Idia Vara Kava Dika Badadia Neganai
Accra, Ghana, July 4, 1995: Medu bada hereana, lagani 60 gunanai unai bamona ia vara lasi gauna, ese abata badana ia havaraia. Taunimanima 200,000 bamona ese edia kohu ibounai idia haboioa, 500,000 ese edia ruma dekenai idia vareai lou diba lasi bona 22 ese edia mauri idia haboioa.
San Angelo, Texas, U.S.A., May 28, 1995: Idia giroagiroa lai dikadia bona medu, aisi nadi bamona, ese taunimanima 90,000 idia noholaia siti idia hadikaia vaitani, idia hadikaia gaudia edia davana be K156 milioni bamona.
Kobe, Japan, January 17, 1995: Sekeni 20 sibona lalonai tano ia mareremarere, to taunimanima tausen haida idia mase, tausen momo ese bero idia abia, bona handred tausen ese edia ruma idia haboioa.
HARI ita noho negana be dika badadia edia nega ita gwauraia diba. United Nations edia ripoti ta ese ia hahedinaraia lagani 30 lalonai, 1963-92, dika badadia dainai idia mase, bero idia abia, bona noho gabuna idia haboioa taudia edia namba be lagani ta ta ai, 6 pesen amo ia bada ia daekau. Inai nega dikana dainai, UN be lagani 1990 ia lao 1999 ia gwauraia “Intenesenel Gaukara Ena Lagani Ten, Idia Vara Kava Dika Badadia Hamaragia Totona.”
To momokani, tanobada ena siahu gauna ta—hegeregere lai badana, lahi ororona ia pou, eiava tano ia mareremarere—ese nega ibounai dika badana ia havaraia lasi. Lagani ta ta ibounai unai gaudia handred momo idia vara to taunimanima idia haberoa eiava hamasea lasi. To taunimanima momo ia hamasea bona kohu momo ia hadikaia neganai, dika badana ita gwauraia be maoro.
Toana be idia vara kava dika badadia idia momo idia lao ita koua diba lasi. Buka ta, Natural Disasters—Acts of God or Acts of Man?, ia gwau: “Taunimanima ese tanobada idia haidaua ia hegeregere dika badadia idia vara, bona edia kara dainai idia sibona be dika badadia idia davaria haraga diba.” Unai buka ese ia vara diba haheitalai ia gwauraia: “Ororo ena gabana dekenai, raro nadi amo idia haginia ruma dikadia momo edia gabu ai, tano ia mareremarere sisina ese taunimanima momo ia hamasea bona hisihisi bada ia havaraia diba. To unai dika badana ia vara badina tano ia mareremarere dainai eiava ia vara badina taunimanima be ruma dikadia lalonai idia noho dika ia vara diba gabuna dekenai, a?”
Baibel idia stadilaia taudia dekenai, idia vara kava dika badadia idia momo idia lao be badina ma ta dainai idia hoalaia lasi. Kahirakahira lagani 2000 gunanai, Iesu Keriso ia gwau “tanobada dokona” ena toana idauidau lalonai “hitolo bada do ia vara, tano danu do ia mareremarere.” (Mataio 24:3, 6-8) Baibel ia gwau danu “nega ena dokona dekenai,” taunimanima ese edia ura do idia tahua, moni do idia mataganigani henia, do idia lalokau diba lasi, bona kara namodia do idia ura henia lasi.a (2 Timoteo 3:1-5) Unai kara dainai nega momo taunimanima ese tanobada idia hadikaia, unai amo tanobada ena siahu gaudia ese haraga taunimanima idia hadikaia diba. Taunimanima ese idia havaraia dika badadia idia vara danu badina lalokau be lasi tanobadana lalonai ita noho.
Iseda tanobada dekenai idia noho taudia edia namba ia bada ia lao, taunimanima edia kara ese dika ia habadaia, bona tanobada ena kohu be dala kererena ai idia gaukaralaia noho lalonai dika badadia ese taunimanima do idia hahisidia noho. Heduru henia gaukarana be mai ena hekwarahi bada, murinai herevana ese do ia hahedinaraia hegeregerena.
[Footnotes]
a Nega dokona ena toa dekenai diba ma haida oi davaria totona Diba ese Mauri Dekenai Ita Ia Hakaua Lao bukana, rau 98-107 oi itaia, Watchtower Bible and Tract Society of New York, Inc. ese ia halasia.
[Picture Credit Line on Page 2]
Top: Information Services Department, Ghana; right: San Angelo Standard-Times