Iehova Dekenai Ita Moale

MAI anina bada gaukara ta idia karaia ore namonamo negana be moale negana. March 13, 1999 ai, Watchtower Educational Center, Patterson, New York dekenai, Watchtower Bible School of Gilead ena klas namba 106 ena stiuden taudia 48 edia kosi haorea program, be unai bamoa moale negana ta.

Theodore Jaracz, Hakaua Oreana ena memba tauna, Gilead klas namba 7 dekenai ia lao tauna, bona unai dina ena program ena seamani ese Salamo 32:11 ena hereva amo program ia kehoa. Ia gwau: “Kara maoromaoro taudia e, do umui moale! Lohiabada ena kara dainai do umui moale!” Unai dina ai ibounai idia moale be namo ena badina ia herevalaia neganai, ia gwau: “Iehova ese kudou-maoro taudia, Gilead Sikuli ena stiuden taudia danu, dekenai ia karaia guguru gaudia dainai, inai bamona dina ai ita moale.” Ena be stiuden taudia ese Gilead Sikuli dekenai do idia mai ena palani idia karaia bona idia hekwarahi bada misinari gaukara dekenai do idia hegeregere totona, to dokona ai Iehova ena kara dainai gau ibounai idia namo. (Aonega Herevadia 21:5; 27:⁠1) Tadikaka Jaracz ia gwau, unai dainai ‘Iehova dekenai ita moale’ be namo.

Patterson ena hebou rumana lalonai idia helai taudia be stiuden taudia edia varavara bona turadia. Idia be tano 12 amo idia mai unai moale dinana ai idia noho totona. Unuseniai idia helai taudia 5,198​—⁠bona vidio program amo idia itaia diba Brooklyn, Patterson, bona Wallkill ai idia noho Betele famili taudia​—⁠be unai dina dekenai do idia vara gaudia idia laloa neganai, idia moale bada.

Idia Hagoadadia Do Idia Moale Noho

Tadikaka Jaracz ena hereva ia hadokoa neganai, ia murinai hereva do idia henia tadikakadia ginigunana ia boiria. Tadikaka ima ese Baibel amo hahegoada hereva namodia idia hegaegaelaia Gilead kosina idia haorea stiuden taudia sibodia totona lasi to helai taudia ibounai totona danu.

Hereva ia henia tadikaka ginigunana be William Malenfant, Gilead sikuli ena klas namba 34 dekenai ia lao tauna. Hari ia be Hakaua Oreana ena Hadibaia Komiti ia durua tauna ta. Ena hereva be Hadibaia Tauna 1:2 amo ia abia bona ena sinado be “ ‘Gau Ibounai’ be Anina Lasi Karadia Lasi.” Iena sinado hegeregerena inai henanadai ia gwauraia: “Solomona ena hereva ena anina be gau ibounai be anina lasi momokani, a?” Haere be: “Lasi. Ia hahedinaraia bema taunimanima ese idia karaia gaudia be Dirava ena ura idia dadaraia, idia tahua gaudia be bona Dirava ena ura idia dadaraia gaudia​—⁠idia ibounai be anina lasi momokani.” To, Dirava momokanina, Iehova, tomadiho henia karana be anina lasi karana lasi; Dirava ena Hereva, Baibel, stadilaia karana, bona ma haida dekenai hadibaia karana danu be anina lasi karadia lasi. Ena hesiai taudia be unai idia karaia neganai, Dirava ese ia laloaboio lasi. (Heberu 6:⁠10) Oibe, ena be Iehova ese ia lalo-namo henidia taudia dekenai dika ia vara, to “Dirava ese [idia] do ia naria, tau ta ese iena davana bada kohu ia naria bamona.” (1 Samuela 25:29) Unai lalohadai ese iseda kudouna ia hamarerea momokani! Unai hereva idia laloatao dainai Iehova idia tomadiho henia taudia ibounai do idia moale noho.

Hakaua Oreana ena memba tauna ta, John Barr, ena hereva ese kosi idia haorea taudia ia hagoadaia, ena sinado be “Oiemu Misinari Gaukara Dekenai Moale Do Oi Davaria.” Ia hahedinaraia misinari gaukara be Iehova Dirava ese hanaihanai ia laloa bada gauna. “Ia be Iehova ese tanobada ia lalokau henia karana ena kahana badana ta. Iena natuna tamona sibona ia siaia mai tanobada dekenai. Iesu be misinari tauna badana, ia be misinari tauna hereadaena.” Kosi idia haorea taudia ese Iesu ena misinari gaukara tanobada dekenai ia karaia namonamo totona ena mauri lalonai ia haidaua gaudia idia laloa dobu diba, to Iesu ena misinari gaukara lalonai ia karaia gaudia edia namo be idia ura abia taudia ibounai idia do hanamoa noho. Tadikaka Barr ia gwau, unai ia vara badina Iesu ia ura bada Dirava ena gaukara ia karaia, bona danu ia ese taunimanima ia lalokau henidia. (Aonega Herevadia 8:​30, 31) Tadikaka Barr ese kosi idia haorea taudia ia hagoadaia edia gaukara do idia dogoatao noho, idia haheauka dainai sibona lasi, to idia moalelaia dainai. Unai klas taudia ia hagoadaia, ia gwau: “Iehova dekenai do umui tabekau, ia ese umui do ia rakatania lasi.”​—⁠Salamo 55:⁠22.

