Kekero Muramurana Inua Hanaihanai Karana Hadokoa Dalana

“Egu gaukara negana lalonai, dabai 10 okaloka bamona, bia lau laloa matamaia. Dina tubua ai lau raka lasi bona ta o rua lau inudia, bena 3 okaloka ai egu tauanina ia heudeheude noho. Lau ura gaukara amo do lau doko ma ta do lau inua totona. Egu ruma lau lao henia negadia momo ai ma rua lau inudia. Bena 7 okaloka bamona ai lau ura do lau inua lou. Lau inua ela bona lau mase rea, helai gauna amo lau moru bona egu piripou lalonai lau mei, bena unai bamona lau hekure ela bona daba. Lagani 29 lalodiai lau be dina dina iboudiai unai bamona lau karaia.”

HARI tauna be kekero muramurana enai ia tabekau. Ia sibona lasi, to tanobada hegegemadai taunimanima milion milion, tatau bona hahine, be unai kara dikana idia hekwarahilaia. Dr. Vernon E. Johnson ia gwau, unai kara ese “taunimanima ena tauanina, ena darana, bona ena lalona ia hadikadia, bona lauma dalanai ia hadikaia danu.”

Diba momo taudia momo idia gwau unai dika koua dalana tamona be, unai bamona tauna do ia inua lou lasi ena mauri negana ibounai lalonai. Inai be taravatu aukana lasi, badina be kekero muramurana be mauri ena badina korikorina ta lasi. Momokani, idia iusilaia kerere taudia be Dirava ese ia badu henidia. (1 Korinto 6:​9, 10) Ta ese kekero muramurana ia dadaraia bena Dirava ena tanobada matamatana ai ia vareai be namo, ena ura dikana dainai ia inua hanaihanai bena unai dainai mauri hanaihanai ia davaria lasi be dika.​—Mataio 5:​29, 30.

Momo idia davaria kekero muramurana inua kerere karana idia rakatania bena idia lou henia lasi be auka. (Roma 7:​21-24 itaia.) Dahaka ese ia durudia diba? Mani oi do ai sisiba henia. Ena be kekero muramurana oi inua lasi, to inai hereva ese oi do ia hadibaia, bona reana emu turana ta o emu varavara ta, unai muramura ia hekwarahilaia tauna, do oi durulaia diba.

Sibomu Emu Kara Oi Tahua

Bema oi be kekero muramurana enai oi tabekau to emu kerere hunia totona oi koikoilaia, oi gwau ienai oi tabekau lasi, do oi hadarerea be auka. Emu ura be do oi inuinu noho mai emu ura kwalimu ida. Reana oi gwau, ‘Egu hekwakwanai be bada lasi. Lau be do mai egu famili bona egu moni gaukarana.’ Gau badana be, oi be do mai emu kekero muramurana.

Bema oi koikoilaia, reana unai dainai oi ese emu turadia, oi idia durua gwauraia taudia, do oi kamonai henidia lasi. Robert ese ena ravana ia itaia, ia inuinu kerere bona hemataurai lasi karadia ia karaia. Robert ia gwau: “Dina haida murinai, lau ese lau nanadaia, ia laloa ia inuinu dainai unai bamona ia kara, eiava.” “Egu hereva ia gorea vaitani, ia gwau, ‘Emu hereva hamomokania gauna be lasi’ bona, ‘Egu lalona ena mamina be oi diba lasi.’ ”

Bema emu varavara ta o emu turana ta ese oi ia sisiba henia badina be emu inuinu karana ia laloa momo dainai, sibomu emu kara oi tahua namonamo. (Hereva Lada-isidia 8:33) Kekero muramurana oi rakatania diba, ela bona pura ta, o hua ta o hua haida do idia ore, a? Bema lasi, dahaka dainai? Oi be sibomu oi koia lasi. Iakobo ia gwau unai bamona ia karaia tauna be “sibona ena vairana toana hevarivari lalonai ia itaia bamona . . . vadaeni ia raka siri, bona maoromaoro iena vairana toana ia laloaboio momokani.”​—Iakobo 1:​22-25.

