Dika Do Ita Negea Momokani be Namo

IEHOVA be Dirava helagana. Idaunegai ia be “Israela ena Dirava Helagana,” bona ia ura Israela taudia idia goeva, mai miro lasi. (Salamo 89:18) Iena abia hidi besena dekenai ia gwau: “Unai dainai do umui helaga, badina lau be helaga.” (Levitiko 11:45) Bema ta ia ura Iehova “ena ororo, dekenai do ia daekau lao” ia “kara goevagoeva, bona laloa goevagoeva” be namo. (Salamo 24:​3, 4) Unai ena anina be kara dika amo ita siri sibona lasi. Ena anina korikorina be “kara dika do ita ura henia lasi, momokani.”​—Aonega Herevadia 8:​13.

Mai ena lalokau ida Iehova ese taravatu idauidau ia henia, Israela besena be kara dika do idia diba bona do idia dadaraia totona. (Roma 7:​7, 12) Unai taravatu lalonai ia haginia auka kara maoromaoro taravatudia idia noho. Idia hahedinaraia heudahanai, tatau idia sihari heheni, famili taudia idia sihari heheni, bona taunimanima be animal idia sihari henia karadia ibounai be kara mirodia momokani. (Levitiko 18:23; 20:10-​17) Unai kara dikadia idia karaia taudia be Israela besena amo idia kokia.

Horoa Keristani taudia edia kongregesen be “Dirava ena Israela” ai idia lao neganai, unai bamona kara maoromaoro taravatudia be idia abia danu. (Galatia 6:16) Keristani taudia danu ese ‘dika idia negea momokani’ be namo. (Roma 12:9) Iehova ena hereva Israela dekenai be idia totona danu, ia gwau: “Do umui helaga, badina lau be lau helaga noho.” (1 Petero 1:15, 16) Miro karadia, hegeregere sihari kava, heudahanai, tatau idia sihari heheni, taunimanima be animal idia sihari henia, bona famili taudia idia sihari heheni karadia ese Keristani kongregesen do idia hadikaia lasi be namo. Unai kara idia rakatania lasi taudia be Dirava ena Basileia lalonai do idia vareai lasi. (Roma 1:​26, 27; 2:​22; 1 Korinto 6:​9, 10; Heberu 13:4) Hari inai “nega ena dokona dekenai,” unai taravatu be “mamoe idaudia” totona danu. (2 Timoteo 3:1; Ioane 10:16) Unai dainai, horoa Keristani taudia bona mamoe idaudia be bese goevana bona namona ai idia lao, idia hegeregere edia Dirava ena ladana idia huaia Iehova ena Witness taudia unai.​—Isaia 43:10.

Kongregesen Do Ia Goeva Noho

Tanobada be idau vaitani, ia ese matabodaga karadia idauidau ia abia dae. Ena be Keristani korikori taudia idia idau, to namona be idia laloaboio lasi hari Iehova idia hesiai henia taudia momo be guna tanobada lalonai. Iseda Dirava helagana idia do diba lasi neganai, idia momo ese badina ta idia itaia lasi edia tauanina ena ura bona lalohadai dikadia idia koua totona, bena “lebulebu karadia” idia karaia. (1 Petero 4:4) Aposetolo Paulo ese Dirava idia diba lasi taudia dikadia edia matabodaga karadia ia gwauraia murinai, ia gwau: “Umui haida be guna unai bamona umui karaia.” To, ma ia gwau: “To Dirava ese umui emui kara dika ia huria goeva vadaeni, ia ese helaga taudia umui ia halaoa vadaeni. Bona hari Dirava ena vairana dekenai umui be maoromaoro, Lohiabada Iesu Keriso dainai, bona Dirava ena Lauma dainai.”—1 Korinto 6:11.

Unai be hagoadaia herevana, ani! Herevana ta ese dahaka ia karaia guna, to Keriso ena sivarai namona ena diari ese ena kudouna ia veria neganai, ia senisi. Ia abidadama henia bona iena mauri ia gwauhamatalaia Iehova Dirava dekenai. Unai nega amo ia ese kara goevana ia badinaia, Dirava ena matana ai ia goeva vadaeni. (Heberu 9:​14) Guna ia karaia kara dika be Dirava ese ia gwauatao, bona ia hegeregere ‘vaira neganai gaudia do ia goadalaia.’a​—Filipi 3:​13, 14; Roma 4:​7, 8.

