Haheauka Dainai Gaukara Ia Tubu

JOSÉ MAGLOVSKY ESE IA SIVARAILAIA

Pulisi tauna ese egu imana ia dogoatao neganai, egu tamana lau tahua. Lau diba lasi pulisi steiseni dekenai idia abia lao vadaeni. Unuseniai lau ginidae neganai, pulisi taudia ese emai buka iboudiai idia abia, emai Baibel danu, bena foloa latanai idia atodia. Egu tamana ese unai ia itaia neganai, ia nanadaidia, ia gwau: “Baibel danu be foloa latanai umui atodia, a? Pulisi biaguna ese sori herevana ia gwauraia, bena Baibel ia abidia isi bona pata latanai ia atodia.

DAHAKA dainai ai be pulisi steiseni dekenai ai noho? Dahaka ai karaia guna? Baibel danu be aiemai amo idia kokia, badina be Dirava idia abidadama henia lasi taudia edia gavamani aukana ta henunai ai noho, a? Unai henanadai haerelaia totona, lagani 1925 do ita lou henia, unai neganai lau do vara lasi.

Unai lagani lalonai egu tamana, Estefano Maglovsky, bona egu sinana, Juliana, ese edia tano, unai neganai ena ladana idia hatoa Yugoslavia, be idia rakatania, bena idia lao Brazil, bona São Paulo dekenai idia noho. Ena be Tamagu be Protestan bona Sinagu be Katolik, to tomadiho ese ia hapararadia lasi. Momokani, lagani 10 idia ore murinai gau ta ia vara, unai ese edia tomadiho ia hatamonaia. Tamagu ena nakimi ese buklet ta ia henia. Unai buklet mai ena kala idauidau, Hungary gado ai idia printaia gauna, ese mase taudia edia noho ia herevalaia. Guna tau ta ese ia henia, harihari gauna ta. Ia ese Tamagu ia noia do ia duahia bona ena lalohadai iena hereva dekenai do ia hamaorolaia; ia ura bada ena lalohadai “hel” herevana dekenai do ia hamaorolaia. Vadaeni, hanuaboi ibounai Tamagu ese buklet ia duahia loulou, bena kerukeru, ena nakimi be ena lalohadai nanadailaia totona ia mai neganai, Tamagu ia gwau: “Hereva momokani be inai!”

Matamana Maragina

Unai buklet be Iehova ena Witness taudia edia amo, unai dainai idia ruaosi ese idia tahudia, edia hahediba herevadia ma haida do idia diba totona. Idia davaridia murinai, emai famili taudia haida be Iehova ena Witness taudia ida Baibel idia herevalaia hebou loulou. Unai lagani, 1935, lalonai, Baibel stadi Hungary gado ai idia hamatamaia bena unai murinai idia karaia loulou, ia lalonai be taunimanima 8 bamona. Unai nega amo ema bona hari, emai ruma lalonai Baibel stadi ai karaia loulou.

Baibel be lagani rua lalonai ia stadilaia murinai, Tamagu be lagani 1937 lalonai bapatiso ia abia. Iehova ena Witness tauna mai goadana ai ia lao, ruma-ta-ruma-ta haroro gaukarana ia karaia, bona kongregesen ena hesiai tauna ta bona stadi naria tauna ai idia halaoa bena unai dagi karadia ia karaia. São Paulo ena kahana ta ladana Vila Mariana lalonai, kongregesen ginigunana haginia gaukarana be ia ese ia durua. Gabeai, unai kongregesen be idia abia hanai siti ena ihuanai, bona ena ladana idia hatoa Central Congregation. Lagani 10 murinai kongregesen iharuana idia haginia, Ypiranga kahana dekenai, bona Tamagu be kongregesen naria tauna ai idia halaoa. Lagani 1954 lalonai kongregesen ihatoina idia haginia, Moinho Velho kahana dekenai; unuseniai danu ia be kongregesen naria tauna ena dagi karadia ia karaia.

Unai kongregesen ia goada neganai, ia ese kongregesen ma ta São Bernardo do Campo dekenai ia durua matamaia. Iehova ese unai Witness taudia edia kongregesen maragidia edia gaukara be lagani momo lalonai ia hanamoa dainai, idia tubu badabada. Lagani 1994 lalonai, São Paulo lalonai, pablisa 70,000 mai kahana be kongregesen 760 lalonai idia gaukara. Madi, Tamagu ese unai tubu ia itaia lasi. Lagani 1958 lalonai ia mase, ena mauri laganidia be 57 neganai.

