Mai Edia Ura Bada Taudia Idia Lao Gilead Dekenai
WATCHTOWER BIBLE SCHOOL OF GILEAD ia noho ena badina be, gwauhamata tatau bona hahine ia hadibaia idau tano dekenai misinari gaukara idia karaia totona. Daika ia hegeregere Gilead dekenai ia lao totona? Mai edia ura bada taudia idia lao diba. (Salamo 110:3) September 8, 2001 ai, Gilead ena klas namba 111 be edia sikuli idia haorea neganai, unai idia hahedinaraia.
Unai klas ena stiuden haida be mai edia ura ida edia ruma bese, turadia, bona tano idia rakatania, haroro taudia be momo lasi gabuna dekenai idia lao totona. Unai bamona idia karaia neganai, sibodia idia tohoa bema gau haida idia haidaua bona gabu idauna dekenai idia noho diba. Hegeregere, Richer bona Nathalie be gau haida idia haidaua Bolivia dekenai idia lao totona, Todd bona Michelle be Dominican Republic dekenai idia lao, bona David bona Monique be Asia ena tano ta dekenai idia lao, Basileia ena sivarai namona idia harorolaia totona. Stiuden taudia ma haida be Nicaragua, Ecuador, bona Albania dekenai idia gaukara vadaeni.
Christy be haisikuli dekenai Spain gado ia stadilaia, unai ese ia durua ia do headava lasi neganai, lagani rua Ecuador dekenai ia noho totona. Ma haida be edia tano dekenai idia noho gado idaudia kongregesen idia lao henia. Saul bona Priscilla edia hekwarahi be idau, sikuli dekenai idia do lao lasi neganai, mai edia ura bada ida idia gaukara goada edia English gado idia hanamoa totona.
Wiki 20 lalonai misinari gaukara hadibaia negana be ia ore haraga. Sikuli haorea dinana ia ginidae, bona stiuden taudia be edia turadia bona ruma bese taudia ida idia helai, sisiba bona hagoadaia hereva namodia idia kamonaia.
Unai program ena seamani be Theodore Jaracz, ia be Gilead Sikuli ena klas namba 7 ia haorea tauna ta, hari ia be Iehova ena Witnes taudia edia Hakaua Oreana tauna ta. Iena hamatamaia herevadia lalonai ia hahedinaraia iseda orea be inai ia laloaboio lasi, Gilead dekenai stiuden taudia hadibaia ena badina be, tanobada ibounai dekenai Basileia ena sivarai namona idia harorolaia totona. (Mareko 13:10) Gilead ese idia hegeregere vadaeni stiuden taudia ia durua edia haroro gaukara idia habadaia totona, bona misinari taudia idia abia be namo tanodia dekenai idia siaidia lao. Tadikaka Jaracz ese stiuden taudia ia hagoadaia idia lao tanodia 19 dekenai idia noho vadaeni misinari taudia idia bamoa neganai, Gilead amo idia abia dibana idia gaukaralaia namonamo.
Sisiba Namona Sikuli Idia Haorea Taudia Totona
Unai murinai, hereva ma haida idia henia. United States ena Brens Komiti tauna ta, William Van De Wall ese hereva ladana “Misinari Gaukara Karaia Goadagoada—Keristani Taudia Momokanidia Edia Toana Ta” ia herevalaia. Ia ese Mataio 28:19, 20 ena ‘diba tahua taudia halaoa’ gaukarana ia herevalaia badabada, bona stiuden taudia ia hagoadaia: “Iesu umui tohotohoa, badina ia ese ena misinari gaukara ia karaia mai ena lalo-goada bona mai ura goadana ida.” Unai misinari gaukara do idia karaia taudia edia lalo-goada do idia dogoatao totona, idia ia hagoadaia: “Sediual namona badinaia; sibona emui stadi umui karaia namonamo noho, tiokratik gaudia matamatadia dibaia noho; bona hanaihanai inai gaukara umui karaia ena badina umui laloaboio lasi.”
