Mauri Sivaraina
Iehova Ena Boiria Herevana Abia Dae Karana ese Ahuna Namona Ia Havaraia
MARIA DO CÉU ZANARDI ESE IA SIVARAILAIA
“Iehova be ia diba dahaka ia karaia. Bema boiria herevana be oi dekenai ia siaia, namona be mai manau danu unai oi abia dae.” Unai be egu tamana ena hereva, lagani 45 gunanai ia gwauraia, bona ia ese lau ia durua, Iehova ena orea amo ia mai boiria herevana ginigunana do lau abia dae bena ful-taim hesiai gaukarana do lau karaia. Hari, egu tamana ena sisiba dainai lau moale noho, badina unai bamona boiria herevana abia dae karana ese lau dekenai ahuna namodia ia mailaia.
LAGANI 1928 ai, Tamana be Gima Kohorona magasin ena sabskripsen ia abia bona Baibel ia stadilaia. Portugal ena ihuana kahanai ia noho dainai, Dirava ena kongregesen ia bamoa dalana tamona be pos opesi amo ia abia bukadia bona egu tubudia edia Baibel. Lagani 1949 ai, egu mauri lagani be 13 neganai, emai ruma bese be Sinagu ena gabu, Brazil, dekenai ai lao, bona Rio de Janeiro kahirakahira dekenai ai noho.
Emai dekena taudia matamatadia be edia dubu vadivadi henia totona ai idia boiria, bona nega haida ai lao. Tamana ia ura idia dekenai hel ena lahi, souli, bona tanobada ena vaira negana dekenai henanadai ia henidia—to haere idia henia diba lasi. Tamana be hanaihanai ia gwau: “Namona be Baibel stiuden taudia momokanidia ita naria.”
Nega ta, matakepulu tauna ta be emai ruma dekenai Gima Kohorona bona Noga! magasin ia abia mai! Tamana be ia dekenai unai henanadai ia henidia, bona Baibel amo haere namodia ia henia. Pura ta murinai, Iehova ena Witnes ma ta be ai ia vadivadi henia. Henanadai ma haida ia haerelaia murinai, sori herevana ia gwauraia bona ia gwau haroro gaukara karaia totona do ia lao, bona Mataio 13:38 amo ia hahedinaraia unai gaukara be tanobada ena kahana ibounai dekenai idia karaia be namo. Tamana ia nanadaia: “Ia namo bema lau lao danu?” Ia haere: “Oibe.” Baibel ena hereva momokanina ai davaria lou dainai ai moale bada! Tamana be hebouhebou gabena dekenai bapatiso ia abia, bona nega sisina murinai, November 1955 ai, bapatiso lau abia.
Boiria Herevana Ginigunana Lau Abia Dae
Lagani ta mai kahana murinai, Iehova ena Witnes taudia edia brens opesi Rio de Janeiro amo, braon revareva udaia gauna badana lalonai, ful-taim haroro gaukara lalonai lau ia boiria herevana lau davaria. Unai neganai sinana be ia gorere momo dainai, sisiba totona tamana lau nanadaia. Mai lalo-goada ida ia gwau: “Iehova be ia diba dahaka ia karaia. Bema boiria herevana be oi dekenai ia siaia, namona be mai manau danu unai oi abia dae.” Unai hagoadaia herevadia dainai, aplikeisen pepana lau hahonua bona July 1, 1957 ai, ful-taim hesiai gaukara lalonai lau vareai. Rio de Janeiro State ena taoni ta Três Rios be lau idia siaia gabuna ginigunana.
Guna, Três Rios dekenai idia noho taudia be emai hereva idia kamonai henia lasi, badina Katolik Baibel ai gaukaralaia lasi dainai. Geraldo Ramalho, Katolik tomadiho ia badinaia tauna, ida Baibel stadi ai hamatamaia neganai, heduru ai abia. Ena heduru amo unai hanua ena pris tauna ese ia sainia Baibel ta lau abia. Unai nega amo, ta ese ai ia dadaraia gwauraia neganai, lau ese pris tauna ena ladana lau hahedinaraia, bona henanadai ma haida idia gwauraia lasi. Gabeai, Geraldo be bapatiso ia abia.