Tamagu Lau Tohotohoa Toho

Keristani taudia goadadia ma haida hegeregeredia, egu tamana ena kara badana ta be iena heabidae. (3 Ioane 1, 5-8 itaia.) Unai dainai hahenamo ta ai abia: Antonio Andrade mai ena adavana bona natuna be emai ruma lalonai ai abia dae, idia be lagani 1936 lalonai Tadikaka bona Taihu Yuille ida United States amo idia mai Brazil dekenai. Emai ruma lalonai ai abia dae taudia ma haida be Watchtower Bible School of Gilead taudia rua, Harry Black bona Dillard Leathco; lagani 1945 lalonai idia be Brazil dekenai idia siaidia misinari taudia ginigunadia. Momo be idia murinai idia mai. Unai tadikaka bona taihu ese emai famili taudia iboudiai idia hagoadaia hanaihanai. Unai lau diba dainai bona egu famili durua totona, egu tamana ena Keristani heabidae karadia lau tohotohoa.

Lau be Tamagu ena natuna merona roboana, bona ena be hereva momokani be lagani 1935 lalonai ia dibaia neganai egu mauri laganidia be 9 sibona, to iena tiokratik gaukaradia lalonai lau bamoa matamaia. Ai ibounai be ia ida ai lao Kingdom Hall; São Paulo lalonai, unai be Witness taudia edia hedikwota dekenai, Eça de Queiroz Dalana, Namba 141 dekenai. Tamagu ese lau ia hadibaia bona ia hakaua dainai, lau ura bada Iehova ena hesiai do lau lao henia, bona lagani 1940 lalonai egu mauri lau gwauhamatalaia Ia dekenai, bona unai ena toana hegeregerena bapatiso be Tietê Sinavaina lalonai lau abia; unai sinavai, São Paulo ihuanai ia aru gauna, be hari inai negai idia hamiroa vadaeni.

Nega daudau lasi lau ese sivarai namona harorolaia loulou gaukarana, hereva momokani sivaraina taunimanima edia lalona dekenai hadoa bona dairia gaukarana, bona Baibel stadi idia ida karaia gaukarana, be lau dibaia. Hari inai negai, Iehova ena Witness taudia, Dirava idia gwauhamata henia vadaeni taudia, tausen momo Brazil dekenai lau itaia neganai, lau moale bada, badina be lau diba Ia ese lau ia gaukaralaia vadaeni, hereva momokani be idia momo hadibalaidia totona eiava edia lalohadai unai hereva dekenai hadobua totona.

Lau durudia taudia ta be Joaquim Melo, ruma-ta-ruma-ta gaukarana lalonai lau davaria tauna. Tatau toi lau hereva henia neganai, idia kamonai sisina sibona. Bena mero ta lau itaia, ai dekenai ia mai vadaeni bona ia kamonai namonamo noho. Unai lau itaia dainai, ia sibona lau hereva henia, bona sivarai namona lau hamaorolaia goevagoeva murinai, lau boiria, Kongregesen Buka Stadi dekenai do ia lao. Stadi dekenai ia lao lasi, to Haroro Sikuli lalonai ia hedinarai, bena unai murinai hebou ia lao henidia loulou. Ia goada ia lao, bapatiso ia abia, bena lagani haida lalonai sekit naria tauna ena dagi gaukaradia ia karaia; unai neganai ena adavana ese ia bamoa.