Hereva ia henia tauna ma ta be Lloyd Barry, Hakaua Oreana ena memba tauna ma ta, ena hereva kwarana be “Iehova Ena Ladana Dekenai Raka Hanaihanai.” Tadikaka Barry ese Gilead sikuli ena klas namba 11 ia haorea murinai, Japan dekenai lagani 25 lalonai misinari gaukara ia karaia, bona misinari gunadia haida edia sivarai ia kikilaia bona idia davaria hekwakwanai haida ia gwauraia. Kosi idia haorea taudia dekenai dahaka aonega sisiba namona ia henia? “Mai anina bada gauna be, lauma dalanai do umui goada noho. Danu, unai tano ena gado bona taunimanima edia kara do umui dibaia. Kiri karana umui laloaboio lasi. Bona emui gaukara do umui badinaia noho; umui manoka lasi bona umui hesiku lasi.” Tadikaka Barry ese kosi idia haorea taudia ia hamaorodia do idia gaukara tanodia ai, dirava idauidau edia ladana dekenai idia raka taudia momo do idia davaria, bona ia ese Mika ena hereva ia gwauraia idia dekenai idia laloatao totona, ia gwau: “Bese ta ta ibounai ese sibodia edia dirava, edia dirava idia tomadiho henia bona kamonai henia. To ita ese Lohiabada, iseda Dirava do ita tomadiho henia, bona kamonai henia ela, bona hanaihanai.” (Mika 4:⁠5) Misinari taudia gunadia edia haheitalai be Dirava ena hesiai taudia ibounai idia hagoadaia bada, Iehova ena ladana dekenai do idia raka noho bona mai abidadama ida ia do idia hesiai henia noho totona.

Hereva ia henia tauna ma ta be Lawrence Bowen, Gilead sikuli ena hadibaia tauna ta. Iena hereva ena sinado be inai henanadai, “Oi be Edena Bamona Tauna ai Do Oi Lao?” Ia hahedinaraia Iehova ita abidadama bona tabekau henia karana sibona amo Dirava ena hesiai gaukara do ita karaia namonamo diba. King Asa be Iehova dekenai ia tabekau momokani dainai, ena inai henia tanona ena tuari taudia milioni ta ia halusia. To peroveta tauna Asaraia ese ia hamaoroa Dirava dekenai do ia tabekau noho, be namo ia gwau: “Umui be Lohiabada dekenai umui noho neganai, ia ese umui dekenai danu ia noho.” (2 Sivarai 14:​9-12; 15:​1, 2) Badina Dirava ena ladana, Iehova, ena anina ese ia hahedinaraia ia be ena ura hagugurua tauna ai ia lao​—⁠ia be Henia Tauna, Gimaia Tauna, eiava Hahemaoro Tauna​—⁠ai ia lao dainai, Iehova idia tabekau henia bona iena ura hegeregerena idia gaukara namonamo misinari taudia be edia gaukara dekenai do idia kwalimu. (Esodo 3:14) Tadikaka Bowen ena hereva dokona ai ia gwau: “Laloaboio lasi, Iehova ena ura be oiemu ura ai oi halaoa neganai, ia ese oi do ia durua bona emu gaukara lalonai oi ura karaia gauna do oi karaia diba.”

Unai program ena kahana dekenai hereva ginigabena ia henia tauna be Wallace Liverance, guna misinari gaukara ia karaia bona hari ia be Gilead sikuli ena rejistra tauna. Ena hereva, ena ladana be “Dirava Ena Hereva be Emu Mauri Lalonai Ia Mauri Noho Bona Ia Gaukara Noho,” ese Dirava ena hereva, eiava gwauhamata, be kahirakahira do idia guguru ia herevalaia. (Heberu 4:12) Idia abia dae taudia edia mauri ia haidaua. (1 Tesalonika 2:13) Iseda mauri lalonai unai hereva be edena dala ai ia mauri noho bona ia gaukara noho diba? Baibel stadilaia namonamo dalana ai. Tadikaka Liverance ese kosi idia haorea taudia be Gilead sikuli dekenai idia dibaia Baibel stadilaia karadia, hegeregere Dirava ena Hereva idia duahia, ena anina bona edia mauri lalonai do idia badinaia dalana idia tahua, ia herevalaia lou. Ia ese Albert Schroeder, Hakaua Oreana ena memba tauna ta, bona lagani 50 gunanai Gilead Sikuli idia haginia komiti ena seamani tauna ena hereva ia gwauraia lou, ia gwau: “Ta ese siri ta ena badina siridia ia gaukaralaia amo Dirava ena Hereva lalonai ia noho lauma dalanai goada ia henia siahuna ibounai ia abia diba.” Unai dala ai Baibel ita stadilaia neganai, Dirava ena hereva be ia mauri bona ia gaukara noho.

