Gilead Kosi Haorea Taudia—“Misinari Korikoridia!”
“MISINARI taudia ese dahaka gaukara idia karaia?” Lagani 40 gunanai, niuspepa ta ese unai henanadai ia kikilaia. Iena toretore tauna ia gwau, misinari taudia korikori be gorere eiava ogogami taudia edia mauri bona moni bona kohu naria dalana hanamoa gaukarana idia karaia. To, Sunday, March 5, 1995 ai, Jersey City Assembly Hall of Jehovah’s Witnesses dekenai, haere idauna ta idia henia. Dahaka idia karaia? Watchtower Bible School of Gilead ena klas namba 98 ena kosi haorea program idia karaia—ia be tanobada hegegemadai dekenai misinari taudia ia siaia sikulina!
Ane bona guriguri amo murinai idia matamaia, Albert D. Schroeder, Hakaua Oreana ena memba tauna ta, ese idia mai taudia 6,430 dekenai hanamoa hereva ia henia. Iena matamaia hereva amo, Tadikaka Schroeder ia hahedinaraia goevagoeva dahaka dainai Gilead misinari taudia be sibodia idia gwauraia misinari taudia amo idia idau. Ia gwau: “Gilead ena sikuli buka badana be Baibel.” Gilead idia haorea taudia be gorere eiava ogogami taudia durua gaukara taudia lasi, to idia be Dirava ena Hereva hadibaia taudia! Idia lao tano idauidau dekenai, bona idia hegeregere momokani idau bese taudia edia ura lauma dalanai do idia hagugurua totona.
Unai murinai, hereva idia henia tadikakadia ese dahaka dainai Gilead idia haorea taudia be misinari taudia “korikori” idia hamomokania gaudia ma haida idia herevalaia. Charles Molohan ena hereva ena ladana be “Misinari Gaukara Lalonai, Huahua Namona Havaraia Noho.” Tadikaka Molohan ese aposetolo Paulo ena hereva Kolose 1:9, 10 ai ia gaukaralaia, idia ia hamaoroa unai hua ima Gilead dekenai ese idia ia durua ‘Dirava ena diba bona diari ese idia do ia hatubua daekau’ totona. Dala rua ai unai ese idia do ia durua huahua idia hedinaraia: Dirava ena lauma ena huahua idia hahedinaraia neganai, bona Baibel ena hereva momokani ma haida dekenai idia henia neganai.
Daniel Sydlik, Hakaua Oreana ena memba ta, ese inai hereva ia henia: “Oiemu Mauri Hoihoilaia Lasi.” Ia ese Iesu ena henanadai, “Tau ta be dahaka davana do ia henia iena mauri do ia davaria lou totona?” ia herevalaia. (Mataio 16:26) Tadikaka Sydlik ese inai ia itaia: “Taunimanima momo ese edia mauri idia haboioa badina idia ura edia mauri dalana ia auka lasi bona hekwarahi lasi.” To, edia abidadama ia goada noho taudia ese hetoho idauidau idia davaria neganai, idia ura idia gini auka. Iesu ena hereva amo ita itaia bema ta ia ura lasi iena souli, eiava mauri, ia haboioa, iena mauri do ia “henia,” eiava, bouboulaia. Misinari taudia matamata idia hagoadaia Iehova ena hesiai gaukara lalonai edia goada ibounai idia henia!
Murinai, William Van de Wall, Haroro Gaukarana Komiti tauna ta ese inai hereva, “Aposetolo Paulo—Iena Haheitalai Namona Tohotohoa” ia henia. Tadikaka Van de Wall ia gwau: “Aposetolo edia nega lalonai, Paulo be misinari gaukara ia gunalaia.” Iena haheitalai namona amo, gau hani be hari misinari gaukara idia karaia taudia dekenai idia hahedinaraia: (1) Paulo ese taunimanima ia lalodia bada bona ia lalokau henidia; (2) iena hesiai gaukara karaia dalana ia namo herea; (3) sibona ena ladana abia isi karana ia dadaraia; (4) Iehova ena ura ia nanadaia lasi to ia abia dae sibona.
“Oiemu Gaukara Matamatana ai, Iehova ese Emu Kara Ia Tahua” be Lyman A. Swingle, Hakaua Oreana ena memba ta, ena hereva ena kwarana. Tadikaka Swingle ese unai dina ena siri, Salamo 139:16, ia gaukaralaia, misinari taudia ese edia gaukara lalonai hekwakwanai do idia davaria bona Iehova be hanamoa dalana ia diba, ia hamomokania totona. “Ia dekenai oi lao,” ia gwau, “hekwakwanai ia vara neganai, ia oi hereva henia, bona iena ura oi tahua goadagoada.”
John E. Barr, Hakaua Oreana ena memba ta, ese inai hereva “Emu Abidadama Ia Bada Ia Lao Noho” ia kikilaia. (2 Tesalonika 1:3) Luka 17:1 ai, Iesu ena hereva ita duahia, ia gwau: “Dibagani be hanaihanai do ia vara noho.” Haida be ma misinari taudia haida edia kara dainai idia hekwakwanai. To Tadikaka Barr ese unai misinari taudia ia hagoadaia edia abidadama lalonai namona be gwauatao karana ia noho. Momokani, unai bamona hedibagani ia noho dainai Iesu ena aposetolo taudia idia noinoi: “Aiemai abidadama oi habadaia.” (Luka 17:2-5) Misinari taudia edia abidadama ia tohoa gauna ma ta be iseda orea ena heau dalana idia haidaua neganai. Tadikaka Barr ia henanadai, gwau: “Iseda abidadama do ia hegeregere unai gaudia abia dae totona, eiava ita idia koua ororo badadia bamona ai do idia lao?”
