Sene Herevadia Iboudiai be Hereva Momokani amo Idia Idau, A?

MARTIN LUTHER ia diba vaitani iena lalohadai be maoro. Ia laloa Baibel ese ia hamomokania. To Poland tauna ta, guba gaudia stadilaia tauna, ladana Copernicus, ia laloa unai lalohadai, unai neganai taunimanima momo ese idia abia dae lalohadaina be kerere.

Dahaka lalohadai? Idia laloa tanobada be guba bogaraginai ia noho bona guba gaudia iboudiai ese idia heaua hegege. To Copernicus ia gwau hereva momokani be inai: Tanobada ese dina ia heaua hegege. Luther ese unai hereva ia dadaraia, ia gwau: “Taunimanima ese guba gaudia stadilaia tauna ta, sibona ena ladana ia abia isi tauna, ena hereva idia kamonaia, ia gwau tanobada ia giroagiroa, to guba padana, bona dina bona hua, be idia giroagiroa lasi.” ​—History of Western Philosophy.

TAUNIMANIMA ese idaunegai amo idia abia dae herevadia momo be hereva momokani amo idia idau. Bona idia dainai taunimanima idia kara dika diba.

To, taunimanima edia amo ita abia herevadia haida be hereva momokani amo idia idau lasi. Aposetolo Paulo ese iena negai idia noho Keristani taudia ia hagoadaia, ia henidia herevadia, Keristani taudia gunadia edia amo ia abia herevadia, be do idia badinaia noho, ia gwau: “Umui lau hanamoa, badina be nega ibounai . . . umui lau henia hadibaia hereva umui badinaia noho.”​—1 Korinto 11:2; ma danu 2 Tesalonika 2:15; 3:6 itaia.

Paulo ena hereva, “hadibaia hereva,” ena anina be dahaka? Insight on the Scriptures, Volume 2, rau 1118 dekenai ia gwau Paulo ese ia gaukaralaia Greek gado herevana, pa·raʹdo·sis, “hadibaia hereva” be ia ida idia hahegeregerea herevana, ena anina be “uduna amo idia gwauraia eiava revareva ai idia torea” herevadia. Ma ia gwau English gado ai unai Greek gado herevana ida idia hahegeregerea herevana, “tradition,” ena anina be “hahediba herevadia o kara, tama sina ese edia natudia idia henidia hanai, eiava taunimanima ese idia abia dae bena idia hegeregeredia idia be vaia idia laloa eiava idia kara gaudia.”a Aposetolo Paulo ese Keristani taudia ia henidia hadibaia herevadia be mai edia badina namona, unai dainai idia badinadia noho be namo.

To ia hedinarai goevagoeva, sene herevadia haida idia momokani bona haida idia koikoi, haida idia namo bona haida idia dika. Britain ena aonega tauna Bertrand Russell ese Copernicus, lagani 1473 ela bona 1543 ai ia noho tauna, ena kara bamona idia karaia taudia ia hanamoa, badina idia be lalo-momokani bona boga auka taudia dainai idia ese sene herevadia idia henanadailaia, idia momokani eiava. Idia “laloa idaunega amo taunimanima ese idia abia dae herevadia be reana idia kerere.” Oi danu oi lalo-parara, sene herevadia badinaia kava lasi be aonega dalana, a?​—Mataio 15:​1-9, 14 itaia.

Vadaeni, tomadiho ena hahediba herevadia bona kara be edena bamona? Ita abia dae diba idia be maoro bona mai edia dika lasi, a? Unai be edena bamona ita dibaia diba? Bema ita davaria tomadiho ena hahediba herevadia, sene herevadia unai, be hereva momokani amo idia idau, dahaka do ita karaia be namo? Hereva gabena lalonai unai henanadai edia haere do ai herevalaia.

[Footnotes]

[Picture Credit Line on page 2]

Cover: Jean-Leon Huens © National Geographic Society

[Picture Credit Line on page 3]

Universität Leipzig