Soul Ia Mase Diba Lasi, A?

TURADIA bona ruma bese taudia be mase mauana badina amo idia raka hanai mai regerege lasi. Idia ese mauri lagani 17 merona ena mase tauanina idia itaia. Ena sikuli turadia ese ena toana gunana idia itaia namonamo lasi. Chemotherapy ese ena huina ia hamaragia, kensa dainai ena tauanina ia maragi momokani. Inai be momokani edia turana, a? Wiki haida gunanai sibona, ia be lalohadai momo, henanadai momo, bona goada bada merona​—⁠mauri amo ia honu! Mero ena sinana be mai taitai danu ia hereva loulou ia gwau: “Hari Tommy ia moale. Dirava ia ura Tommy ia lao guba, ia dekenai.”

Unai lalo-metau hahinena ena lalona ia hanamoa bona helaro ia havaraia lalohadaina be iena natuna be dala idauna ai ia mauri noho. Dubu dekenai idia hadibaia soul be ia mase diba lasi, ia be kara, lalohadai, bona laloatao gaudia edia badina​—⁠ta “sibona.” Ia abia dae, ena natuna ena soul be ia mase lasi; ia be mauri noho laumana, mase ai tauanina ia rakatania bena ia lao guba, Dirava bona aneru ida do idia noho.

Dika ta ia vara neganai, taunimanima be edia lalona ai helaro ta do idia dogoatao auka, unai dainai momo ese unai lalohadai idia abia dae ena badina ita itaia diba. Haheitalai ta be, The Gospel of the Hereafter bukana lalonai tomadiho badinaia tauna J. Paterson-Smyth ese ena lalohadai ia gwauraia ita laloa: “Mase be gau maragina ta sibona, bema ia murinai ia vara gauna ida ita hahegeregerea neganai​—⁠unai tanobada herea, herea, hereadaena, Mase ese ita ia abia vareai gabuna.”

Tanobada hegegemadai, tomadiho momo bona kastom momo lalonai, taunimanima momo idia laloa taunimanima be mai edia mase diba lasi soul, idia lalonai; tauanina ia mase neganai ia mauri noho laumana ta. Unai hadibaia herevana be kahirakahira Kerisendom ena tomadiho bona orea idauidau tausen momo lalodiai idia abia dae. Iuda tomadihona lalonai unai be edia orea ena hahediba herevana ta. Hindu taudia idia laloa atman, o soul, be matamana neganai Dirava ese ia karaia, vara negana ai tauanina ese ia guia, bona mase negana ai ia lao tauanina ma ta bona unai bamona mauri noho karana ia badinaia loulou. Muslim taudia idia laloa vara neganai soul be tauanina danu idia vara hebou, bena tauanina ia mase neganai ia be ia mauri noho. Tomadiho ma haida​—⁠African animist, Shinto, bona dala ta ai Buddist danu​—⁠be dala idaudia ai unai hereva badana tamona idia hahedibalaia.

Daradara Henanadaidia Haida

Ena be ita diba soul ia mase diba lasi lalohadaina be kahirakahira tanobada hegegemadai ai idia abia dae, daradara henanadaidia haida idia havaraia. Hegeregere, taunimanima idia daradara edia lalokau tauna ena soul be edeseni ia lao bema ena mauri lalonai ia kara namo lasi. Ia be anina bada lasi mauri gauna ta ai do ia lao, a? Eiava ia be pegatori dekenai do ia lao, bena unuseniai hisihisi amo do idia hagoevaia ela bona ia hegeregere guba dekenai ia lao totona, a? Eiava dika hereana be, ia be hel ena lahi dekenai hisihisi do ia ania ela bona hanaihanai, a? Eiava, animist tomadiho momo edia hahediba bamona, ia be ena lalona do oi hanamoa toho laumana ta, a?

Unai bamona lalohadai ese ia havaraia lalohadaina be, mauri taudia be vaira neganai hekwarahi bada do idia abia. Ita be iseda mase lalokau taudia edia lauma edia lalona do ita hanamoa, badina be ita idia hahisia garina, a? Ita be idia do ita durua, pegatori amo do idia siri totona, a? Eiava ita be mai heudeheude bona gari ida idia ita laloa sibona, idia be hel dekenai idia hisihisi noho, a? Eiava animal haida ita kara henidia, mase taudia edia soul be idia lalonai idia noho dainai hegeregerena, a?

Unai lalohadai amo Dirava ena kara dainai idia vara henanadaidia be lalo-goada idia havaraia lasi. Hegeregere, sivarai ena matamanai ai herevalaia hahinena hegeregerena, tama sina momo be Dirava ese edia natuna ena soul guba dekenai ia “abia lao” lalohadaina, ese edia lalona ia do hagoadaia guna. To, idia momo be nega sisina murinai idia laloa matamaia edena bamona Diravana be gorere dikana ta amo kerere lasi natuna ta do ia hahisia, bena guba dekenai edia lalokau natuna do ia abia lao ia sibona totona, ena lalohisihisi tama sina edia amo ia abia siri haraga, idia laloa lasi negana ta ai. Unai bamona Diravana ena kara maoromaoro, lalokau, bona hebogahisi be edeseniai? Haida idia daradara, unai bamona Diravana ena aonega dekenai. Idia henanadai, bema soul iboudiai be dokonai guba dekenai do idia lao, aonega Diravana ta ese idia be tanobada dekenai do ia atodia guna, a? Unai ena anina be tanobada ia karaia be iena lalohadai bona nega ia haorea kava, ani?​—⁠Deuteronomi 32:4; Salamo 103:8; Isaia 45:18; 1 Ioane 4:⁠8 itaia.

Ia hedinarai, taunimanima edia soul ia mase lasi lalohadaina, herevana edena dala ai idia hahedinaraia, to daradara henanadaidia idia havaraia, bona lalohadai ia idauidau. Dahaka dainai? Hekwakwanai idia vara edia badina be unai hahediba herevana ia mai dalana dainai. Reana emu lalona do ia kehoa bema nega sisina unai badina oi tahua neganai; bona reana do oi hoa Baibel ese soul ia herevalaia dalana oi diba neganai. Mase murinai mauri ena helaro namona ta ia herevalaia, tanobada ena tomadiho momo ese idia hadibaia herevadia bamona lasi.