Ma ta be Arnaldo Orsi, egu gaukara gabuna dekenai lau davaria tauna. Unuseniai gaukara tauna ta lau haroro henia loulou, to lau itaia tauhau ta mai ena besoso be nega iboudiai egu hereva ia kamonaia, unai dainai lau hereva henia. Iena famili be Katolik tomadihona idia goadalaia, to kuku ania karana, kara bodaga muvini piksa raraia karana, bona tuari karana, ladana judo, karaia karana be ia henanadailaia momo. Baibel ena hereva lau hahedinaraia ia dekenai, bena kerukeru lau hoa bona lau moale, badina be lau ia boiria, bena lau vairanai ia ese ena paipa bona ena laita bona ena korosi maragina ia hamakohia, ena muvini piksa dikadia ia hadikaia ore, bona ena besoso ia utua oho. Miniti haida lalonai ia idau vaitani! Ia ese danu judo ia hadokoa bona lau ia noia, ia be lau ida Baibel be dina iboudiai do ai stadilaia hebou. Ena be ena adavana bona ena tamana ese idia koua toho, to tadikaka haida iena ruma kahirakahira dekenai idia noho ese idia durua dainai, ia be lauma dalanai ia goada ia lao. Nega daudau lasi bapatiso ia abia, bona hari inai negai ia be kongregesen ena elda ta. Iena adavana bona ena natuna danu ese hereva momokani idia abia dae.

Basileia Gaukarana Lalonai Lau Heduru

Egu mauri laganidia be 14 bamona neganai, lau be kampani ta dekenai lau gaukara matamaia, unuseniai saini penia gaukarana lau dibaia. Unai egu diba lau gaukaralaia momo, bona lagani haida lalonai São Paulo lalonai lau sibogu idia hagaukaraia saini maragidia bona badadia lau penia totona; unai saini amo Iehova ena Witness taudia edia pablik tok bona edia hebouhebou edia hereva idia hahedinaraia. Kahirakahira lagani 30 lalonai lau be hebouhebou edia Saini Dipatmen lau naria; unai be hahenamo ta lau dekenai. Lagani iboudiai egu livi lau abia lasi ela bona hebouhebou negana, hebouhebou gaukarana lalonai do lau haorea totona. Nega haida lau be hebouhebou rumana lalonai lau mahuta, saini be nega korikori ai do lau penidia ore dalana davaria totona.

Society ena saun motukana gaukaralaia dalana lau davaria danu, unai neganai unai motuka be gau matamatana momokanina. Emai buka, Baibel gwauraia gaudia, be pata ta latanai ai atoa, bena saun motukana ese pikap ena hereva ia halasia lalonai, ia vara noho gauna itaia totona edia ruma amo idia raka lasi taudia ai hereva henia. Basileia sivaraina ai harorolaia totona ai gaukaralaia gauna ma ta be pikap, emai imana dekenai ai abia loaloa diba gauna, bona lau be do mai egu rekodi, unai nega lalonai Society ena buka edia hereva be idia amo ai halasia gaudia. Unai gau ai gaukaralaidia dainai, Baibel gwauraia bukadia momo be taunimanima ai henidia.

Unai nega lalonai Katolik Oreana ese masi latadia be São Paulo ena dala dekenai idia karaia; nega momo tatau haida ese masi taudia idia gunalaia, edia raka dalana idia karaia. Sunday ta, lau bona Tamagu be dala dekenai Gima Kohorona bona Noga! be taunimanima ai henidia toho neganai, masi latana ia hedinarai. Vaia ena kara hegeregerena, Tamagu be mai ena kwara gauna. Masi idia gunalaia taudia ta ia boiboi, ia gwau: “Emu kwara gauna oi kokia! Idia raka mai taudia oi itaia lasi, a?” Tamagu ese ena kwara gauna ia kokia lasi neganai, tatau ma haida idia mai, ai idia doria siri sitoa ta ena uindo dekenai, bona haida idia hagaria. Pulisi tauna ta ese regerege ia kamonai dainai, ia mai, unai ia vara gauna itaia totona. Unai tatau ta ese ena imana ia dogoatao, ia ura do ia hereva henia. To pulisi tauna ese ena imana ia pataia, ma ia oda henia, ia gwau: “Emu imana be egu pulisi dabuana amo oi abia oho!” Bena ia nanadaia dahaka ia vara noho. Unai tau ia gwau Tamagu ese ena kwara gauna be masi dainai ia kokia lasi, ma ia gwau: “Lau be aposetolo ena Roman Katolik tauna ta.” Pulisi tauna ena haere ia hoalaia, badina be ia gwau: “Oi gwau oi be Roma tauna ta, a? Vadaeni, Roma oi lou henia! Inai be Brazil.” Bena ai ia nanadaia, ia gwau: “Daika be iniseni ia mai guna?” Tamagu ia gwau ai ese, bena pulisi tauna ese unai tatau ia siaia oho, bona ai ia hamaoroa emai gaukara do ai karaia noho be namo. Ai badinai ia gini ela bona masi taudia iboudiai idia raka hanai vadaeni​—bona Tamagu ena kwara gauna be ena kwarana dekenai ia noho!

