Emu Tomadiho—Oi Rakatania Diba Lasi Bouti, A?

BOUTI ta be davara dekenai bona lai bada ia toa mai medu danu. Bouti dekenai idia gaukara taudia idia hekwarahi bada edia bouti ia mutu lasi totona, bona idia ese dala ta do idia abia hidi haraga: bouti dekenai do idia noho eiava do idia rakatania. Oi diba, tomadiho idia herevalaia neganai unai haheitalai mai garina idia gaukaralaia.

Katolik tomadiho idia stadilaia aonega taudia ese, nega momo edia dubu be lai bona medu bada davarana dekenai ia hure noho bouti bamona idia gwauraia. Idia gwau Iesu eiava Petero ese unai bouti idia taria, bona unai bouti sibona amo mauri ita abia diba. Edia haroro taudia edia hereva be: ‘Bouti umui rakatania lasi. Inai dubu ese hekwakwanai momo ia davaria, to ia be gunaguna ema bona hari hekwakwanai momo amo ia kwalimu vadaeni bouti.’ Haida idia gwau, ‘Dahaka dainai Katolik dubu oi rakatania? Edena dubu ta dekenai do oi lao diba? Namona be oi noho bona oi durua davara namona dekenai ia heau lao totona, ani?’

Unai ataiai hereva hegeregerena, tomadiho idauidau dekenai idia lao taudia momo be inai bamona idia laloa, ‘Lau diba egu tomadiho be gau momo dekenai ia kerere, to lau ura unai kara do ia haidaua be namo. Lau ura lasi lau rakatania. Lau ura do lau durua unai hekwakwanai ia hanaidia totona.’ Unai bamona lalohadai idia abia badina reana idia ura lasi edia tama sina edia tomadiho idia rakatania, eiava idia gari badina edia tomadiho amo idia “heau boio” bamona.

Haheitalai ta be, momo ese idia diba Katolik dubu ena hereva ia dadaraia tomadiho stadilaia tauna, Hans Küng. Ia be inai bamona ia laloa: “Lai badana bona medu lalonai bouti do lau rakatania, bona bouti dekenai ai hekwarahi hebou taudia lau rakatanidia idia sibodia lai badana lalonai idia hekwarahi bona ranu ia vareai matu idia koua totona, bona reana idia roho mauri totona idia hekwarahi bada, a?” Ia haere ia gwau: “Lauegu gaukara namona egu dubu lalonai do lau rakatania lasi.” To idia abia hidi diba dala ma ta be, “unai dubu idia rakatania badina hereva momokani ia rakatania dainai, badina kara namo idia lalokau henia dainai bona reana, Keristen momokani taudia ai idia lao totona.”​—Die Hoffnung bewahren.

To, tau ta be ena dubu ena bouti dekenai do ia noho bona ia naria mai helaro danu, reana Dirava ena hebogahisi hegeregerena ai, nega do ia henia dubu idauidau edia kara do idia haidaua totona, a? Unai henanadai be mai anina bada. Unai haheitalai ese ia hahedinaraia bamona, bema hekwakwanai ia davaria bouti oi rakatania haraga bona idia dika bouti maragidia dekenai oi guia oi heau mauri totona, ena dika be ia mutu noho bouti dekenai oi noho ena dika hegeregerena. Ia be aonega karana bema dubu dekenai dahaka dika ia vara, to oi noho sibona, a? Hari inai nega ena dubu idauidau be mai edia dala do idia namo idia lao diba totona, a? Dirava ese iena ura hegeregerena idia raka lasi karana be do ia haheaukalaia ela bona edena negai?

[Picture Credit Line on page 3]

Chesnot/Sipa Press