Iehova ese helalo-kerehai tauna Davida ena ala-ala karana bona ena heudahanai ia gwauatao, bona ia ese helalo-kerehai tauna Manase ena matabodaga kaivakuku tomadiho henia karana bona rara bubua karadia ia gwauatao. (2 Samuela 12:​9, 13; 2 Sivarai 33:​2-6, 10-​13) Ita moale bada badina ita diba iseda kara dika do ia gwauatao danu bema mai eda momokani bona manau ida ita helalo-kerehai bona ia dekenai ita lao. To, ena be Iehova ese Davida bona Manase edia kara dika ia gwauatao, unai tatau ruaosi​—bona Israela besena idia ida​—be edia kara dika dainai idia vara anina dikadia idia koua diba lasi. (2 Samuela 12:11, 12; Ieremia 15:​3-5) Unai hegeregerena, Iehova ese helalo-kerehai taudia edia kara dika ia gwauatao neganai, reana edia kara dainai idia vara anina dikadia do idia koua diba lasi.

Kara Dika Dainai Idia Vara Gaudia

Hegeregere, ena mauri lalonai matabodaga karadia ia karaia bona AIDS ia abia tauna be reana hereva momokani ia abia, ena mauri ia haidaua, bona ia gwauhamata bona bapatiso. Hari ia be lauma dalanai goeva Keristani tauna, Dirava ia tura henia, bona nega vaira ena helaro namona ia abia; to AIDS ia do noho danu. Gabeai reana unai gorere dainai do ia mase, ena kara gunadia dainai ia vara lalohisihisi gauna, ia koua diba lasi anina dikana. Keristani taudia haida dekenai guna idia karaia matabodaga karadia dainai idia vara gaudia be ma dala idauidau ai idia haheaukalaia. Edia bapatiso murinai lagani momo lalonai, reana inai tanobada dokona ena nega ibounai lalonai, do idia hekwarahi matabodaga kara gunadia dekenai idia veria tauanina ena ura dikadia idia dadaraia totona. Iehova ena lauma ena heduru dainai, momo idia kwalimu. To nega ibounai unai tuari idia karaia noho.​—Galatia 5:​16, 17.

Unai bamona taudia idia kara dika lasi bema edia ura dikadia idia biagua. To bema idia be tatau, reana aonega dalana be kongregesen lalonai maduna ‘idia tahua’ lasi, tauanina ena ura dikadia dainai idia do hekwarahi neganai. (1 Timoteo 3:1) Badina be dahaka? Badina kongregesen ese elda taudia idia laloa dalana idia diba. (Isaia 32:​1, 2; Heberu 13:17) Idia lalo-parara tadikaka bona taihu be hehuni gaudia momo dekenai elda taudia edia heduru idia tahua bona do idia naria namonamo dalana ai heduru do idia henia. Ia be lalokau, aonega, eiava laloa maoromaoro karana lasi bema tauanina ena ura dikadia dainai hanaihanai ia hekwarahi tauna ese unai maduna bada gaukarana ia tahua.​—Aonega Herevadia 14:16; Ioane 15:12, 13; Roma 12:1.

Bapatiso ia do abia lasi neganai natuna ia hadikaia tauna ena kara dika dainai ia vara gauna be reana ma idau. Hereva momokani ia diba neganai, ia helalo-kerehai bona ena kara ia haidaua, unai kara dika mai hisihisina be kongregesen lalonai ia mailaia lasi. Reana unai murinai lauma dalanai ia goada lao, ena ura dikadia idia ore momokani, bona reana ia ura kongregesen lalonai maduna bada gaukarana ‘ia tahua.’ To bema momo idia diba ia ese natuna ia hadikaia be edena bamona? Ia be “kara maoromaoro tauna, . . . ena ladana be do ia namo, . . . ta ese [ena] kerere ia gwauraia diba lasi” tauna, a? (1 Timoteo 3:​1-7, 10; Tito 1:7) Lasi. Unai dainai, ia be hegeregere lasi kongregesen lalonai dagi do ia abia.

Gwauhamata Keristani Tauna Ia Kara Dika Neganai

Iehova ia lalo-parara ita be goada lasi bona ita bapatiso murinai danu ita kara dika diba. Aposetolo Ioane ese ena negai idia noho Keristani taudia dekenai ia torea: “Inai hereva umui dekenai lau torea noho, be umui ese do umui kara dika lasi totona. To tau ta bema ia kara dika, ita be mai iseda durua tauna, iseda Tamana ena vairanai. Ia be Iesu Keriso, kara maoromaoro tauna. Bona Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.” (1 Ioane 2:1, 2) Oibe, Iesu ena boubou gauna dainai, Iehova ese bapatiso Keristani taudia edia kara dika do ia gwauatao​—bema idia helalo-kerehai momokani bona edia kara dika idia rakatania.

