Kwalimu Stiuden Taudia be Kwalimu Misinari Taudia ai Idia Lao

WILL bona ena adavana, Patsy, be Watchtower Bible School of Gilead ena klas namba 103 ena kosi idia haorea murinai, ia gwau: “Lau do abia dae lasi ai ese inai hahenamo badana ai abia!” Zahid bona Jeni ese unai hereva idia abia dae. Idia gwau: “Ai mamia iniseniai ai mai be hahenamo ta.” Stiuden taudia iboudiai be sikuli dekenai idia gaukara namonamo. Hari mai edia lalona ibounai ida idia ura edia misinari gaukara idia hamatamaia. To idia do lao lasi neganai, September 6, 1997 ai, sikuli idia haorea ena program dekenai, edia misinari gaukara lalonai do idia kwalimu totona sisiba namodia idia abia.

Program ena seamani be Theodore Jaracz, Hakaua Oreana tauna ta. Ia hahedinaraia​—⁠idia helai Betele famili bona Watch Tower Society ena brens 48 edia gwaukau taudia ida​—⁠Canada, Europe, Puerto Rico, bona United States amo turadia bona varavara taudia idia mai danu, stiuden taudia idia hagoadaia bona edia lalokau idia hahedinaraia totona. Tadikaka Jaracz ia gwau Kerisendom ena dubu ese idia siaia misinari taudia be nega momo edia misinari gaukara idia rakatania bona aonega bada idia tahua eiava politik lalonai idia vareai. To Gilead Sikuli idia haorea taudia be idau, idia dibaia gaukarana idia karaia. Idia ese Baibel idia hadibaia taunimanima dekenai.

Bena Robert Butler, Society ena Brooklyn opesi amo be hereva ladana “Kwalimu Dalana Oi Abia Hidi” ia henia. Ia gwau taunimanima ese edia kwalimu ena bada be moni eiava tauanina gaudia amo idia hahetohoa, to Dirava ese kwalimu ena bada ia hahetohoa dalana be mai anina bada. Iesu be ena haroro gaukara dekenai ia kwalimu, taunimanima momo ia veridia dainai lasi, to badina mai ena kamonai ida ena gaukara ia karaia. Iesu ese Iehova ia hahairaia, bona tanobada ena kara dika amo ia gini siri. (Ioane 16:33; 17:⁠4) Keristani taudia ibounai ese unai gaudia idia karaia diba.

Robert Pevy, guna Philippines dekenai misinari gaukara ia karaia tauna, ena sisiba be “Taunimanima Ibounai Edia Hesiai Taudia Ai Umui Lao.” Aposetolo Paulo be ena misinari gaukara dekenai ia kwalimu. Ia kwalimu ena ki be dahaka? Ia be taunimanima ibounai edia hesiai tauna ai sibona ia halaoa. (1 Korinto 9:​19-23) Tadikaka Pevy ia gwau: “Unai bamona Gilead Sikuli ia haorea tauna be do ia laloa lasi misinari gaukara be dagi badana, unai amo orea lalonai mai anina bada dagi badadia do ia abia. Lasi. Misinari tauna be ena gaukara tanona dekenai ia lao ena badina be tamona​—⁠haida durudia totona, badina unai be hesiai tauna ena gaukara.”

Gerrit Lösch, Hakaua Oreana tauna ta, ena sisiba be 2 Korinto karoa 3 bona 4 amo ia abia, bona ia ese unai stiuden taudia ia hagoadaia, “Hevarivari Bamona Iehova ena Hairai Umui Hahedinaraia.” Ia hadibadia Dirava ena diba be diari bamona, Keristani tauna ese ena kudouna dekenai unai diba ia abia dae neganai, ia hadiaria. Sivarai namona ita harorolaia bona kara maoromaoro ita badinaia neganai unai diari ita hahedinaraia. Ia gwau: “Nega haida do oi mamia reana oi hegeregere lasi. Unai bamona hemami oi abia neganai, Iehova dekenai oi tabekau, ‘siahu bada be Dirava sibona dekena amo do ia mai.’ ” (2 Korinto 4:⁠7) Tadikaka Lösch ese Paulo ena hereva 2 Korinto 4:1 dekenai ia gaukaralaia, bona stiuden taudia ia noia: “Umui emui misinari gaukara umui rakatania lasi. Emui hevarivari umui hagoevaia hanaihanai!”