Bena program dekenai hereva ia henia tauna be Guy Pierce, Hakaua Oreana tauna ta. Iena hereva ena sinado be “Emu ‘Darana’ Gaukaralaia Namonamo Karana Oi Habadaia.” (Roma 12:1, NW ) Sikuli idia haorea taudia dekenai sisiba namona ia henia, idia ia hagoadaia Dirava ese idia dekenai ia henia diba bona laloa namonamo karana idia gaukaralaia be namo. Ia gwau, “Iehova ese ena Hereva amo oi dekenai ia gwauraia gaudia oi laloa dobu noho. Unai ese oi do ia gimaia.” (Aonega Herevadia 2:11) Danu, Tadikaka Pierce ese idia ia sisiba henia edia lalohadai idia dogoatao auka lasi, unai amo edia “darana,” gaukaralaia namonamo karana do idia koua lasi. Momokani, sikuli idia haorea taudia be misinari gaukara idia karaia neganai, unai nega korikori ai idia abia hadibaia herevadia ese idia do ia durua.
Seamani ese Gilead hadibaia tauna ta, Lawrence Bowen, ia boiria, iena hereva ena sinado be “Idau Gauna ta Oi Laloa Lasi.” Ia hahedinaraia, aposetolo Paulo be Korinto dekenai misinari gaukara ia karaia neganai, ena lalona ia hadaia ‘idau gauna ta ia laloa lasi, to Iesu Keriso satauro dekenai ia mase sibona ia laloa.’ (1 Korinto 2:2) Paulo ia diba guba bona tanobada ai ia noho siahu badana, lauma helaga, ese Baibel ibounai lalonai ia noho sivaraina ia durua: Gwauhamata Garana amo Iehova ena lohia siahuna ena maoro do ia hamomokania. (Genese 3:15, NW ) Sikuli idia haorea stiuden taudia 48 idia hagoadaia Paulo bona Timoteo bamona idia kara bona misinari taudia namodia ai idia lao totona, ‘hereva momokani idia badinaia noho.’—2 Timoteo 1:13.
Hamatamaia herevadia dekenai idia henia hereva dokona ena sinado be, “Inai Hahenamo Oi Laloa Bada, Ia be Harihari Gauna ta Dirava Amo.” Gilead Sikuli ena rejistra tauna, Wallace Liverance, ese idia ia durua idia lalo-parara totona, hesiai gaukara be Dirava ena hariharibada dainai idia abia. To, idia be mai edia maoro lasi unai gauna idia abia eiava ia be edia hekwarahi dainai lasi idia abia. Tadikaka Liverance ese Paulo ena haheitalai ia hahedinaraia, ia gwau: “Iehova ese Paulo ia abia hidi Iuda Lasi taudia dekenai aposetolo tauna ai do ia lao be iena gaukara dainai lasi, ia ura lasi toana be Paulo ena hekwarahi dainai ia be mai ena maoro ida unai gaukara ia abia, eiava unai be ena gaukara ena davana. Lagani momo lalonai ia be Keristani tauna eiava ia manada dainai ia abia lasi. Reana taunimanima idia laloa Banaba ia abia hidi be maoro. To ta ena diba dainai ia abia hidi lasi; toana be Apolo be hereva goevagoeva tauna, Paulo bamona lasi. Ia abia Dirava ena hariharibada dainai.” (Efeso 3:7, 8) Tadikaka Liverance ese sikuli idia haorea taudia ia hagoadaia edia harihari gauna, eiava hesiai gaukara, do idia gaukaralaia ma haida idia durua Dirava ena turadia ai idia lao bona ‘Dirava ena harihari gauna mauri hanaihanai, Iesu Keriso iseda Lohiabada’ amo idia abia totona.—Roma 6:23.
