“Uduna Ubua, to Aena Lasi” Mase Taudia Guridia Karadia Africa Ai

“EDIA mase taudia idia guridia lasi!” West Africa ai taunimanima momo ese Iehova ena Witness taudia unai bamona idia herevalaidia. To, taunimanima momo idia diba Witness taudia ese edia mase taudia idia guridia.

Dahaka dainai idia gwau edia mase taudia idia guridia lasi? Badina be edia hanua taudia edia kara, mase taudia guridia karadia, idia karaia lasi dainai.

Mase Taudia Guridia Karadia

Aliu be hanua maragina ai ia noho, Central Nigeria ai. Ena sinana ia mase neganai, ena varavarana ia hadibadia, bona dala ia karaia, Iehova ena Witness taudia edia elda ta ese Baibel ena hereva be ena sinana ena ruma lalonai do ia harorolaia. Elda ese mase taudia edia noho ia gwauraia, bona Baibel ese ia gwauraia helarona, toreisi-lou helarona, danu. Unai murinai, Aliu ena sinana idia guria.

Ena varavarana idia badu dikadika. Idia gwau ta ia mase murinai, namona be kerukeru hanuaboi ai mase ariana idia karaia. Aliu ena hanua ai unai aria be moale gauna, lalohisihisi gauna lasi. Mase tauanina idia hagoevaia, dabua kurokurona idia hadokilaia, bena mahuta patana ai idia hahekurea. Miusik karaia taudia idia boiridia, bia bona uaina idia hoia, bona boromakau eiava nani idia bouboulaia. Unai murinai edia varavaradia bona edia turadia idia mai, ane idia abia, idia mavaru, idia aniani, bona idia inuinu, ela bona daba ia rere.

Unai aria ai, mase tauanina ena aena badinai aniani idia atoa. Mase tauna ena huina sisina idia pakosia bona ena imana bona aena kwakikwakidia kahaudia haida idia utudia bena idia naridia, “guria karana iharuana” totona. Unai be dina o pura o lagani haida murinai do idia karaia.

Aria idia karaia bena kerukeru mase tauanina idia guria, to dina 7 eiava ma haida lalodiai mase tauna dainai kara haida idia karaia noho. Gabeai, guria karana iharuana idia karaia. Mase tauna ena huina sisina bona ena imana bona aena kwakikwakidia kahaudia be dabua kurokurona ai idia kumidia, bena au ta, ena lata be tau ta ena lata bamona, ai idia kwatua. Gara gabuna idia abia lao lalonai, ane idia abia bona idia mavaru, bena mase tauna ena gara badinai idia guria. Bena miusik idia karaia lou, idia inuinu lou, bona aria idia karaia lou. Unai kara ibounai hadokoa totona, ta ese ipidi be nega tamona guba ia pidia.

Aliu ese unai kara ia koudia, unai dainai idia gwau ia ese ena sinana masena bona sene karadia ia matauraidia lasi. Badina be dahaka hari Iehova ena Witness tauna ese unai kara ia badinadia lasi? Badina be tomadiho lalohadaidia dainai unai kara idia karadia, bona ia ese unai lalohadai ia abidia dae diba lasi.

Sene Herevadia Africa Ai

Africa lalonai, idia laloa taunimanima be lauma gabuna amo idia mai bona do idia lou henia. Nigeria ai, Yoruba taudia idia gwau: “Tanobada be maketi gabuna, to guba be noho gabuna.” Bona Igbo taudia idia gwau: “Tanobada ai idia vara taudia iboudiai be edia noho gabuna do idia lou henia, herevana lagani hida tanobada ai idia noho.”

Ai gwauraia vadaeni karadia mani oi lalodia. Aria idia karaia, mase laumana bamahuta henia totona. Idia laloa dabua kurokurona be dabua maorona lauma edia gabu ai. Aniani be aena badinai idia atoa, badina be idia laloa mase tauanina be aena amo ia aniani bona namona be idia ubua guna, sene taudia edia gabu do ia lao henia lalonai do ia hitolo garina.

