau henia, iena lalokau kahirakahira dekenai umui noho, bona do umui kwalimu momokani.”

Daba ena hereva iboudiai murinai, seamani be tanobada ena gabu idauidau amo hanamoa herevadia ia duahia. Nega ia ginidae sikuli ena headava taudia 24 be edia setifiket pepadia idia abia totona. Hari, unai Gilead stiuden taudia be Gilead kosi haorea taudia! Idia be tano ima amo idia mai, to edia misinari gaukara be tano 17 dekenai do idia karaia, unai be Hong Kong, Taiwan, Mozambique, bona Eastern Europe gabudia haida.

Idia laga-ani sisina murinai, adorahi ena program idia hamatamaia, Robert L. Butler ese Gima Kohorona stadi ia karaia. Unai murinai, sikuli taudia be haheitalai dekenai edia sikuli negana lalonai, Wallkill, New York kahirakahira ai idia haroro ena ekspiriens haida idia hahedinaraia. Program ese Gilead dekenai idia mai ena badina tamona ia hahedinaraia​—unai be haroro gaukara idia ura henia bada.

Stiuden taudia edia program murinai, idia hebou taudia momo idia laloa reana kara ma ta do idia karaia Gilead Sikuli ena lagani 50 dinana idia laloa totona. Bona edia lalohadai be maoro!​—Maua ena hereva, “Gilead Sikuli Ena Lagani 50 Sivaraina.”

Lagani 50 gunanai, Tadikaka Knorr ese ia hahedinaraia ia be mai ena abidadama bona dina vaira totona ia hegaegae. Ia diba Gilead Sikuli be do ia namo bona klas ginigunana taudia dekenai ia gwau: “Ai laloa, ena ladana hegeregerena, inai gabu amo ‘haroro bada’ do ia lao ela bona tanobada ena kahana ibounai dekenai bona inai haroro gaukara be Dirava do ia hanamoa, do idia haorea diba lasi. Umui be gwaumaoro abia haroro taudia dainai Siahu Ibounai Diravana dekenai do umui abidadama noho, umui diba umui dabu neganai ia ese umui do ia hakaua, bona do umui diba ia be hahenamo henia Diravana danu.”a

Lagani 50 gunanai idia haginia, to Gilead Sikuli ia namo noho! Unai kosi idia haorea vadaeni taudia be 6,500 bona ma haida, bona klas 94 taudia be idia bamona idia karaia. Idia ese “haroro momo” idia karaia gaukarana lalonai, namona be Siahu Ibounai Diravana dekenai idia abidadama noho bona unai amo Iehova Dirava ena hairai idia hahedinaraia diba.

[Footnotes]

[Box on page 25]

Sikuli Ena Lista

Stiuden taudia iboudiai: 48

Edia tano idauidau: 5

Idia lao henia tano idauidau: 17

Edia lagani ena averes: 32

Orea lalonai noho laganidia ena averes: 15.3

[Box on page 26, 27]

GILEAD SIKULI ENA LAGANI 50 SIVARAINA

Gilead ena sivarai ita riviulaia dalana namona be Gilead taudia edia sivarai ita laloa. Sikuli ai idia stadi bona kosi idia haorea taudia, hahediba idia gunalaia taudia, bona unai sikuli idia hegaegaelaia taudia edia sivarai unai. Idia helai kamonai taudia iboudiai idia moale bada Tadikaka Theodore Jaracz ese hereva ena kahana, ladana “Gilead Sikuli Ena Lagani 50 Sivaraina,” ia gwauraia neganai.

Sikuli idia haginia ena badina bona ena dala be edena bamona? Tadikaka Schroeder ia gwau ia bona ma hahediba karaia tadikakadia rua be hua hani sibona lalonai idia hegaegaelaia gwauraia. Ia gwau: “To Monday, February 1, 1943 ai, ai hegaegae vadaeni, unai sikuli hamatamaia totona.” Idia hadibadia bona gabu matamatadia ai idia siaidia misinari taudia ginigunadia edia lalohadai be dahaka? Tadikaka Henschel ese ia gwauraia: “Ai ese unai taudia edia kohu ai haboudia Society ena Shipping Dipatmen dekenai, bona maua lalodiai unai kohu idia siaidia. Unai kohu be misinari edia gabu ai idia ginidae neganai idia ese edia kohu idia abia, bona unai maua danu idia gaukaralaidia edia ruma edia helai gaudia bona pata idia karaia totona.” Ma ia gwau, murinai, Society ese misinari edia ruma bona kohu sisina idia henidia.

Murinai, Gilead ena klas ginigunadia taudia haida idia noho, bona hari idia be United States ena Betele dekenai idia noho tadikakadia be idia laloatao gaudia, edia hemami, bona edia sivarai idia gwauraia. Edia hereva ese helai taudia iboudiai edia kudou idia hamareredia.

