Haida Idia Vara Lou Ena Badina

“BEMA taunimanima ta be ia vara lou lasi, ia be Dirava ena Basileia do ia itaia diba lasi.” (Ioane 3:3) Lagani 1,900 ia lao vadaeni, Iesu ese unai hereva ia gwauraia neganai, taunimanima momo idia hoa bona idia daradara.

Iesu ena hereva vara lou dekenai ita lalo-pararalaia namonamo totona, namona be inai henanadai haida ita haerelaidia be namo: Dirava ena ura taunimanima dekenai be dahaka? Mase ia vara neganai souli dekenai dahaka ia vara? Dirava ena Basileia be dahaka do ia karaia?

Dirava Ena Ura Taunimanima Dekenai

Tau ginigunana, Adam, ia vara neganai ia be tau goevadaena bona ia be Dirava ena natuna. (Luka 3:38) Iehova Dirava ia ura lasi Adam be do ia mase. Adam bona ena adavana Eva be mai edia dala kara dika lasi natudia do idia havaraia bona tanobada paradaisona do idia hahonua bona do idia mauri hanaihanai. (Genese 1:28) Ita gwau lasi hamatamaia neganai mase be Dirava ena ura tau bona hahine dekenai. Dirava ena taravatu idia gwau-edeede henia dainai unai ese taunimanima edia mauri ia hadikaia.​—Genese 2:​15-17; 3:​17-19.

Unai gwau-edeede karana ese mauri ena kara goeva dekenai henanadai badadia ia havaraia, hegeregere, Dirava be mai ena gwaumaoro ia lohia totona bona taunimanima ese Dirava ena taravatu do idia badinaia noho diba eiava. Unai henanadai hamaoromaoroa totona nega ia henia be namo. To Iehova Dirava ena ura taunimanima dekenai ia idau lasi, bona ia ura karaia gaudia be do ia karaia momokani. Iena ura be kara maoromaoro taudia ese tanobada do idia hahonua bona mauri hanaihanai Paradiso lalonai do idia moalelaia. (Salamo 37:29; 104:5; Isaia 45:18; Luka 23:43) Iesu ena hereva vara lou karana dekenai ita laloa neganai, namona be unai hereva momokanina ita laloa danu.

Mase Ia Vara Neganai, Dahaka Ia Vara Souli Dekenai?

Greek aonega bada taudia be idia hekwarahi bada mauri ena anina idia tahua totona, to Dirava ena lauma helaga ese Bible torea taudia dekenai ia hahedinaraia gaudia idia diba lasi. Taunimanima be lagani momo lasi idia mauri noho bona lalo-hekwarahi lalonai idia noho, bena idia mase ore herevana Greek aonega taudia ese idia abia dae lasi. Unai hereva dekenai idia maoro. To mase murinai do ia vara gauna dekenai edia lalohadai be maoro lasi. Idia laloa ta ia mase murinai ena mauri be tauanina idauna ta dekenai ia hanai, bona idia laloa taunimanima ibounai edia tauanina lalonai mase diba lasi soulina ta ia noho.

Iuda taudia bona sibodia idia gwauraia Keristen taudia be unai lalohadai idia abia dae danu. Heaven​—A History bukana, ia gwau: “Idia karoho rohoroho Iuda taudia bona Greek aonega taudia idia hedavari neganai, mase diba lasi soulina ena hereva idia kikilaia.” Unai buka ma ia gwau: “Greek taudia edia hahediba hereva souli dekenai be Iuda taudia ese idia abia dae bena murinai Keristen taudia ese idia abia dae danu. . .  Pilato ena hahediba hereva bona Bible dekenai guna ia vara sene karadia ia haboudia neganai, Philo [Keristen ginigunadia edia nega lalonai ia be Iuda aonega bada tauna Alesendria ai] bona ia ese dala ia kehoa gabeai Keristen lalohadaina idia abia taudia totona.”

Philo be dahaka ia abidadama henia? Unai buka ma ia gwau: “Ia laloa, mase ia vara neganai souli be ia hamatamaia gabunai ia giroa lou sinana ena bogana amo ia do vara lasi negana bamona. Souli be guba maurina dainai, mauri be tauanina lalonai ia noho daudau lasi, bona nega momo ia be mauri namona lasi.” To, Adam be “sinana ena bogana” amo ia vara lasi. Bible ena hereva ta ia gwau lasi, ta ia mase neganai Dirava ese ena mauri be gabu ta dekenai ia abia lao, hegeregere inai tanobada be tohoa gabuna sibona gabeai maurina be atai kahana dekenai eiava henuna kahana dekenai do ia lao totona.