Lagani 1959 ai, Três Rios ihuana momokani ai sekit hebouhebouna ta ai abia dainai lau moale bada. Unai nega ai Baibel ia stadilaia pulisi ena tau badana be dala ia karaia, taoni ena kahana ibounai dekenai unai hebouhebou ena program ai halasia totona. Lagani toi Três Rios dekenai lau gaukara murinai, lau idia boiria, hanua ladana Itu, kilomita 110 São Paulo amo west kahanai, lau gaukara totona.
Kakakaka, Bulu, Bona Ielo Bukadia
Nega sisina noho gabuna ai tahua murinai, egu painia turana bona lau be taoni ena ihuana dekenai mahuta gabuna namona be hebogahisi vabu ta, Maria, ena ruma dekenai ai davaria. Maria be ai ia kara henia ena natuna kekeni korikoridia bamona. To, daudau lasi murinai, Itu ena Roman Katolik bisop ta be ia dekenai ia lao bona ai ia siaia totona ia hereva, to Maria ia ura lasi unai ia karaia bona ia gwau: “Egu adavana ia mase neganai, lau oi hagoadaia totona gau ta oi karaia lasi. Ena be lau be inai Iehova ena Witnes taudia edia tomadiho ena memba ta lasi, to lau idia durua.”
Unai nega dekenai, hahine ta ese ai ia hadibaia, Itu ena Katolik pris taudia be edia dubu taudia idia koua, “Diabolo ia herevalaia buka kakakakana” ena kopi ta do idia abia dae lasi totona. Idia be unai pura lalonai taunimanima dekenai ai hariharilaia Baibel buka ladana “Let God Be True” idia herevalaia. Pris taudia be buka kakakakana idia “koua” dainai, bulu buka (“New Heavens and a New Earth”) ena kiki herevana ai hegaegaelaia. Gabeai, dubu gunalaia taudia be unai idia kamonai neganai, ielo buka (What Has Religion Done for Mankind?) ai gaukaralaia, bona ma haida danu. Ai dekenai buka momo mai edia kala idauidau idia noho be namo herea!
Itu dekenai lagani ta lau noho murinai, telegram ta lau davaria, idia ese Betele, Iehova ena Witnes taudia edia brens opesi Rio de Janeiro dekenai, nesenel hebouhebou ena hegaegae gaukarana nega sisina lalonai lau karaia totona lau idia boiria. Mai moale ida unai lau abia dae.
Gaukara Bona Hekwakwanai Haida
Betele dekenai gaukara ia ore lasi, bona mai moale ida dala idauidau ai heduru lau henia. Daba ta ta ai dina ena siri idia herevalaia neganai bona Monday hanuaboi ibounai famili Gima Kohorona Stadi dekenai lau noho be heduru gauna badana! Otto Estelmann bona Betele famili ena lo tadikaka ma haida be mai edia kudouna ibounai ida idia henia guriguri ese lau idia hagoadaia momokani.
Unai nesenel hebouhebou murinai, Itu dekenai lau giroa lou totona egu kohu lau udaia, to lau hoa badina brens naria tauna, Grant Miller, be lau dekenai boiria herevana ena revareva ta ia henia, lau be Betele famili lalonai lau vareai totona. Lau ida daiutu tamona dekenai ai noho hebou Taihu be Hosa Yazedjian, hari Brazil ena Betele dekenai ia do gaukara noho. Unai neganai, Betele famili be ia maragi—ai ibounai be 28 sibona—bona ai ibounai be turadia namodia.
Lagani 1964 ai, ful-taim hesiai tauna matamata, João Zanardi, be treinini abia totona Betele dekenai ia mai. Unai neganai, ia be Betele kahirakahira dekenai, sekit naria tauna, eiava loaloa naria tauna, ena gaukara ia karaia matamaia. Nega haida Betele dekenai ia mai ena ripoti ia henidia neganai, ia lau hedavari henia. Brens ia naria tauna be João dekenai gwaumaoro ia henia, Monday hanuaboi ena famili stadi totona ia mai totona, bona unai dala amo nega bada ai abia hebou. August 1965 ai, João bona lau ai headava. Mai moale ida sekit gaukara dekenai egu adavana lau bamoa.
