Keristani Taudia Ginigunadia Bona Gavamani

KAHIRAKAHIRA do ia mase hora ginigabedia lalonai, Iesu ese ena hahediba taudia ia hamaoroa, ia gwau: “Umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.” (Ioane 15:19) Unai ena anina be Keristani taudia be tanobada ena lohia taudia do idia inai henia, a?

Tanobada Bamona Lasi, to Idia Inai Henia Lasi

Aposetolo Paulo be Roma lalonai idia noho Keristani taudia dekenai ia gwau: “Taunimanima ibounai ese gavamani do idia kamonai henia.” (Roma 13:⁠1) Unai hegeregerena, aposetolo Petero ia torea, ia gwau: “Taunimanima edia taravatu ibounai do umui badinaia, Lohiabada dainai. King do umui kamonai henia, badina ia be siahu bada herea tauna. Gavana taudia danu edia hereva do umui badinaia. Badina be king ese idia ia abia hidi, kara dika taudia do idia panisia, to kara namo taudia do idia hanamoa totona.” (1 Petero 2:​13, 14) Keristani taudia ginigunadia ese idia abia dae Gavamani bona ia abia hidi taudia edia siahu henunai idia noho be maoro. Idia hekwarahi hanua ena taravatu idia badinaia totona bona mai maino ida taunimanima ida idia noho hebou totona.​—⁠Roma 12:⁠18.

The Encyclopedia of Religion ena kwarana herevana “Dubu Bona Gavamani” henunai, ia gwau: “Lagani 300 ginigunadia AD lalodiai, Keristani dubu be Roma besena amo ia gini siri . . . To, Keristani gunalaia taudia . . . ese Keristani taudia idia hadibadia Roma ena taravatu do idia badinaia, bona ena pavapava do idia kamonai henia, Keristani abidadama ena hetoana hegeregerena ai.”

Hemataurai, to Tomadiho Lasi

Keristani taudia ese Roma pavapava idia dagedage henia lasi. Iena siahu idia matauraia bona iena dagi hegeregerena idia kara henia. Pavapava Nero ena lohia negana ai, aposetolo Petero be Roma Basileiana ena gabu idauidau ai idia noho Keristani taudia ia tore henia, ia gwau: “Taunimanima ibounai do umui matauraia. . . . King do umui matauraia.” (1 Petero 2:⁠17) Inai hereva “king” be Greek gado tanodia ai idia gaukaralaia edia hanua ena pavapava totona bona Roma ena pavapava totona danu. Aposetolo Paulo ese Roma Basileiana ena siti badana ai idia noho Keristani taudia ia sisiba henia, ia gwau: “Unai dainai ibounai ta ta dekenai edia davana do umui henidia. . . . Idia mataurai henia tauna dekenai do umui matauraia.” (Roma 13:⁠7) Roma pavapava ia ura ia do idia matauraia. Gabeai, ia ura idia tomadiho henia danu. To Keristani ginigunadia ese unai idia karaia lasi.

Lagani 155 C.E. ai, Polycarp be Roma ena gavana vairanai idia kota henia neganai, ia gwau: “Lau be Keristani tauna. . . . Ai idia hadibaia vadaeni ibounai do ai matauraia . . . Dirava ena gwaumaoro idia abia siahu bona lohia taudia ibounai do ai matauraia.” Polycarp be mase ia abia hidi badina ia ura lasi pavapava do ia tomadiho henia. Lagani 100 C.E. murinai ia noho tomadiho ia gwauraia Antioka tauna, Theophilus, ia gwau: “Lau ese pavapava do lau matauraia, ia do lau tomadiho henia lasi, to ia totona do lau guriguri. To Dirava, ia mauri noho bona ia momokani Diravana, lau tomadiho henia.”

Pavapava totona idia karaia guriguri maorodia be pavapava tomadiho henia eiava bese heagilaia karana ta lasi. Aposetolo Paulo ese edia badina ia hahedinaraia, ia gwau: “Lauegu sisiba ginigunana be, lau ura emui guriguri gaukara lalonai, taunimanima ibounai dainai do umui noinoi karaia. Umui guriguri, bona umui noinoi neganai, Dirava do umui tanikiu henia. King taudia totona, bona lohia taudia ibounai totona danu, Dirava dekenai do umui noinoi. Unai dekena amo, Dirava ita badinaia bona matauraia dainai, mai maino danu do ita noho namonamo.”​—⁠1 Timoteo 2:​1, 2.