Murina hereva be Gilead ena hadibaia tatau rua edia sisiba. Jack Redford ese ia hamaorodia idia laloa goada noho be namo. Misinari hahine ta ena sivarai ia kikilaia; ia ese ena misinari gaukara ia rakatania badina misinari ma haida ese ena nanadu dalana idia kirikirilaia. To, Baibel lalonai badu haraga karana ia sisibalaia. (Hadibaia Tauna 7:9) “Emu lalona umui hagoadaia,” ia gwau. “Ma haida edia kerere bona goevadae lasi karadia oi gwauatao.”
U. V. Glass, Gilead ena registrar, ese idia ia nanadaia: “Umui hegeregere inai ‘nega dika, bona inai dika ia vara kava noho’ gaudia umui haheaukalaia totona, a?” (Hadibaia Tauna 9:11) Tadikaka Glass ia gwau: “Iseda mauri ena heau dalana do ia idau diba bona gau haida ese ita do idia hamoalea lasi.” Misinari taudia haida idia hoa badina idia davaria hanaihanai idia gorere, eiava gorere dikana ta idia abia, o ruma bese lalonai hekwakwanai badadia idia vara dainai, edia misinari gaukara idia rakatania. “Herevana dahaka vara kava gauna ita davaria,” Tadikaka Glass ia gwau, “ita diba Iehova ese unai gau ia itaia bona ia laloa noho. Bema Ia dekenai ita tabekau, ita diba do ita kwalimu!”
Hereva ta “Misinari Gaukara Karaia Totona Umui Noho” be daba program ena hereva namona ta. Theodore Jaracz, Hakaua Oreana ena memba ta, ese inai henanadai, “Misinari taudia ese dahaka gaukara idia karaia?” ia kikilaia lou. Haere henia totona, Aposetolo edia Kara bukana karoa 13 bona 14, Paulo bona Banaba edia misinari gaukara idia kikilaia karoadia ia gaukaralaia. Oi itaia goevagoeva diba, edia gaukara be gorere bona ogogami taudia durua totona lasi, to edia gaukara badana be ‘sivarai namona idia harorolaia.’ (Kara 13:32) Tadikaka Jaracz ia henanadai: “Paulo bona Banaba ese misinari tauna korikori ena kara idia haheitalaia umui abia dae, a?” Nega daudau lalonai Mexico dekenai misinari gaukara ia karaia tauna, Robert Tracy, idia noia iena ekspiriens namodia haida ia kikilaia totona.
Daba program ena mai anina bada kahana be Tadikaka Schroeder ese sikuli haorea pepadia ia henia misinari matamata 48 dekenai. Idia helai taudia be mai moale ida, misinari taudia idia lao gwauraia tanodia 21 edia ladadia idia kamonai henia: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, bona Venezuela.
Edia dina tubua laga-ani murinai, idia helai lou bona Robert P. Johnson, Haroro Gaukarana Komiti dekenai ia gaukara tadikaka ta, ese Gima Kohorona stadi ia karaia. Gilead ena klas namba 98 taudia ese iena henanadai idia haerelaidia. Bena Gilead sikuli lalonai idia gaukara tadikakadia ese stiuden haida idia henanadaia henia. Idia helai taudia idia moale bada Gilead idia haorea taudia ese edia haroro gaukara sivaraidia bona dahaka idia laloa edia gaukara bona gabuna matamata dekenai idia kikilaia neganai.
Lagani 6 mai kahana, Gilead be Society ena Watchtower Farms, Wallkill, New York dekenai, ia noho. April 1995 ai, unai sikuli gabuna idia haidaua, idia abia lao Watchtower Educational Center, Patterson, New York dekenai. Wallkill ena Betele tadikaka edia mamina be edena bamona? Unai sikuli haorea dinana ai, Wallkill tadikaka haida idia henanadai henia. Oi itaia maoromaoro, edia hereva amo, idia moale guna unai stiuden taudia be idia ida idia noho. Momokani, unai taudia, sibodia edia ura idia dadaraia tatau bona hahine, be misinari korikoridia—manau, edia ura idia atoa guna lasi, ma haida idia durua taudia.
Unai dina ia ore neganai, idia mai taudia iboudiai idia diba Gilead Sikuli be lagani 50 lalonai ia karaia vadaeni gaukarana do ia karaia noho—misinari korikoridia do ia havaraia!
[Box on page 18]
Klas Taudia:
Edia tano idauidau: 8
Idia lao henia tanodia idauidau: 21
Klas taudia iboudiai: 48
Edia lagani edia averes: 32.72
Lagani hida hereva momokani lalonai, edia averes: 15.48
Lagani hida ful-taim hesiai gaukara idia karaia, edia averes: 10.91
[Picture on page 18]
Watchtower Bible School of Gilead Ena Klas Namba 98
Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be lauri kahana amo ela bona idiba kahana. (1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx, H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.