Mase diba lasi soulina ena hahediba be Dirava ena lauma helaga ese ia havaraia bukana, Bible ena Hereva, dekenai ia noho lasi. Unai hereva “mase diba lasi soulina” be nega ta Bible dekenai idia gwauraia lasi. Bible ia gwau, Adam ia vara neganai ia be souli ta, ia gwau lasi ia be mai ena souli. Genese 2:7 ia gwau: “Iehova Dirava ese taunimanima tano ena kahu amo ia karaia, bona mauri ena laga ena udu baubau lalonai ia hiriria vareai, vadaeni taunimanima be mauri tauna [souli] ia karaia vadaeni.” Taunimanima be mauri hanaihanai guba dekenai eiava hel ena lahi dekenai hisihisi hanaihanai abia ena helaro idia abia lasi. Bible ese ia hahedinaraia souli, eiava tau ta, ia mase neganai ena lalohadai ibounai ia ore. (Salamo 146:​3, 4; Kohelete 9:​5, 10; Esekiel 18:4) To, souli ena hahediba dekenai aonega taudia edia lalohadai be Bible ena lalohadai hegeregerena lasi. Namona be lalohadai kereredia dekenai ita naria namonamo, namo lasi unai lalohadai kerere dainai Iesu ia gwauraia vara lou herevana ita lalo-pararalaia namonamo lasi.

Idia Vara Lou Lohia Gaukara Karaia Totona

Iesu ese Nikodemo ia hamaoroa, ia gwau, idia ‘vara lou taudia be Dirava ena Basileia lalonai do idia vareai.’ (Ioane 3:​3-5) Unai Basileia be dahaka? Haheitalai herevana amo, Iehova Dirava ese taunimanima ia havaraia negana murinai, ia gwau iena ura be “garana” ta do ia gaukaralaia​—do ia lohia tauna ta unai—​idau negai gaigaina, Satana Diabolo ena kwarana do ia makohia totona. (Genese 3:15; Apokalupo 12:9) Bible siridia momo ese idia hahedinaraia bamona, unai “garana” be Iesu Keriso, ia bona ma haida be Dirava ena lohia namona dalana, Mesia Basileiana lalonai lohia gaukara do idia karaia hebou. (Salamo 2:​8, 9; Isaia 9:​6, 7; Daniel 2:44; 7:​13, 14) Unai be guba Basileiana. Unai guba gavamanina ese Iehova ena lohia siahuna ena maoro do ia abia isi bona taunimanima be kara dika bona mase edia igui amo do ia hamauridia.​—Mataio 6:​9, 10.

Iesu ida lohia gaukara do idia karaia hebou taudia be 144,000 bona idia be taunimanima ihuana amo ia abidia hidi. (Apokalupo 5:​9, 10; 14:​1-4) Dirava ese Adam ena kara dika besena amo ia abidia hidi “Atai Herea Diravana ena helaga taudia” ai idia lao, Keriso ida Dirava ena Mesia Basileiana lalonai do idia lohia hebou totona. (Daniel 7:27; 1 Korinto 6:2; Apokalupo 3:21; 20:6) Unai tatau bona hahine be Iesu Keriso idia abidadama henia, Iesu ia gwau do idia “vara lou.” (Ioane 3:​5-7) Edena bamona bona dahaka dainai idia vara lou?

Unai taudia ta ta iboudiai be ranu dekenai idia bapatiso neganai idia be Keriso ena murina dekenai idia raka. Dirava ese Iesu ia henia boubou karana amo edia kara dika ia gwauatao, ia gwauraidia kara maoromaoro taudia bona ena lauma natudia ai ia halaodia. (Roma 3:​23-26; 5:​12-21; Kolose 1:​13, 14) Unai taudia dekenai aposetolo Paulo, ia gwau: “Dirava ese umui ia henia Laumana ese Dirava ena natuna umui ia halaoa vadaeni. Unai dainai Lauma ena siahu dekena amo, Dirava ita hereva henia neganai, ‘Tamagu e, lauegu Tamana lalokau e!’ ita gwauraia diba. Dirava ena Lauma bona iseda laumadia danu idia hereva hebou, idia gwauraia ita be Dirava ena natuna. Ita be Dirava ena natuna dainai ita ese iena bese taudia do idia abia hanamoa gauna be ita danu do ita abia, bona Dirava ese Keriso ia henia hanamoa gauna do ita abia danu. Badina bema Keriso danu ita hisihisi nega tamona, be ia danu iena hairaina do ita abia nega tamona.”​—Roma 8:​15-17.