“Taunimanima ese Idia Dadaraia”

Keristani taudia ginigunadia edia hemataurai karana dainai turadia momo idia davaria lasi edia gabudia ai. France histori torea tauna A. Hamman ese Keristani ginigunadia ia gwauraia neganai, ia gwau “taunimanima ese idia dadaraia.” Idia be bese rua ihuanai idia noho, Iuda taudia bona Roma taudia, bona idia ese idia inai henidia bona idia gwauraidia dika.

Hegeregere, Iuda taudia edia gunalaia taudia ese aposetolo Paulo idia samania kava neganai, Roma gavana vairanai ia gwau: “Lau be Iuda taudia edia taravatu lau makohia lasi, Dubu Helaga lau hadikaia lasi, bona [Kaisara] dekenai lau kerere lasi. . . . Kaisara dekenai lau noinoi. Iena kota dekenai lau lao be namo”! (Kara 25:​8, 11) Paulo ia diba Iuda taudia edia palani be ia do idia hamasea neganai, ia ese Nero ia noia, unai amo ia hahedinaraia unai Roma pavapava ena siahu ia abia dae. Bena Roma lalonai idia kota henia negana ginigunana ai, Paulo idia ruhaia. To gabeai idia hadiburaia lou, bona sene herevadia idia gwau Nero ena oda dainai idia hamasea.

Keristani ginigunadia edia hekwarahi, Roma taudia ihuanai idia noho dainai, ia torelaia bona tomadiho ia stadilaia tauna, Ernst Troeltsch, ia gwau: “Gavamani dagi bona gaukara lalonai idia karaia kaivakuku tomadiho gaukara amo idia gini siri, bona Pavapava tomadiho henia karana, rara bubua karadia, mase hahemaoro henia karana, eiava tomadiho koikoi ena lebulebu karadia gaukaradia idia dadaraia.” Unai idia karaia lasi dainai, Keristani bona Gavamani be mai maino bona mai hemataurai ida idia kara heheni diba lasi, a?

Kaisara Dekenai Iena “Davana” Henia

Iesu ese inai hereva ia gwauraia, Keristani taudia ese idia badinaia be namo, Roma Gavamani eiava gavamani ma ta henunai idia noho neganai, ia gwau: “Kaisara ena gau, Kaisara dekenai umui henia, to Dirava ena gau be Dirava dekenai umui henia.” (Mataio 22:⁠21) Iesu ena sisiba ena hahediba taudia dekenai be edia bese idia heagilaia Iuda taudia edia lalohadai amo ia idau momokani. Idia ese Roma ena lohia dalana idia inai henia bona idau besena dekenai takisi monina henia taravatu idia hepapahuahulaia.

Gabeai, Paulo ese Roma lalonai idia noho Keristani taudia ia hamaoroa: “Unai dainai, gavamani mai ena siahu taudia do umui kamonai henidia, Dirava ena badu umui laloa dainai lasi, to badina be emui lalona dekenai umui diba dala maorona be unai. Takisi moni danu umui henia ena badina be unai. Badina be gavamani taudia [lohia taudia] ese gaukara davana idia abia be namo, Dirava ena gaukara do idia karaia diba totona. Unai dainai ibounai ta ta dekenai edia davana do umui henidia. Takisi gogoa tauna dekenai takisi do umui henia. Kastom moni gogoa tauna dekenai kastom moni do umui henia.” (Roma 13:​5-7) Ena be Keristani taudia be tanobada ena lasi, to edia maduna be do idia koikoi lasi, takisi moni idia henia, Gavamani ia karaia gaudia edia davana do idia henia.​—⁠Ioane 17:⁠16.

To Iesu ese takisi moni sibona ia herevalaia, a? Badina be Iesu ese Kaisara ena gau be dahaka dahaka bona Dirava ena gau be dahaka dahaka ia hedinaraia lasi dainai, nega haida Baibel ena siri ma haida amo, eiava Baibel ibounai ita lalo-pararalaia dalana amo do ita diba unai gau be daika ena. Unai ena anina be Keristani tauna ese edena gaudia be Kaisara dekenai do ia henia be nega haida Baibel ena hahegani ese iena lalona ia doria dalana hegeregerena do ia abia hidi diba.

