Dirava Ena Hereva Stadilaia Taudia ese Kosi Idia Haorea
KERISTANI taudia ginigunadia idia karaia hegeregerena, tanobada hegegemadai taunimanima be Iehova ena Witness taudia edia ruma-ta-ruma-ta gaukarana idia diba. Unai gaukara be Watchtower Bible School of Gilead ena klas namba 102 ena kosi haorea program ena hamatamaia herevana ai idia gwauraia hedinarai.
March 1, 1997 ai, Albert Schroeder, Iehova ena Witness taudia edia Hakaua Oreana tauna ta, ese French magasin ladana Le Point lalonai vanegai idia gwauraia herevana ta ia herevalaia. Unai magasin ia hahedinaraia Roman Katolik oreana be palani idia karaia Italy dekenai ruma-ta-ruma-ta haroro gaukarana do idia hamatamaia. Unai magasin ia gwau: “Vadaeni [Vatican misinari taudia] be Iehova ena Witness taudia edia teritori dekenai idia gaukara helulu neganai imana kavakava do idia ginidae lasi totona, Vatican be dala ia karaia Helaga Tauna Mareko ena Evanelia Bukana ena kopi milioni ta do idia printaia, badina edia gwaukau taudia be iduara-ta-iduara-ta ai hereva namona ‘hariharilaia’ diba momo taudia [Witness taudia] ida do idia gaukara helulu.”
Unai kosi haorea taudia 48 be Dirava ena Hereva halasia gaukarana ai Iesu ena haroro diba momo karadia idia tohotohoa taudia haida. Idia be tano idauidau 8 amo idia mai Watchtower Educational Center, Patterson, New York dekenai. Hua ima idia sikuli lalonai, Baibel ibounai idia stadilaia, rau ginigunana amo ela bona dokona. Edia kosi lalonai idia stadilaia gaudia haida be Dirava ena orea ena sivarai, misinari maurina ai idia badinaia diba daladia, bona Dirava ena lauma ena huahua. Unai ibounai amo idia ura hagugurua gauna be tamona—do idia hahegaegaea idia siaia tanodia idauidau 17 dekenai misinari gaukara karaia totona. Kosi haorea pepa idia abia gwauraia neganai, gabu idauidau taudia 5,015 ese unai nega idia moalelaia danu. Dahaka sisiba oredia be unai Gilead stiuden taudia ese idia abia?
Misinari Matamatadia Hagoadaia Herevadia Nega Korikori Ai
Seamani ena program kehoa herevadia murinai, Ralph Walls, Hakaua Oreana ena Gaukara Taudia Naria Komiti durua tauna ta, ese hereva ginigunana kwadogina ia henia, bona misinari matamatadia ese idia badinaia diba sisiba ia henia. Iena hereva kwarana be “Lalokau Hahedinaraia Karana Laloatao.” Ia hahedinaraia Baibel ese, 2 Timoteo karoa 3 ai, taunimanima edia lalokau do ia ore ia lao ia perovetalaia. Nega korikori ai misinari taudia matamatadia dekenai inai sisiba ia henia, 1 Korinto 13:1-7 ese lalokau ia herevalaia hegeregerena: “Umui, misinari taudia, be reana emui gaukara horadia do umui hanaia. Reana emui Gilead kosi amo diba bada herea umui abia. Eiava reana iseda brens gaukara ena nega murinai hora ma haida do ita gaukara goada noho. To iseda hekwarahi bona sibona eda ura dadaraia karana be anina lasi bema lalokau ita hahedinaraia lasi.”
