Sene Herevadia be Hereva Momokani amo Idia Idau Negana

NARIA NAMONAMO​—INAI BE INUINU RANUNA LASI. Reana unai bamona hadibaia herevadia be nega momo ita itaia. Gabu momo ai mase muramuradia be ranu gabudia haida dekenai idia negea dainai, ranu ia dika, unai dainai unai gabu taudia idia naria namonamo, ranu goevana sibona do idia inua totona. Unai kerere ia vara dainai, ripoti ta ia gwau, unai gau ese ranu idia hadikaia dainai, unai ranu be “mauri durua bona naria gauna lasi,” to ia amo “gorere bona . . . mase muramuradia idia hanai taunimanima dekenai.”​—Water Pollution.

Hereva Momokani Ranudia Hadikaia Karana

Sene herevadia, hereva momokani amo idia idau herevadia, be haida ese idia hadikaia ranudia bamona. Uru ta ta amo idia henidia hanai gaudia​—hadibaia herevadia, o lalohadai, o abidadama herevadia, o kastom​—be reana ita badinaia badina ita diba lasi, to lalohadai kereredia bona aonega koikoi herevadia ese unai gau idia hadikadia vadaeni. Ranu dikana bamona, idia ese taunimanima be lauma dalana ai idia hadikadia bada diba.

Ena be ita laloa iseda tamana bona sinana edia amo ita abia tomadiho herevadia be Baibel amo, to namona be ita ibounai ese unai hereva ita tahudia namonamo. Mani oi laloa, Martin Luther ese iena negai taunimanima momo ese idia abia dae herevana ia abia dae dainai, Copernicus ena hereva ia gwauraia koikoi neganai, ia laloa Baibel ese iena hereva ia hamomokania. To, Luther ese idaunegai Berea taudia edia kara ia tohotohoa lasi; ‘idia be namo, dina ibounai Buka Helaga idia tahua, inai hereva be ia momokani o lasi.’​—Kara 17:​10, 11.

Mani oi laloa, Iesu ena negai sene herevadia ese Iuda taudia haida idia hadikaia. Mai edia goada ida idia abia dae edia sene herevadia be momokani. Nega ta idia maumau, idia gwau Iesu ena hahediba taudia ese sene taudia edia taravatu idia badinaia lasi. Iesu ese ia nanadaidia, ia gwau: “Badina be dahaka umui ese Dirava ena taravatu umui makohia, umui emui sene taudia edia taravatu karaia totona?” (Mataio 15:​1-3) Edia kerere be dahaka? Iesu ese edia kerere ia hahedinaraia, peroveta tauna Isaia ena hereva ia gwauraia neganai, ia gwau: “Idia tomadiho [Dirava] dekenai, to anina lasi. Idia edia hadibaia hereva be taunimanima edia taravatu sibona.”​—Mataio 15:9; Isaia 29:13.

Oibe, Dirava ena amo idia mai herevadia momokanidia edia gabu ai, idia ese taunimanima edia amo eiava lauma dikadia edia amo idia mai lalohadaidia idia atoa. Haheitalai ta be Insight on the Scriptures, Volume 1, rau 506, ese ia gwauraia, ia gwau: “Unai neganai Farisea taudia ese idia hadibalaia herevana be, bema tau ta ia gwau iena kohu be ‘Kobana,’ anina be Dirava dekenai ia gwauhamatalaia vadaeni harihari gauna, ia gaukaralaia diba lasi iena tamana sinana durua totona, herevana idia dabu momokani, to bema ia ura neganai, ia sibona ese unai kohu ia gaukaralaia diba ela bona ia mase.” Taunimanima edia aonega, hereva momokani ranudia ia hadikaia aonegana, ese lauma dalana ai Iuda taudia ia hadikaia. Idia momo ese Mesia, nega daudau lalonai idia naria tauna, idia dadaraia.

Kerisendom Danu ese Ia Hadikaia

Iesu ia mase murinai, lauma dalana ai dika be unai bamona idia havaraia. Sibodia be Iesu gavaia taudia idia gwauraia taudia momo ese uru gunadia taudia edia hereva idia gaukaralaia, hahediba herevadia matamatadia hamomokania totona. McClintock bona Strong edia buka, Cyclopedia of Biblical, Theological, and Ecclesiastical Literature, ia gwau sibodia be Keristani taudia idia gwauraia taudia haida idia laloa unai uru gunadia amo idia abia herevadia be “aposetolo ese Keristani ekalesia oreadia ginigunadia idia hadibalaia herevadia, aposetolo edia nega amo idia mai, bona haida ese unai hereva idia naridia namonamo ela bona idia edia nega.”

