Moale—Davaria be Auka

BADU, lalo-hekwarahi, bona lalo-metau be nega daudau lalonai, saiens taudia ese idia stadilaia. To, vanegai laganidia lalonai, saiens taudia mai edia diba bada be lalona hagoadaia hemamina bona taunimanima idia ura gauna​—⁠moale​—⁠idia stadilaia.

Dahaka ese taunimanima edia moale ia habadaia? Bema idia matamata, idia taga, idia gorere lasi, idia lata, o edia tauanina idia hamaragia edia moale do idia habadaia, a? Moale korikori davaria dalana be dahaka? Taunimanima momo ese unai henanadai ena haere idia henia be auka, eiava ena haere idia henia diba lasi. Ita itaia taunimanima momo herea be moale idia davaria lasi dainai, reana dahaka be moale davaria dalana lasi be haida ese do idia haerelaia haraga diba.

Nega daudau lalonai, doketa taudia mai edia diba bada ese sibona laloa karana idia gwauraia moale davaria dalana. Moale lasi taudia idia hagoadaia, ta ta sibona ena ura hagugurua dalana sibona do ia laloa. Lalo-ani herevadia hegeregere “oi sibona oi laloa,” “oiemu lalona ena hemami korikori oi dibaia,” bona “emu kara korikori oi dibaia” be lalona hanamoa toho gaukarana ai idia gwauraia. To, unai lalohadai idia habadaia doketa taudia haida be hari idia abia dae, unai bamona sibona laloa lalohadaina be noho daudau moalena ia mailaia lasi. Sibona laloa bada karana ese idia reaia diba lasi hisihisi bona lalohisihisi do ia havaraia. Ta sibona ena namo ia tahua karana be moale havaraia dalana lasi.

Lalohisihisi Havaraia Dalana

Moale karadia idia goadalaia taudia be dala kererena ai idia ura moale idia davaria. Idaunegai Israelana ena aonega tauna King Solomona ena haheitalai mani oi laloa. Baibel bukana Hadibaia Tauna lalonai, ia gwau: “Egu ura gaudia ibounai lau abia, bona egu kudouna dekena amo moale ta lau koua lasi. Badina be egu hekwarahi ibounai dainai, egu kudouna ia moale noho, bona inai lau abia gau namodia be egu ahuna korikori.” (Hadibaia Tauna 2:10) Solomona ese ena ruma haida ia haginia, vain umadia ia hadoa, uma ma haida bona loaloa uma gabudia ia karaia, bona ena ranu guridia ia geia. (Hadibaia Tauna 2:​4-6) Nega ta ia henanadai, ia gwau: “Badina be daika ena aniani bona daika ena inuinu gaudia ese lauegu idia hereaia?” (Hadibaia Tauna 2:​25, NW) Ane abia taudia namo hereadia ese ia totona ane idia abia, bona unai tano ena hairai momokani hahinedia edia hebamo ia moalelaia.​—⁠Hadibaia Tauna 2:⁠8.

Gau ta be inai, Solomona be moale karadia idauidau lalonai ia vareai. Iena mauri lalonai unai moale karadia momo herea ia abia murinai, ena hereva dokona be dahaka? Ia gwau: “To unai neganai, egu imana ena gaukara bada, bona egu hekwarahi ibounai lau laloa, vadaeni egu lalona ia kehoa, idia ibounai be anina lasi, lai bema lau lulua kava hegeregerena. Lau ia hanamoa gauna ta be lasi, lasi momokani.”​—⁠Hadibaia Tauna 2:⁠11.

Ema bona hari inai nega, unai aonega pavapavana ia gwauraia hereva dokona be maoro. Mani moni momo tanona United States ita laloa. Idia hanaia laganidia 30 lalonai, America taudia ese edia kohu, hegeregere motuka bona televisen, edia momo be nega rua amo idia habadaia. To, kwara goreredia hanamoa doketa idia gwau, unai ese America taudia edia moale ia habadaia lasi. Magasin ta ia gwau, “unai nega tamona lalonai, lalo-metau taudia edia namba ia bada momokani. Memero kekeni huanai, sibona hamasea karana ena namba be nega toi amo ia bada daekau. Headava hadokoa karana ena namba be nega rua amo ia bada daekau.” Tahua karana idia karaia taudia be vanegai unai bamona hereva idia gwauraia danu, tano idauidau 50 bamona taudia huanai moni bona moale hakapua toho karana idia stadilaia murinai. Hereva kwadogina be, moale oi hoia diba lasi.

Taga tahua karana ese moale ia havaraia lasi, to ita gwau diba ia be lalohisihisi havaraia dalana. Aposetolo Paulo be sisiba ia henia, ia gwau: “Kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.”​—⁠1 Timoteo 6:​9, 10.

Taga, gorere lasi tauanina, eregabe maurina, hairai, siahu, eiava idia haida oi abia hebou ese noho daudau moalena do ia havaraia lasi. Dahaka dainai? Badina be ita be mai eda siahu lasi, dika gaudia ita koua bena do idia vara lasi. King Solomona ia hereva maoro, ia gwau: “Ma danu, taunimanima be edia nega idia diba lasi. Gwarume be reke ese ia abidia haraga, bona manu be tarapu ese ia koudia haraga. Unai bamona danu, nega dika ese taunimanima ia abidia, idia diba lasi negana dekenai.”​—⁠Hadibaia Tauna 9:​12.

Tahua Gauna Aukana

Saiens taudia ese gau momo herea idia stadilaia diba, to moale abia totona, taunimanima idia havaraia dalana ta do idia davaria diba lasi. Solomona be ma ia gwau: “Ma gau ta lau diba inai: Inai tanobada lalonai, heau helulu dekenai, heau haraga taudia be guna lasi, bona tuari lalonai, goada taudia idia kwalimu lasi. Aonega taudia ese aniani idia abia lasi, diba momo taudia ese kohu momo idia davaria lasi, bona gaukara bada taudia be do idia hanamoa lasi. Badina ibounai ese nega dika idia davaria noho, bona inai dika ia vara kava noho.”​—⁠Hadibaia Tauna 9:​11.

Unai hereva idia abia dae taudia momo idia gwau, moale momokani maurina idia tahua be anina lasi. Tisa tauna ta mai ladana bada ia gwau, “moale be iseda lalona dekenai ita laloa gauna ta sibona.” Ma haida idia laloa moale davaria dalana be ita lalo-pararalaia diba lasi hehuni gauna, bona unai hehuni gauna idia hahedinaraia diba taudia be momo lasi; idia be ita lalo-pararalaia diba lasi gaudia idia tahua taudia mai edia aonega bada.

To, taunimanima be moale davaria totona, mauri daladia idauidau idia tohoa. Ena be idia vairanai idia lao taudia be idia kwalimu lasi, to hari inai negai momo ese taga, siahu, gorere lasi tauanina, o moale karadia idia tahua noho, edia lalohisihisi haorea totona. Taunimanima idia hekwarahi noho, badina be idia momo edia lalona momokani ai idia abia dae, ia noho daudau moalena be idia lalohadailaia sibona maurina lasi. Idia laloa moale be idia davaria diba gauna, ia be nihi kava gauna lasi. Vadaeni, reana oi henanadai, ‘Edena bamona do lau davaria diba?’