Unai murinai, Gilead ena hadibaia tauna ma ta, Mark Noumair, ena hereva “Hegaegae Namonamo Karana ese Anina Namodia Ia Havaraia” amo stiuden taudia haida ida herevahereva namona idia karaia. (Aonega Herevadia 21:5) Idia gwauraia haheitalai ese idia hahedinaraia, hesiai tauna ta be haroro gaukara totona ia hegaegae namonamo, bona bema ena kudouna ia hegaegaelaia namonamo, taunimanima do ia laloa bada. Dahaka do ia herevalaia do ia daradaralaia lasi. To, ia gwauraia herevadia bona ia karaia gaudia ese lauma dalanai idia do ia durua. Tadikaka Noumair be guna Africa dekenai misinari gaukara ia karaia dainai, ia gwau diba, “unai be mai anina bada gauna misinari namona ai oi lao totona.”
Misinari Gaukara—Moale Gaukarana
Ralph Walls bona Charles Woody ese Patterson Educational Center dekenai kosi ma ta totona idia mai misinari taudia haida idia henanadai henidia. Idia hahedinaraia, taunimanima lalokau henia karana ese misinari gaukarana lalonai moale ia mailaia. Unai nega daudau lalonai misinari gaukara idia karaia taudia ese idia hahedinaraia dahaka dainai misinari gaukara be moale ia havaraia gaukarana, bona idia kamonai stiuden taudia, edia ruma bese, bona turadia dekenai unai be hagoadaia gauna.
Hakaua Oreana tauna ta, John E. Barr, ese unai dina ena hereva badana ia henia, ena sinado be “Ane Matamatana Do Umui Abia Iehova Dekenai.” (Isaia 42:10) Tadikaka Barr ese ia hahedinaraia unai hereva “ane matamatana” be nega 9 New World Translation Baibel lalonai ia noho. Ia henanadai, “Unai ane matamatana ena anina be dahaka?” Bena ia haere: “Badinai siri ma haida ese idia hahedinaraia ane matamatana idia abia badina Iehova ena lohia siahuna ia gaukaralaia karana dekenai gau matamata idia vara.” Stiuden taudia ia hagoadaia edia gadodia amo Dirava ena Basileia, ena Mesia Pavapavana, Keriso Iesu, ena imana dekenai ia noho gauna, be ane abia karana dekenai idia hanamoa noho. Tadikaka Barr ia gwau Gilead dekenai idia dibaia gaudia ese idia ia durua unai “ane matamatana” ena kahana idauidau idia lalo-pararalaia namonamo totona. Ia gwau: “Sikuli ese umui ia hagoadaia umui lao henia gabudia ibounai dekenai emui tadikaka bona taihu ida Iehova hanamoa anedia do umui ‘abia’ hebou; hanaihanai emui gaukara gabuna ai ma haida ida umui lalo-tamona be namo.”
Stiuden taudia ese edia sikuli haorea pepa idia abia murinai, unai klas totona hereva ia gwauraia stiuden ta ese Gilead ena hadibaia namona dainai, revareva ta amo edia tanikiu herevana ia duahia.
Emu hesiai gaukara Dirava dekenai oi habadaia bona hanamoa diba, a? Bema unai oi karaia diba, unai sikuli idia haorea taudia hegeregerena, oi gaukara goadagoada. Idia gaukara goadagoada dainai, idia hegeregere misinari gaukara idia karaia totona. Bema ta ese mai ena moale bona mai ena ura bada ida sibona ia henia Dirava hesiai gaukara karaia totona, moale bada do ia davaria.—Isaia 6:8.
[Box on page 25]
KLAS TAUDIA
Edia tano idauidau: 10
Idia lao henia tanodia idauidau: 19
Klas taudia iboudiai: 48
Edia mauri lagani ena averes: 33.2
Lagani hida hereva momokani lalonai, edia averes: 16.8
Lagani hida ful-taim hesiai gaukara idia karaia, edia averes: 12.6
[Picture on page 26]
Watchtower Bible School of Gilead Ena Klas Namba 111
Inai lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be laurina kahana amo ela bona idibana kahana.
(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.