Gilead Sikuli ena tisa ta, Karl Adams, ese hereva idauna ta, ena ladana be “Iehova be Edeseniai?” ia henia. Unai henanadai ese Dirava ena noho gabuna ia herevalaia lasi, to Iehova ena lalohadai bona ena hakaua daladia idia laloa be namo ia herevalaia. Ia gwau: “Hekwakwanai idia vara neganai, Iehova ena hesiai gaukara lalonai lagani momo ia noho tauna danu ese unai ia laloaboio diba.” (Iobu 35:10) Hari inai nega be edena bamona? Lagani 1942 ai, Dirava ena taunimanima be iena hakaua idia abia be namo. Haroro gaukara be do ia doko, eiava gaukara badana ia do noho? Iehova ena ura be dahaka ena taunimanima totona? Dirava ena Hereva idia stadilaia neganai haere ia hedinarai goevagoeva. Tadikaka Adams ia gwau: “Lagani 1942 ia do ore lasi neganai, Watchtower Bible School of Gilead haginia totona palani idia karaia ore.” Iehova ese unai sikuli amo idia siaia misinari taudia edia gaukara ia hanamoa momokani.

Mark Noumair be ena hereva ia henia tisa iharuana. Iena hereva ladana “Oi Abia Gauna be Edena Bamona Do Oi Gaukaralaia?” lalonai, stiuden taudia ia hagoadaia edia gaukara tanona dekenai idia ginidae neganai maoromaoro Gilead dekenai idia diba gaudia do idia gaukaralaia. Ia gwau: “Umui hekwarahi ma haida edia namo umui laloa bada totona. Idia karaia karadia edia anina umui dibaia. Unai tano taudia edia kastom, histori, hevaseha daladia umui tahua goadagoada. Edia gado umui dibaia haraga neganai, umui do ia durua bada.”

Gaukara Goada Stiuden Taudia ese Moale Idia Davaria Haroro Lalonai

Stiuden taudia be Gilead dekenai idia sikuli lalonai, kahirakahira idia noho kongregesen 11 dekenai idia siaidia. Saturday bona Sunday ai, haroro gaukara lalonai idia gaukara goadagoada. Gilead Sikuli ena tisa ta, Wallace Liverance, ese idia haida ia boiria edia ekspiriens haida be helai taudia dekenai idia kikilaia totona. Sitoa badadia ai, motuka atoa gabudia ai, bisinesi teritori ai, dala ai, bona ruma ta ruma ta gaukara ai idia vara ekspiriens idia kikilaia neganai, edia moale toana ia hedinarai. Idia haida idia hekwarahi edia kongregesen ena teritori lalonai idia noho bona idia gaukara idau gado taudia idia tahua totona. Unai klas namba 103 ena stiuden taudia be edia sikuli ena hua ima lalonai Baibel stadi ibounai 10 idia hamatamaia bona idia karaia.

Misinari Taudia ese Kwalimu Daladia Idia Herevalaia

Unai program ena kahana namona murinai, Patrick Lafranca bona William Van de Wall ese Brens Komiti memba taudia 7 idia boiria edia misinari gaukara lalonai idia dibaia gaudia do idia kikilaia stiuden taudia durua totona. Sikuli idia haorea taudia idia hagoadaia namona be idia laloa edia misinari gaukara tanona be Iehova ese ia abia hidi bona edia lalona idia hadaia unai tano dekenai do idia noho. Idia ese tano ma haida dekenai Gilead Sikuli ese ia hadibaia misinari taudia ese idia havaraia namo idia kikilaia.