“Lau idia boiria klas ginigunana dekenai lau lao totona murinai, lau kamonai egu sinana be kansa gorerena ia abia. To, badina ia be pioneer gaukara ia karaia ena lagani 16 negana amo, egu sinana ia ura bada lau lao Gilead dekenai. Unai dainai mai egu lalo-daradara sisina, bona mai egu abidadama Iehova dekenai lau lao South Lansing dekenai. Gilead Sikuli ai lau abia hadibaia herevadia dainai lau moale bada bona Iehova lau hanamoa. Egu sinana be ena tanobada maurina ia hadokoa egu sikuli lau haorea murinai.”​—Charlotte Schroeder, Mexico bona El Salvador dekenai misinari gaukara ia karaia hahinena.

“Iehova ese lau ia naria lauegu noho gabuna ginigunana lalonai, unai dainai lau laloa ia ese lau do ia naria tanobada ena kahana iboudiai dekenai. Unai dainai lau moale Gilead ena klas ginigunana dekenai lau lao totona.”​—Julia Wildman, Mexico bona El Salvador dekenai misinari gaukara ia karaia hahinena.

“Gaukara be namo herea! Iduara iboudiai dekenai ai haroro diba. Unai hua ginigunana lalonai, lau ese buka 107 lau haridia bona Baibel stadi 19 lau karadia. Hua hani murinai lauegu Baibel stadi be 28. To, gau haida idia auka​—siahu bada, dimairi bona manumanu maragidia momo. To, unuseniai lau noho be hahenamo badana ta. Egu mauri ibounai lalonai lau laloa momo gauna unai.”​—Mary Adams, klas iharuana, ese ena misinari gaukara Cuba dekenai ia herevalaia.

“Alaska dekenai ai hekwarahi badina mirigini kahana be keru bada gabuna, nega haida ena keru be -50 degrees zero Celcius henunai. India hanua maragidia Alaska ena laurabada kahanai be bouti eiava palaimasini sibona amo ai lao henidia diba.”​—John Errichetti, klas ihatoina tauna ta.

Lau dekenai Gilead be hegeregere Iehova ese ai ia boiria, ena tanobada oreana amo, lauma dalanai ai goada bona mauri namona lalonai ai vareai totona.”​—Mildred Barr, klas 11 hahinena ta, Ireland dekenai misinari gaukara ia karaia.

Murinai ma sivarai momo idia kamonaidia​—Lucille Henschel (klas 14, Venezuela ai misinari gaukara ia karaia), Margaret Klein (klas 20, Bolivia dekenai misinari gaukara ia karaia), Lucille Coultrup (klas 24, Peru dekenai misinari gaukara ia karaia), Lorraine Wallen (klas 27, Brazil dekenai misinari gaukara ia karaia), William bona Sandra Malenfant (klas 34, Morocco dekenai idia misinari karaia), Gerrit Lösch (klas 41, Austria dekenai ia misinari karaia), bona David Splane (klas 42, Senegal dekenai ia misinari karaia).

Hadibaia gaukara idia karaia taudia be edena bamona? Idia haida ese edia sivarai idia gwauraia​—unai taudia be Russell Kurzen, Karl Adams, Harold Jackson, Fred Rusk, Harry Peloyan, Jack Redford, bona Ulysses Glass. Unai gaukara maduna namona idia herevalaia bona edia moale ema bona hari idia gwauraia.

Japan dekenai misinari gaukara ia karaia tauna ta, Lloyd Barry, ese Gilead hahediba idia abia misinari taudia edia gaukara namona ia herevalaia. Lagani 1949 lalonai, misinari 15 idia siaidia Japan dekenai, unai neganai Japan ena tano ibounai lalonai pablisa 10 sibona idia noho. To, lagani 44 murinai, unai tano ai Basileia idia harorolaia taudia 175,000 bamona idia noho! Robert Wallen ese misinari taudia edia gaukara namodia, taunimanima idia durudia hereva momokani dekenai idia vareai totona, ia herevalaidia, ia gwau misinari taihu ta be lagani 45 lalodiai ia gaukara Panama dekenai, ia ese taunimanima 125 ia durudia ela bona edia mauri idia gwauhamatalaia bona idia bapatiso.

Hereva badana bona dokona be idia ese helai taudia dekenai idia noho Gilead misinari taudia iboudiai idia boiridia helai taudia vairanai idia mai totona. Betele taudia ena Gilead taudia 89 bona idia mai vadivadi Gilead taudia​—tadikaka bona taihu​—be edia helai gabudia idia rakatania bona tadikaka vairanai idia gini. Unai be hebogahisi negana momokani. Ma danu, sikuli dekenai idia hahediba taudia bona klas namba 94 taudia danu idia gini​—iboudiai be 160 bamona!

Tadikaka Jaracz ia henanadai, ia gwau: “Gilead Sikuli ese misinari taudia ia hadibadia namonamo idau tanodia ai haroro gaukara idia karaia namonamo totona, a?” Ia gwau: “Idia hanai laganidia 50 lalodiai ia hedinarai haere be io, bona io momokani!”