To gauna be, uru gunadia edia amo idia abia herevadia momo be lalohadai kereredia. Cyclopedia bukana ia gwau, unai lalohadai matamatadia be “uru gunadia edia amo idia abia herevadia ma haida amo idia idau, bona aposetolo edia revareva, idia dekenai idia noho gaudia, amo idia idau danu.” Haida ese unai idia hoalaia lasi. Aposetolo Paulo ese Keristani taudia ia hamaoroa, ia gwau: “Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.”​—Kolose 2:8.

Hari inai negai danu, sene herevadia momo be ‘aposetolo edia revareva amo idia idau.’ Kerisendom ese hereva momokani ranudia be lauma dikadia ese idia havaraia lalohadaidia amo idia hadikaia. Unai lalohadai haida be inai: Toi Tamona Diravana, hel lahina, taunimanima be mai edia mase diba lasi laumadia, bese abia isi karana, bona kaivakuku tomadiho henia karana.a (1 Timoteo 4:​1-3) Kerisendom ena sivarai ese ia hahedinaraia ia ese lauma dikadia edia hahediba herevadia ia abia dae bona sibona ena hahediba herevadia ai ia halaodia, bena unai hereva amo ia hakereredia taudia be lauma dalana ai idia gorere.​—Isaia 1:​4-7 itaia.

Hereva momokani hadikaia karana be matamana negana amo ia vara noho. Satani ese Eden lalonai ia hamatamaia karana, taunimanima edia darana be koikoi amo ia hadikaia karana, be ia karaia noho. (Ioane 8:44; 2 Korinto 11:3) Noa ena negai ia vara Abatana Badana murinai, taunimanima ese tanobada ena gabu idauidau idia noholaia neganai, lauma dikadia ese idia havaraia lalohadaidia ese bese iboudiai taudia edia diba idia hadikaia.

Lauma Dalana ai Idia Hadikadia Dainai Idia Vara Gaudia

Lauma dalana ai idia hamirodia karana ese dahaka dika ia havaraia diba? Idia hamiroa ranuna ese iseda tauanina ia hadikaia karana ida ita hahegeregerea diba. Diba tauna ta ia gwau: “Sikistosomiasis (bilhasia) gorerena ese taunimanima milioni 200 bamona ia hadikaia. [Unai bisisi fiva gorerena dainai taunimanima edia rara be sisina sibona, hisihisi idia ania, idia goada lasi, bona idia mase.] Idia hamiroa ranuna ese taunimanima edia kopina ia hapariparia dainai unai gorere ia vara. Taunimanima milioni 500 ese trakoma gorerena idia abia bona unai gorere ese taunimanima momo edia matadia ia hakepulua, badina be ranu mirona ai idia digudigu dainai. . . . Taunimanima bilioni rua be mai edia inuinu ranuna namona lasi.” (Our Country, the Planet) Sene herevadia, lauma dikadia edia hahediba herevadia koikoidia ida idia mikisia herevadia, be taunimanima milioni milioni ese idia badinaia dainai, unai ese lauma dalana ai ia hagoreredia, edia matadia ia hakepulua, bona ia hamasedia.​—1 Korinto 10:​20, 21; 2 Korinto 4:​3, 4.

Haheitalai ta be inai: Momo be lauma dalana ai idia matakepulu dainai idia be Iesu Keriso ena dagi bona iena Tamana, Iehova Dirava, ena dagi edia idau be idia daradaralaia. Sibodia be Keristani taudia idia gwauraia taudia haida be vaia edia kara Dirava ena ladana helagana, Iehova, be Keristani Greek Revarevadia ai idia torea lasi. George Howard be Journal of Biblical Literature lalonai ia gwau: “Ai laloa Tetragram[maton] [Dirava ena ladana unai, Heberu revarevadia ai] kokia karana dainai, Iuda Lasi Keristani taudia gunadia ese ‘Lohiabada Dirava’ bona ‘Lohiabada Keriso’ edia dagi idia daradaralaia.”

