Tanobada Taudia ese Mesia Idia Abia be Namo, A?
“SIAHU TAUNA IA GWAU, TANOBADA BE MESIA TA IA ABIA BE NAMO”
Unai hereva be Toronto, Canada ena 1980 The Financial Post niuspepa lalonai idia torea. Idia gwauraia siahu tauna be Aurelio Peccei, ia be aonega lalohadai oreana ta, Club of Rome, ena presiden bona haginia tauna. Post dekenai ia gwau, Peccei ia laloa “mai siahu gunalaia tauna ta sibona—saiens, politikol, eiava tomadiho tauna unai—ese tanobada taudia ibounai idia hadikaia ore gwauraia gaudia, hegeregere edia noho hebou hadikaia karadia bona hekwakwanai iboudiai, amo ia hamauria diba.” Dahaka oi laloa? Momokani hari tanobada ia dika herea dainai taunimanima be Mesia ta idia abia be namo, a? Namona be hari tanobadana ia abia hekwakwanai ta oi laloa—hitolo.
NIUSPEPA ena laulau dekenai, korema matadia badadia rua ese oi idia raraia. Idia be natuna ta ena matadia, lagani ima ia abia lasi kekeni maragina ta ena. To unai matadia dainai oi moale lasi. Unai matadia idia diari lasi, moale dalanai idia hoa lasi, kerere diba lasi abidadama toana be lasi. To daradara, hisihisi, bona hitolo toana idia hahedinaraia. Unai kekeni ia hitolo mase. Ia diba gauna be hisihisi bona hitolo sibona.
Sedira, taunimanima momo bamona, oi ura lasi unai bamona laulau oi lalodia momo, unai dainai rau oi hagiroa haraga. Ita gwau lasi oi hebogahisi lasi, to oi lalo-hekwarahi badina oi laloa reana unai kekeni ena heduru dalana be lasi. Ena tauanina ia maragi herea bona ena bogana ia gudu dainai toana be tauanina ese sibona ia ania. Iena laulau oi itaia neganai, sedira ia mase vadaeni. Bona ia dika momokani gauna be oi diba ia bamona natudia be momo.
Unai hekwakwanai ena bada be edena bamona? Oi laloa natudia 14 milion edia momo be edena bamona? Ita momo be unai ita laloa diba lasi; unai namba be bada herea momokani. Steidiam ta oi laloa, idia helai taudia edia namba be 40,000. Oi laloa unai steidiam be natudia amo ia honu masemase—helai gabudia iboudiai idia hahonua. To unai oi laloa be auka sisina danu. Unai bamona idia honu steidiam 350 ese unai namba 14 milion do idia abia. UNICEF (United Nations Children’s Fund) ia gwau lagani ta ta iboudiai lalonai, idia do goada lasi tanodia ai, hitolo amo bona idia koua diba goreredia amo idia mase lagani ima davaria lasi natudia edia namba be unai. Anina be dina ta ta iboudiai, steidiam tamona idia hahonua ena namba hegeregerena natudia idia mase! Unai namba dekenai idia hitolo taunimanima badadia edia namba oi hakapua, bona tanobada ibounai dekenai hanaihanai idia hitolo dikadika taudia iboudiai bilion tamona edia namba do oi abia.
Dahaka Dainai Momo Idia Hitolo?
Hari tanobadana ese aniani bada ia hatubua, taunimanima ese idia ania ore diba lasi, bona aniani ma haida ia hatubua diba. To, miniti tamona tamona iboudiai lalonai natudia 26 26 be hitolo bona gorere amo idia mase. Unai miniti tamona lalonai, taunimanima ese K2,000,000 idia negea tuari idia hegaegaelaia totona. Mani oi laloa unai moni ibounai—eiava ena kahana maragina ta—be unai natudia 26 26 ia durudia diba, ani?
Ia hedinarai momokani, tanobada ibounai dekenai hitolo ia vara lasi aniani eiava moni ia hegeregere lasi dainai. Hekwakwanai ena badina be idau. Argentina profesa ta, Jorge E. Hardoy, ia gwau bamona, “taunimanima momo idia hegeregere lasi mauri gaudia namodia, siahu, nega, kohu, bona diba be dabu taudia dekenai idia henia totona.” Oibe, hekwakwanai be taunimanima edia kohu lasi, to hekwakwanai be taunimanima. Taunimanima edia kara badadia be mata-ganigani bona sibodia idia laloa momo karadia. Taunimanima iboudiai edia kahana ima amo, idia taga bada bona gau namodia idia moalelaia kahana be ogogami herea kahana hani ese idia moalelaia gaudia be nega 60 amo idia hanaia.
Momokani, haida idia ura momokani hitolo taudia dekenai aniani idia henia, to idia biagua diba lasi karadia ese idia koudia dainai edia gaukara ia dika. Nega momo sibodia edia bese idia tuari heheni tanodia ai, eiava gavamani gwau-edeede henia tanodia ai, hitolo ia vara, bona nega momo idia tuari heheni taudia ese dabu taudia edia heduru abia dalana idia koua. Idia tuari heheni oreadia idia laloa bema edia inai taudia edia kahanai idia hitolo taudia be aniani idia abia, unai be hegeregere edia inai taudia dekenai aniani idia henia. Gavamani oreadia danu be politikol dalanai hitolo idia gaukaralaia tuari gauna ta bamona.
Hanamoa Dalana Lasi, A?
Madi, taunimanima milion momo idia hitolo be hari tanobada taudia ese idia mamia hekwakwanai tamona sibona lasi. Hodahoda, tano, davara bona tanobada ena mauri gaudia be gabu iboudiai dekenai idia hadikaia bona idia hamiroa, hanaihanai tuari ese taunimanima milion momo ia hamasedia, gabu ibounai dekenai dagedage taravatu utua karadia ese gari bona abidadama lasi karadia idia havaraia, bona unai gau dikadia momo edia badina be taunimanima edia mauri ena kara namodia idia dika noho—unai gaudia iboudiai, tanobada ibounai dekenai, ese hereva momokani ta idia hahedinaraia, unai be taunimanima be sibodia idia biagua diba lasi.
Sedira, unai dainai taunimanima momo idia laloa tanobada ena hekwakwanai hanamodia dalana be lasi. Ma haida be Aurelio Peccei bamona idia laloa, guna ai gwauraia tauna unai. Idia laloa bema hanamoa dalana ia noho reana atai siahuna ta ese ia karaia diba. Unai dainai, mesia lalohadaina idia ura henia momo. To mesia ta ita helaro henia be lalohadai namona ta, a? Eiava unai helaro be lalohadailaia kava gauna ta sibona?
[Picture Credit Line on page 2]
Cover photos: Top: U.S. Naval Observatory photo; Bottom: NASA photo
[Picture Credit Line on page 3]
WHO photo by P. Almasy
[Picture Credit Lines on page 4]
WHO photo by P. Almasy
U.S. Navy photo