Moale Idia Havaraia Ekspiriens

Unai hereva murinai, helai taudia be stiuden taudia amo moale idia havaraia ekspiriens haida idia kamonai. Mark Noumair be guna misinari gaukara ia karaia bona hari ia be Gilead sikuli ena hadibaia tauna ta, bona ena gunalaia henunai, stiuden taudia haida ese nega idauidau ai idia haroro daladia idia kikilaia bona idia haheitalaia. Haida be edia teritori lalonai idia noho taudia edia noho dalana idia itaia bona edia hereva idia kamonai namonamo bona unai taudia idia lalodia bada dainai, Baibel stadi haida idia hamatamaia bona idia karaia diba. Unai dala ai stiuden taudia be ‘sibodia edia kara bona edia hadibaia hereva idia naria namonamo,’ bona idia ura momokani haida idia durua hahemauri idia abia totona.​—⁠1 Timoteo 4:⁠16.

Heduru herevadia namodia momo idia henia, bona Watchtower Educational Center dekenai brens komiti taudia edia sikuli dekenai idia lao lo tadikakadia ese misinari gaukara ena moale idia herevalaia danu. Hedikwota dekenai idia gaukara tadikakadia Samuel Herd bona Robert Johnson ese Society ena brens opesi idauidau, hegeregere Bolivia, Zimbabwe, Nicaragua, Central African Republic, Dominican Republic, Papua New Guinea, bona Cameroon, amo idia mai taudia idia henanadai henidia.

Ekspiriens idia ore murinai, Gerrit Lösch, Hakaua Oreana ena memba tauna ta bona Gilead sikuli ena klas namba 41 ia haorea tauna, ese program ena hereva dokona ia henia ena ladana be, “Oi be Dirava ese Ia ‘Lalokau Henia’ Tauna, A?” Tadikaka Lösch ese kosi idia haorea taudia ia hamaorodia, Iesu, Dirava ena natuna goevadaena, be taunimanima ese idia lalokau henia lasi, to “idia negea, bona ia idia rakatania.” (Isaia 53:⁠3) Unai dainai ita hoa lasi tanobada ena kahana momo dekenai, taunimanima be misinari taudia idia ura henia lasi, eiava idia abia dae lasi. To, Daniela be Babulonia ai lagani momo lalonai ia gaukara neganai, Havaraia Tauna be aneru amo nega toi ia gwau Daniela “ia lalokau henia bada.” (Daniela 9:23; 10:​11, 19) Dahaka dainai Dirava ese Daniela ia lalokau henia? Ia be Babulonia mauri dalana ia badinaia totona ena noho dalana ia haidaua neganai, Baibel ena hahekau herevadia ia utua lasi; gau ibounai lalonai ia kara maoromaoro, iena dagi ia gaukaralaia lasi sibona ena namo ia tahua totona; bona ia ese Dirava ena Hereva ia stadilaia goadagoada. (Daniela 1:​8, 9; 6:4; 9:⁠2) Danu, ia ese Iehova ia guriguri henia hanaihanai bona nega ibounai ia karaia gaudia ibounai dainai karaharaga Dirava ia hanamoa. (Daniela 2:20) Daniela ena haheitalai idia tohotohoa neganai, Dirava ena hesiai taudia be tanobada ese do idia lalokau henidia lasi, to Iehova Dirava ese do ia lalokau henidia.

Lauma dalanai goada ia henia program hadokoa totona, seamani tauna ese tanobada ena kahana idauidau amo idia mai telegram bona hereva haida ia duahia. Bena, tatau 24 bona edia adavadia ese edia kosi haorea pepana idia abia bona idia lao henia tanodia edia ladana idia gwauraia hedinarai. Dokonai, klas ena gwaukau tauna ese Hakaua Oreana bona Betele famili taudia dekenai idia torea revareva ta ia duahia. Unai revareva lalonai idia be hua ima unuseniai idia noho bona misinari gaukara totona treinini bona heduru idia abia dainai idia tanikiu bada herevana ia gwauraia.

Program ia doko neganai unai ruma idia rakatania taudia huanai “hanamoa” herevadia oi kamonai diba.​—⁠Nehemia 12:​27.

[Box on page 27]

Klas Taudia

Edia tano idauidau: 10

Idia lao henia tanodia idauidau: 19

Klas taudia iboudiai: 48

Tatau mai edia adavadia: 24

Edia mauri lagani edia averes: 33

Lagani hida hereva momokani lalonai, edia averes: 16

Lagani hida ful-taim hesiai gaukara idia karaia, edia averes: 13

[Picture on page 25]

Watchtower Bible School of Gilead Ena Klas Namba 106

Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be laurina kahana amo ela bona idibana kahana.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.