Tanobada ai Uiti Gogoa Totona Ma Misinari Momo Idia Mai

BIRU taudia dekenai September be uiti gogoa negana, to uiti gogoa gaukara badana ta dainai, hutuma bada herea be Iehova ena Witness taudia edia Jersey City Assembly Hall dekenai idia lao; unai be September 8, 1991 neganai, Hudson Sinavaina kahanai, New York City ena kahana dekenai. Watchtower Bible School of Gilead edia klas namba 91 be edia setifiket idia abia. Betele ruma besena bona idia boiridia taudia 4,263 bamona idia noho, bona taunimanima 1,151 be telefon amo idia kamonai. Unai telefon be Brooklyn hedikwota bona Wallkill bona Patterson uma gabudia dekenai idia atoa.

Gilead School ena presiden, Frederick W. Franz, iena lagani be kahirakahira 98, be Dirava hanamoa momokani bona kudou hamarerea gurigurina amo hebou ia kehoa. Albert D. Schroeder, Hakaua Oreana tauna ta bona guna unai sikuli ia naria bona ia hadibaia tauna ta, be unai dinana sikuli karaia ore hebouna ena seamani tauna. Ia be kamonai taudia dekenai Salamo 2:​1, 2 ena hereva ia hadibaia lou, bona peroveta herevadia ma haida ia gwauraia; idia gwau hari inai nega lalonai bese idauidau idia hepapahuahu bona idia heiriheiri karaia. Unai bamona heiriheiri dainai gabu momo dekenai uiti gogoa gaukarana idia karaia hamatamaia.

George M. Couch, Betele Komiti tauna ta, ese unai dina ena hereva ginigunana ia henia. Iena hereva ena sinado be “Oi Abia Hahenamo Oi Duahia.” Ia ese Gilead student taudia ia hamaorodia harihari unai bamona idia karaia hamatamaia be namo. Ia gwau unai student taudia be hahenamo idia abia to unai hahenamo idia abia idia gaukara bada dainai. Unai hegeregerena, lagani 97 tauna, Iakobo, hanuaboi negana lalonai aneru ida ia heatu badina ia ura hahenamo ta ia abia. (Genese 32:​24-32) Tadikaka Couch ese student taudia ia hamaorodia, lalona hametaua gaudia idia laloa momo lasi to ma haida dekenai hahenamo idia mailaia idia be lalohadai mainona idia habadaia dainai; unai idia abia diba guriguri bona idia ura bada karana amo.

Hakaua Oreana tauna ta, John E. Barr, be inai sinado “Umui Lalokau Heheni” ia herevalaia. Iesu murinai idia raka taudia edia lalona idia hegeregere idia ta ta totona edia mauri idia henia. Ia be student taudia ia henanadai henidia, ia gwau, “Emui kudou lalonai unai bamona lalokauna ia noho, a?” Ia gwau: ‘Unai lalokau be lasi neganai, ita be namo lasi. Unai sibona.’ (1 Korinto 13:3) Tadikaka Barr be lalokau hahedinaraia karadia haida ia gwauraidia. Ia ese student taudia ia hagoadaia idia be ma misinari haida idia matauraidia, bona nega ibounai hereva gwauraia mai manada daladia idia tahua. Iena sisiba be “hepapahuahu maragidia oi laloaboio,” bona 1 Petero 4:8 ia gwauraia. Ia gwau bema idia laloa unai gaukara be maduna sibona lasi, misinari ta ta edia nadunadu dinadia be lalokau idia hahedinaraia diba negadia. Ia be student taudia ia hadibaia lou, ia gwau: “Iseda tadikaka bona taihu dekenai nega ibounai lalokau ita henia.”​—Roma 13:8.