Inai danu mani oi laloa: Taunimanima be mai edia mase diba lasi laumadia herevana, Baibel ese ia gwauraia lasi herevana, ese daradara bona gari ia havaraia. (Hadibaia Tauna 9:5; Esekiela 18:4, NW itaia.) Sene tubudia tomadiho henia karana ese taunimanima hida ia guidia, eiava mase taudia do idia lou mai bona do idia hadikadia garina idia gari hanaihanai taudia be hida? Unai lalohadai ese taunimanima haida ia ha-uraia, sibodia bona ma haida do idia alaia mase.

Japan taudia momo idia laloa, mase neganai edia laumadia ese idia rakatanidia bena mauri gabena ai do idia hedavari lou. Unai dainai, tama sina haida, sibodia idia alaia mase gwauraia taudia, idia laloa edia natudia danu do idia alaia mase be namo. Buka ta ladana An English Dictionary of Japanese Ways of Thinking ia gwau: “Japan lalonai, ta be sibona ia hamasea karana be nega haida idia gwauraia dika lasi, to nega momo idia laloa ta ese ena kara dika rohorohona dainai ia sori toana ia hahedinaraia dalana namona be unai . . . Ruma bese be sibodia idia hamasea sivaraidia momo danu be idia ripotilaia mai edia hebogahisi ida.”

Sene Herevadia Oi Tohoa

Sene herevadia bona karadia badinaia kava karana dainai, dika ia vara diba, unai dainai dahaka ita karaia be namo? Lagani 98 C.E. bamona ai, aposetolo Ioane ese ena Keristani bamodia be inai bamona ia sisiba henidia, ia gwau: “Lauegu lalokau taudia e, peroveta koikoi taudia momo be tanobada kahana ibounai dekenai idia lao noho. Unai dainai, bema taunimanima idia gwau, ‘Lau be Lauma Helaga lau abia vadaeni,’ do umui naria namonamo. Idia ibounai do umui hamomokania lasi. To unai tau do umui tohoa guna [ranu ena goeva do umui tohoa hegeregerena], do umui davaria, Dirava ena Lauma ia abia momokani, o lasi.” (1 Ioane 4:1; ma danu 1 Tesalonika 5:21 itaia.) Edena bamona do oi diba sene herevana ta ese oi do ia hadikaia eiava lasi? Namona be oi be mai emu hahetoho gauna namona, oi abia dae herevadia be ia amo do oi tohoa totona.

Baibel be unai bamona gauna. Iesu Keriso ia gwau: “Hereva momokani dekena amo idia do oi hahelagaia, oiemu hereva be hereva momokani.” (Ioane 17:17) Ma ia gwau: “Nega ta do ia mai, bona harihari ia ginidae vadaeni, tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho.” (Ioane 4:23) Dirava ena lauma ese ia havaraia Herevana gaukaralaia karana amo, hereva momokani ena ranu goevadia oi abia, taunimanima bona lauma dikadia ese idia gwauraia herevadia, ranu mirona bamona herevadia, do oi abia lasi.​—Ioane 8:​31, 32; 2 Timoteo 3:16.

Mani oi laloa, miro sisina sisina sibona ese dika bada ia havaraia diba. Nega haida unai dika ia hedinarai lasi ela bona lagani momo idia ore vadaeni. World Conservation Union ena presiden gunana, Shridath Ramphal, ia gwau: “Ranu mirona dainai idia mase taudia edia momo ese ma gau ta dainai idia mase taudia edia momo ia hanaia. Idia gaukaralaia dainai, dina ta ta iboudiai taunimanima 25,000 o ma haida idia mase.” Lauma dalana ai idia hamirodia sene herevadia edia dika ese ranu mirona ena dika ia hereaia.

Bema oi davaria lagani momo lalodiai oi badinaia herevadia be hereva momokani amo idia idau, emu lalona ena goada ia hegeregere unai hereva do oi rakatania, a? Sisiba oi badinaia. Oi sibomu bona emu famili do oi naria totona, umui badinaia herevadia oi tahua namonamo, idia be Dirava ena Hereva momokani goevana ida idia hegeregere, eiava lasi.​—Salamo 19:​8-11; Aonega Herevadia 14:15; Kara 17:11.

[Footnotes]

[Picture on page 7]

Dirava ena Hereva momokani be sinavai mai ranu goevana bamona