Haheitalai be aposetolo edia negai ia noho Korinto ena kongregesen lalonai ita itaia. Aposetolo Paulo ia kamonai unai kongregesen matamatana lalonai famili ta lalonai sihari heheni karana ta ia vara, bona hahegani ia henia unai tau be murimuri ai do idia atoa. Gabeai, unai kara dika tauna ia helalo-kerehai, bona Paulo ese kongregesen ia hamaoroa unai tauna do idia abia vareai. (1 Korinto 5:​1, 13; 2 Korinto 2:​5-9) Unai amo, Iehova ena hebogahisi lalokauna ena hanamoa siahuna bona Iesu ena boubou davana badana ese kara dika amo unai tau idia hagoevaia. Unai bamona gaudia be hari inai negai idia vara diba danu. To, guna ita hereva bamona, ena be ia kara dika bapatiso tauna ia helalo-kerehai bona Iehova ese ena kara dika ia gwauatao vadaeni, to ena kara dika dainai idia vara anina dikadia do ia koua diba lasi.​—Aonega Herevadia 10:16, 17; Galatia 6:7.

Hegeregere, bema ia gwauhamata kekenina ta ia sihari kava, reana mai lalohisihisi bada ida ia helalo-kerehai bona kongregesen ena heduru dainai lauma dalanai do ia namo lou. To bema ena sihari kava dainai ia rogorogo be edena bamona? Ena kara dainai iena mauri ibounai ia idau momokani, unai ia koua diba lasi. Heudahanai tauna ta reana ia helalo-kerehai bona murimuri ai do idia atoa lasi. To Baibel ena taravatu hegeregerena ena adavana ese unai tau ia rakatania diba, bona reana ia ura unai bamona ia karaia. (Mataio 19:9) Bema unai ia karaia, unai tau, ena be Iehova ese ena kara dika ia gwauatao, to ena mauri orena ibounai be ena kara dika dainai ia vara hisihisi gauna do ia mamia.​—1 Ioane 1:9.

Bema lalokau lasi dalanai tau ta ese headava ia hadokoa hahine ma ta do ia adavaia totona be edena bamona? Reana gabeai do ia helalo-kerehai bona kongregesen dekenai do idia abia vareai. Nega ia heau lalonai, reana lauma dalanai ia goada lou bona Baibel ena “hereva badadia” ia badinaia. (Heberu 6:1) To bema iena hahine ginigunana be ma tau ta danu ia noho lasi, ia be hegeregere lasi kongregesen lalonai maduna do ia abia. Ia be “hahine tamona ena adavana” lasi badina ena hahine ginigunana ia rakatania be Baibel ena taravatu hegeregerena lasi.​—1 Timoteo 3:​2, 12.

Unai be Keristani tauna ese kara dika ia negea momokani ena badina goadadia, ani?

Natuna Hadikaia Tauna be Edena Bamona?

Bema bapatiso Keristani tauna badana ese natuna ta ia sihari henia be edena bamona? Unai kara dika ia karaia tauna be dika herea dainai Iehova ese ena dika do ia gwauatao diba lasi, a? Reana lasi. Iesu ia gwau ‘lauma helaga dekenai ia hereva dika henia tauna ena dika do ia gwauatao lasi.’ Bona Paulo ia gwau hereva momokani ia diba murinai mai ena ura ida kara dika ia karaia noho tauna totona boubou gauna be lasi. (Luka 12:10; Heberu 10:26, 27) To Baibel ia gwau lasi Keristani tauna ta ese natuna ta​—iena natuna eiava ma natuna ta​—ia sihari henia kara dikana be Dirava ese do ia gwauatao diba lasi. Momokani, iena kara dika amo ia goeva diba bema ena kudouna amo mai ena momokani ida ia helalo-kerehai bona ena kara ia haidaua. To, reana guna ia habadaia vadaeni tauanina ena ura dikadia dadaraia totona do ia hekwarahi noho be namo. (Efeso 1:7) Bona reana unai kara dainai idia vara anina dikadia do ia koua diba lasi.

Iena tano ena taravatu hegeregerena, reana natuna ia hadikaia tauna be dibura dekenai do ia lao eiava Gavamani ese kara dika ena davana ma ta do ia henia. Kongregesen ese unai amo ia do idia gimaia lasi. Ma danu, unai tau ese ena manoka badana ia hahedinaraia bona unai idia laloaboio diba lasi. Bema helalo-kerehai ena toana ia hahedinaraia, ia idia hagoadaia lauma dalanai do ia goada, haroro gaukara do ia karaia, ma danu Haroro Sikuli lalonai hereva do ia henia bona Hesiai Hebou lalonai hadibaia lasi kahana do ia karaia totona. To, ita gwau lasi anina be ia hegeregere kongregesen lalonai maduna ta do ia huaia. Baibel ai unai ena badina be dahaka dahaka?