Do oi namo lou matamaia murinai danu, namona be do oi naria, sibomu do oi koia garina. Buka ta ladana Willpower’s Not Enough be ia gwau: “Kekero muramurana ia rakatania matamata tauna be reana ia laloa kerere, ia laloa ia be nega sisina ia rakatania diba dainai . . . ia namo lou vadaeni.” Unai bamona ia laloa kerere tauna be ia moru lou matamaia. Unai lalohadai kererena do oi dadaraia totona, heduru do oi abia be namo.

Heduru Oi Abia

Tau ta ladana Leo ena lalona ia parara ia sibona ese unai kerere do ia halusia diba lasi, unai dainai doketa edia heduru ia tahua. Idia durua bada murinai ia namo ia lao noho. Leo ia laloa unai bamona heduruna be mai anina bada. Bema unai bamona heduruna be emu taoni ai oi abia diba, reana emu lalona do oi hadaia do oi tahua.

To namona be oi diba, do oi namo lou totona, inua karana do oi hadokoa sibona be hegeregere lasi. Bema emu kerere ena badina oi tahua lasi, dika do oi davaria reana. Doketa Charlotte Davis Kasl ia gwau: “Kekero muramurana idia inua kerere taudia haida lau davaridia, doketa ese idia hanamodia toho loulou ela bona nega 14, badina be edia kerere edia badina korikoridia idia tahudia lasi.”

Dennis ia diba unai be momokani. Ia gwau: ‘Ena be kekero muramurana lau rakatania vadaeni, to lau be do mai egu hekwakwanai momo, ela bona egu mero negana ai idia vara gaudia edia anina lauegu ai lau tahua bona lau lalo-pararalaia bena egu kara lau haidaua.’

Unai hegeregerena, Leo ia namo lou lasi ela bona sibona ena lalona ia tahua namonamo. Ia gwau: “Guna lau mama momo bona lau dagedage momokani. Nega haida lau hemarai bada bona nega haida lau hekokoroku bada.” Bena Leo ese Baibel ena sisiba Efeso 4:22 ai ia badinaia: “Emui mauri gunana dabua gunana bamona umui kokia.” Oibe, emu raka dalana gunana ese emu mauri ena oromana ia havaraia. Kara dika bema oi kokia neganai, dahaka be ia do noho? Gauna be emu mauri, lagani momo lalodiai emu raka dalana gunana ese ena oromana ia havaraia gauna unai. Unai dainai, do oi namo lou totona, namona be emu mauri dalana do oi haidaua.

Dirava Dekenai Oi Tabekau

Leo ia namo lou badina ma ta be, Dirava enai ia tabekau matamaia. Ia gwau: “Iehova enai tabekau karana ese egu lalohadai bona egu kara ia haidaudia vaitani.”

To namona be do oi naria namonamo. Dirava enai do oi tabekau diba totona, namona be emu lalo-hekwarahi do oi hamaorolaia mai emu momokani bona mai emu abidadama ida. Kekero muramurana enai ia tabekau tauna ese unai kara namodia ia goadalaidia haraga diba lasi.

Reana oi be Dirava enai tabekau karana ena mamina oi diba lasi. Unai dainai do oi haheauka be namo. Emu lalona ai oi gwau lasi inua karana oi hadokoa dainai unai mamina do oi abia. Namona be dala do oi tahua goadagoada, Dirava bona ena kara do oi lalo-pararalaidia totona. Baibel ena salamo, Dirava bona ena dala idia lalodia goevagoeva taudia edia lalohadai idia gwauraidia gaudia, be do oi duahidia namonamo bona edia anina do oi laloa namonamo loulou be namo.a

“Siahu Badana”

Bema Iehova enai oi tabekau mai emu abidadama ida, unai be mai anina bada oi emu ai. Emu hekwarahi, do oi namo lou totona oi hekwarahilaia, be Iehova ese do ia durua. (Salamo 51:​10-12; 145:14 itadia.) Nega iboudiai do oi guriguri henia diba, bona oi diba ia ese “siahu badana” oi do ia henia.​—2 Korinto 4:7; Filipi 4:​6, 7.