Ia murinai ia hereva tauna Carey Barber, Hakaua Oreana tauna ta, ia herevalaia gauna ena hereva kwarana be “Iehova ese Ita Ia Hakaua Ita Kwalimu Totona.” Tanobada Ibounai Tuarina Ginigunana murinai, Iehova Dirava ese iena Basileia sivarai namona harorolaia gaukarana ai ena abidadama hesiai taudia ia hakaudia bona idia kwalimu, herevana dagedage idia davaria. Lagani 1931 ai, Bible Student taudia, edia ladana unai neganai, ese inai ladana Iehova ena Witness taudia idia abia, to Kerisendom ena dubu taudia be idia lalohisihisi. Tadikaka Barber ia gwau: “Gilead kosi idia haorea klas namba 102 misinari taudia edia hahenamo namo hereana be gaukara badana lalonai taunimanima momo dekenai unai ladana idia diba dalana do idia hadibaia.” Idia be Gilead Sikuli dekenai idia hadibaia misinari taudia 7,131 edia lista latana ai idia vareai; idia be heduru idia henia, lagani 1943 ai tano 54 amo ema bona hari tano 233 dekenai Dirava ena Hereva harorolaia gaukarana habadaia totona.
Gabeai ia hereva tauna, Lloyd Barry, Hakaua Oreana tauna danu, be Gilead kosi haorea klas namba 11 tauna bona lagani 25 mai kahana lalodiai Japan dekenai misinari gaukara ia karaia. Hereva kwarana “Inai Kara Namodia Do Oi Karaia Noho” amo hagoadaia herevadia ia henia. Stiuden taudia ia hamaoroa: “Emui moale bada herea be haheauka karana amo do umui davaria.” Misinari gaukara eiava tiokratik gaukara ma ta lalonai ita haheauka karana amo dahaka hahenamo idia mai? “Gau bada hereana be, iseda haheauka karana ese Iehova ena lalona ia hamoalea . . . Iseda lalona do ia namo hahetoho neganai ita kara maoromaoro noho neganai . . . Misinari hesiai gaukara be emu mauri gaukarana ai oi halaoa . . . Emu ahuna be inai lalo-namo herevana, ‘namo herea!’ ” (Mataio 25:21; Aonega Herevadia 27:11) Tadikaka Barry ena hereva ia hadokoa gwauraia neganai, misinari matamatadia ia hagoadadia edia lalona idia hadaia ‘inai kara namodia do idia karaia noho,’ misinari gaukarana be edia mauri ena anina ai idia halaoa karana amo.—1 Timoteo 4:16.
“Dahaka Do Oi Itaia?” be Karl Adams, Gilead klas momo ia hadibaia tauna, ese ia gwauraia henanadaina. Ia gwau misinari taudia matamatadia ese edia gaukara lalonai do idia itaia gaudia be edia matana korikori sibona amo lasi to edia lalona amo danu. (Efeso 1:18) Israela ena spai taudia ese Gwauhamata Tanona ai idia itaia gaudia ese unai ena anina ia hahedinaraia. Spai taudia iboudiai 12 ese edia matana korikori amo idia itaia gaudia be tamona, to rua sibona ese Gwauhamata Tanona be Dirava ena itaia dalana ai idia itaia. Misinari taudia ese dala idauidau ai gau do idia itaia diba. Hesiai gaukara idia karaia tanodia haida ai, idia ese ogogami, hisihisi, bona helaro lasi toana do idia itaia. To namona be idia lalo-hesiku lasi bona unai tano idia rakatania lasi. Tadikaka Adams ese misinari ta vanegai klas ta amo ia herevalaia, unai taihu ia gwau: “Inai ekspiriens ese lau idia hadibaia do lau noho be namo. Inai taudia ese nega vaira helarona idia abia be namo. Lau ura edia mauri lau hanamoa.” Tadikaka Adams ese misinari taudia matamatadia ia hagoadaia idia siaidia tanona do idia laloa, ia be Iehova ese Iena tanobada Paradaisona ai do ia halaoa kahana ta, bona taunimanima do idia lalodia idia be unai tanobada matamatana ai idia vareai diba taudia.
Program dekenai unai kahana ena hereva dokona be Wallace Liverance ese ia henia, ia be lagani momo misinari gaukara ia karaia murinai Gilead ena hadibaia tauna ta ai ia lao. Iena hereva kwarana be “Dirava Ena Hoa Gaukaradia Lalonai mai Lalo-Parara ida Oi Kara.” Mai lalo-parara ida idia kara ena anina be edia kara idia biagua namonamo, idia kara mai aonega ida, bona mai edia darana ida. Israela ena King Saulo be unai bamona ia karaia lasi.—1 Samuela 13:9-13; 15:1-22.