Badina ta be, elda ese “sibona ena tauanina do ia naria bona biagua” be gau badana. (Tito 1:8) Momokani, ita ta lasi be goevadae dalanai tauanina ita biagua diba. (Roma 7:​21-​25) To natuna ta ia sihari henia gwauhamata Keristani tauna ese ia hahedinaraia manoka gauna, be tauanina ena ura kererena ta. Idia vara gaudia idia hahedinaraia unai bamona kara ia karaia tauna ese gabeai ma natudia haida do ia hadikaia diba. Momokani, natuna hadikaia taudia ibounai ese edia kara dika idia karaia lou lasi, to momo idia karaia. Bona kongregesen taudia ese iena kudouna ai ia noho gauna idia diba lasi dainai idia gwau diba lasi daika ese natudia reana do ia hadikaia lou bona daika be do ia karaia lou lasi. (Ieremia 17:9) Unai dainai, Paulo ena sisiba Timoteo dekenai be mai anina bada natuna ia hadikaia bapatiso tauna dekenai: “Lohiabada ena gaukara totona, gunalaia tauna ta do oi abia hidi haraga lasi.” (1 Timoteo 5:22) Iseda natudia ita naria namonamo totona, guna natuna ia hadikaia tauna ia hegeregere lasi kongregesen lalonai maduna do ia huaia. Danu ia be painia gaukarana eiava ma spesel ful-taim hesiai gaukarana do ia karaia diba lasi.​—Esodo 21:28, 29 ena hakaua herevana oi itaia.

Haida idia henanadai diba, ‘Guna haida ese kara dika idaudia idia karaia bona helalo-kerehai ena toana idia hahedinaraia, to gabeai unai kara dika idia karaia lou, ani?’ Oibe, unai bamona ia vara, to ma gau haida ita laloa danu be namo. Hegeregere, bema ta ese tau eiava hahine ia sihari henia gwauraia, unai tau eiava hahine ese unai kara ia koua diba. To ta ese natudia ia koia haraga diba, edia daradara ia havaraia, eiava ia hagaridia be auka lasi. Baibel ia gwau natudia be aonega lasi. (Aonega Herevadia 22:15; 1 Korinto 13:11) Iesu ese natudia ia gaukaralaia, kerere lasi manau karana ia haheitalaia totona. (Mataio 18:4; Luka 18:16, 17) Natudia be kerere lasi bona diba idia do abia lasi. Natudia momo be idia gari lasi, idia ura ma ta idia hamoalea, bona unai dainai idia diba bona idia abidadama henia tauna mai ena lalohadai dikana ese ia hadikaia diba. Unai dainai, Iehova ena vairanai, kongregesen be mai edia maduna edia natudia do idia naria.

Idia hadibaia namonamo vadaeni natudia ese edia tama sina, elda taudia, bona ma taunimanima badadia idia kamonai henia bona idia matauraia. (Efeso 6:​1, 2; 1 Timoteo 5:​1, 2; Heberu 13:7) Ia be kara dika badana bema unai siahu taudia ta ese natuna ena kerere lasi abidadama ia gaukaralaia ia hadikaia totona eiava ia doria ia sihari henia totona. Ta ese unai bamona ia sihari henia taudia be lagani momo lalonai unai kara dainai ia vara lalohisihisi metauna idia hekwarahilaia. Unai dainai, natuna hadikaia tauna ese sisiba aukana bona taravatu haida do ia abia kongregesen lalonai. Unai tauna ena dagi be anina bada lasi to kongregesen ena goeva be mai anina bada.​—1 Korinto 5:6; 2 Petero 3:​14.

Bema natuna hadikaia tauna ia helalo-kerehai momokani, ia ese Baibel ena hakaua herevadia badinaia karana ena namo do ia itaia. Bema dika do ia negea momokani, ia ese ia karaia karana do ia inai henia bona do ia hekwarahi ena kara dika do ia karaia lou lasi totona. (Aonega Herevadia 8:​13; Roma 12:9) Ma danu, Iehova ena lalokau badana dainai do ia tanikiu henia, unai lalokau dainai helalo-kerehai tauna, ia bamona tauna, ese iseda Dirava helagana ia tomadiho henia diba bona helaro ia abia tanobada dekenai hanaihanai do idia noho “kara maoromaoro” taudia bogaraginai ia danu do ia noho.​—Aonega Herevadia 2:​21.

[Footnotes]

[Blurb on page 28]

Iehova ese helalo-kerehai taudia edia kara dika ia gwauatao, to reana edia kara dainai idia vara anina dikadia idia koua diba lasi