Dahaka gau ese unai Brens Komiti taudia ia durua lagani momo lalonai mai moale ida misinari gaukara namona idia karaia totona? Unai tano edia tadikaka ida idia gaukara hebou bona idia amo diba idia abia. Edia gaukara tanona dekenai idia ginidae murinai, karaharaga gado dibaia totona idia hekwarahi. Idia dibaia edia kara haida idia haidaua be namo bona unai tano ena kastom dainai mauri dalana idauna do idia noholaia. Charles Eisenhower, Gilead ena klas ginigunana ia haorea bona lagani 54 lalonai misinari gaukara ia karaia tauna ta, be idia kwalimu misinari taudia ese idia dibaia “ki” ima ia gwauraia: (1) Baibel stadilaia hanaihanai, (2) gado stadilaia, (3) haroro gaukara lalonai gaukara goadagoada, (4) misinari ruma lalonai maino tahua, bona (5) Iehova dekenai guriguri loulou. Stiuden taudia be idia henia sisiba namodia sibona lasi, to Iehova ena gaukara lalonai idia manada misinari taudia edia moale idia laloa bada danu. Armando bona Lupe idia hereva bamona, “edia mauri idia kikilaia neganai idia moale.”

Unai henanadai henia kahana murinai, hereva tamona sibona ia noho. Albert Schroeder, Hakaua Oreana tauna ta ese unai hereva ia henia, ena ladana be “Mai Abidadama Ida Dirava ena Hereva Gimaia Karana ese Hereva Momokani ena Dava Bada Herevadia Ia Hahedinaraia.” Baibel be Gilead Sikuli ena buka badana dainai, stiuden taudia ese dahaka do ia herevalaia idia ura kamonai. Tadikaka Schroeder ia gwau lagani 50 gunanai, New World Translation of the Holy Scriptures Baibel hahanaia gaukara idia hamatamaia neganai, New World Bible Translation Committee ena horoa taudia be taunimanima edia hanamoa idia tahua lasi, to lauma helaga ena hakaua dalana idia badinaia. (Ieremia 17:​5-8) Vanegai, diba bada taudia haida ese New World Translation ena namo idia abia dae. Baibel ia stadilaia tauna ta ese revareva ia torea Society, dekenai ia gwau: “Buka namona ta ena toana lau itaia neganai lau diba, bona emui ‘New World Bible Translation Committee’ ese ena gaukara ia karaia namonamo.”

Unai hereva murinai, stiuden taudia ese edia sikuli idia haorea kwalimu pepadia idia abia bona edia gaukara tanodia idia gwauraia hedinarai helai taudia dekenai. Klas taudia dekenai unai be moale bona hebogahisi negana. Klas tauna ta ese tanikiu revarevana ia duahia neganai, momo idia hebogahisi bada bona edia matana be ranu amo ia honu. Stiuden taudia haida be lagani momo lalonai misinari gaukara totona idia hegaegae. Idia diba Gilead kosi be English gado ai idia karaia dainai, haida be English gado kongregesen dekenai idia lao, English gado idia veria bona torea namonamo diba totona. Ma haida be painia taudia momo lasi gabudia eiava tanodia dekenai idia lao. Ma haida be misinari taudia edia sivarai idia duahia, tahua gaukara idia karaia, eiava Society ena vidio ladana To the Ends of the Earth idia itaia loulou.

Inai hereva ena matamana dekenai ai gwauraia taudia, Will bona Patsy, be ma haida edia laloa bada karana stiuden taudia dekenai idia hoalaia. “Ai diba lasi taudia ese ai idia rosia bona emai laulau idia abia. Hakaua Oreana tauna ta ese emai imana ia abia bona ia gwau, ‘Umui dainai ai heagi bada!’ ” Oibe, ita daradara lasi unai klas namba 103 ena stiuden taudia idia lalokau henidia bada. Idia hadibadia namonamo vadaeni. Gilead ai idia abia diba ese do ia durudia kwalimu stiuden taudia be kwalimu misinari taudia ai do idia lao.

[Box on page 22]

Klas Taudia

Edia tano idauidau: 9

Idia lao henia tanodia idauidau: 18

Klas taudia iboudiai: 48

Tatau mai edia adavadia: 24

Edia mauri lagani ena averes: 33

[Picture on page 23]

Watchtower Bible School of Gilead Ena Klas Namba 103

Henuna lista ai, laini edia namba be vairana kahana amo ia daekau murinai kahana, bona laini ta ta ai idia gini taudia edia ladana be laurina kahana amo ela bona idibana kahana.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Picture on page 24]

Edeseniai do ita lao?