Ruaosi Edia Davana Oi Laloa Maoromaoro

Taunimanima momo idia laloaboio Iesu be Kaisara ena gau henia herevana ia gwauraia murinai, ma ia gwau: “To Dirava ena gau be Dirava dekenai umui henia.” Aposetolo Petero ese Keristani taudia dekenai edia maduna ginigunana ia hahedinarai. “King,” eiava pavapava, bona “Gavana” taudia idia matauraia sisibana ia henia murinai, Petero ia gwau: “Umui be ura kwalimu taudia, to inai ura kwalimu do umui gaukaralaia kerere lasi. Unai ura kwalimu lalonai umui noho neganai, hunia dekenai kara dika do umui karaia lasi, to Dirava ena hesiai taudia mai guia danu do umui noho. Taunimanima ibounai do umui matauraia. Keristani taudia ibounai do umui lalokau henia. Dirava do umui gari henia. King do umui matauraia.” (1 Petero 2:​16, 17) Aposetolo tauna ia hahedinaraia Keristani taudia be Dirava ena hesiai taudia, lohia tauna ta ena lasi. Ena be idia ura hemataurai maorona idia hahedinaraia gavamani taudia dekenai, to mai Dirava gari henia ida do idia karaia badina Dirava ena taravatu be herea.

Lagani momo gunanai Petero ia hahedinaraia goevagoeva Dirava ena taravatu ese taunimanima edia taravatu ia hanaia. Roma taudia ese Iuda Kaunsolo dekenai Iuda taudia edia kara bona tomadiho naria totona, siahu ia henia. Iesu ena hahediba taudia ia hagania Iesu ena ladana ai idia karaia hadibaia gaukarana do idia hadokoa neganai, Petero bona ma aposetolo taudia haida be mai hemataurai to mai edia goada ida idia gwau: “Dirava ai kamonai henia be namo, taunimanima ai kamonai henia be dika.” (Kara 5:⁠29) Ita itaia goevagoeva diba, Keristani ginigunadia be Dirava idia kamonai henia karana, bona lohia taudia matauraia karana idia laloa maoromaoro be gau badana. Lagani 200 C.E. murinai ia noho tauna Tertullian, ia gwau: “Bema gau ibounai be Kaisara ena, Dirava ena be dahaka?”

Gavamani Idia Kamonai Guna Matamaia

Gabeai Keristani ginigunadia taudia ese gavamani kara henia dala maorona amo idia raka siri matamaia. Iesu bona aposetolo taudia idia perovetalaia hegeregerena, hereva momokani negea negana be lagani 100 C.E. ia lao 299 C.E. ai ia tubu daekau. (Mataio 13:​37, 38; Kara 20:​29, 30; 2 Tesalonika 2:​3-​12; 2 Petero 2:​1-3) Hereva momokani idia negea Keristani taudia be dala maorona amo idia raka siri bona Roma taudia edia dirava koikoidia edia aria bona lalohadai idia abia dae, bona gavamani dekenai idia gaukara sibona lasi, to edia ami lalonai idia vareai danu.

Profesa Troeltsch ia gwau: “Lagani 200 C.E. murinai, unai kara ia dika ia lao, badina be Keristani taudia momo be dagi bada, ladana bada, ami bona siahu taudia ai idia lao. Keristani taudia idia toretore herevadia [Baibel lasi] haida lalodiai, be unai bamona kara idia maumauraidia; to, edia hereva haida lalodiai idia ura unai kara ena namo idia gwauraia​—⁠edia lalona ena hisihisi idia hadokoa totona herevadia . . . Constantine ena nega amo unai bamona kara lalo-hekwarahilaia ia ore; Keristani bona Keristani lasi taudia ihuanai hepapahuahu ia ore bona Keristani taudia dekenai gavamani gaukara iboudiai idia kehoa.”

Lagani 400 C.E. kahirakahira ia ginidae neganai, unai goeva lasi, dala maorona ia rakatania Keristani Oreana be Roma Basileia ena Gavamani ena tomadiho ginigunana ai ia lao.

Kerisendom ena histori ese ia hahedinaraia​—⁠Katolik, Otodoks, bona Protestan Oreadia unai​—⁠be dala maorona amo idia raka siri noho bona gavamani ena ura idia karaia; politik lalonai idia vareai bona edia tuari idia durudia. Dubu dekenai idia lao lalo-maoromaoro taudia momo ese unai gaudia idia hoalaia, to do idia moale bema idia diba hari iseda negai Keristani taudia haida be Keristani taudia ginigunadia bamona Gavamani idia kara henia. Murina hereva rua ese unai do idia herevalaia.

[Picture on page 5]

Petero ese Kaisara Nero ia gwauraia neganai, ia gwau: “King do umui matauraia”

[Credit Line]

Musei Capitolini, Roma

[Picture on page 6]

Polycarp be ia ura lasi pavapava ia tomadiho henia dainai, mase ia abia hidi

[Picture on page 7]

Keristani ginigunadia be maino, koikoi lasi, bona takisi moni idia henia taudia