Unai neganai, Brazil ena lalona kahanai loaloa gaukara lalonai gau idauidau idia vara diba. Minas Gerais State ena taoni Aranha ena pablisa ai vadivadi henia negadia be do lau laloaboio diba lasi. Trein ai abia guna bona gabeai ai raka—bona emai sutkeisi, taipraita, slaid foto hahedinaraia masini, haroro baege, bona buka bona magasin ai huaia. Ai moale bada, badina tadikaka burukana, Lourival Chantal, be hanaihanai trein steiseni dekenai ai ia naria bona ai ia durua, emai sutkeisi ia huadia totona.
Aranha dekenai hebou ibounai be ai rentaia rumana ta dekenai ai abia. Murina dekenai ia noho daiutu maragina ta dekenai ai mahuta. Daiutu ena kahana ta ai, au ai gabua nanadu bona tadikaka be baketi amo ai totona idia mailaia ranu hasiahua totona. Bona baubau plenteisini ihuanai tano dekenai matu ta ia noho, bona unai be emai mei rumana bamona ai gaukaralaia. Hanuaboi ai gasi lamepa ai rakatania ia gabua noho, Chagas’ gorerena idia havaraia diba manumanu be ai kahirakahira idia mai lasi totona. Daba iboudiai, emai udu baubau be kwalahu amo idia korema. Unai be gabu idauna ta!
Paraná State ai, sekit gaukarana ai karaia lalonai, Brens opesi amo unai braon revareva udaia gauna badana ma ta ai abia. Unai be Iehova ena orea amo ia mai boiria herevana ma ta—hari Portugal dekenai hesiai gaukara do ai karaia totona! Unai gabu dekenai emai Keristani gaukara idia taravatua bona Portuguese ena gavamani be tadikaka momo idia dogoatao vadaeni dainai, unai revareva be ai ia hagoadaia, unai gaukara ai do abia dae lasi neganai Luka 14:28 ena sisiba bona do ai davaria diba hekwakwanai ai lalohadailaia totona.
Unai bamona dagedage do ai davaria diba gabuna dekenai do ai lao, eiava? João ia gwau: “Bema iseda Portuguese tadikakadia be unuseniai idia noho bona mai edia abidadama ida Iehova idia hesiai henia diba, badina ta dainai unai ita karaia diba lasi, a?” Egu tamana ena hagoadaia herevadia lao laloatao neganai, lau gwau: “Bema Iehova be ita dekenai boiria herevana ia siaia, namona be unai ita abia dae bona ia ita abidadama henia.” Nega sisina murinai, ai be São Paulo ena Betele dekenai ai lao, hadibaia hereva ma haida ai abia bona emai laolao ena pepadia ai hegaegaelaia totona.
João Maria Bona Maria João
September 6, 1969 ai, emai bouti, Eugênio C, be Santos, São Paulo State, amo ia lao. Dina 9 davara dekenai ai heau murinai, Portugal dekenai ai ginidae. Matamanai, hua haida dekenai idia manada vadaeni tadikaka ida Alfama bona Mouraria, Lisbon distrik gunana dekenai, edia dala maragidia dekenai ai gaukara. Ai idia hadibaia ai naria namonamo totona, unai amo pulisi ese ai do idia dogoatao haraga lasi.
Kongregesen hebou ibounai be Witnes taudia edia ruma dekenai ai abia. Emai dekena taudia idia laloa matamaia gau idauna ta ai karaia neganai, karaharaga hebou be gabu ma ta dekenai ai abia, unai dala amo pulisi ese ruma do idia sekea lasi bona tadikaka do idia abidia lasi. Emai hebouhebou be Monsanto Park, Lisbon kahirakahira ai, bona Costa da Caparica, ena au momo konena dekenai pikiniki bamona ai karaia. Unai nega ai, hebou dabuadia ai karaia lasi, bona atendan goadadia be gabu haida dekenai gima taudia bamona idia gini. Bema ai diba lasi tauna ta ia mai kahirakahira, nega ia noho gadara ta ai karaia, pikiniki ta ai hegaegaelaia, eiava mavaru ane ta ai abia.
Sekuriti pulisi be ai idia diba lasi totona emai ladana korikoridia ai gaukaralaia lasi. Tadikaka be ai idia gwauraia João Maria bona Maria João. Emai ladana be revareva eiava fom ta dekenai idia noho lasi. To namba ai gaukaralaidia. Egu lalona lau hadaia, tadikaka edia adres lau laloatao lasi totona. Unai dala amo, bema lau idia dogoatao, tadikaka edia noho gabudia lau gwauraia diba lasi.