Taunimanima momo idia laloa lauma ese tauanina ia rakatania neganai, mauri taudia dekediai ia noho bona sene taudia ia lou henidia lasi, ela bona guria karana iharuana amo idia ruhaia negana. Bema guria karana iharuana idia karaia lasi, idia gari, lauma do ia badu bena mauri taudia do ia hagoreredia eiava do ia hamasedia garina. Idia laloa ipidi pidia karana ese “lauma ia siaia lao” guba.

Ena be mase dainai idia karaia karadia be idauidau Africa ena gabu idauidau ai, to idia iboudiai idia laloa ta ia mase neganai ena lauma ia mase lasi. Idia karaia karadia edia badina be, lauma idia durua ena noho gabuna korikorina do ia lou henia totona.

Unai lalohadai bona kara idia goadalaidia, badina be Kerisendom ena hahediba herevana, taunimanima be mai edia mase diba lasi laumadia herevana, bona “helaga taudia” ia tomadiho henidia karana dainai. Swaziland ai, ami ena pasto tauna ta ia gwau Iesu ia mai, sene herevadia haoredia totona lasi, to hagugurudia o hamomokanidia totona. Haroro taudia be mase taudia guridia negadia ai idia haroro dainai, taunimanima momo idia laloa Baibel ese sene herevadia bona karadia ia hamomokanidia.

Baibel Ena Hereva

Baibel ese unai lalohadai ia hamomokanidia, a? Kohelete 3:20 ese mase taudia be inai bamona ia gwauraidia: “Iboudiai [taunimanima bona boroma] be gabu tamona idia lao. Iboudiai be kahu amo, bona iboudiai be kahu ai do idia lao.” Baibel be ma ia gwau: “Mauri taudia idia diba do idia mase; to mase taudia be gau ta idia diba lasi . . . Edia lalokau bona edia badu bona edia mama be idia ore vadaeni . . . Oi lao henia gabuna, Sheol [guri], lalonai be gaukara ta lasi, lalohadai ta lasi, lalo-parara ta lasi, bona aonega ta lasi.”​—Kohelete 9:5, 6, 10.

Inai siri bona ma haida danu ese idia hahedinaraia goevagoeva mase taudia ese ita idia itaia diba lasi o kamonai diba lasi o durua diba lasi o hadikaia diba lasi. Inai be oi itaia vadaeni gauna hegeregerena, ani? Reana taga tauna ta ena sivarai oi kamonai vadaeni, ena be ia mase neganai ena famili ese kastom karadia iboudiai idia karadia, to gabeai idia ogogami. Bema unai tau be lauma gabuna ai ia mauri noho, dahaka dainai ia durudia lasi? Ia durudia diba lasi, badina be Baibel ena hereva be momokani​—mase taudia be gau ta idia karaia diba lasi, unai dainai ta idia durua diba lasi.​—Isaia 26:14.

Dirava ena Natuna, Iesu Keriso, ia diba unai be momokani. Lasaro ia mase murinai, Iesu ese ena hahediba taudia ia hamaorodia, ia gwau: “Iseda turana Lasaro be ia mahuta noho, to lau lao, do lau haoa.” Unai dainai idia haere henia, idia gwau: “Lohiabada e, bema ia mahuta be do ia namo lou.” To Iesu ese Lasaro ena mase ia gwauraia unai.​—Ioane 11:​11-13.

Iesu ese mase be mahuta, o laga-ani, ida ia hahegeregerea. Betania ai ia ginidae neganai, ia ese Lasaro ena taihuna Maria bona Mareta edia lalodia ia hagoadadia. Hebogahisi dainai Iesu danu ia tai. To, ena hereva ta lasi eiava ena kara ta lasi ese ia hahedinaraia ia laloa Lasaro be mai ena mauri laumana bona heduru ia tahua ena sene taudia edia gabu do ia lao henia totona. Lasi, Iesu ese Lasaro ia hatorea isi lou, unai amo mase ena mahuta amo ia haoa. Unai ese ia hahedinaraia gabeai Dirava ese Iesu do ia hagaukaraia, gara gabudia ai idia noho taudia iboudiai do ia hatoredia isi lou totona.​—Ioane 11:​17-44; 5:28, 29.