Dirava ese emu lalona ia diba herea. (Salamo 103:14) Sisiba taudia, taunimanima edia aonega ai idia tabekau taudia, ese oi idia durua maragi diba; to Dirava ese oi ia durua bada diba inai tuari lalonai! (Isaia 41:10; 48:​17, 18) Keristen kongregesen lalonai oi do ia durua mai ena lalokau ida.

Heduru Dalana

Lauma dalanai idia goada elda taudia Keristen kongregesen lalonai ese oi do idia durua bada diba. Doketa taudia edia hereva idia diba momo lasi reana, to idia ese Dirava ena hereva idia diba bona idia abidadama henia. Idia be “lai koua gabuna hegeregerena ai do idia lao, lai-gubana koua gabuna; sinavai maragidia gabu kaukauna ai bamona, nadi badana ena keru gabuna tano gagaena ai bamona.” (Isaia 32:2) Edia heduru do oi tahua be namo.

To, momokani, unai Keristen elda taudia, bona emu varavara bona emu turadia danu, ese sibomu emu kara ena anina amo oi do idia hamauria lasi. Buka ta ladana Coming Off Drink ia gwau: “Kekero muramurana enai idia tabekau taudia hanamodia dalana korikorina be inai: Edia kara ena anina dikana ita hadibalaidia, bona ita hagoadadia, sibodia edia kara naria madunana do idia huaia totona.” Unai dainai idia ese oi unai bamona do idia kara henia; emu lalona do idia hagoadaia mai edia hebogahisi ida, emu kerere hanamoa dalana do oi badinaia namonamo bona kekero muramurana tuari henia karana ai do oi kwalimu totona.

Oiemu Maduna Oi Huaia

Ena be haida edia heduru amo namo do oi davaria, to namona be oi diba taunimanima ta eiava lauma ta ese oi do ia fosia diba lasi do oi namo lou totona. Do oi namo lou totona, oiemu maduna do oi huaia be namo. (Genese 4:7; Deuteronomi 30:​19, 20; Filipi 2:12 itadia.) Unai maduna oi abia dae, bena Iehova ese oi do ia hanamoa. Baibel ena gwauhamata 1 Korinto 10:13 ai be inai: “Dirava be ia momokani. Ia ese umui do ia naria, emui goada ia hanaia hedibagani ese umui do ia pidia garina. Bona hedibagani neganai emui dala ta do ia kehoa. Vadaeni inai dala dekena amo unai hedibagani dekenai do umui kwalimu diba.” Unai dainai oi goada karaia​—kekero muramurana inua hanaihanai karana do oi hadokoa diba.

[Footnotes]

[Box on page 24]

Reana kekero muramurana ese emu mauri ia hadikaia. Bema unai bamona, oi dara doko lasi. Heduru do oi abia diba.

[Box on page 26]

BEMA OI HEKWAKWANAI LOU

Buka ta ladana Willpower’s Not Enough ia gwau: “Oi hegaegae be lahi totona oi hegaegae bamona. Oi gwau lasi lahi do ia vara, to oi hegaegae, bema do ia vara neganai do oi kara namonamo totona.” Bema oi hekwakwanai lou:

□ Iehova oi guriguri henia. Ia ese emu hekwakwanai ia lalo-pararalaia bona ia ura oi do ia durua.​—Salamo 103:14; Isaia 41:10.

□ Keristen elda tauna ta, emu lalona ai oi gwauraia hidi guna tauna, oi hamaorolaia mai emu momokani ida, bona ena sisiba Baibel amo be oi kamonaia namonamo.

□ Oi naria namonamo, emu lalona do ia metau garina. Bema sibomu emu kerere oi badulaia dikadika, reana do oi moru momokani, unai dainai oi laloa maoromaoro. Ena be nega tamona oi lusi, to oi darere vaitani lasi. Heau helulu daudauna ai ia heau tauna ta bema ia keto, hamatamaia gabuna ia lou henia lasi; ia toreisi bena ia heau lou. Unai bamona oi karaia, do oi namo lou totona. Oi kwalimu vadaeni puradia, o huadia, o laganidia be do mai anina.

[Picture on page 25]

Sibomu oi koia lasi; sibomu emu kara oi tahua namonamo mai emu momokani ida