Herevana taravatu ia noho, to hanaihanai João bona lau be haroro totona dala ai tahua, badina ai diba nega sisina lalonai ai do idia dogoatao diba. Iseda guba Tamana, Iehova, dekenai tabekau henia karana ai dibaia. Ia be emai Naria Tauna bona ena aneru ia gaukaralaidia dainai, ai mamia ‘ita itaia diba lasi Diravana ai itaia bamona.’—Heberu 11:27.
Nega ta, Porto dekenai ruma-ta-ruma-ta gaukarana ai karaia lalonai, tau ta ai davaria, bona ia ura dikadika ena ruma dekenai ai ia boiria vareai. Lau ida ia gaukara taihuna be unai ia abia dae, bona lau be gau ta lau karaia diba lasi dainai ia lau bamoa. Ruma lalonai tuari dabua ia karaia tauna ta ena laulau lau itaia bona lau gari bada. Dahaka do lau karaia diba? Ai ia boiria tauna be ai helai totona ia hereva, bona lau ia nanadaia: “Bema emu natuna mero be tuari totona idia abia hidi neganai, ia do oi siaia, eiava?” Unai gauna dekenai lau naria namonamo. Egu lalona ai lau guriguri murinai, mai manau ida lau haere: “Lau be natudia lasi, bona lau diba bema oi amo do ia vara diba lasi gauna lau henanadailaia, unai bamona haere do oi henia danu.” Hereva ta ia gwauraia lasi. Unai dainai lau gwau: “To bema lau oi nanadaia, mase dekenai egu taihuna ta eiava tamana lau haboioa ena mamina be edena bamona, unai do lau haerelaia diba, badina egu taihuna bona tamana idia mase vadaeni.” Lau hereva lalonai egu matana be tai amo idia honu, bona lau itaia kahirakahira ia tai danu. Ia hahedinaraia ena adavana be vanegai sibona ia mase. Ia dekenai toreisi lou helarona lau hahedinaraia neganai, ia kamonai namonamo. Bena mai hemataurai ida bamahuta herevana ai gwauraia, bona ena gabu ai rakatania, bona unai be Iehova ena imana dekenai ai rakatania.
Herevana gaukara idia taravatua, to lalo-momokani taudia ai durua bona hereva momokani dekenai diba idia abia. Porto dekenai, egu adavana be bisinesi tauna ta Horácio ida stadi ta ia hamatamaia, bona ia be lauma dalanai ia tubu haraga. Gabeai, ena natuna Emílio, doketa namona ta, be hereva momokani ia abia dae danu bona bapatiso ia abia. Momokani, gau ta lasi ese Iehova ena lauma helaga ia koua diba.
“Iehova be Do Ia Karaia Gauna Umui Diba Lasi”
Lagani 1973 ai, Brussels, Belgium ai, “Dirava Ia Kwalimu” Intenesenel Hebouhebouna dekenai João bona lau idia boiria. Spain bona Belgium tadikaka tausen momo idia hebou, bona Mozambique, Angola, Cape Verde, Madeira, bona Azores amo haida idia mai danu. Tadikaka Knorr, New York dekenai ia noho hedikwota amo ia mai tauna ena hereva dokona ai, ai ia hagoadaia bona ia gwau: “Mai kamonai ida Iehova umui hesiai henia noho Iehova be do ia karaia gauna umui diba lasi. Daika ia diba, reana gabeai Portugal ai intenesenel hebouhebouna dekenai do umui lao diba!”
Lagani ta ia ore murinai, Portugal dekenai gwaumaoro ai abia haroro gaukara ai karaia totona. Bona Tadikaka Knorr ena hereva hegeregerena lagani 1978 ai Lisbon dekenai intenesenel hebouhebou ginigunana ai abia. Lisbon ena dala dekenai ai raka, bona saini maragidia, magasin, bona pablik tok ena boiboi pepadia amo ai haroro diba be hahenamo badana! Ai ura henia gauna be ia vara momokani.
Emai Portuguese tadikaka ai lalokau henidia bada, idia momo be edia Keristani gini siri karana dainai, dibura dekenai idia dagedage henidia bona idia dadabadia. Emai ura bada be Portugal dekenai ai gaukara noho. To, unai ia vara lasi. Lagani 1982 ai, João be kudou gorere dikana ta ia davaria, bona brens opesi taudia be ai idia hamaoroa, Brazil dekenai do ai giroa.
