Lohiabada Ena Ladana ai Edia Kara Idia Hunia

MARCH 1995 ai, gasi mai ena poisini idia halasia Tokyo, Japan, ena trein gabuna ai. Taunimanima 12 ia hamasea, tausen momo ia hagorerea, bona hunia gauna ta ia hahedinaraia. Tomadiho orea idauna ta, idia gwauraia Aum Shinrikyo (Hereva Momokani Hereana), be hunia dalana ai sarin gasi idia haboua, idia hedinarai lasi tahua gauna abia totona.

Hua ta murinai, Oklahoma City, U.S.A., ena gavamani rumana ta dekenai bomu ia pou bona taunimanima 167 idia mase. Toana be idia karaia badina gavamani taudia be lagani rua gunanai, Branch Davidian tomadiho orea idauna ta, Waco, Texas, dekenai idia hagegea bona idia tuari henia. Unai neganai ena memba taudia 80 idia mase. Unai bomu ia pou dainai, taunimanima momo idia diba lasi gauna ia hedinarai: Ami bamona oreadia momo idia gaukara United States dekenai, idia haida be hunia dalanai gavamani dagedage henia palanidia idia hegaegaelaia.

Murinai, lagani 1995 ia ore gwauraia neganai, idia gabua tauanidia 16 idia davaria Grenoble, France, ena uda gabuna ta ai. Idia be Order of the Solar Temple taudia, unai be tomadiho orea idauna maragina ta. October 1994 ai niusi taudia Switzerland bona Canada ai ese idia herevalaia, ena memba taudia 53 ese sibodia idia hamasea eiava ta ese ia alaia mase dainai. Ena be unai gau dikana ta ia vara, to unai orea ia gaukara noho. Ema bona hari ia noho ena badina bona ena tahua gaudia idia do hunia noho.

Tomadiho Hehuni Karana Ena Dika

Unai gaudia idia vara dainai, ita hoa lasi bema taunimanima momo ese tomadiho oreadia idia raraia bamona, ani? Momokani, ta ia ura lasi hehuni oreana​—⁠tomadiho eiava tomadiho lasi oreana​—⁠ia durua bema ena abidadama ia gaukaralaia kerere bona ia abia dae lasi gaudia ia tahua. Hehuni orea dikadia edia tarapu lalonai vareai lasi totona, taunimanima be dahaka idia karaia diba?

Momokani, namona be hehuni oreana ta ai ia vareai gwauraia tauna be ena tahua gaudia korikoridia ia tahua guna be namo. Namona be ia naria namonamo ena turadia o ia diba taudia ese idia doria dainai ia vareai, bona do ia vareai abiahidina be ia diba gaudia dainai, ia mamia gaudia dainai lasi. Laloaboio lasi, unai tau sibona​—⁠ma haida lasi​—⁠be ena kara ena davana do ia abia.

Baibel ena hakaua herevadia badinaia noho karana be orea dikana dadaraia dalana mai kwalimuna. (Isaia 30:21) Bema Baibel ia badinaia, politikol karadia amo do ia gini siri, ma haida dekenai, inai henia taudia dekenai danu, lalokau do ia hahedinaraia, “tauanina ena kara” do ia karaia lasi, bona Dirava ena lauma ena huahua do ia havaraia. Gau badana be, Keristani taudia momokanidia be tanobada ena lasi, Iesu be tanobada ena lasi hegeregerena, unai dainai tanobada ena hehuni oreadia lalonai do idia vareai lasi.​—⁠Galatia 5:​19-23; Ioane 17:​14, 16; 18:36; Roma 12:17-21; Iamesi 4:⁠4.

Iehova ena Witness taudia ese Baibel idia stadilaia mai edia ura ida, edia tomadiho idia laloa bada, bona taunimanima vairanai ia hegeregerena idia noho. Tanobada hegegemadai, taunimanima momo idia diba vadaeni unai orea be ‘maino ia tahua, bona maino ena dala ia badinaia’ oreana. (1 Petero 3:​11) Edia buka ta Jehovah’s Witnesses​—⁠Proclaimers of God’s Kingdom be mai maoro ida ia gwau: “Iehova ena Witness taudia be hehuni oreana ta lasi. Edia hahediba herevadia be Baibel amo idia abia bona edia buka bona magasin lalodiai idia herevalaia hedinarai goevagoeva, bona idia be taunimanima ibounai idia abia diba bukadia unai. Danu, idia hekwarahi taunimanima idia boiria edia hebou dekenai, idia sibodia do idia itaia bona kamonai dahaka idia karaia.”

Tomadiho momokanina lalonai hunia karadia idia karaia lasi. Dirava momokanina ese ia idia tomadiho henia taudia ia hamaoroa edia noho bona Iehova ena Witness taudia edia kara ena badina idia hunia lasi. Iesu ena hahediba taudia ginigunadia ese Ierusalema hanuana ibounai be edia hahediba herevadia amo idia hahonua, idia abia dae gaudia bona edia gaukara idia karaia taunimanima vairanai. Hari iseda nega lalonai Iehova ena Witness taudia ese unai idia karaia danu. Momokani, lohia tauna o gavamani aukana ese tomadiho henia karana ia taravatua mai ena maoro ida lasi neganai, Keristani taudia be mai edia aonega bona boga-auka ida edia gaukara idia karaia noho. Idia diba ‘Dirava idia kamonai henia be namo, taunimanima idia kamonai henia be dika,’ to edia gini goada karana dainai, unai bamona hekwakwanai idia davaria.​—⁠Kara 5:​27-29; 8:⁠1; 12:​1-14; Mataio 10:16, 26, 27.

Bema guna oi laloa Iehova ena Witness taudia be hehuni oreana eiava tomadiho orea idauna ta, reana unai ia vara badina idia oi diba namonamo lasi. Aposetolo taudia edia negai taudia momo dekenai reana unai be momokani.

Kara karoa 28 ese aposetolo Paulo bona “Iuda gunalaia taudia” edia hebou Roma dekenai ia herevalaia. Ia dekenai idia gwau: “To ai ura oiemu laloa do ai kamonai, badina be ai diba gabu ibounai ese inai orea totona idia hereva ia dika.” (Kara 28:​16-22) Iena haere lalonai, Paulo ese “Dirava ena Basileia ia hadibaia bona ia harorolaia,” bona “haida be Paulo ena hereva idia abia dae.” (Kara 28:​23, 24) Diba maoromaoro be Keristani dalana momokanina dekenai idia abia dainai, idia ese hahenamo hanaihanai idia abia.

Edia mauri idia gwauhamatalaia, taunimanima vairanai Dirava ena hesiai gaukara karaia totona dainai, Iehova ena Witness taudia be mai edia moale ida edia kara bona idia abia dae gaudia do idia herevalaia ia ura ia diba tauna ida. Namona be edia sivarai ibounai oi tahua, bena idia abidadama henia gaudia do oi diba momokani, ani?

[Picture on page 6]

Iehova ena Witness taudia ese edia orea bona idia karaia gaudia idia hahedinaraia mai edia moale ida