Hesiai Department Komiti tauna, David A. Olson, ena hereva ena sinado namona be “Oiemu Lalo-Goada be Edena Bamona?” Ia be lalo-goada daladia rua ia gwauraidia bada: Iehova bona iena orea dainai, bona ita duahia diba lasi gaudia momo dainai idia dainai ita lalo-goada diba (Hereva Lada-isidia 14:6; Ieremia 17:8); bona ita sibona dainai ita lalo-goada diba. Misinari taudia be mai badina dainai idia sibona dekenai idia lalo-goada diba, hegeregere idia be hesiai gaukara idia karaia bona Iehova bona iena orea be idia dekenai gaukara idia henia dainai. Aposetolo Paulo be unai bamona badina haida dainai ia lalo-goada. (1 Korinto 16:13; Filipi 4:13) To Tadikaka Olson ena sisiba be namona be idia naria namonamo, tanobada ese ia abia isi hekokorokuna idia hahedinaraia garina, taunimanima idia diba momo torea tauna ese unai hereva ia haheitalaia hegeregerena, ia gwau: “Nega momo lauegu hereva lau gwauraia. Unai amo lauegu herevahereva dekenai taunimanima idia ura idia kamonai.” To, lalo-goada be mai manau ida idia hahedinaraia neganai, ma haida edia lalo-goada idia havaraia diba. Paulo dekenai unai hereva be momokani.​—Filipi 1:​12-14.

Hakaua Oreana tauna ta, Lyman A. Swingle, ese student taudia ia hagoadaia inai hereva amo: “Umui Gilead School Taudia E, Uiti Gogoa Gabuna ai Umui Lao!” Ia gwau unai dina be Gilead School bona tadikaka ibounai edia orea ena uiti gogoa dinana, badina unai sikuli taudia be misinari gaukara idia karaia noho taudia tausen tausen ida idia lao idia gaukara hebou totona​—idia haida be lagani 1940 ia lao 1950 bamona lalonai idia karaia sikuli ginigunana, iharuana, bona ihatoina idia lao henia, bona misinari gaukara idia do karaia noho! Tadikaka Swingle ia gwau unai neganai idia diba lasi unai misinari gaukara be do ia lao noho ma lagani 50 lalodiai, bona idia diba lasi Nazi, Fascist, bona ma gavamani haida ese haroro gaukara idia koua totona idia karaia karadia be do idia ore. Ia gwau: “Bema Iehova ese ia karaia vadaeni gaudia dainai ita hoa, gabeai do ia karaia gaudia dekenai dahaka ita laloa?” Iena hereva ia hadokoa neganai ia be student taudia dekenai ia hereva badabada, ia gwau: “Uma gabuna dekenai umui lao!”

Bena Gilead Sikuli ena hadibaia taudia badadia rua be nega ginigabena ai klas namba 91 idia hereva henidia. Jack D. Redford ena hereva ena sinado be “Aonega Oi Abia.” Student taudia ia hamaorodia, Gilead School dekenai diba bona lalo-parara idia hadibaia, to idia sibona be aonega do idia abia, dala maorona dekenai edia diba idia gaukaralaia totona. Ia ese student taudia ia hamaorodia lalohadai kererena, Gilead School dekenai gau iboudiai idia diba lalohadaina unai, idia dadaraia. “Sikuli oi rakatania murinai oi dibaia gaudia be gau badana.” Inai gaudia dekenai diba do idia abia: maino dalana dekenai taunimanima kara henidia, adavana dekenai, ma misinari taudia haida dekenai, bona tadikaka bona taihu dekenai idia gwau diba “Lau sori”; namo lasi edia lalohadai ginigunana gau ta dekenai idia dogoatao, bona namona be idia diba hekwakwanai iboudiai be mai dobudia bona unai dainai namona be gau iboudiai idia lalo-pararalaia namonamo guna bena gabeai sisiba aonegana idia henia diba; bona idia noho gabudia ai idia noho tadikaka idia matauraidia badina hekwakwanai idauidau dekenai idia gaukara noho diba.​—Hereva Lada-isidia 15:28; 16:23; Iakobo 1:19.

Gilead School ena registrar tauna, Ulysses V. Glass, be iena hereva lalonai Filipi 3:16 ia herevalaia bada. Ia ese klas taudia ia hanamodia idia namo idia lao dainai, bona ia hagoadaia unai siri hegeregerena idia raka noho. Ena be student taudia be diba maoromaorona do idia habadaia noho, to ia gwau gau iboudiai do idia diba lasi. Ia be namba ia hahedinaraia dina gauna amo ena hereva ia haheitalaia. Reana dina gauna ena biaguna ia diba edena bamona ia gaukaralaia to ena gaukara dalana ia diba namonamo lasi. Unai hegeregerena, namo lasi misinari taudia be edia diba hegeregerena lasi taudia idia laloa maragi, unai taudia be gau badana idia diba​—Iehova gari henia dalana. (Hereva Lada-isidia 1:7) Ia be klas taudia ia hadibaia lou gau badana be ‘matana namona’ idia karaia noho. (Mataio 6:22) Lauma dalana ai matana ia dika diba, tauanina dalana ai matana ia dika diba hegeregerena. Hegeregere, haida be gau haida sibona idia itaia diba​—idia be gau haida sibona idia laloa momo dainai gau iboudiai idia itaia diba lasi​—to ma haida be idau, idia be anina bada lasi gaudia idia itaia bona idia laloa be namo anina bada gaudia idia itaia lasi.