Hahetoho Negana
Brazil brens opesi tadikakadia be ai idia durua bada, bona Quiririm Kongregesen, Taubaté, São Paulo State dekenai, ai idia siaia lao, unuseniai emai gaukara ai karaia totona. João ena gorere be ia dika ia lao haraga, bona nega sisina murinai, ruma ia rakatania diba lasi. Kamonai taudia be Baibel idia stadilaia totona emai ruma dekenai idia mai, bona haroro gaukara heboudia be dina ta ta dekenai ai abia, bona pura ibounai ena grup stadi ai abia danu. Lauma dalanai ai goada noho totona unai heduru gaudia ese ai idia durua bada.
Iehova ena hesiai gaukara lalonai, João ia karaia diba gaudia ia karaia noho ela bona October 1, 1985 ai ia mase. Lau lalohisihisi bona lalo-metau danu, to egu lalona lau hadaia egu gaukara do lau karaia. April 1986 ai, hekwakwanai ma ta ia vara, henaohenao taudia be egu ruma dekenai idia vareai bona kahirakahira gau ibounai idia henaoa. Egu mauri lalonai nega ginigunana mamina lau abia lau sibona lau noho bona lau gari. To mai edia lalokau headava taudia rua be lau idia boiria, nega sisina lalonai idia danu lau noho totona, bona unai dainai lau moale bada.
João ena mase bona egu kohu idia henaoa karadia ese egu hesiai gaukara Iehova dekenai ia hadikaia danu. Hesiai gaukara karaia lalonai lau gari. Brens opesi lau tore henia bona egu hekwakwanai lau gwauraia murinai, lau idia boiria Betele dekenai nega sisina lalonai lau noho bona egu lalona do ia namo lou totona. Unai nega be hagoadaia negana!
Lau namo sisina neganai, idia ura Ipuã, São Paulo state ena taoni ta, dekenai do lau gaukara bona unai lau abia dae. Haroro gaukara dekenai lau bisi bada, to nega haida lau lalo-manoka danu. Unai bamona negadia ai, Quiririm dekenai idia noho tadikaka lau rini henidia, bona ruma bese ta be dina haida dekenai lau idia vadivadi henia. Unai vadivadi be lau idia hagoadaia momokani! Ipuã dekenai lau noho laganina ginigunana lalonai, tadikaka bona taihu idauidau 38 be lau itaia totona be unai laolao daudauna idia karaia.
Lagani 1992 ai, João ena mase bena lagani 6 murinai, Iehova ena orea amo boiria herevana ma ta lau abia, Franca, São Paulo State dekenai, do lau lao totona, bona ful-taim hesiai gaukara be unai gabu ai lau do karaia noho. Unai teritori be anina namo ia havaraia. Lagani 1994 ai, taoni naria tauna badana ida Baibel stadi lau hamatamaia. Unai neganai, dala ia karaia noho Brazil ena gavamani lalonai gabu ta ia abia totona, to ena be ia bisi bada, Monday ibounai ena stadi ai karaia. Ta be emai stadi karana ia hadikaia lasi totona ena telefon ia koua. Metairametaira politikol karadia amo ia siri bona, hereva momokani ena heduru amo, ena headava ia hanamoa lau itaia neganai, lau moale bada! Lagani 1998 ai, ia bona ena adavana be bapatiso idia abia.
Unai lau laloa neganai, lau gwau diba, egu mauri ful-taim hesiai gaukarana lalonai be hahenamo badana. Iehova ena orea amo lau dekenai ia henia boiria herevadia lau abia dae karana ese lau dekenai ahuna namona ia mailaia. Bona herevana dahaka boiria herevadia be nega vaira dekenai idia mai neganai, do lau abia dae mai egu ura bona goada bada ida.
[Pictures on page 25]
Lagani 1957 ai, ful-taim hesiai gaukara lalonai lau vareai neganai, bona hari
[Picture on page 26]
Brazil Betele famili ida, lagani 1963 ai
[Picture on page 27]
Emai headava August 1965 ai
[Picture on page 27]
Hebouhebou ta Portugal ai, gaukara idia taravatua lalonai
[Picture on page 28]
Dala gaukara Lisbon dekenai lagani 1978 ena “Kwalimu Abidadama” Intenesenel Hebouhebouna lalonai