Evanelia Bukadia—Hepapahuahu Ia Lao Noho

Iesu Keriso ena vara sivaraina Evanelia Bukadia lalonai idia momokani, a?

Ororo dekenai Haroro Herevana Badana be ia ese ia henia, a?

Momokani Iesu ia toreisi lou, a?

Momokani ia gwau: “Dala be lau, hereva momokani be lau, mauri danu lau”?—IOANE 14:⁠6.

LAGANI 1985 murinai, Iesu Hebouna be nega rua lagani ta ta ai idia karaia; unai hebou dekenai diba bada taudia 80 bamona be unai bamona gaudia idia herevalaia. Unai diba bada taudia be dala idauna ai unai bamona henanadai idia haerelaia. Unai hebou taudia be idia vouti, Evanelia Bukadia ese idia gwauraia Iesu ena hereva iboudiai dekenai. Vouti neganai idia makaia kakakaka gauna ese ia hahedinaraia idia laloa Iesu be momokani unai hereva ia gwauraia. Idia makaia pink gauna anina be unai hereva be Iesu ena hereva bamona. Idia makaia gray gauna anina be unai be Iesu ena lalohadai bamona, to unai hereva ia gwauraia lasi. Idia makaia korema gauna anina be Iesu ese ia gwauraia lasi momokani, to idia laloa unai hereva be gabeai ia vara.

Unai dala idia badinaia neganai, Iesu Hebouna edia memba taudia ese inai hereva ena matamana dekenai ai henanadailaia gaudia hani idia hakoikoia. Unai taudia be Evanelia Bukadia ese idia gwauraia Iesu ena hereva 82 pesen idia makaia korema gaudia. Idia laloa Evanelia Bukadia bona ma toretore haida lalodiai Iesu idia gwauraia sivaraidia 16 pesen sibona be sedira momokani.

Evanelia Bukadia dekenai unai bamona kerere tahua karana be kara matamatana lasi. Hermann Reimarus, Hamburg, Germany, ena profesa ta bona Ist gabudia edia gado ia stadilaia tauna ia mase murinai, iena rau 1,400 toretorena be lagani 1774 ai idia printaia, bona unai ese Evanelia Bukadia edia kerere ia herevalaia. Unai toretore lalonai Reimarus ia gwau Evanelia Bukadia idia momokani be ia daradaralaia bada. Iesu ena mauri idia herevalaia Evanelia Bukadia hani lalonai gado ia tahua bona hereva haida idia tamona lasi bamona dainai unai bamona lalohadai ia abia. Unai murinai, toretore tahua taudia be nega momo Evanelia Bukadia idia momokani be idia daradaralaia, bona taunimanima edia abidadama unai toretore dekenai idia hamanokaia.

Unai diba bada taudia edia lalohadai badana be Evanelia Bukadia edia sivarai be taunimanima idauidau ese idia gwauraia tomadiho gori herevadia sibona. Unai daradara diba bada taudia edia henanadai be inai: Sedira edia abidadama dainai Evanelia Bukadia hani idia torea taudia be idia vara gaudia edia sivarai dekenai ma hereva haida idia atoa kava, ani? Gunaguna Keristani oreana lalonai haida be dagi idia tahua dainai Iesu ena sivarai idia haidaua eiava ma hereva haida idia atoa kau, a? Evanelia Bukadia dekenai edena kahana idia momokani bona edena be gori?

Dirava ia noho lasi lalohadaina idia abia dae eiava tanobada gaudia idia laloa bada taudia huanai idia tubu taudia idia laloa Baibel​​—⁠Evanelia Bukadia danu​​—⁠be gori sivaraidia bukana. Ma haida idia hoa dikadika badina Kerisendom ena sivarai lalonai rara bada idia bubua, dagedage karadia, lalo-tamona lasi, bona Dirava badinaia lasi karadia be momo. Unai taudia idia laloa Kerisendom lalonai idia matauraia bada toretore helagadia kamonai henia karana be mai badina namona lasi. Idia laloa tomadiho koikoina idia havaraia toretoredia be anina lasi gori sivaraidia sibona.

Dahaka oi laloa? Diba bada taudia haida sibona be Evanelia Bukadia ena momokani idia daradaralaia dainai oi danu oi daradara be namo, a? Evanelia Bukadia torea taudia be gori herevadia idia havaraia oi kamonai neganai, unai ese oiemu abidadama edia toretore dekenai ia hamanokaia be maoro, a? Kerisendom lalonai Dirava diba lasi karadia momo idia karaia dainai, Evanelia Bukadia idia momokani oi daradaralaia be namo, a? Oi ai noia idia vara momokani gaudia oi tahua totona.

[Picture on page 4]

Evanelia Bukadia lalonai be gori eiava sivarai momokani?

[Credit Line]

Jesus Walking on the Sea/The Doré Bible Illustrations/Dover Publications

[Picture Credit Line on page 3]

Background, pages 3-5 and 8: Courtesy of the Freer Gallery of Art, Smithsonian Institution, Washington, D.C.