Unai daba ena hereva ginigabena ena sinado be “Iehova Ena Orea Ita Diba Dalana bona Ia Ida Ita Gaukara Hebou Dalana,” bona Hakaua Oreana tauna ta, Theodore Jaracz, ese ia henia. Tadikaka Jaracz ia gwau ena be tanobada lalonai orea bona sosaiti tausen tausen idia noho, to tamona sibona be tanobada ese ia havaraia lasi. To Iehova ena orea be edena dala ai ita diba? Dirava ena Hereva ese diba dalana ia hadibaia. Bible ia hahedinaraia guba ai ia karaia gaudia idia gaukara namonamo dala namo hereana dekenai. (Salamo 103:​20, 21; Isaia 40:26) Iehova ena tanobada oreana ita diba dalana be ia gaukara namonamo bona tanobada amo ia gini siri, Bible ena sisiba ia badinaia momokani, ena kara ibounai idia goeva momokani, bona ena orea taudia idia lalokau heheni. Tadikaka Jaracz ese Gilead student taudia ia hagoadaia idia lao gabudia ai taunimanima momo idia durudia, Bible ena amo, Iehova ena orea idia diba totona. Unai dekenai, ia be moale havaraia momokani herevana ta ia gwauraia: Gilead School be nega rua amo do ia bada, klas namba 93 dekenai student 50 do idia vareai! Danu, Germany dekenai, klas namba 93 ia karaia neganai, nega tamona Gilead Extension School do idia hamatamaia. Helai taudia be nega daudau lalonai edia imana idia patapataia mai rege bada!

Unai daba ena kara badana dekenai, Gilead student ibounai 24 be edia diploma pepana idia abia. Nega kahirakahira idia be tanobada ena tano idauidau 12 dekenai do idia lao. Unai klas be kudou amo gwaubou herevana idia karaia, idia be Hakaua Oreana bona Betele taudia idia tanikiu henia. Dina tubua aniani murinai, Tadikaka Charles J. Rice, Watchtower Farms Komiti tauna, be Gima Kohorona Stadi kwadogina ia karaia. Bena mai edia goada ida sikuli karaia ore taudia be hebou ta idia karaia. Hua 5 lalonai, Wallkill, New York dekenai sikuli idia karaia negana lalonai haroro gaukara dekenai idia davaria gaudia idia haheitalaia lou. Unai murinai, kongregesen idauidau pablisa taudia be drama ta idia karaia, ena ladana be Youths Who Remember Their Creator Now [Harihari Edia Havaraia Tauna Idia Laloatao Memero Kekeni].

Hebou ia hadokoa totona, Tadikaka George Gangas, Hakaua Oreana ena lagani 95 tauna ta, be vaia ena kara hegeregerena mai goada ida guriguri Iehova dekenai ia henia. Kamonai taudia be mai moale danu idia lao, bona ita daradara lasi to ita diba idia ta ta idia ura tanobada ibounai ena uiti gogoa gaukara lalonai edia gaukara idia habadaia.

[Box on page 22]

Sikuli Ena Lista

Edia tano idauidau: 6

Idia lao henia tano idauidau: 12

Sikuli ena kosi idia karaia taudia: 24

Tatau mai edia adavana: 12

Edia lagani ena averes: 33.4

Hereva momokani lalonai idia noho laganidia ena averes: 16.13

Nega ibounai hesiai gaukara idia karaia laganidia ena averes: 11.3

[Picture on page 23]

Gilead Ena Watchtower Bible Sikuli Ena Klas Namba 91 Taudia

Henuna dekenai laini ta ta dekenai idia gini tadikaka bona taihu edia ladana be vairana kahana amo bona laurina kahana amo idia torea lao.

(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.