Dahaka Dainai Idia Idau?

Mase taudia guridia karadia, Baibel ena hereva hegeregerena lasi karadia, ita karaia be kerere a? Aliu bona ma Iehova ena Witness taudia milion milion idia laloa unai be kerere. Idia diba bema kara ta ena badina be hahediba herevana koikoina, idia karaia be kerere bona koikoi. Idia ura lasi taravatu hadibaia taudia bona Farisea taudia hegeregeredia ai do idia lao; edia tomadiho karadia koikoidia dainai Iesu ese ia gwauraidia dika.​—Mataio 23:​1-36.

Aposetolo Paulo ia gwau: “Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae. Inai hadibaia hereva be koikoi taudia ese do idia gwauraia.” (1 Timoteo 4:​1, 2) Vadaeni, mase taudia be lauma edia gabu ai idia mauri noho herevana be demoni edia hahediba herevana, a?

Oibe. Satana Diabolo, “koikoi ibounai edia tamana,” ese Eva ia hamaoroa do ia mase lasi, anina be tauanina ai do ia mauri noho. (Ioane 8:44; Genese 3:​3, 4) Unai hereva be idau, tauanina ia mase neganai mase diba lasi laumana be ia mauri noho herevana hegeregerena lasi. To, Satana bona ena demoni ese taunimanima idia veridia, Dirava ena Hereva momokani do idia dadaraia totona; unai dainai mase murinai idia mauri noho lalohadaina ia havaraia. Iehova ena Witness taudia ese Dirava ena hereva Baibel lalonai idia abia dae, unai dainai idia ese Satana ena koikoi durua lalohadaidia bona karadia idia dadaraidia vaitani.​—2 Korinto 6:​14-18.

Mase taudia guridia karadia, Baibel ena hereva utua karadia unai, be Iehova ena Witness taudia ese idia karadia lasi dainai, haida ese idia badu henidia. Haida be edia ahudia idia henidia lasi. Ma haida be edia varavara ese idia dadaraidia. To idia be Keristen korikori taudia dainai, idia diba Dirava ena hereva badinaia karana ese tanobada ena badu ia havaraia. Iesu Keriso ena aposetolo mai edia kamonai hegeregeredia idia laloa ‘Dirava idia kamonai henia be namo, taunimanima idia kamonai henia be dika.’​—Kara 5:29; Ioane 17:14.

Edia lalokau taudia, mase lalonai idia mahuta taudia, idia lalodia noho lalonai, Keristen korikori taudia ese lalokau karadia be mauri taudia dainai idia karaia toho. Hegeregere, Aliu ena tamana ia mase neganai, ena sinana ia abia dae iena ruma lalonai, bena ia ubua bona ia naria ela bona ia mase. Kastom dalanai ena sinana ia guria lasi dainai haida idia gwau ia lalokau henia lasi neganai, ena bese taudia edia hereva ta ia gwauraia, ia gwau: “Egu uduna oi ubua guna, egu aena be gabeai.” Ta ena uduna ubua karadia, ia mauri noho lalonai ubua bona naria karadia unai, be mai anina bada, to ia mase murinai aniani be ena aena badinai atoa karana be mai anina maragi. Aniani be ena aena badinai atoa karana ese ia durua lasi, lasi momokani.

Aliu idia gwau henia taudia be ia ese ia nanadaidia, ia gwau: ‘Edena oi ura​—emu buruka neganai emu famili ese oi do idia ubua bona do idia naria, eiava do oi mase neganai aria badana do idia karaia?’ Momo idia gwau idia ura idia mauri noho lalonai do idia ubudia. Bona inai idia diba dainai idia moale: Do idia mase neganai Baibel ena hereva hegeregerena guriguri do idia karaia bona hemataurai dalanai do idia guria.

Iehova ena Witness taudia ese edia lalokau taudia be unai bamona idia kara henidia. Edia ududia idia ubudia, to edia aedia lasi.