Keriso ena murinai idia raka dainai, idia vara lou eiava mauri matamatana ta idia hamatamaia. Unai dainai idia diba Iesu ida guba mauri ena ahuna do idia abia. (Luka 12:32; 22:​28-30; 1 Petro 1:23) Aposetolo Petro ese unai vara lou dalana inai bamona ia gwauraia, ia gwau: “Dirava, iseda Lohiabada Iesu Keriso ena Tamana do ita hanamoa bada. Iena bogahisihisi ia bada herea. Ia ese Iesu Keriso mase dekena amo ia hatorea isi lou. Bona unai dainai ita be matamata vadaeni, ita vara lou. Vadaeni mauri korikori ena ura namona laloa ese iseda lalona ia hahonua. Dirava ese ita ia abia hidi, guba dekenai mauri do ita abia . Inai mauri ia noho hanaihanai ia be goevagoeva, ia bodaga diba lasi. Inai mauri be guba dekenai umui totona ia noho hegaegae.” (1 Petero 1:​3, 4) Unai taudia be guba mauri matamatana idia abia diba badina Dirava ese idia be Iesu bamona ia hatoredia isi lou.​—1 Korinto 15:​42-49.

Tanobada be Edena Bamona?

Ita gwau lasi kamonai taudia iboudiai be do idia vara lou bena tanobada idia rakatania guba dekenai do idia daekau totona. Unai lalohadai kererena be aonega taudia, Philo bamona, ese idia havaraia, idia laloa “mauri be tauanina lalonai [be] ia noho daudau lasi, bona nega momo ia be mauri namona lasi.” To hamatamaia neganai Iehova Dirava ese tanobada dekenai ia havaraia gaudia be idia dika lasi.​—Genese 1:31; Deuteronomi 32:4.

Dirava ia ura lasi taunimanima be nega sisina do idia mauri bona mai hisihisi danu idia noho. Iesu Keriso bona idia vara lou taudia be guba dekenai pavapava bona hahelaga gaukara do idia karaia neganai, idia ese Satana ena gwau-edeede karadia idauidau do idia kokia. (Efeso 1:​8-10) Gwauhamata hegeregerena, idia be ‘Abraham ena garana’ dainai, bese iboudiai ese hahenamo do idia davaria. (Galatia 3:29; Genese 22:18) Kamonai taudia be tanobada paradaiso dekenai do idia mauri, unai mauri be harihari ia vara hisihisi momo maurina amo do ia idau momokani.​—Salamo 37:​11, 29; Apokalupo 21:​1-4.

Daidia ese Namo Do Idia Davaria?

Mase amo do idia toreisi lou neganai, Iesu ia henia boubou karana dekenai idia abidadama taudia be Dirava ena hahenamo do idia davaria danu. (Ioane 5:​28, 29; Kara 24:15) Idia momo be guna Dirava bona Keriso idia diba lasi dainai Iesu dekenai abidadama idia hahedinaraia diba lasi. Do idia toreisi lou abidadama taudia ta be Ioane Bapatiso, ia mase guna bena gabeai Iesu ena mase amo dala ia kehoa taunimanima be guba maurina do idia abia diba totona. (Mataio 11:11) To idia sibona lasi, ‘hutuma bada herea, bese idauidau amo idia mai taudia ese edia dabua idia huria vadaeni Mamoe ena Natuna, Iesu Keriso, ena rarana lalonai bona idia kurokuro momokani.’ Basileia haroro gaukara amo sivarai idia kamonai henia bona idia abia dae, unai gaukara be Iesu ena vara lou ‘tadikaka’ ese idia gunalaia noho, bona idia be Dirava ena tuari, Aramagedono, dekena amo do idia roho mauri bona tanobada goevadaena dekenai do idia noho. (Apokalupo 7:​9-14; 16:​14-16; Mataio 24:14; 25:​31-46) Vadaeni, Dirava ena ura hegeregerena, ena be taunimanima milion momo be hahemauri do idia davaria, to idia vara lou lasi bona Keriso ida guba dekenai lohia gaukarana do idia karaia lasi.​—1 Ioane 2:​1, 2.

Oi be tanobada paradaiso dekenai mauri hanaihanai do idia abia taudia ta, a? Bema Iesu Keriso ia henia boubou karana dekenai do oi abidadama bona Keristen momokani ena kongregesen ida do oi hebou neganai unai tauna ta ai do oi lao diba. Unai kongregesen be tanobada ena aonega hereva idauidau amo ia dika lasi, to “ia be hereva momokani ena du bona iena badina korikori.” (1 Timoteo 3:15; Ioane 4:24; 8:​31, 32 itaia danu.) Bena vaira negana namona do oi itaia, unai neganai Dirava ena vara lou natudia be guba dekenai idia lohia noho, bona Dirava ena tanobada natudia be mai edia goevadae ida tanobada paradaiso namo hereana dekenai do idia noho. Unai dainai namona be dala oi tahua unai tanobada matamata dekenai hahenamo hanaihanai do oi abia totona.​—Roma 8:​19-21; 2 Petero 3:13.

[Picture on page 6]

Adam be guba ai mauri do ia abia lalohadaina eiava hel ena lahi ai hisihisi hanaihanai ena lalohadai ia abia lasi