Unai bamona karadia be nega ta ta mo idia vara. To idia vara negadiai, emai lalona idia goada, badina be ai diba taunimanima haida idia laloa orea maragi taudia idia kara maoromaoro henidia be maoro, bona Katolik Oreana garina idia gari lasi.

Ma nega ta, lau ese tauhau ta lau davaria, ia kamonai bona lau ia noia pura gabena ai do lau lou henia. Lau lou henia neganai, ena ruma lalonai lau ia abia dae mai ena gado namo ida. Bena lau hoa bada, badina be uhau haida ese lau idia ginia hegege, lau idia hevaseha henia bona idia habadua toho! Edia kara idia habadaia, bona mamina lau abia, nega daudau lasi lau do idia heatu henia. Lau ia boiria tauna lau hamaoroa, bema gau ta be lau dekenai ia vara, ia sibona mo be mai ena kerere, bona egu famili idia diba lau be unuseniai. Lau noidia lau do idia kahua nege, bena egu hereva idia abia dae. To, lau do rakatanidia lasi neganai, lau hamaorodia, bema idia ta ia ura ia sibona ese lau do ia hereva henia, do lau dadaraia lasi. Gabeai, lau kamonai idia be Katolik tomadihona goadalaia dikadika taudia, unai hanua ena fada ena turana haida. Ia ese ia hagoadadia vadaeni, lau ida unai bamona do idia hebou totona. Lau moale, badina be idia edia amo lau roho mauri.

Matamana neganai, Brazil lalonai gaukara ia tubu metairametaira momokani. Unai neganai ai “hadohado” matamaia neganai, emai nega be hegeregere lasi, uma do ai “biru henia” bona emai gaukara ena anina do ai “gogoa.” Nega ibounai ai ese aposetolo Paulo ena hereva ai laloatao; ia gwau: “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua. Hadoa tauna bona dairia tauna edia gaukara be herevana, badina Dirava sibona ese hadoa gauna ia hatubua.” (1 Korinto 3:6, 7) Gilead misinari taudia ginigunadia ruaosi be lagani 1945 lalonai idia ginidae neganai, ai laloa nega daudau lalonai ai naria gauna do ia vara; anina be gaukara do ia tubu.

Badu Neganai Lau Boga Auka

To emai gaukara ia tubu neganai, haida ese idia koua toho, bona Tanobada Ibounai Tuarina be Europe lalonai ia vara murinai edia kara idia habadaia. Idia ese ai idia dagedage henia momokani, badina be taunimanima momo bona gavamani taudia haida ese emai kara, politik amo gini siri karana, be idia lalo-pararalaia lasi dainai. Nega ta, lagani 1940 lalonai, São Paulo ena ihuanai saini maragidia ai loaloalaia neganai, pulisi tauna ta be lau murina amo ia mai, saini be egu tauanina amo ia darea oho, bona egu imana ia dogoatao, lau be pulisi steiseni dekenai ia abia lao gwauraia. Egu kwarana lau giroa egu tamana itaia totona, to ia noho lasi. Lau diba lasi, ia bona tadikaka bona taihu haida be pulisi steiseni dekenai idia abia lao vadaeni; idia ta be Tadikaka Yuille, Brazil lalonai gaukara ia naria tauna. Inai sivarai ena paragraf ginigunana lalonai lau hahedinaraia hegeregerena, pulisi steiseni dekenai lau be Tamagu ida ai hedavari lou.

Lau be mero mo, unai dainai lau idia dogoatao diba lasi. Nega daudau lasi pulisi tauna ta ese lau ia abia lao ruma dekenai bona egu sinana dekenai ia henia. Unai hanuaboi dekenai taihu danu idia ruhadia. Gabeai pulisi taudia idia gwau tadikaka iboudiai, 10 bamona, do idia ruhaia, Tadikaka Yuille sibona do idia dogoatao. To tadikaka idia hereva goada, idia gwau: “Ai ibounai do ai lao; bema lasi, ta lasi do ia lao.” Pulisi taudia idia auka dainai, tadikaka iboudiai be hanuaboi ai daiutu keruna ta lalonai semenisi foloa latanai idia mahuta hebou. Kerukeru pulisi taudia ese idia iboudiai idia kahua nege vaitani. Nega haida tadikaka idia dogodia tao, badina be saini maragidia amo idia haroro dainai. Saini dekenai idia ese pablik tok ta bona buklet ta ladana Fascism or Freedom idia herevalaia, bona gavamani taudia haida idia laloa anina be ai ese Fascism ai ura henia, unai dainai ai idia laloa kerere.

