Dika Oi Gwauatao, A?

BILL bona ena lagani 16 natuna kekenina, Lisa, idia hebamo namonamo lasi. Idia lalo-tamona lasi dainai nega momo idia hepapahuahu. Gabeai, ruma dekenai hepapahuahu ia bada herea dainai, Lisa idia hamaoroa ruma do ia rakatania.a

Gabeai, Lisa ia lalo-parara ia kerere bona ena tamana dekenai ia lao bona ia noia ena dika do ia gwauatao totona. To Lisa ese ia ida maino dalana ia havaraia toho neganai, ena tamana ia badu noho bona Lisa ena kara dika gunana ia laloaboio diba lasi, unai dainai ena natuna kekeni ia dadaraia. Iaa! Ia ura lasi ena natuna kekeni ia hebogahisi henia unai!

Idaunegai, ena be dika ta ia karaia lasi to kara maoromaoro tauna ta idia samania bona idia gwau do ia mase. Kota dekenai taunimanima idia koikoi, bona politik taudia ese idia durua lasi dainai unai tau idia kara maoromaoro henia lasi. Unai kerere lasi tauna be Iesu Keriso. Kahirakahira ia mase neganai, guriguri amo Dirava dekenai ia gwau: “Egu Tamana e, inai taudia edia dika mani oi gwauatao, badina idia diba lasi dekenai inai bamona idia karaia.”​—Luka 23:34.

Iesu be ena kudouna amo dika ia gwauatao, bona ena hahediba taudia ia hagoadadia iena kara idia tohotohoa totona. (Efeso 4:32) To, Bill hegeregerena, taunimanima momo be idia hebogahisi lasi, idia ura lasi dika idia gwauatao. Unai kara dekenai oi be edena bamona? Haida ese oi dekenai dika ta idia karaia neganai, oi ura edia dika oi gwauatao, a? Bona kara dika badadia idia karaia be edena bamona? Unai dika danu do oi gwaudia tao be namo, a?

Dika Gwauatao Karana be Ia Auka Gauna Ta

Momokani, nega haida dika ita gwauatao be ia auka sisina. Bona hari inai nega dikana lalonai, taunimanima huanai hekwakwanai momo idia vara. Ruma bese lalonai, lalohisihisi bona lalo-metau gaudia be momo. Idaunegai, Keristen aposetolo Paulo ia gwau “nega dokonai” unai bamona kara do idia vara. Ia gwau: “Taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi, . . . kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani.”​—2 Timoteo 3:​1-4.

Vadaeni, nega ta ta ai, ita ibounai dekenai reana kara ta do ia vara bona unai ese iseda gwauatao heheni karana do ia tohoa. Danu, hanaihanai ita hekwarahi siboda eda manoka ita koua totona. Mai ena lalohisihisi danu Paulo ia gwau: “Kara namodia lau ura karaia neganai be lau karaia diba lasi. Bona kara dikadia lau ura lasi karaia neganai be lau karaia inai. Bema lau ura lasi gauna lau karaia noho, karaia tauna be lau lasi, to lauegu lalona dekenai ia noho kara dika ese ia karaia noho.” (Roma 7:​19, 20) Unai dainai, ena be ita momo ita ura dika ita gwauatao heheni to nega haida ita karaia lasi. Kara dika be ita dekenai ia hanai dainai, iena siahu ita dekenai be bada, bona unai dainai nega haida taunimanima ita hebogahisi henidia lasi.

Ta ese ia dekenai kerere maragina ta ia karaia neganai hahine ta idia hagoadaia do ia gwauatao totona, to unai hahine ia gwau: “Ta ena kerere oi gwauatao be hekwarahi kava karana.” Reana oi laloa unai hereva be hebogahisi lasi, ia auka, bona taunimanima ia gwauraia koikoi karana. To, ena hereva ita laloa dobu neganai, ita itaia unai bamona idia hereva taudia momo idia lalo-hekwarahi badina inai tanobada dekenai taunimanima momo be sibodia edia namo idia tahua, ma haida edia namo idia tahua lasi, bona idia dagedage bada. Tau ta ia gwau: “Taunimanima edia kerere oi gwauatao neganai, oi idia koia noho diba. Oi idia matauraia lasi.”

Vadaeni, inai nega dokona lalonai, ita diba dika gwauatao heheni karana ita karaia be ia auka. To, Baibel ena hereva ese ita ia hagoadaia mai iseda hebogahisi ida dika ita gwauatao totona. (Korinto Iharuana 2:7 itaia.) Dahaka dainai ita gwauatao heheni be namo?

[Footnotes]