Mai lalo-parara ida idia kara dalana ta be mauri dala matamatana do idia manadalaia ena hekwarahi idia abia dae, anina be gado matamatana bona unai taunimanima edia mauri do idia diba. Misinari taudia ese hekwarahi idia haheaukalaia bona hekwakwanai idia hanaia neganai, unai ese lauma dalanai idia hagoadadia diba, Iosua bona Kaleba be Dirava ese ia henidia tanona idia hadarerea neganai goada idia abia hegeregerena.
Haida Idia Henanadai Henidia
Program ena kahana gabena ai haida idia henanadai henidia. Harold Jackson ese Ulysses Glass ia henanadai henia. Ia be Gilead Sikuli ena registra bona hadibaia tauna ta nega daudau lalonai, bona hari ena mauri lagani be 85. Idia gaukara noho misinari taudia momo be iena abidadama hadibaia laganidia momo idia laloatao. Gabeai Mark Noumair ia mai, ia be Gilead ena hadibaia tauna ta bona lagani momo Africa dekenai misinari gaukara ia karaia bena gabeai Gilead Sikuli ena hadibaia tauna ta ai ia lao. Ia ese stiuden taudia ia nanadaia edia hua ima sikuli idia karaia neganai, edia haroro gaukara be edena bamona. Edia ekspiriens ese idia hahedinaraia unai gabu dekenai taunimanima haida idia ura Dirava ena Hereva idia kamonai.
Gabeai Robert Ciranko bona Charles Molohan be lo tadikakadia ida idia herevahereva. Idia be unai gabu ena sikuli ma ta, brens tadikakadia totona idia karaia sikulina, dekenai idia lao taudia. Kosi haorea taudia dekenai idia henia sisiba haida be, do idia manau be namo bona kongregesen ia lalo-tamona totona idia gaukara. Idia gwau namona be kosi haorea taudia ese edia lalohadai idia haginia guna lasi edia misinari gaukara gabuna dekenai be dahaka do ia vara, to mai edia ura ida dahaka gaukara idia henia be do idia abia dae. Unai sisiba idia badinaia karana ese misinari taudia matamatadia do ia durua Dirava ena Hereva hadibaia gaukarana do idia hagugurua.
Dokonai, Theodore Jaracz, Hakaua Oreana tauna ta, ese hereva ladana “Dahaka ese Daika Ia Veria Noho?” amo kamonai taudia ia hereva henia. Ia hahedinaraia ita Keristani taudia ese lauma ena huahua ita hahedinaraia neganai, dala namona ai taunimanima ita veria diba. Ia gwau: “Iehova ena orea ese ia siaia misinari taudia ese lauma dalanai bona namo havaraia dalana ai taunimanima idia veria sivaraidia namodia be momo.” Bena misinari taudia edia haheitalai namona ese ia durudia dainai Dirava ena hesiai idia lao henia taudia haida edia hereva ia gwauraia. Ena hereva ia hadokoa neganai, ia gwau: “Namona be Iehova ena taunimanima edia ladana namona umui dogoatao noho bona emui gaukara tanodia ai iduara dekenai umui pidipidi noho, do idia kamonai taudia tahua totona . . . Bona, emui kara maorodia bona goevadia amo tanobada umui dadaraia, bona dala namona ai ma haida umui veria Iehova hanamoa bona ena ladana abia isi totona.”
Program ena dokona ai, seamani ese hahenamo herevadia gabu idauidau amo ia gwauraia bena edia kosi haorea pepadia ia henia bona edia misinari gaukara gabudia ia gwauraia. Gabeai kosi haorea tauna ta ese klas ena lalo-tamona herevana ia duahia, ia hahedinaraia idia abia dibana dainai idia tanikiu bada. Momokani, unai klas 102 ena kosi haorea program ese idia lao taudia ibounai ia hagoadaia edia lalona do idia hadaia goada Dirava ena Hereva idia harorolaia totona.
[Picture on page 31]
Watchtower Bible School of Gilead Ena Klas Namba 102
Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be lauri kahana amo ela bona idiba kahana.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.