Diba Momo Taudia ese Evanelia Bukadia Idia Gwauraia Dalana
“TAUNIMANIMA be dahaka idia gwau, lau be daika?” (Luka 9:18) Kahirakahira lagani 2,000 gunanai, Iesu ese unai bamona iena hahediba taudia ia nanadaia. Unai be taunimanima ese idia hepapahuahulaia henanadaina. Toana be hari inai negai idia hepapahuahulaia bada, bona Kerisimasi ia kahirakahira neganai, idia gwau Iesu idia laloa bada negana unai, idia hepapahuahulaia bada herea. Taunimanima momo idia abia dae Dirava ese guba amo Iesu ia siaia taunimanima ia hoia lou totona. Oi be unai bamona oi laloa, a?
Diba momo taudia haida ese lalohadai idauna ma ta idia gwauraia. Tomadiho bona taunimanima edia mauri dalana ia tahua profesa ta, Marcus J. Borg, ia gwau: “Iesu idia gwauraia taunimanima ia hadibadia ia be Dirava ena Natuna, tanobada taudia edia kara dika dainai do ia mase, to unai be momokani lasi.”
Diba momo taudia ma haida idia gwau Iesu korikorina be Baibel ai ena sivarai ita duahia tauna bamona lasi. Haida idia gwau Evanelia Bukadia be lagani 40 eiava ma haida Iesu ena mase murinai idia torea bona unai neganai, Iesu korikorina be daika, idia laloa idau vadaeni. Idia gwau hekwakwanai be Evanelia Bukadia idia torea taudia edia laloatao karana dekenai lasi, to idia edia lalohadai dalana dekenai. Iesu ena mase murinai hahediba taudia edia lalohadai ia idau—ia be Dirava ena Natuna, Hahemauri Tauna, bona Mesia. Mai hekokoroku ida haida idia gwau Iesu be ia loaloa aonega tauna ta, taunimanima edia noho ia haidaua toho tauna ta sibona. Diba momo taudia idia gwau, unai be evanelia ena hereva momokani.
“Diba Momo Taudia Edia” Lalohadai Iesu Dekenai
Baibel hakoikoia toho taudia ese edia “diba momo taudia edia” lalohadai ena maoro idia hamomokania toho totona, mai edia ura ida Iesu ena mauri lalonai idia vara hoa gaudia idia dadaraia. Hegeregere, haida idia gwau Iesu be rami-hebou kekenina amo ia vara sivaraina idia torea badina idia ura sivarai korikorina idia hunia, sihari kava amo ia vara sivaraina unai. Haida ese Iesu ena peroveta herevana, Ierusalema do idia hadikaia ore herevana idia dadaraia, idia gwau ena anina ia “vara” murinai Evanelia Bukadia lalonai idia torea. Haida idia gwau danu, Iesu be taunimanima ia hanamoa karadia be edia lalohadai ia haidaua gaudia sibona. Oi laloa unai hereva idia maoro eiava unai be kavakava herevadia?
Danu, diba momo taudia haida idia gwau, Iesu ena hahediba taudia ese ena toreisi lou herevana idia gwauraia kava, edia orea ia moru garina. Idia gwau, Iesu ia noho lasi neganai, ia murinai idia raka taudia be siahu lasi, unai dainai edia Biaguna ena sivarai be edia sivarai lalodiai idia torea lou. Edia hereva ena anina be Keriso lasi, to Keristani dalana ia toreisi lou. Bema oi laloa unai lalohadai be diba momo taudia edia koikoi herevana sibona, dahaka oi laloa Barbara Thiering ena lalohadai dekenai, ia gwau Iesu idia hamasea lasi? Ia gwau idia hasatauroa amo Iesu ia roho mauri, nega rua ia headava, bona natudia toi ia havaraia.
Unai lalohadai ibounai ese Iesu ena dagi idia hamaragia, ela bona diba momo taudia ese idia abia dae diba: aonega tauna ta, Iuda tauna idauna ta, taunimanima edia noho hanamoa toho tauna ta—unai iboudiai idia abia dae diba to idia abia dae lasi ia be Dirava ena Natuna, “taunimanima momo edia dika davana karaia totona” ia mai tauna.—Mataio 20:28.
Reana Kerisimasi ia kahirakahira neganai, Evanelia Bukadia edia kahana idauidau oi duahia, hegeregere Iesu be boromakau edia aniani maua dekenai ia vara sivaraina. Eiava dubu dekenai reana oi kamonai. Oi ese Evanelia sivaraidia oi abia dae idia be mai anina bada bona oi abidadama henia diba sivaraidia, a? Bema oi abia dae, mani inai hoa gauna do oi laloa. Lagani 1985 amo ema bona hari, diba momo taudia edia grup ta be lagani ta ta ai nega rua hebou ta, Jesus Seminar, idia karaia, Iesu ena hereva idia tahua namonamo totona. Iesu ese Baibel ia herevalaia gaudia ia gwauraia, eiava lasi? Seminar ena memba taudia be mai kala idauidau ageva amo Iesu ena hereva ta ta idia vouti henia. Ageva kakakakana ena anina be momokani Iesu ese unai hereva ia gwauraia; ageva kakakaka sisina ena anina be reana Iesu be unai bamona ia gwau; ageva korema sisina ese daradara ia hahedinaraia; bona ageva koremana ese hereva ia hakoikoia.
Reana oi daradara Jesus Seminar ena lalohadai do oi diba neganai, badina idia gwau, Iesu ia gwauraia herevadia amo 82 pesen be ia ese ia gwauraia lasi. Mareko ena Evanelia Bukana amo hereva tamona sibona idia gwauraia momokani. Idia gwau Luka ena Evanelia Bukana be koikoi herevadia amo ia honu dainai ta ese ia “hamaoromaoroa diba lasi.” Ioane ena Evanelia Bukana ibounai, to laini toi sibona lasi, be ageva korema idia henia, anina be koikoi, bona unai kahana maragina be ageva korema sisina ia abia, ia hahedinaraia unai danu idia daradaralaia.
Diba Momo Taudia Edia Hepapahuahu Sibona Lasi
Diba momo taudia ida oi lalo-tamona, a? Idia ese Iesu idia gwauraia dalana be maoro to Baibel dekenai ia noho hereva be maoro lasi, a? Unai henanadai be diba momo taudia edia hepapahuahu sibona lasi. Hari, Kerisimasi ia kahirakahira neganai, reana ma oi laloa lou, Baibel ia gwau Dirava ese Iesu ia siaia “idia abidadama henia taudia ibounai be do idia mase lasi, to mauri hanaihanai do idia abia” totona.—Ioane 3:16.
Bema Iesu be ia loaloa aonega tauna ta, ita diba namonamo lasi tauna sibona, ia ‘ita abidadama henia’ be anina lasi. To, bema Baibel ese dala maorona ai Iesu ia herevalaia, unai be mai anina bada iseda hahemauri dekenai. Unai dainai, namona be do ita diba—Baibel lalonai Iesu ena sivarai momokanina ia noho, eiava lasi?