Duahia Taudia Edia Henanadai

Nega momo nao gado Baibel “New World Translation of the Holy Scriptures” lalonai “the fatherless boy” (tamana lasi merona) idia gwauraia; anina be kekeni be anina lasi a?

Lasi vaitani.

Hari Baibel ena siri momo lalodiai inai hereva “tamana lasi merona” idia torea; Dirava ena hebogahisi tamana o sinana lasi natuna dekenai idia gwauraia. Israel taudia ia henidia taravatudia lalodiai ia hahedinaraia unai bamona maragidia ia bogadia hisi.

Hegeregere, Dirava ia gwau: “Vabu o tamana lasi merona ta umui hahisia lasi. Bema umui hahisia bena lau ia tai henia, lau be momokani ena tai do lau kamonai; bena egu badu do ia siahu, bena tuari kaiana amo umui do lau alaia mase, emui adavana do idia vabu bona emui natuna memerodia be tamana lasi do idia noho.” (Esodo 22:​22-24, NW) “Iehova, emui Dirava, be dirava edia Dirava bona lohia edia Lohia; ia be siahu bona hahegari Diravana. Ia vairanai taunimanima iboudiai be hegeregere; ta ese moni amo ena lalona ia ania diba lasi. Ia ese vabu bona tamana lasi merona dainai ia hahemaoro.”​—Deuteronomi 10:​17, 18; 14:29; 24:17; 27:19.

Baibel momo ai, unai siri ai inai hereva “tamana lasi maragina” eiava “ihareha” idia torea, anina be memero bona kekeni. To, Heberu gado herevana ya·thohmʹ be Motu gado ai unai bamona idia hahanaia be maoro momokani lasi, badina be unai Heberu gado herevana idia torea, mero idia herevalaia negadiai. Unai dainai, New World Translation of the Holy Scriptures Baibel lalonai inai hereva maorona, “fatherless boy” (tamana lasi merona) idia torea. Salamo 68:5 ia gwau: “Dirava be tamana lasi memerodia edia tamana bona vabu edia hahemaoro tauna, ena noho gabuna helagana ai.” Unai hegeregerena, Heberu gado ena mamina hegeregerena, Salamo 68:11 ia gwau: “Sivarai namona idia gwauraia hahinedia be orea badana ta.”a

Ena be inai hereva ya·thohmʹ ena anina be “tamana lasi merona,” to namo lasi ia dainai ita laloa Dirava ese tamana lasi kekenina ia laloa lasi. Ai gwauraia vadaeni siridia bona ma haida ese idia hahedinaraia Dirava ese ena bese taudia ia hamaorodia, namona be vabu, hahine unai, do idia naridia. (Salamo 146:9; Isaia 1:17; Ieremia 22:3; Sekaria 7:​9, 10; Malaki 3:5) Taravatu bukana lalonai Dirava ese Mose ia hamaoroa, Selofehad ia mase dainai ena natuna hahinedia ese edia ahudia do idia abia be maoro. Unai hereva be taravatu ta ai ia halaoa, gabeai unai bamona tamana lasi kekenidia durudia totona.​—Numera 27:​1-8.

Iesu ese memero sibodia lasi to kekeni danu ia kara namo henidia. Baibel ia gwau: “Natudia maragi idia mailaia Iesu dekenai, idia ura iena imana idia latanai ia atoa, to diba tahua taudia ese idia lulua. To Iesu ia itaia, ia badu, ia gwau henia, ia gwau, ‘Lau ura maragi idia mai lau dekenai, umui lulua lasi, badina idia bamona be Dirava ena Basileia taudia. Momokani lau hamaoroa umui, daika ese Dirava ena Basileia natuna maragina bamona ia abia dae lasi, ia be do ia vareai lasi unuseni.’ Vadaeni maragidia ia rosia, bona iena imana ia atoa idia latanai, ia hanamoa.”​—Mareko 10:​13-16.

Unai siri ena hereva, “natudia maragi,” be Greek gado herevana ta amo idia hahanaia. Greek gado diksenarina ta ia gwau ena anina be “memero bona kekeni.” Iehova hegeregerena Iesu ese maragidia iboudiai, memero bona kekeni, edia namo ia tahua. (Heberu 1:3; ma danu Deuteronomi 16:14; Mareko 5:​35, 38-42 itadia.) Vadaeni, namona be ita diba, “tamana lasi memerodia” naridia karana herevadia Heberu Revarevadia ai edia anina be inai: ita ese maragidia iboudiai, tamana o sinana lasi natudia eiava tamana bona sinana lasi natudia, do ita bogadia hisi.

[Footnotes]