Iseda orea uhaudia idia hekwarahilaia gauna ma ta be inai: Gavamani ese taravatu ia atoa, uhau iboudiai be ami lalonai do idia vareai. Lagani 1948 ai, Brazil lalonai, unai taravatu dainai dibura rumadia lalonai idia koua taudia ginigunana be lau. Gavamani taudia idia diba lasi lau be edena bamona do idia kara henia. Lau idia siaia lao ami gabuna dekenai Caçapava lalonai, bona biru gaukarana bona daiutu ta hagoevaia gaukarana lau idia henia; unai daiutu lalonai opesa taudia be tuari gadarana idia karaia. Ami taudia haroro henidia daladia momo bona buka henidia daladia momo lau davaria. Unai kamepa ena biaguna ese Society ena buka ladana Children ia abia dae guna, bena unai murinai ma haida ese. Gabeai, lau idia hagania, tomadiho herevadia be ami taudia 30 o 40 bamona do lau hadibalaidia, unai neganai idia be eksasais idia karaia diba lasi, bona daiutu ta lalonai idia koudia. Dokonai, lau be hua 10 bamona dibura rumana lalonai lau noho murinai, lau idia kota henia bena lau idia ruhaia. Iehova lau tanikiu henia, badina be ia ese goada lau ia henia, bena unai tatau haida ese lau idia hagaria toho, o idia hahemaraia toho, o idia hevasehalaia negadiai, unai ibounai lau haheaukalaia diba.

Heduru Hahinena mai Ena Kamonai

June 2, 1951 ai, lau ese Barbara lau adavaia, bena unai nega amo lau ia badinaia bona ia durua mai ena kamonai ida, “Lohiabada ena hadibaia hereva” be emai natudia hadibaia gaukarana lalonai. (Efeso 6:4) Emai natudia be ima; idia hani ese dala idauidau amo Iehova ena hesiai idia lao henia noho mai edia moale ida. Aiemai helaro be, idia be ai ida hereva momokani lalonai do idia haheauka noho, bona orea hatubua gaukarana bona ia karaia gaukarana danu be do idia durua noho. Lauegu famili taudia, laulau lalonai idia hedinarai, iboudiai be Dirava ena hesiai taudia, idia gwauhamata henia taudia unai; ena tamana ena imana ai ia noho beibina sibona be lasi. Idia hani be elda taudia bona rua be regula painia taudia danu; unai ese Aonega Herevadia 17:6 ia hamomokania: “Tau buruka ese iena tubuna ia heagilaia noho. Memero danu ese edia tamadia dekenai idia heagi noho.”

Hari inai negai egu mauri laganidia be 68, bona egu tauanina ia manoka. Egu kudouna ena rara varovarodia hanamoa totona, lagani 1991 lalonai operesen rua lau abia. To lau moale, badina be kongregesen ta lalonai gunalaia tauna ena dagi karadia lau karaia noho, São Bernardo do Campo lalonai. Egu tamana ena aena gabudia dekenai lau raka noho; gaukara be iniseniai idia hamatamaia taudia ginigunadia ta be ia. Momokani, iseda uru be idau vaitani, badina be ita ese hahenamo ta, nega gabena ta ai do idia abia lou lasi hahenamona, be ita abia; gauna be inai: Iehova ena Mesia Basileiana haginia negana ita harorolaia diba. Unai dainai, Paulo ese Timoteo ia henia haheganina do ita laloaboio lasi be namo; ia gwau: “Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.”​—2 Timoteo 4:5.

[Picture on page 23]

Egu tamana bona sinana, Estefano bona Juliana Maglovsky

[Picture on page 26]

José bona Barbara mai edia famili taudia, Iehova ena gwauhamata hesiai taudia